അഞ്ചാം ദിനവും ; പാർലമെന്‍റ് പ്രക്ഷുബ്‌ധം : Deepika.com National News |

Click here for detailed news of all items

അഞ്ചാം ദിനവും ; പാർലമെന്‍റ് പ്രക്ഷുബ്‌ധം

Saturday, July 26, 2025 2:44 AM IST

ന്യൂഡൽഹി: കാര്യമായ നടപടിക്രമങ്ങൾ പൂർത്തിയാക്കാതെ വർഷകാല സമ്മേളനത്തിന്‍റെ തുടർച്ചയായ അഞ്ചാം ദിവസവും പാർലമെന്‍റ് പിരിഞ്ഞു.

ബിഹാറിലെ സമഗ്ര വോട്ടർ പട്ടിക പരിഷ്കരണത്തിനെതിരേയാണ് ഇന്നലെയും പ്രതിപക്ഷം സഭയ്ക്കകത്തും പുറത്തും പ്രതിഷേധമുയർത്തിയത്.

രാവിലെ 11ന് പാർലമെന്‍റ് നടപടിക്രമങ്ങൾ ആരംഭിച്ചെങ്കിലും രാജ്യസഭ 12 വരെയും ലോക്സഭ ഉച്ചകഴിഞ്ഞ് രണ്ടുവരെയും പിരിയുകയായിരുന്നു. ഇരുസഭകളും പിന്നീടു ചേർന്നപ്പോൾ പ്രതിപക്ഷം ബഹളം വച്ചതോടെ തിങ്കളാഴ്ചത്തേക്കു പിരിയുകയായിരുന്നു.

പാർലമെന്‍റ് മന്ദിരത്തിലെ ഗാന്ധിപ്രതിമയ്ക്കു മുന്നിൽനിന്ന് "എസ്ഐആർ ജനാധിപത്യത്തിനുമേലുള്ള ആക്രമണം’എന്നെഴുതിയ ബാനറുമായിട്ടാണ് പ്രതിപക്ഷ പാർട്ടികൾ പാർലമെന്‍റിലേക്കെത്തിയത്. തുടർന്ന് എസ്ഐആർ എന്നെഴുതിയ പോസ്റ്ററുകൾ കീറി പാർലമെന്‍റിലെ മകർദ്വാറിനു മുന്നിൽ സ്ഥാപിച്ച വേസ്റ്റ് ബോക്സിലേക്ക് എംപിമാർ നിക്ഷേപിച്ചു. പ്രകടനത്തിനുശേഷം സഭയ്ക്കുള്ളിൽ കയറി നടുത്തളത്തിലിറങ്ങി പ്രതിപക്ഷ എംപിമാർ പ്രതിഷേധിച്ചു.

സഭയ്ക്കുള്ളിൽ പ്ലക്കാർഡുകൾ ഉയർത്തുന്നതും മുദ്രാവാക്യങ്ങൾ വിളിക്കുന്നതും ഉചിതമല്ലെന്നു പറഞ്ഞ ലോക്സഭാ സ്പീക്കർ ഓം ബിർള, ഭരണ-പ്രതിപക്ഷ പ്രതിനിധികളെ വിളിച്ച് സഭാ നടപടിക്രമങ്ങളിൽ സഹായിക്കണമെന്ന് ആവശ്യപ്പെട്ടു. തുടർന്ന് തിങ്കളാഴ്ച മുതൽ സഭാനടപടികളിൽ സഹകരിക്കുമെന്ന് പ്രതിപക്ഷം വ്യക്തമാക്കി.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.