നേമം: വർക്ക്ഷോപ്പിൽനിന്നും ഇരുചക്ര വാഹനവുമായി കടന്നു കളയാൻ ശ്രമിച്ച യുവാവിനെ ജീവനക്കാർ പിടികൂടി പൊലി സിനു കൈമാറി. ചെന്നൈ സ്വദേശി വിജയ രാഘവൻ (24) ആണ് പിടിയിലായത്. നേമം ഗണപതി ക്ഷേത്രത്തിനു സമീപം പ്രവർത്തിക്കുന്ന ആർ.ജി. മോട്ടേഴ്സിൽ നിന്നാണ് ഇന്നലെ പുലർച്ചെ നാലോടെ വാഹനം മോഷ്ടിച്ച് രക്ഷപ്പെടാൻ ശ്രമിച്ചത്. ഇതു ശ്രദ്ധയിൽപ്പെട്ട ജീവനക്കാർ നരുവാമൂട് മൊട്ടമൂട് ഭാഗത്തു വച്ചു പ്രതിയെ തടഞ്ഞുനിർത്തി പൊലിസിൽ വിവരം അറിയിക്കുകയായിരുന്നു. പ്രതി മദ്യലഹരിയിലായിരുന്നുവെന്ന് കേസെടുത്ത നേമം പൊലിസ് വ്യക്തമാക്കി.