വൈൽഡ് ലൈഫ് ഇൻസ്റ്റിറ്റ്യൂട്ടിൽ എംഎസ്‌സി കോഴ്സുകൾ
കേന്ദ്ര വനം, പരിസ്ഥിതി മന്ത്രാലയത്തിനു കീഴിൽ ഡെറാഡൂണിലെ സ്വയംഭരണ സ്ഥാപനമാണ് വൈൽഡ് ലൈഫ് ഇൻസ്റ്റിറ്റ്യൂട്ട് ഓഫ് ഇന്ത്യ. വൈൽഡ് ലൈഫ് സയൻസിൽ ഇൻസ്റ്റിറ്റ്യൂട്ട് നടത്തുന്ന എംഎസ്‌സി കോഴ്സുകൾ ജൂലൈ ഒന്നിന് ആരംഭിക്കും.
എംഎസ്‌സി വൈൽഡ് ലൈഫ് സയൻസ്, ഹെരിറ്റേജ് കൺസർവേഷൻ ആൻഡ് മാനേജ്മെന്‍റ് എന്നിവയിൽ ദ്വിവത്സര എംഎസ്‌സി കോഴ്സുകൾക്കാണ് അപേക്ഷ ക്ഷണിച്ചിരിക്കുന്നത്. 5,32,800 രൂപയാണു കോഴ്‌സ് ഫീസ്. സമർഥരായ എട്ടു പേർക്ക് സ്കോളർഷിപ് ലഭിക്കും. സയൻസ്, മെഡിക്കൽ സയൻസ്, എൻജിനിയറിംഗ്, വെറ്ററിനറി സയൻസ്, അഗ്രിക്കൾച്ചർ, ഫോറസ്ട്രി, ഫാർമസി, സോഷ്യൽ സയൻസ്, കംപ്യൂട്ടർ സയൻസ് എന്നിവയിൽ ബിരുദം നേടിയവർക്കും അവസാന വർഷ വിദ്യാർഥികൾക്കും വൈൽഡ് ലൈഫ് സയൻസ് കോഴ്സിന് അപേക്ഷിക്കാം. ഹെരിറ്റേജ് കൺസർവേഷൻ ആൻഡ് മാനേജ്മെന്‍റ് കോഴ്സിന് ഏതെങ്കിലും വിഷയത്തിൽ ബിരുദമാണു യോഗ്യത. 2019 ജൂലൈ ഒന്നിന് 25 വയസ് കവിയരുത്. സംവരണ വിഭാഗങ്ങൾക്ക് അഞ്ചു വർഷത്തെ ഇളവുണ്ട്.
ഷോർട്ട് ലിസ്റ്റ് ചെയ്യുന്നവരുടെ ലിസ്റ്റ് ഏപ്രിൽ 30നു പ്രസിദ്ധീകരിക്കും. ഇതിൽ നിന്നു തെരഞ്ഞെടുക്കപ്പെടുന്നവരെ മേയ് അഞ്ചിനു ദേശീയ തലത്തിൽ നടത്തുന്ന നാഷണൽ എലിജിബിലിറ്റി ടെസ്റ്റിന്‍റെ (നെറ്റ്) അടിസ്ഥാനത്തിലാണ് അഡ്മിഷൻ. തിരുവനന്തപുരം, ചെന്നൈ, റാഞ്ചി, ഐസ്വാൾ, ഹൈദരാബാദ്, ബംഗളൂരു, ഭോപ്പാൽ, മുംബൈ, ഡൽഹി, ലക്നോ, ഡെറാഡൂണ്‍, കോൽക്കത്ത, ഗോഹട്ടി, ജമ്മു എന്നിവിടങ്ങളിൽ മേയ് അഞ്ചിനാണ് നെറ്റ്. 100 മാർക്കിന്‍റെ രണ്ടു മണിക്കൂർ ദൈർഘ്യമുള്ളതാണ് നെറ്റ്. 70 മാർക്കിന്‍റെ ഒബ്ജക്ടീവ് ടൈപ് ചോദ്യങ്ങളും 30 മാർക്കിന്‍റെ ഉപന്യാസ രീതിയിൽ ഉത്തരം എഴുതേണ്ട ചോദ്യങ്ങളുമാണ് ഉണ്ടാകുക. തെരഞ്ഞെടുക്കപ്പെടുന്നവരെ മേയ് 29,30 തീയതികളിൽ ഡെറാഡൂണിൽ പേഴ്സണൽ ആപ്റ്റിറ്റ്യൂഡ് ടെസ്റ്റിനു വിളിക്കും. ഓണ്‍ലൈനായി ഏപ്രിൽ 25 വരെ അപേക്ഷിക്കാം. ഫീസ് 1000 രൂപ. അപേക്ഷയുടെ പ്രിന്‍റൗട്ട് മേയ് രണ്ടിനകം ലഭിക്കത്തക്കവിധം അയച്ചു കൊടുക്കണം. ഫോണ്: +911352646284. വെബ്സൈറ്റ്: https://www.wii.gov.in.