തിരുവനന്തപുരം: സർക്കാർ അനുമതിയോ മറ്റു രേഖകളോ ഇല്ലാതെ കണ്ണൂരിൽ കിഫ്ബി ഏറ്റെടുത്തത് 2074 ഏക്കർ ഭൂമി. വ്യവസായ പാർക്കിന് എന്ന പേരിൽ സിഇഒയായിരുന്ന ഡോ.കെ.എം. ഏബ്രഹാമിന്‍റെ കത്തിന്‍റെ മാത്രം അടിസ്ഥാനത്തിലാണ് 1000 ഏക്കറിന് 2489 കോടി രൂപ നിരക്കിൽ 2074 ഏക്കർ ഭൂമി ഏറ്റെടുത്തത്. ഭൂമി ഏറ്റെടുപ്പിന് മന്ത്രിസഭയുടെ അംഗീകാരമോ ബജറ്റ് നിർദേശമോ വേണമെന്നിരിക്കേയാണ് ധനവകുപ്പിന്റെപോലും അനുമതിയില്ലാതെ ഇത്രയും ഭൂമി ഏറ്റെടുത്തത്.
കിഫ്ബിയുടെ പേരിൽ നടന്ന ഭൂമി കുംഭകോണത്തിലൂടെ സംസ്ഥാന സർക്കാരിനുണ്ടായ കോടികളുടെ നഷ്ടം വിജിലൻസിനെക്കൊണ്ട് അന്വേഷിപ്പിക്കാനാണ് സർക്കാർ ആലോചന. എന്നാൽ, അടുത്ത മന്ത്രിസഭയിൽ ചർച്ച ചെയ്ത ശേഷം മാത്രമാകും അന്തിമ തീരുമാനം. ഇക്കാര്യത്തിൽ സിആൻഡ് എജിയുടെ ഓഡിറ്റിംഗും സർക്കാർ പരിഗണിക്കുന്നുണ്ട്. കഴിഞ്ഞ പിണറായി സർക്കാർ കിഫ്ബിയിൽ സിഎജി ഓഡിറ്റിംഗ് അനുവദിച്ചിരുന്നില്ല.
കണ്ണൂരിലെ ഇരിട്ടി, കോളാരി എന്നിവിടങ്ങളിലായി 1044 ഏക്കറും കൂടാളി, പട്ടാന്നൂർ, തലശേരി എന്നിവിടങ്ങളിലായി 1030 ഏക്കർ ഭൂമിയുമാണ് അനധികൃതമായി ഏറ്റെടുത്തത്. പാലക്കാട്ട് 470 ഏക്കർ ഭൂമി ഏറ്റെടുക്കാനുള്ള അനുമതിയുടെ മറവിലായിരുന്നു വ്യവസായ എസ്റ്റേറ്റിന്‍റെ പേരിൽ ചില വൻകിടക്കാരെ സഹായിക്കാനുള്ള ഭൂമി ഏറ്റെടുക്കലുകൾ കിഫ്ബിയുടെ പേരിൽ നടത്തിയത്. മലയോര മേഖലയിലെ ചെങ്കുത്തായ ഈ ഭൂമി വ്യവസായ ആവശ്യങ്ങൾക്ക് ഉതകില്ലെന്നാണ് വിദഗ്ധ സമിതി റിപ്പോർട്ട്.
കേന്ദ്രസർക്കാരിന്‍റെ ഭവ്യ പദ്ധതിയിലും അപേക്ഷിച്ചു
ക്രമവിരുദ്ധ ഭൂമി ഏറ്റെടുക്കലുകൾ ക്രമപ്പെടുത്താനായി കേന്ദ്ര സർക്കാരിന്‍റെ ഭവ്യ പദ്ധതിയിൽ വ്യവസായ എസ്റ്റേറ്റ് സ്ഥാപിക്കാനുള്ള അപേക്ഷ പോർട്ടൽ വഴി കിഫ്ബി സമർപ്പിച്ചു.
രണ്ടാം പിണറായി സർക്കാരിന്‍റെ അവസാനകാലത്താണ് വ്യവസായ എസ്റ്റേറ്റുകൾ സ്ഥാപിക്കാനുള്ള കേന്ദ്ര പദ്ധതിയിലേക്ക് അപേക്ഷ നൽകിയത്. ആറു വർഷത്തെ ഭൂമി ഏറ്റെടുക്കലിന്‍റെ പലിശ അടക്കം നൽകിയ ശേഷമായിരുന്നു ക്രമപ്പെടുത്താനുള്ള ത്വരിത നീക്കം.
എന്നാൽ, ഇവിടെയും തിരിച്ചടി ലഭിച്ചു. 1000 ഏക്കർ ഭൂമി 1000 കോടി രൂപ നിരക്കിൽ ഏറ്റെടുക്കാൻ മാത്രമേ ഭവ്യ സ്കീം വഴി കഴിയുമായിരുന്നുള്ളൂ. ഈ തുക ചെലവഴിക്കേണ്ട സ്ഥലത്താണ് 2489 കോടി ചെലവഴിച്ചത്.
വ്യവസായവകുപ്പിനു കീഴിലുള്ള കെഎസ്ഐഡിസി, കിൻഫ്ര എന്നിവരെ നോഡൽ ഏജൻസിയാക്കിയാണ് കിഫ്ബി ത്രികകക്ഷി കരാറിൽ 2020 ഓഗസ്റ്റ് 13ന് ഒപ്പുവച്ചത്. ഹഡ്കോയിൽനിന്ന് ഒൻപതു ശതമാനം പലിശനിരക്കിൽ വായ്പയെടുത്താണ് സർക്കാർ ചട്ടങ്ങളും നിയമങ്ങളും മറികടന്ന് ഭൂമി വാങ്ങിക്കൂട്ടിയത്.
ഒരു പ്രയോജനവും പദ്ധതിയും ഇല്ലാത്ത ഭൂമി വാങ്ങിക്കൂട്ടിയതു വഴി കഴിഞ്ഞ ആറു വർഷത്തിനിടെ പലിശ ഇനത്തിൽ മാത്രം സർക്കാരിന് കോടികളുടെ നഷ്ടമുണ്ടായതായും വിദഗ്ധ സമിതിയുടെ റിപ്പോർട്ടിൽ ചൂണ്ടിക്കാട്ടുന്നുണ്ട്.
കണ്ണൂരിലും പാലക്കാട്ടുമായി 5,366 ഏക്കർ ഭൂമി ഏറ്റെടുക്കാൻ 12,727 കോടി രൂപയാണ് ചെലവഴിച്ചത്. ഇതിൽ 40 ഏക്കർ ഒഴികെയുള്ളത് കിഫ്ബി ഡയറക്ടർ ബോർഡിന്റെ ശിപാർശ പ്രകാരമാണെന്നാണു കണ്ടെത്തൽ.
ഈ ഭൂമി വിൽപന നടത്തിയാൽ അഞ്ചിലൊന്നു തുക ലഭിക്കില്ലെന്നാണ് കിൻഫ്ര മൊഴി നൽകിയത്. അതായത്, വിപണിവിലയുടെ അഞ്ചിരട്ടി തുക പോലും അധികം നൽകി ഒരു പദ്ധതിയുടെയും പേരിൽ അല്ലാതെ കിഫ്ബി ഭൂമി വാങ്ങിക്കൂട്ടി. ഇക്കാര്യത്തിൽ വിജിലൻസ് കേസെടുത്ത് അന്വേഷണം നടത്തുന്നതിനിടെ വിദേശ ഇടപാടുകളോ മറ്റോ കണ്ടെത്തിയാൽ ഇഡിയും അന്വേഷണത്തിന് എത്താനുള്ള സാധ്യതയുണ്ട്.
Deepika
Corehub Solutions
E-paper LOGIN
LOGIN