ദുബായ്: ദുബായ് കെഎംസിസി ആഭിമുഖ്യത്തിൽ 48-മത് യുഎഇ ദേശീയ ദിനാഘോഷ സമാപന സമ്മേളനവും, കെ എംസിസിയുടെ 45-മത് വാർഷികാഘോഷവും യുഎഇ സഹിഷ്ണുതാ വർഷ പരിപാടികളും ഡിസംബർ 13 വെള്ളിയാഴ്ച വൈകുന്നേരം 5 മുതൽ ദുബായ് അൽ നാസർ ലെഷർ ലാൻഡിൽ അതിവിപുലമായി സംഘടിപ്പിക്കും.
സഹിഷ്ണുതാ സമ്മേളനം യുഎഇ സഹിഷ്ണുതാ വകുപ്പ് മന്ത്രി ശൈഖ് നഹ്യാൻ ബിൻ മുബാറക് അൽനഹ്യാൻ ഉദ്ഘാടനം ചെയ്യും. മുസ്ലിം ലീഗ് സംസ്ഥാന അധ്യക്ഷൻ പാണക്കാട് സയ്യിദ് ഹൈദരലി ശിഹാബ് തങ്ങൾ, ലുലു ഗ്രൂപ്പ് ഇന്റർനാഷണൽ ചെയർമാൻ പത്മശ്രീ എം.എ യൂസുഫലി തുടങ്ങിയവർ മുഖ്യാതിഥികളായി പങ്കെടുക്കും. മുസ്ലിം ലീഗ് ദേശീയ ജന. സെക്രട്ടറി പി.കെ കുഞ്ഞാലിക്കുട്ടി എംപി, ദുബായ് കമ്യൂണിറ്റി ഡെവലപ്മെന്റ് അഥോറിറ്റി ഡയറക്ടർ ജനറൽ അഹ്മദ് അബ്ദുൽ കരീം ജുൽഫാർ, ജനറൽ ഡയക്ടറേറ്റ് ഓഫ് റെസിഡെൻസി ആന്റ് ഫോറീനേഴ്സ് അഫയേഴ്സ് ദുബായ് ഡയറക്ടർ ജനറൽ മേജർ ജനറൽ മുഹമ്മദ് അഹ്മദ് അൽമർറി, ജനറൽ മാനേജർ ഓഫ് ഇസ്ലാമിക് അഫയേഴ്സ് ആൻഡ് സിഐഡി ഡോ: അഹമ്മദ് ശൈബാനി, പി.വി അബ്ദുൽ വഹാബ് എംപി, പാണക്കാട് സയ്യിദ് സാദിഖലി ശിഹാബ് തങ്ങൾ, ഡോ.എം.കെ മുനീർ എംഎൽഎ, എം.സി ഖമറുദ്ദീൻ എംഎൽഎ തുടങ്ങിയവർ വിശിഷ്ടാതിഥികളാകും.
പരിപാടികളുടെ ഒരുക്കങ്ങളെല്ലാം പൂർത്തിയായതായി അൽബറാഹ കഐംസിസി ആസ്ഥാനത്ത് വിളിച്ചു ചേർത്ത വാർത്താസമ്മേളനത്തിൽ ദുബായ് കഐംസിസി പ്രസിഡൻറ് ഇബ്രാഹിം എളേറ്റിൽ, ജനറൽ സെക്രട്ടറി മുസ്തഫ വേങ്ങര, ട്രഷറർ പി.കെ ഇസ്മായിൽ, ഓർഗനൈസിംഗ് സെക്രട്ടറി ഹംസ തൊട്ടി, മീഡിയ ചെയർമാൻ ഒ.കെ ഇബ്രാഹിം എന്നിവർ അറിയിച്ചു. അൽ നാസർ ലെഷർ ലാൻഡ് ക്ലബിലെ ഗേറ്റുകൾ വൈകുന്നേരം നാലിന് തുറക്കും. 5 മണിയോടെ പരിപാടികൾക്ക് തുടക്കമാകും. പരിപാടിയിൽ പങ്കെടുക്കുന്നവർക്കായി ആകർഷക സമ്മാനങ്ങൾ ഏർപ്പെടുത്തിയിട്ടുണ്ട്. 20 പേർക്ക് നറുക്കെടുപ്പിലൂടെ ലുലുവിൻറെ 500 ദിർഹമിന്റെ പർചേസ് വൗചർ സമ്മാനമായി നൽകും. റിട്ടേണ് വിമാന ടിക്കറ്റുകളും നൽകും. മറ്റു സമ്മാനങ്ങളുമുണ്ടാകും. കഴിഞ്ഞ വർഷങ്ങളിലെ പരിപാടികളെക്കാൾ കൂടുതൽ വിപുലമായാണ് ഇത്തവണ ആഘോഷം ഒരുക്കിയിരിക്കുന്നത്. സഹിഷ്ണുതാ വർഷ ഭാഗമായി പ്രത്യേക പരിപാടികൾ അരങ്ങേറും.
സമ്മേളന സ്ഥലത്തേക്ക് ബസ് ഏർപ്പെടുത്തുന്നതാണ്. പരിപാടിയിലേക്ക് പ്രവേശനം സൗജന്യമാണ്. പ്രവേശനം പാസ് മുഖേന നിയന്ത്രിക്കുന്നതാണ്. പ്രവേശന പാസുകൾക്ക് 04 2727773 (കഐംസിസി ഓഫീസ്, അൽബറാഹ), 04 2274899 (കഐംസിസി ഓഫീസ്, അൽസബ്ഖ) എന്നീ നന്പറുകളിൽ ബന്ധപ്പെടണം.
റിപ്പോർട്ട്: നിഹ്മത്തുള്ള തയ്യിൽ