ഇന്ത്യൻ ഇൻസ്റ്റിറ്റ്യൂട്ട് ഓഫ് ഫോറിൻ ട്രേഡിൽ എംഎ, എക്സിക്യൂട്ടീവ് പ്രോഗ്രാമുകൾ
അന്താരാഷ്ട്ര വാണിജ്യവുമായി ബന്ധപ്പെട്ട് പഠന, ഗവേഷണ പ്രവർത്തനങ്ങൾ നടത്തുന്ന രാജ്യത്തെ ഏറ്റവും പ്രമുഖ സ്ഥാപനമാണ് ഇന്ത്യൻ ഇൻസ്റ്റിറ്റ്യൂട്ട് ഓഫ് ഫോറിൻ ട്രേഡ് (ഐഐഎഫ്ടി). ഐഐഎഫ്ടി നടത്തുന്ന എംഎ, എക്സിക്യൂട്ടീവ് പ്രോഗ്രാമുകൾക്ക് ഇപ്പോൾ അപേക്ഷിക്കാം. വിലാസം: ഡൽഹി കാമ്പസ്, ബി12 കുത്തബ് ഇൻസ്റ്റിറ്റ്യൂഷണൽ ഏരിയ, ന്യൂഡൽഹി 110016. ഫോണ്: 011 39147213. വെബ്സൈറ്റ്: www.iift.edu.
എംഎ
ട്രേഡ് ആൻഡ് ഫിനാൻസിൽ സ്പെഷലൈസേഷനോടു കൂടിയ എംഎ പ്രോഗ്രാം ഇൻസ്റ്റിറ്റ്യൂട്ട് കഴിഞ്ഞ വർഷമാണ് ആരംഭിച്ചത്. നാലു സെമസ്റ്ററുകളുള്ള രണ്ടു വർഷമാണു കോഴ്സിന്റെ ദൈർഘ്യം.
1.75 ലക്ഷം രൂപയാണു വാർഷിക ട്യൂഷൻ ഫീസ്. 50 ശതമാനം മാർക്കോടെ ഇക്കണോമിക്സിൽ ബിരുദം നേടിയവർക്കും അവസാന വർഷ വിദ്യാർഥികൾക്കും അപേക്ഷിക്കാം.
പ്രവേശന പരീക്ഷയുടെ അടിസ്ഥാനത്തിലാണ് അഡ്മിഷൻ. ഒബ്ജക്ടീവ്, ഡിസ്ക്രിപ്റ്റീവ് മാതൃകയിൽ രണ്ടു ഭാഗങ്ങളായാണു പ്രവേശന പരീക്ഷ നടത്തുന്നത്.
അടിസ്ഥാന ഗണിതം, സ്റ്റാറ്റിസ്റ്റിക്സ്, മൈക്രോ ഇക്കണോമിക്സ്, മാക്രോ ഇക്ണോമിക്സ്, ഇന്‍റർനാഷണൽ ഇക്കണോമിക്സ്, പബ്ലിക് ഫിനാൻസ് തുടങ്ങിയ വിഷയങ്ങളാണ് ഒബ്ജക്ടീവ് പരീക്ഷയിൽ ഉൾപ്പെടുത്തിയിരിക്കുന്നത്. വർത്തമാനകാല സാന്പത്തിക വിഷയങ്ങളിലുള്ള അറിവും അഭിരുചിയും അളക്കുന്നതിനുദ്ദേശിച്ചുള്ളതാണ് ഡിസ്ക്രിപ്റ്റീവ് ടെസ്റ്റ്.
ന്യൂഡൽഹി, കോൽക്കത്ത കാന്പസുകിളിൽ വച്ചായിരിക്കും പ്രവേശന പരീക്ഷ. തുടർന്ന് ന്യൂഡൽഹിയിൽ ഇന്‍റർവ്യുവും ഉണ്ടായിരിക്കും. അപേക്ഷാ ഫീസ് 1600 രൂപ.
സംവരണ വിഭാഗങ്ങൾക്ക് 800 രൂപ. ഏപ്രിൽ 15നകം അപേക്ഷിക്കണം.
മേയ് 26 നാണു പ്രവേശന പരീക്ഷ.
എക്സിക്യൂട്ടീവ് പ്രോഗ്രാമുകൾ
ഇന്ത്യൻ ഇൻസ്റ്റിറ്റ്യൂട്ട് ഓഫ് ഫോറിൻ ട്രേഡ് നടത്തുന്ന എക്സിക്യൂട്ടീവ് പ്രോഗ്രാമുകൾക്ക് മേയ് 15 വരെ അപേക്ഷിക്കാം. എക്സിക്യൂട്ടീവ് പോസ്റ്റ് ഗ്രാജ്വേറ്റ് ഡിപ്ലോമ ഇൻ ഇന്‍റർ നാഷണൽ ബിസിനസിലാണു രണ്ടു പ്രോഗ്രാമുകളും. ന്യൂഡൽഹി കാമ്പസിൽ നടത്തുന്ന ഓൺ കാമ്പസ് പ്രോഗ്രാമാണ് ആദ്യത്തേത്. ഓൺലൈൻ പാഠ്യരീതി കൂടി ഉൾപ്പെടുത്തിയ ഹൈബ്രിഡ് പ്രോഗ്രാമാണു രണ്ടാമത്തേത്. 50 ശതമാനം മാർക്കോടെ ബിരുദവും അഞ്ചു വർഷത്തെ പ്രവൃത്തിപരിചയവും ഉള്ളവർക്ക് അപേക്ഷിക്കാം. പിജി, എൻജിനിയറിംഗ് ബിരുദധാരികൾക്ക് മൂന്നു വർഷത്തെ പ്രവൃത്തി പരിചയം മതി. അപേക്ഷാ ഫീസ് 2000 രൂപ. പ്രോഗ്രാം ഫീസ് 5.10 ലക്ഷം രൂപ. 15 മാസമാണു ദൈർഘ്യം.