യൂറോപ്പിന്‍റെ പാൽപ്പൊടി മോശം, ഞെട്ടിത്തരിച്ച് ചൈന

Wednesday, April 25, 2018 9:22 AM IST

സ്പെയിനിലെ ജിറോണയിൽ കൊച്ചുകുട്ടികൾക്ക് ഗുണനിലവാരമില്ലാത്ത പാൽപ്പൊടി നിർമിച്ച് വിതരണം ചെയ്യാൻ ശ്രമിച്ച ഫാക്ടറി അടച്ചുപൂട്ടി. വിവിധ രാജ്യങ്ങളിലേക്ക് കയറ്റി അയയ്ക്കാനായി സൂക്ഷിച്ചിരുന്ന എട്ടു ടണ്ണോളം വരുന്ന ഗുണനിലവാരമില്ലാത്ത പാൽപ്പൊടിയും പോലീസ് പിടിച്ചെടുത്തു.

ഇവ കൊണ്ടുപോകാനായി എത്തിയ ചരക്കുകപ്പലും പോലീസ് പിടിച്ചെടുത്തിട്ടുണ്ട്. സംഭവവുമായി ബന്ധപ്പെട്ട് ഫാക്ടറി നടത്തിപ്പുകാരായ നാലു പേരെ അറസ്റ്റ് ചെയ്തു. ഇതിൽ ഒരാൾ നിരവധി ക്രിമിനൽ കേസുകളിൽ പ്രതിയാണ്. പിടിച്ചെടുത്ത പാൽപ്പൊടി ആവശ്യമായ പോഷകങ്ങളൊന്നും ചേർക്കാതെ തീർത്തും വൃത്തിഹീനമായ സാഹചര്യത്തിൽ നിർമിച്ചതാണെന്ന് പോലീസ് പറഞ്ഞു.

ഇവയിലധികവും ചൈനയിലേക്ക് കയറ്റി അയയ്ക്കാനിരുന്നതാണെന്നാണ് റിപ്പോർട്ട്. ഈ വിവരം പുറത്തായതോടെ ഇറക്കുമതി ചെയ്ത പാൽപ്പൊടി ഉത്പന്നങ്ങൾ വിശദപരിശോധനയ്ക്കായി ചൈനീസ് അധികൃതർ ശേഖരിച്ചിട്ടുണ്ട്. പാലുത്പാദനത്തിൽ ലോകരാജ്യങ്ങളിൽ നാലാം സ്ഥാനമുള്ള രാജ്യമാണ് ചൈന. എന്നാൽ, ആഭ്യന്തര ഉപയോഗത്തിനുള്ള പാൽ പൂർണമായും ഉത്പാദിപ്പിക്കാൻ ചൈനയ്ക്കായിട്ടില്ല. യൂറോപ്യൻ രാജ്യങ്ങളിൽനിന്നുള്ള പാലിറക്കുമതിയാണ് ആഭ്യന്തര പാലുത്പാദനത്തിലെ കുറവ് നികത്തുന്നത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.