തിരുവനന്തപുരം: യുഡിഎഫിലും കോണ്ഗ്രസ് പാർട്ടിക്കുള്ളിലും കഴിഞ്ഞ നാലു മാസമായി പുകയുന്ന അസ്വസ്ഥതയാണ് യുഡിഎഫ് കണ്‍വീനർ അടൂർ പ്രകാശിന്‍റെ തുറന്നു പറച്ചിലിലൂടെ ഇന്നലെ പൊട്ടിത്തെറിയിൽ കലാശിച്ചത്.
സർക്കാരിൽ പാർട്ടിക്കും മുന്നണിക്കും റോളില്ലെന്ന് ഏറെ നാളായി കോണ്ഗ്രസ് നേതാക്കൾ രഹസ്യമായി പറഞ്ഞു നടന്നതാണ് യുഡിഎഫ് കണ്‍വീനർ അടൂർ പ്രകാശ് തന്നെ പത്രസമ്മേളനം വിളിച്ചു വെടിപൊട്ടിച്ചതോടെ പരസ്യമായത്.
പാർട്ടിയിലും മുന്നണിയിലും ഒരു ചർച്ചയും നടക്കുന്നില്ലെന്നും മുഖ്യമന്ത്രി സ്വന്തം ഇഷ് ടപ്രകാരം എല്ലാം നടത്തുകയാണെന്നുമായിരുന്നു അടൂർ പ്രകാശിന്‍റെ തുറന്നു പറച്ചിൽ. അടൂർ പ്രകാശിന്‍റെ തുറന്നു പറച്ചിലിനു പിന്നാലെ നേതാക്കൾ പക്ഷം പിടിച്ചു രംഗത്ത് എത്തിയതോടെ കൂടുതൽ പൊട്ടിത്തെറിയിലേക്ക് നീങ്ങാനുള്ള സാധ്യതയും തള്ളിക്കളയാൻ കഴിയില്ല.
കഴിഞ്ഞ ദിവസം സാംസ്കാരിക സ്ഥാപന അധ്യക്ഷൻമാർ അടക്കമുള്ളവരെ പ്രഖ്യാപിച്ചപ്പോൾ തന്നെ കോണ്ഗ്രസ് ഉന്നത തലത്തിൽ ഏറെ അസ്വസ്ഥത രൂപപ്പെട്ടിരുന്നു. സംഘടനാ ചുമതലയുള്ള എഐസിസി ജനറൽ സെക്രട്ടറി കെ.സി. വേണുഗോപാലിനും ഇതിൽ ചില പേരുകളോടു വിയോജിപ്പുണ്ടായിരുന്നു. ഇതാണ് വിയോജിപ്പുകൾ പാർട്ടി യോഗത്തിൽ ചർച്ച ചെയ്യുമെന്നും പാർട്ടിയിൽ പറയേണ്ട കാര്യങ്ങൾ പുറത്തു പറയില്ലെന്നും കെ.സി. വേണുഗോപാൽ പറഞ്ഞത്.
ബുധനാഴ്ച ചേർന്ന മന്ത്രിസഭായോഗത്തിൽ മുസ്‌ലിം ലീഗിന്‍റെ ആറാം കാബിനറ്റ് പദവി കൂടി പുറത്തു വന്നതോടെയാണ് ഇതു പൊട്ടിത്തെറിയിലേക്ക് നീങ്ങിയത്. എല്ലാ വിഭാഗത്തേയും തൃപ്തിപ്പെടുത്തി അനുരജ്ഞനത്തിലൂടെ കാബിനറ്റ് പദവി പ്രഖ്യാപിച്ചിരുന്നെങ്കിൽ പ്രതിസന്ധിയിലേക്കു നീങ്ങില്ലായിരുന്നുവെന്നും ഒരു വിഭാഗം പറയുന്നു.
വി.ഡി. സതീശൻ സർക്കാരിലെ മന്ത്രിമാർക്കെതിരേ യുവമോർച്ചയും ഡിവൈഎഫ്ഐയും തടയലും ആക്രമണവും സംസ്ഥാന വ്യാപകമായി നടത്തുന്നതിനിടെയാണ് സർക്കാരിനെ കൂടുതൽ പ്രതിരോധത്തിലാക്കി യുഡിഎഫ് കണ്‍വീനർ തന്നെ രംഗത്ത് എത്തിയത്. മന്ത്രിമാർക്കെതിരേയുള്ള കരിങ്കൊടി സമരത്തിലേക്ക് പ്രതിപക്ഷ പാർട്ടികളെ പ്രകോപിപ്പിച്ചതിൽ പാർട്ടിയിൽ ഒരു വിഭാഗം നേതാക്കൾക്കു പങ്കുണ്ടോയെന്ന സംശയവും ഔദ്യോഗിക പക്ഷം ഉന്നയിക്കുന്നു.
Deepika
Corehub Solutions
E-paper LOGIN
LOGIN