കോൽക്കത്ത: പശ്ചിമബംഗാളിൽ ക്രൈസ്തവർക്കും പള്ളികൾക്കും നേരേയുള്ള ആക്രമണം തുടർക്കഥയാകുന്നു. ഏറ്റവുമൊടുവിൽ കഴിഞ്ഞ ഞായറാഴ്ച രാത്രി സൗത്ത് 24 പർഗാനാസ് ജില്ലയിലെ റായ്ദിഘിക്കു സമീപമുള്ള ഖാരി ബമുനേർ ചക് ഗ്രാമത്തിൽ പള്ളിക്കു സമീപമുണ്ടായിരുന്ന പരിശുദ്ധ കന്യാമാതാവിന്‍റെ തിരുസ്വരൂപം അടിച്ചുതകർത്തു. ഇരുട്ടിന്‍റെ മറവിൽ അജ്ഞാതരാണ് ആക്രമണം നടത്തിയത്.
സംഭവത്തിൽ പള്ളി അധികൃതർ പൊലിസിനു പരാതി നൽകുകയും പൊലിസ് സ്ഥലത്തെത്തി അന്വേഷണം ആരംഭിക്കുകയും ചെയ്തെങ്കിലും പ്രതികളെ ഇനിയും പിടികൂടിയിട്ടില്ല. കഴിഞ്ഞ മേയ് മാസത്തിൽ ബിജെപി സർക്കാർ അധികാരത്തിൽ വന്നതുമുതൽ പശ്ചിമബംഗാളിൽ പള്ളികൾക്കും ക്രൈസ്തവസ്ഥാപനങ്ങൾക്കും നേരേ തുടർച്ചയായ ആക്രമണങ്ങളാണ് റിപ്പോർട്ട് ചെയ്യപ്പെടുന്നത്.
ആക്രമണങ്ങൾക്കെതിരേയും സമാധാനപരമായ പ്രാർഥനായോഗങ്ങൾ മതപരിവർത്തനത്തിന് ഉപയോഗിക്കുന്നുവെന്ന തെറ്റായ പ്രചാരണങ്ങൾക്കെതിരേയും കഴിഞ്ഞ ദിവസം കോൽക്കത്തയിലെ റാണി റാഷ്മോണി അവന്യൂവിൽ വൻ പ്രതിഷേധ പ്രാർഥനാറാലി നടന്നിരുന്നു. വിവിധ ക്രൈസ്തവസഭകളുടെ നേതൃത്വത്തിൽ നടന്ന റാലിയിൽ 12,000 പേർ പങ്കെടുത്തു.
റാലിയിൽ പ്രസംഗിച്ച കോൽക്കത്ത ആർച്ച്ബിഷപ് ഡോ. ഏലിയസ് ഫ്രാങ്ക്, സഭകൾ തമ്മിലുള്ള ഐക്യത്തിന്‍റെയും പീഡനങ്ങളെ പ്രാർഥനയോടെയും ക്ഷമയോടെയും നേരിടേണ്ടതിന്‍റെയും ആവശ്യകത ഊന്നിപ്പറഞ്ഞു.
കഴിഞ്ഞുപോയ മാസങ്ങളിൽ നമ്മുടെ വിശ്വാസം പലവിധത്തിലുള്ള പരീക്ഷണങ്ങൾക്കു വിധേയമായിട്ടുണ്ടെന്നും ഈ ദുഷ്‌കരമായ സമയങ്ങളിൽ നാം പരസ്പര ഐക്യദാർഢ്യം പ്രകടിപ്പിക്കുക മാത്രമല്ല, പീഡനങ്ങൾ നടത്തുന്നവർക്കുവേണ്ടിയും പ്രാർഥിക്കേണ്ടതുണ്ടെന്നും അദ്ദേഹം പറഞ്ഞു.
ബംഗിയ ക്രൈസ്തവ പരിഷത്തിന്‍റെ (ബിസിപി) നേതൃത്വത്തിലാണു പ്രതിഷേധപരിപാടി സംഘടിപ്പിച്ചത്. കഴിഞ്ഞ അഞ്ചു മാസത്തിനിടയിൽ ക്രൈസ്തവർക്കെതിരേ 48 ഭീഷണിപ്പെടുത്തൽ സംഭവങ്ങൾ റിപ്പോർട്ട് ചെയ്തിട്ടുണ്ടെന്ന് ബിസിപി സെക്രട്ടറിയും സ്ഥാപകനുമായ ഹെറോദ് മുല്ലിക്ക് വ്യക്തമാക്കി. എന്നാൽ യഥാർഥ കണക്കുകൾ ഇതിലും കൂടുതലായിരിക്കാമെന്നും 16 കേസുകളിൽ പൊലിസ് പരാതി രജിസ്റ്റർ ചെയ്യാൻ പോലും തയാറായില്ലെന്നും അദ്ദേഹം ആരോപിച്ചു.
Deepika
Corehub Solutions
E-paper LOGIN
LOGIN