പരിയാരത്ത് കാർഡിയോ വാസ്കുലർ തൊറാസിക് കോഴ്സ് തീയതി നീട്ടി
പരിയാരം: നഴ്‌സിംഗ് മേഖലയിലെ സ്‌പെഷാലിറ്റി കോഴ്‌സായ കാർഡിയോ വാസ്‌കുലാർ ആന്‍ഡ് തൊറാസിക് നഴ്‌സിംഗ് കോഴ്‌സിൽ അപേക്ഷ സമർപ്പിക്കുന്നതിനുള്ള അവസാന തീയതി പുതുക്കിനിശ്ചയിച്ചു. ഇതുപ്രകാരം ഈമാസം 25 വരെ ഓൺലൈൻ വഴി അപേക്ഷ സമർപ്പിക്കാം.
സ്ഥാപനത്തിന്‍റെ വെബ്‌സൈറ്റിൽ ഓൺലൈൻ അപേക്ഷയുടെ ലിങ്ക് ലഭ്യമാക്കിയിട്ടുണ്ട്. ബിഎസ്‌സി നഴ്‌സിംഗ് അല്ലെങ്കിൽ ജനറൽ നഴ്‌സിംഗ് കോഴ്സ് കഴിഞ്ഞ് കേരള നഴ്‌സസ് ആൻഡ് മിഡ്‌വൈഫ്‌സ് കൗൺസിലിൽ റജിസ്‌ട്രേഷൻ (കെഎൻഎംസി) നേടിയിരിക്കണം എന്നതാണ് യോഗ്യത. ഓൺലൈൻവഴി ലഭിക്കുന്ന അപേക്ഷകൾ മാത്രമാണ് പ്രവേശനത്തിനായി പരിഗണിക്കുക. ഇതനുസരിച്ച് അപേക്ഷിക്കുന്നവർക്ക് ഇമെയിൽ വിലാസം നിർബന്ധമാണ്. ഓൺലൈൻ അപേക്ഷാഫോറത്തിലെ മുഴുവൻ കോളവും പൂരിപ്പിച്ചാൽ മാത്രമേ അപേക്ഷ സേവ് ചെയ്യുന്നതിന് സാധിക്കുകയുള്ളൂ.
അപേക്ഷാഫീസ് 500 രൂപ. തെരഞ്ഞെടുക്കപ്പെടുന്നവർക്ക് പ്രതിമാസം സ്റ്റൈപ്പൻഡ് ലഭിക്കുന്ന നഴ്‌സിംഗ് മേഖലയിലെ സ്‌പെഷാലിറ്റി കോഴ്‌സാണിത്. ഒരുവർഷമാണ് കോഴ്സ് കാലയളവ്. സേവ് ചെയ്ത ഓൺലൈൻ അപേക്ഷാഫോറത്തിന്‍റെ ഹാർഡ്‌കോപ്പിയും അപേക്ഷാഫോറം നിരക്കായ നിശ്ചിത തുകയ്ക്കുള്ള ഡിമാന്‍ഡ് ഡ്രാഫ്റ്റും പ്രിൻസിപ്പൽ, പരിയാരം നഴ്‌സിംഗ് കോളജ്, പരിയാരം മെഡിക്കൽ കോളജ് പി.ഒ, കണ്ണൂർ670503’ എന്ന വിലാസത്തിൽ ഈമാസം 29ന് വൈകുന്നേരം നാലിനുമുന്പ് തപാൽ വഴിയോ നേരിട്ടോ ലഭിച്ചിരിക്കണം. www.mcpariyar am.com