ഗുലാത്തി ഇൻസ്റ്റിറ്റ്യൂട്ടിൽ ജിഎസ്ടി കോഴ്സ്
കേരള ഗവൺമെന്റിനു കീഴിൽ സ്വയംഭരണ സ്ഥാപനമായ ഗുലാത്തി ഇൻസ്റ്റിറ്റ്യൂട്ട് ഓഫ് ഫിനാൻസ് ആൻഡ് ടാക്സേഷൻ സ്റ്റഡീസ് നടത്തുന്ന ചരക്കു സേവന നികുതിയിൽ പോസ്റ്റ് ഗ്രാജ്വേറ്റ് ഡിപ്ലോമ കോഴ്സിലേക്ക് അപേക്ഷ ക്ഷണിച്ചു.വ്യവസായ, വാണിജ്യ മേഖലയിൽ ജിഎസ്ടിയിൽ പ്രാവീണ്യമുള്ള പ്രഫഷണലുകളെ സൃഷ്ടിക്കുക എന്ന ലക്ഷ്യത്തോടെയാണു കോഴ്സ് രൂപകൽപ്പന ചെയ്തിരിക്കുന്നത്.
ജിഎസ്ടിയുമായി ബന്ധപ്പെട്ട നിയമം, നടപടിക്രമങ്ങൾ, അക്കൗണ്ടിംഗ് തുടങ്ങിയ എല്ലാ വശങ്ങളും പാഠ്യ പദ്ധതിയിൽ ഉൾപ്പെടുത്തിയിരിക്കുന്നു. ഒരു വർഷം ദൈർഘ്യമുള്ളതാണു കോഴ്സ്. വാരാന്ത്യങ്ങളിലും അവധി ദിവസങ്ങളിലുമായി രണ്ടു സ്ട്രീമുകളായാണു ക്ലാസ് ക്രമീകരിച്ചിരിക്കുന്നത്. ഇപ്പോൾ തിരുവനന്തപുരം, കൊച്ചി എന്നിവിടിങ്ങളിൽ നടത്തുന്ന കോഴ്സ് കൂടുതൽ നഗരങ്ങളിലേക്കു വ്യാപിപ്പിക്കാൻ ഉദ്ദേശ്യമുണ്ട്. അവധിക്കാല പരിശീലനം തിരുവനന്തപുരത്തു മാത്രമേയുള്ളു.
മൂന്നു മണിക്കൂർ വച്ച് 40 ദിവസമാണു പരിശീലനം. വാരാന്ത്യ പരിശീലനത്തിനു തിരുവനന്തപുരത്തും കൊച്ചിയിലും സൗകര്യമുണ്ട്. ഒരു ദിവസം ആറു മണിക്കൂർ വച്ച് 20 ദിവസം പരീശീലനത്തിനായി നീക്കിവച്ചിരിക്കുന്നു.പരിശീലനം പൂർത്തിയാക്കുന്നവരെ മാത്രമേ ഫൈനൽ പരീക്ഷ എഴുതാൻ അനുവദിക്കുകയുള്ളു. കോഴ്സ് ഫീസ് 20,060 രൂപ.
ബിരുദധാരികൾക്കും പ്രഫഷണൽ ബിരുദധാരികൾക്കും ഫൈനൽ പരീക്ഷ എഴുതുന്നവർക്കും അപേക്ഷിക്കാം. വിദ്യാർഥികൾ, ലീഗൽ കൺസൾട്ടന്റ്സ്, ടാക്സ് പ്രാക്ടീഷണേഴ്സ്, ടാക്സ് പ്രഫഷണൽസ്, അക്കൗണ്ടന്റ്സ്, എക്സിക്യൂട്ടീവ്സ് എന്നിവർക്ക് അനുയോജ്യമാണു കോഴ്സ്. ഓൺലൈനായി വേണം അപേക്ഷിക്കാൻ. ഒരു തവണ രജിസ്റ്റർ ചെയ്താൽ മുന്നു അക്കാഡമിക് വർഷം പ്രാബല്യമുണ്ടായിരിക്കും. www.gift.res.in. ഫോൺ: 91 471 2593960, 2596970, 2596980.