Deepika
ADVERTISEMENT
Kerala
കണ്ണൂർ: കേരളചരിത്രത്തിന്‍റെ ഭൂപ്രകൃതിയും അസന്തുലിതാവസ്ഥയും ചർച്ച ചെയ്ത് തലശേരിരിയിൽ നടക്കുന്ന ഇന്ത്യൻ ചരിത്രകോൺഗ്രസിന്‍റെ രണ്ടാം ദിനം.
‘കേരളചരിത്രത്തിന്‍റെ ഭൂപ്രകൃതികൾ: ചരിത്രപരമായ തുടർച്ചകളും വിച്ഛേദങ്ങളും’ എന്ന വിഷയത്തിൽ നടന്ന പാനൽ ചർച്ച ചരിത്ര പരിണാമത്തിൽ ലിംഗപരമായ അസന്തുലിതാവസ്ഥ വിശകലനം ചെയ്തു. തൊഴിൽ, സംസ്കാരം, കല തുടങ്ങി വിവിധ മേഖലകളിൽ സ്ത്രീയുടെ അടയാളപ്പെടുത്തലുകൾ എവിടെ നിലച്ചുവെന്ന ചർച്ച സജീവമായിരുന്നു.
‘തൊഴിൽ മേഖലയിലെ അതിരുകളിൽ നില്ക്കുന്ന സ്ത്രീകൾ: അനിശ്ചിതത്വം, പ്രതിരോധം, അവകാശരാഷ്‌‌ട്രീയം’ എന്ന വിഷയത്തിൽ ഐഐടി മദ്രാസ് ഹ്യൂമാനിറ്റീസ് ആൻഡ് സോഷ്യൽ സയൻസ് വിഭാഗത്തിലെ പ്രഫ. ബിനിത തമ്പി ചർച്ചയ്ക്കു തുടക്കമിട്ടു. 2011ലെ സ്വകാര്യ ആശുപത്രി നഴ്സുമാരുടെ സമരം 2015 ലെ പൊമ്പളൈ ഒരുമൈ എന്നിവയെ അടിസ്ഥാനമാക്കിയാണ് സ്ത്രീകൾ തൊഴിൽ മേഖലയിൽ നേരിടുന്ന ചൂഷണങ്ങൾ അവർ വിശകലനം ചെയ്തത്.
എസ്‌ആർഎം സർവകലാശാല, അമരാവതിയിലെ ഡോ. ലക്ഷ്മി ചന്ദ്രൻ പ്രകൃതി ലിംഗബോധം ഭൗമസങ്കല്പം: സാഹിത്യ സംസ്കാരത്തിലെ മധ്യകാല കേരളത്തിന്‍റെ പരിസ്ഥിതി ചരിത്രങ്ങൾ’ എന്ന വിഷയത്തിലാണ് പ്രബന്ധം അവതരിപ്പിച്ചത്. മധ്യകാല കേരളത്തിന്‍റെ സാഹിത്യ സംസ്കാരങ്ങളിൽ പ്രതിഫലിക്കുന്ന ലിംഗബോധം, പ്രകൃതി, മനുഷ്യ ഇടപെടൽ എന്നിവയുടെ സങ്കീർണതകളെ വിമർശനാത്മകമായി വിശകലനം ചെയ്യുന്നതാണ് പഠനം.
മണിപ്രവാള പാരമ്പര്യത്തിലെ വിവിധ സാഹിത്യശൈലികൾ പ്രകൃതിയെ എങ്ങനെ നിർമിക്കുന്നു, ചർച്ച ചെയ്യുന്നു, സങ്കൽപ്പിക്കുന്നു എന്നതും മനുഷ്യരും പരിസ്ഥിതിയും തമ്മിലുള്ള ബന്ധങ്ങളെ അവ എങ്ങനെ അവതരിപ്പിക്കുന്നു എന്നതുമാണ് ഈ പഠനം പരിശോധിക്കുന്നത്. സന്ദേശകാവ്യം, ചമ്പൂകാവ്യം എന്നിവ ഉൾപ്പെടെയുള്ള മണിപ്രവാളം സാഹിത്യസ്രോതസുകളിൽ പ്രദേശങ്ങളുടെയും ഉപപ്രദേശങ്ങളുടെയും ഭൂമിശാസ്ത്ര സവിശേഷതകൾ എങ്ങനെ പ്രതിനിധീകരിക്കപ്പെടുന്നു എന്നും പഠനം അന്വേഷിക്കുന്നു.
ബംഗളൂരുവിലെ ക്രൈസ്റ്റ് യൂണിവേഴ്സിറ്റി അസി. പ്രഫസർ ഡോ. അന്ന വർഗീസ് അവതരിപ്പിച്ച പ്രബന്ധം ‘കേരളത്തിന്‍റെ കരകൗശലവിദ്യയും ശില്പിസമൂഹങ്ങളും: ലിംഗപരമായ വിശകലനം’എന്ന വിഷയത്തിലായിരുന്നു. കേരളത്തിലെ കൈത്തൊഴിൽ മേഖലകളിലും കരകൗശല സമൂഹങ്ങളിലുമുള്ള സ്ത്രീകളുടെ ചരിത്രമാണ് ഡോ. അന്ന വർഗീസ് ഈ പ്രബന്ധത്തിലൂടെ അന്വേഷിക്കുന്നത്.
മധ്യകാല കേരളത്തിലെ ശിലാലേഖന സ്രോതസുകളിൽ കാണപ്പെടുന്ന ഐങ്കുടി കമ്മാളർ എന്ന സമൂഹത്തെ സംബന്ധിച്ച പരാമർശങ്ങളിൽ സ്ത്രീകളുടെ സാന്നിധ്യം മനഃപൂർവം ഒഴിവാക്കിയിട്ടുണ്ടോ എന്നതിനെക്കുറിച്ചുള്ള അന്വേഷണമാണ് ഈ പ്രബന്ധം ലക്ഷ്യമിടുന്നത്.
കേരളത്തിലെ ദൈനംദിന ജീവിതത്തെ രൂപപ്പെടുത്തുന്നതിൽ പിതൃസത്താധിഷ്ഠിതവും വർഗ പരവുമായും ജാതി അടയാളപ്പെടുത്തപ്പെട്ടതുമായ പുരുഷത്വ ആശയങ്ങൾ എങ്ങനെ പ്രവർത്തി ക്കുന്നു എന്നതിനെക്കുറിച്ച് കേരള സർവകലാശാലയിലെ പിഎച്ച്ഡി ഗവേഷകനായ എൻ.എസ്. അനാസ് തയാറാക്കിയ പഠനം വ്യക്തമാക്കുന്നു. എന്നാൽ കേരളത്തിന്‍റെ സമകാലിക ഡിജിറ്റൽ സാംസ്കാരിക ഭൂപ്രകൃതി ഇത്തരം ആധിപത്യ രൂപങ്ങളിൽ നിന്ന് വ്യക്തമായൊരു വഴിത്തിരിവ് സൂചിപ്പിക്കുന്നു. തിരുവനന്തപുരം ഓൾ സെയിന്‍റ്സ് കോളജിലെ അസോ. പ്രഫസർ ഡോ. പാർവതി മേനോനായിരുന്നു പാനലിന്‍റെ അധ്യക്ഷ.
National
മുംബൈ: ബിജെപിയുടെയും കേന്ദ്രസർക്കാരിന്‍റെയും സ്തുതിപാഠകനായി അറിയപ്പെടുന്ന റിപ്പബ്ലിക് ടിവി എഡിറ്റർ ഇൻ ചീഫ് അർണബ് ഗോസ്വാമിയുടെ നിലപാടുമാറ്റം ശ്രദ്ധേയമാകുന്നു.
ഏതാനും ദിവസങ്ങളായി വിവിധ വിഷയങ്ങൾ ചൂണ്ടിക്കാട്ടി സ്വന്തം ചാനലിലൂടെ പ്രൈംടൈം ചർച്ചയിൽ മോദിയെയും കേന്ദ്രസർക്കാരിനെയും വ്യവസായി ഗൗതം അദാനിയെയുമെല്ലാം വളരെ നിശിതമായാണു അർണബ് വിമർശിക്കുന്നത്. ഡൽഹിയിലെ അന്തരീക്ഷ മലിനീകരണം, മധ്യപ്രദേശിൽ ബിജെപി നേതാവിന്‍റെ മകന്‍റെ ആഡംബര വിവാഹം, ആരവല്ലി മലനിരകളിലെ ഖനനം തുടങ്ങിയ വിഷയങ്ങളിലാണ് സർക്കാരിനെ അർണോബ് പ്രതിക്കൂട്ടിലാക്കുന്നത്.
ആരവല്ലി മലനിരകള്‍ വന്‍കിട ബിസിനസുകാര്‍ ലാഭത്തിനുവേണ്ടി തകര്‍ക്കുകയാണെന്ന് അര്‍ണാബ് ആരോപിച്ചു. “വലിയ ശതകോടീശ്വരന്മാര്‍ക്കുവേണ്ടി നിയമങ്ങള്‍ തിരുത്തിക്കൊണ്ടിരിക്കുകയാണ്. അവര്‍ ബുള്‍ഡോസറുകള്‍ കൊണ്ടുവന്ന് ആരവല്ലി മലനിരകള്‍ ഇടിച്ചുനിരത്തുകയാണ്. കോടികള്‍ ഉണ്ടാക്കാന്‍വേണ്ടി പ്രകൃതിയെ തകര്‍ക്കാന്‍ ആരാണ് ഇവര്‍ക്ക് അനുവാദം നല്‍കിയത്?’’- അദാനി ഗ്രൂപ്പിനെ പരോക്ഷമായി സൂചിപ്പിച്ചുകൊണ്ട് അദ്ദേഹം കുറ്റപ്പെടുത്തി.
ഡൽഹിയിലെ അന്തരീക്ഷ മലിനീകരണം ഒരു ജനതയെ നിത്യരോഗികളാക്കുന്പോൾ കേന്ദ്രസർക്കാർ ഉറക്കം നടിക്കുകയാണെന്ന് അദ്ദേഹം ആരോപിച്ചു. “രാജ്യം ഒരു ആരോഗ്യ അടിയന്തരാവസ്ഥ നേരിടുമ്പോള്‍ പ്രധാനമന്ത്രി നരേന്ദ്ര മോദി എവിടെയാണ്? എന്തുകൊണ്ട് അദ്ദേഹം ഇതില്‍ ഇടപെടുന്നില്ല? 30 കോടി ജനങ്ങളുടെ ജീവന്‍ വച്ചാണ് കളിക്കുന്നത്. ഞങ്ങള്‍ക്കു വേണ്ടത് നേതൃത്വമാണ്, മൗനമല്ല”. ഡൽഹിയിലെ അന്തരീക്ഷ മലിനീകരണം കോവിഡിനെക്കാൾ വലിയ ആരോഗ്യഭീഷണിയാണു സൃഷ്‌ടിക്കുന്നതെന്നും അദ്ദേഹം തുറന്നടിച്ചു.
ആരവല്ലി മലനിരകളെ ഖനനത്തിനായി കോർപറേറ്റുകൾക്ക് വിട്ടുകൊടുക്കാനുള്ള നീക്കത്തിനെതിരേ, “നമ്മൾ വിക്സിത് ഭാരത് അല്ല, പാരിസ്ഥിതികമായി തകർന്ന ഭാരതമായി മാറും” എന്നാണ് അദ്ദേഹം റിപ്പബ്ലിക് ടിവിയിലൂടെ തുറന്നടിച്ചത്. സുപ്രീംകോടതിയുടെ പുതിയ ഉത്തരവിനെ മറയാക്കി സർക്കാർ കോർപറേറ്റുകളെ സഹായിക്കുകയാണെന്നും ശതകോടീശ്വരന്മാർക്ക് ലാഭമുണ്ടാക്കാൻ 200 കോടി വർഷം പഴക്കമുള്ള മലനിരകൾ തകർക്കുന്നത് ജനാധിപത്യമല്ലെന്നും അർണബ് ഓർമിപ്പിക്കുന്നു.
വിമർശനം പരിസ്ഥിതി വിഷയങ്ങളിൽ മാത്രമായി ഒതുങ്ങുന്നില്ല എന്നതു ശ്രദ്ധേയമാണ്. മധ്യപ്രദേശിലെ ബിജെപി എംഎൽഎ മകന്‍റെ വിവാഹത്തിന് കോടികളുടെ ധൂർത്ത് നടത്തിയപ്പോൾ അതേ സംസ്ഥാനത്തു ഗർഭിണികൾ ചികിത്സ കിട്ടാതെ മരിക്കുന്നതും കുട്ടികൾക്ക് ചികിത്സാപ്പിഴവിലൂടെ എച്ച്ഐവി ബാധിക്കുന്നതും ചൂണ്ടിക്കാട്ടി ബിജെപി നേതാക്കളുടെ ധാർഷ്‌ട്യത്തെയും അർണബ് രൂക്ഷമായി വിമർശിച്ചു.
80 കോടി രൂപയോളം പൊടിച്ച് ഇൻഡോറിൽനിന്നുള്ള ബിജെപി എംഎൽഎ ഗൊലു ശുക്ലയുടെ മകന്‍റെ വിവാഹം നടത്തിയതാണ് അർണബിനെ ചൊടിപ്പിച്ചത്. വിവാഹസത്കാരത്തിലെ വെടിക്കെട്ടിനു മാത്രം 70 ലക്ഷം ചെലവായെന്നാണു റിപ്പോർട്ട്. കഴിഞ്ഞ 11ന് നടന്ന വിവാഹമാമാങ്കത്തിൽ പ്രമുഖ ബിജെപി നേതാക്കളും വ്യവസായികളുമെല്ലാം പങ്കെടുത്തിരുന്നു.
ഇൻഡിഗോ വിമാന പ്രതിസന്ധിയിൽ മോദി സർക്കാർ എന്താണു ചെയ്തതെന്നു ചോദിച്ചതിനൊപ്പം സർക്കാർ ശമ്പളം പറ്റുന്ന മറ്റു മാധ്യമപ്രവർത്തകരെ നിശിതമായി പരിഹസിക്കാനും അർണബ് തുനിഞ്ഞു.
‘വിഷയാധിഷ്ഠിതമായി നോക്കുമ്പോൾ ജനങ്ങളാണു യഥാർഥ പ്രതിപക്ഷം’ എന്ന അർണബിന്‍റെ വാക്കുകൾ ഭരണകൂടത്തിനുള്ള വലിയൊരു മുന്നറിയിപ്പാണ്.
ഡല്‍ഹി, ഹരിയാന, രാജസ്ഥാന്‍, ഗുജറാത്ത് സംസ്ഥാനങ്ങളില്‍ വ്യാപിച്ചുകിടക്കുന്ന ആരവല്ലി മലനിരകളുമായി ബന്ധപ്പെട്ട പുതിയ നിര്‍വചനം വന്‍തോതിലുള്ള ഖനനത്തിനു വഴിതുറക്കുമെന്ന ആരോപണങ്ങളെത്തുടര്‍ന്നാണു വിഷയം ചർച്ചയായത്.
ആരവല്ലി മലനിരയിൽപ്പെട്ട ജില്ലകളിലെ സമീപപ്രദേശത്തെ താഴ്ന്ന നിരപ്പില്‍നിന്ന് 100 മീറ്ററോ അതിലേറെയോ ഉയര്‍ന്ന പ്രദേശങ്ങളെ ആരവല്ലി കുന്നുകളായും 500 മീറ്റര്‍ പരിധിയില്‍ വരുന്ന കുന്നുകള്‍ ആരവല്ലി പര്‍വതനിരകളായും കണക്കാക്കുമെന്നു വ്യക്തമാക്കി കേന്ദ്ര പരിസ്ഥിതി-വനം മന്ത്രാലയത്തിനു കീഴില്‍ രൂപീകരിച്ച കമ്മിറ്റി ശിപാര്‍ശ സമർപ്പിക്കുകയും ഈ ശിപാർശകള്‍ സുപ്രീംകോടതി കഴിഞ്ഞ നവംബര്‍ അവസാനം അംഗീകരിക്കുകയും ചെയ്തിരുന്നു. ഇതിനെതിരേ വലിയ പ്രതിഷേധം നടക്കുന്നതിനിടെയാണ് അർണോബ് നിശിതവിമർശനവുമായി രംഗത്തുവന്നത്.
Kerala
നടി ആക്രമണക്കേസിന്റെ നിർണായകമായ കോടതിവിധി പുറത്തുവന്നപ്പോൾ വർഷങ്ങൾക്കുമുമ്പ് നടന്ന രണ്ടു പ്രസംഗങ്ങൾ വീണ്ടും ചർച്ചയാകുന്നു.
ആക്രമിക്കപ്പെട്ട നടിക്ക് ഐക്യദാർഢ്യമറിയിക്കാൻ സംഭവം നടന്ന് രണ്ടു ദിവസത്തിനുശേഷം 2019 ഫെബ്രുവരി 19ന് എറണാകുളം ദർബാർ ഹാൾ ഗ്രൗണ്ടിൽ സിനിമാപ്രവർത്തകർ നടത്തിയ സംഗമത്തിൽ മഞ്ജു വാര്യരും ദിലീപും നടത്തിയ പ്രസംഗങ്ങളാണു കോടതിവിധിയുടെ പശ്ചാത്തലത്തിൽ വീണ്ടും ചർച്ചയാകുന്നത്.
നടി ആക്രമിക്കപ്പെട്ടതിനുപിന്നിൽ ക്രിമിനൽ ഗൂഢാലോചനയെന്ന ആരോപണം ആദ്യമായി ഉന്നയിക്കുന്നത് അന്നത്തെ പ്രസംഗത്തിൽ മഞ്ജു വാര്യരാണ്. അന്ന് അതിനെ അനുകൂലിച്ച പലരും പിന്നീട് നിലപാട് മാറ്റിയപ്പോഴും മഞ്ജു അതിജീവിതയ്ക്കൊപ്പം ശക്തമായി നിന്നു. അതേസമയം നടിക്കു പിന്തുണയറിയിക്കുന്നതായിരുന്നു ദിലീപിന്റെയും പ്രസംഗം. ഇരുവരുടെയും പ്രസംഗങ്ങളിലെ പ്രധാന ഭാഗങ്ങൾ ഇങ്ങനെ:
ഇവിടെ ഇരിക്കുന്ന പലരെയും, ഞാനടക്കമുള്ള പലരെയും പല അര്ധരാത്രികളിലും അസമയങ്ങളിലും ഞങ്ങളുടെ വീടുകളില് സുരക്ഷിതരായി കൊണ്ടാക്കിയ ഡ്രൈവര്മാരുണ്ട്. അതുകൊണ്ട് എല്ലാ സഹപ്രവര്ത്തകരെയും അങ്ങനെ കുറ്റം പറഞ്ഞിട്ടു കാര്യമില്ല. പക്ഷേ, ഇതിനുപിന്നില് നടന്നിരിക്കുന്നത് ക്രിമിനല് ഗൂഢാലോചനയാണ്.
ഈ ഗൂഢാലോചനയ്ക്കു പിന്നില് പ്രവര്ത്തിച്ചവരെ നിയമത്തിനു മുന്നില് കൊണ്ടുവരാനുള്ള പ്രവര്ത്തനങ്ങള്ക്ക് അങ്ങേയറ്റം പൂര്ണമായ പിന്തുണ നല്കുക എന്നതാണ് നമുക്കിവിടെ ചെയ്യാന് സാധിക്കുക. അതു മാത്രമല്ല, ഒരു സ്ത്രീക്ക് വീടിനകത്തും പുറത്തും അവള് പുരുഷന് നല്കുന്ന ബഹുമാനം അതേ അളവില് തിരിച്ചുകിട്ടാനുള്ള അര്ഹതയുണ്ട്.
ആ ഒരു സന്ദേശമാണ് ഞാനിവിടെ എല്ലാവരെയും അറിയിക്കാന് ആഗ്രഹിക്കുന്നത്. നമ്മുടെ സമൂഹത്തിന് എല്ലാ നന്മകളും ഉണ്ടാകട്ടേയെന്ന് എല്ലാവരോടും അഭ്യര്ഥിക്കുന്നു.
എന്റെ കൂടെ ഏറ്റവും കൂടുതൽ സിനിമ ചെയ്തിട്ടുള്ള കുട്ടികൂടിയാണ് ആക്രമിക്കപ്പെട്ടത്. ശരിക്കു പറഞ്ഞാല് നമ്മള് ഉടനെ നമ്മുടെ വീടിന്റെ അകത്തേക്കുതന്നെയാണ് നോക്കിപ്പോകുന്നത്. വളരെ ഭയക്കുന്നത്, ഇതു സിനിമയില് സംഭവിച്ചു എന്നതിനെക്കാളേറെ നമ്മുടെ നാട്ടില് സംഭവിച്ചു എന്നതാണ്.
സത്യസന്ധമായ രീതിയിലാണ് പോലീസ് അതിന്റെ അന്വേഷണമെല്ലാം മുന്നോട്ടു കൊണ്ടുപോകുന്നത്. എല്ലാവരും വളരെ സജീവമായി ഇതിന്റെ പിന്നിലുള്ള ആളുകളുടെ പിന്നാലെതന്നെയുണ്ട്. മീഡിയക്കാരോട് പ്രത്യേകിച്ചു പറയാനുള്ളത്, വാര്ത്തകള് വളച്ചൊടിക്കാനല്ല ശ്രമിക്കേണ്ടത്. ഇത് സിനിമയില് സംഭവിച്ചുവെന്ന് പറയുമ്പോള് അതില് ഇത്രയും കൂട്ടായ്മയുണ്ടായി.
പക്ഷേ, നമ്മുടെ ഒരു സാധാരണക്കാരന്റെ വീട്ടില് നടക്കുന്ന സംഭവമായി എടുത്ത് ഇനി ഈ നാട്ടില് ഇതു സംഭവിക്കാതിരിക്കാന് നമുക്ക് ഒരുമിച്ചു നില്ക്കാം. അതിന്റെ ഭാഗത്ത് ഞാനുമുണ്ടാകും.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN