കണ്ണൂർ: കേരളത്തിലെ പ്രമുഖ സ്വകാര്യ ബാങ്കുകളിലൊന്നായ സൗത്ത് ഇന്ത്യൻ ബാങ്ക് വടക്കൻ കേരളത്തിലെ പ്രവർത്തനം കൂടുതൽ വിപുലീകരിക്കുന്നതിന്റെ ഭാഗമായി കണ്ണൂർ മേഖലയിൽ അഞ്ചു പുതിയ ബ്രാഞ്ചുകൾ കൂടി ആരംഭിക്കുമെന്ന് ബാങ്കിന്റെ എക്സ്ക്യൂട്ടീവ് വൈസ് പ്രസിഡന്റും ചീഫ് ഓപ്പറേറ്റിംഗ് ഓഫീസറുമായ ടി. ആന്റോ ജോർജ്. എടൂർ, ഉളിക്കൽ, മാട്ടൂൽ, മയ്യിൽ, പാനൂർ എന്നിവിട ങ്ങളിലെ ബ്രാഞ്ചുകളുടെ ഉദ്ഘാടനം ചിങ്ങം ഒന്നായ ഓഗസ്റ്റ്17ന് നടക്കുമെന്ന് കണ്ണൂരിൽ പത്രസമ്മേളനത്തിൽ അദ്ദേഹം അറിയിച്ചു.
പയ്യാവൂർ റോഡിലെ ഉളിക്കൽ ബ്രാഞ്ച് രാവിലെ ഒന്പതിനും, മാടത്തിൽ-എടൂർ റോഡിലുള്ള പുത്തൻപുരക്കൽ ബിൽഡിംഗിലെ എടൂർ ബ്രാഞ്ച് രാവിലെ 10 നും മന്ത്രി സണ്ണി ജോസഫ് ഉദ്ഘാടനം ചെയ്യും. ചന്പാട് റോഡിലെ പികെവൈ പ്ലാസ ബിൽഡിംഗിലെ പാനൂർ ബ്രാഞ്ച് രാവിലെ 11.30ന് ഷാഫി പറന്പിൽ എംപിയും, മയ്യിൽ കൃപ കോംപ്ലക്സിലെ ബ്രാഞ്ച് ഉച്ചകഴിഞ്ഞു മൂന്നിന് ടി.കെ. ഗോവിന്ദൻ എംഎൽഎയും, മാട്ടൂൽ പെട്രോൾ പന്പിന് എതിർവശത്തെ എംആർസെഡ് കോംപ്ലക്സിലെ ബ്രാഞ്ച് വൈകുന്നേരം 4.30 മാട്ടൂൽ പഞ്ചായത്ത് പ്രസിഡന്റ് നസീർ ബി. മാട്ടൂലും ഉദ്ഘാടനം ചെയ്യും.
ഒപ്പം ഉദുമ, പുൽപ്പള്ളി, കരുവഞ്ചാൽ, ഇരിക്കൂർ, പൈസക്കരി ബാങ്കുകൾ നവീകരിച്ചതിന്റെ ഉദ്ഘാടനവും17ന് നടക്കും. ആധുനിക ബാങ്കിംഗ് സൗകര്യങ്ങളോടെയും മികച്ച അടിസ്ഥാന സൗകര്യങ്ങളോടെയും ആണ് ബ്രാഞ്ചുകളുടെ നവീകരണം.
ഓണം പ്രമാണിച്ച് ജില്ലയിലെ അഞ്ച് പുതിയ ബ്രാഞ്ചുകളിലും ലോക്കർ ഫീസിന് 50 ശതമാനത്തിന്റെ ഇളവും ബാങ്ക് പ്രഖ്യാപിച്ചിട്ടുണ്ട്. ജില്ലയിലെ ഗ്രാമീണ-നഗര മേഖലകളിലുള്ള ഉപഭോക്താക്കൾക്ക് കൂടുതൽ വേഗത്തിലും എളുപ്പത്തിലും ആധുനിക ബാങ്കിംഗ് സേവനങ്ങൾ ലഭ്യമാക്കുകയാണ് ലക്ഷ്യമെന്ന് ബാങ്ക് ഡെപ്യൂട്ടി ജനറൽ മാനേജർ കെ.പി. രമേഷ് പറഞ്ഞു.
മലബാറിൽ നിലവിൽ 50 ബ്രാഞ്ചുകൾ ഉണ്ടായിരുന്ന സ്ഥാനത്ത് അത് 55 ആയി ഉയർന്നു. കണ്ണൂർ ജില്ലയിൽ 24 ബാങ്കുകളുടെ സ്ഥാനത്ത് ഈ മാസം 17 ഓടെ അത് 29 ആയി ഉയരും. സെപ്റ്റംബർ 30 ഓടെ 16 പുതിയ ബ്രാഞ്ചുകൾ തുടങ്ങാനാണ് ബാങ്കിന്റെ തീരുമാനമെന്നും കെ.പി. രമേഷ് പറഞ്ഞു.
97 വർഷത്തെ പ്രവർത്തന പാരമ്പര്യമുള്ള സൗത്ത് ഇന്ത്യൻ ബാങ്ക് സാങ്കേതിക വിദ്യ, നവീനത, ഉപഭോക്തൃ സേവനം എന്നിവയിൽ നിക്ഷേപം നടത്തുന്നതിനോടൊപ്പം തന്നെ തങ്ങളുടെ ശൃംഖല കൂടുതൽ വ്യാപിപ്പിക്കാനുള്ള ശ്രമത്തിലാണെന്ന് ഡെപ്യൂട്ടി ജനറൽ മാനേജരും കണ്ണൂർ റീജണൽ ഹെഡുമായ ജോർജ് ജോസഫ് പറഞ്ഞു.
Deepika
E-paper LOGIN
LOGIN
