കേരളത്തിലെ എൻജിനിയറിംഗ് കോളജിലേക്കു കൗൺസലിംഗ് രീതി വിശദമാക്കാമോ? ഹരികൃഷ്ണൻ, ഹരിപ്പാട്
പ്രവേശന പരീക്ഷയിൽ നേടിയ റാങ്കിന്റെ അടിസ്ഥാനത്തിൽ കമ്മീഷൻ ഫോർ എൻട്രൻസ് എക്സാമിനേഴ്സ് (സിഇഇ) ഓൺലൈനിലാണ് കൗൺസലിംഗിന് അപേക്ഷിക്കാൻ ആവശ്യപ്പെടുന്നത്. കഴിഞ്ഞ വർഷത്തെ കൗൺസലിംഗ് രീതി ഇപ്രകാരമായിരുന്നു.
സ്റ്റെപ്പ് ഒന്ന്: രജിസ്ട്രേഷൻ പോർട്ടലിൽ ലോഗിൻ ചെയ്യുക. കെഇഎഎമ്മിന്റെ റോൾ നന്പരും ആപ്ലിക്കേഷൻ നന്പരും ഉപയോഗിച്ച് വേണം ലോഗിൻ. ഇതിനുശേഷം കാൻഡിഡേറ്റ് കീ നന്പറും പാസ്വേഡും സബ്മിറ്റ് ചെയ്യണം. കീ നന്പർ എന്നു പറയുന്നത് കാൻഡിഡേറ്റിന്റെ രജിസ്ട്രേഷൻ സമയത്ത് ലഭിക്കുന്ന 16 ഡിജിറ്റലുള്ള ആൽഫ ന്യൂമറിക് നന്പർ ആണ്.
സ്റ്റെപ്പ് രണ്ട്: കോളജുകളുടെയും കോഴ്സുകളുടെയും തെരഞ്ഞെടുപ്പ്. ലോഗിൻ ചെയ്താൽ കോളജുകളുടെയും കോഴ്സുകളുടെയും ലിസ്റ്റ് സ്ക്രീനിൽ ലഭ്യമാകും. ഈ ലിസ്റ്റിൽനിന്ന് താത്പര്യമുള്ള കോളജുകളും കോഴ്സുകളും തെരഞ്ഞെടുക്കുക. തെരഞ്ഞെടുക്കാൻ പറ്റുന്ന അത്രയും കോളജുകളും കോഴ്സുകളും മുൻഗണനാക്രമത്തിൽ തെരഞ്ഞെടുക്കാൻ ശ്രമിച്ചാൽ നല്ല കോളജ് ലഭിക്കാനുള്ള സാധ്യത കൂടും.
തെരഞ്ഞെടുത്ത കോളജുകളും കോഴ്സുകളും സ്ക്രീനിൽ കാണാൻ കഴിയും. എന്റർ ചെയ്ത ഓപ്ഷനുകൾ വിദ്യാർഥി സേവ് ചെയ്യണം.
സ്റ്റെപ്പ് മൂന്ന്: ഫിൽറ്റർ ഓപ്ഷൻ. ഓപ്ഷനുകളിൽ തിരുത്തൽ നടത്താൻ എഡിറ്റ് ബട്ടൺ ഉപയോഗിക്കാം. അതുവഴി പുതിയ കോഴ്സുകളും കോളജുകളും കൂട്ടിച്ചേർക്കാനും ഒഴിവാക്കാനും കഴിയും.
സ്റ്റെപ്പ് നാല്: റിവ്യുവും പ്രിന്റൗട്ടും. കമ്മീഷൻ ആദ്യ സീറ്റ് അലോട്ട്മെന്റ് നടത്തുന്നതിനു മുന്പ് ട്രയൽ അലോട്ട്മെന്റ് നല്കും. ഈ ട്രയൽ അലോട്ട്മെന്റ് കാൻഡിഡേറ്റ് നല്കിയിട്ടുള്ള കോഴ്സുകളുടെയും കോളജുകളുടെയും പ്രിഫറൻസ് അടിസ്ഥാനത്തിലാകും. ആയതിനാൽ ട്രയൽ അലോട്ട്മെന്റിന്റെ അടിസ്ഥാനത്തിൽ ഓപ്ഷനുകൾ പുനർക്രമീകരിക്കാൻ വിദ്യാർഥിക്കു കഴിയും.
ഇതിനുശേഷം സിഇഇ ഓൺലൈനായി ആദ്യ അലോട്ട്മെന്റ് നടത്തും. ഈ അലോട്ട്മെന്റ് ഏകജാലകമാണ് അഥവാ കേന്ദ്രീകൃത അലോട്ട്മെന്റ് പ്രക്രിയ (സിഎപി) രീതിയിലാണ്. സീറ്റ് അലോട്ട്മെന്റ് കിട്ടുന്ന വിദ്യാർഥികൾ സിഇഇയുടെ അക്കൗണ്ടിൽ കമ്മീഷൻ നിർദേശിച്ച ബാങ്കുകളുടെ ബ്രാഞ്ചുകളിലൂടെ പണം അയയ്ക്കണം. പ്രവേശന സമയത്ത് കോളജിൽ എല്ലാ സർട്ടിഫിക്കറ്റുകളുടെ അസൽ പരിശോധനയ്ക്കായി ഹാജരാക്കണം.
തയാറാക്കിയത് : ബാബു പള്ളിപ്പാട്ട്
ചോദ്യങ്ങൾ അയയ്ക്കേണ്ട ഇ മെയിൽ
[email protected]