കൊച്ചി: ബോഡി ബില്‍ഡിംഗ് ലോകചാമ്പ്യന്‍ ചിത്തരേഷ് നടേശന്‍, ലോക പുരുഷസൗന്ദര്യ മത്സരത്തിലെ വെള്ളിമെഡല്‍ ജേതാവ് ഷിനു ചൊവ്വ എന്നിവരെ ആംഡ് പൊലിസ് ഇന്‍സ്‌പെക്ടര്‍മാരായി നിയമിച്ചതില്‍ വിജിലന്‍സ് അന്വേഷണം ആവശ്യപ്പെട്ടു നല്‍കിയ ഹര്‍ജി ഹൈക്കോടതി തീര്‍പ്പാക്കി.
നിലവിലെ ഡിജിപി എസ്. ശ്രീജിത്ത് അടക്കമുള്ളവര്‍ക്കെതിരേ അന്വേഷണമാവശ്യപ്പെട്ട് അഡ്വ. കെ.എം. ഷാജഹാന്‍ നല്‍കിയ ഹര്‍ജിയാണ് ജസ്റ്റീസ് എ. ബദറുദ്ദീന്‍ തീര്‍പ്പാക്കിയത്.
നിയമനവുമായി ബന്ധപ്പെട്ടു വിജിലന്‍സ് അന്വേഷണം ആവശ്യമില്ലെന്ന സര്‍ക്കാര്‍ വാദം അംഗീകരിച്ചും ഇരുവരെയും നിയമിച്ചതും പ്രോസിക്യൂഷന് അനുമതി നിഷേധിച്ചതുമടക്കം ഉത്തരവുകള്‍ ഹർജിക്കാരനും മറ്റുള്ളവരും ചോദ്യം ചെയ്തിട്ടില്ലെന്നും വിലയിരുത്തിയാണ് ഉത്തരവ്.
ബോഡി ബില്‍ഡര്‍മാരെ ഇന്‍സ്‌പെക്ടര്‍മാരായി നിയമിച്ചത് രാഷ്‌‌ട്രീയലക്ഷ്യത്തോടെയായിരുന്നുവെന്നും അഴിമതി നടന്നിട്ടുണ്ടെന്നുമായിരുന്ന ആരോപണം. ശാരീരികക്ഷമതാ പരീക്ഷകളില്‍ പരാജയപ്പെട്ടിട്ടും നിയമനം നടത്താന്‍ തീരുമാനിച്ചതും ചൂണ്ടിക്കാട്ടിയിരുന്നു.
എന്നാല്‍, നിയമന ഉത്തരവ് നല്‍കിയെങ്കിലും പരിശീലനത്തിനടക്കം അനുമതി നല്‍കിയിട്ടില്ലെന്നാണ് സര്‍ക്കാര്‍ അറിയിച്ചത്. ചട്ടങ്ങളോ വകുപ്പുതല മാനദണ്ഡങ്ങളോ ലംഘിച്ചുവെന്നതുകൊണ്ടു മാത്രം കുറ്റകരമായ പ്രവൃത്തിയായി കാണാനാകില്ലെന്ന് സര്‍ക്കാര്‍ ചൂണ്ടിക്കാട്ടിയതും കോടതി കണക്കിലെടുത്തു.
അന്വേഷണത്തിന് അനുമതി നിഷേധിച്ച സാഹചര്യത്തില്‍ ഹര്‍ജി ഭേദഗതി ചെയ്ത് ആ ഉത്തരവിനെ ഹര്‍ജിക്കാരന്‍ ചോദ്യംചെയ്തിട്ടില്ലെന്ന് കോടതി ചൂണ്ടിക്കാട്ടി. അതിനാല്‍, ഈ ഉത്തരവ് റദ്ദാക്കണമെന്നാവശ്യപ്പെട്ട് ഹര്‍ജിക്കാരനടക്കമുള്ളവര്‍ക്ക് നിയമപരമായി കോടതിയെ സമീപിക്കാമെന്നു വ്യക്തമാക്കിയാണ് കോടതി ഹര്‍ജി തീര്‍പ്പാക്കിയത്.
Deepika
Corehub Solutions
E-paper LOGIN
LOGIN