കൊച്ചി: നെടുമ്പാശേരിയില്‍ മൂന്നു പേരുടെ മരണത്തിന് ഇടയാക്കിയ മിനി കൂപ്പര്‍ വാഹനാപകടത്തിന് പിന്നാലെ രജിസ്റ്റര്‍ ചെയ്ത എഫ്ഐആറിനെച്ചൊല്ലി ആക്ഷേപം. എഫ്ഐആറില് പ്രതി സുഹൈല്‍ സജീവിന്‍റെ പേരില്ലെന്ന ആരോപണവുമായി ബന്ധുക്കൾ അടക്കം ചിലർ രംഗത്തുവന്നു. പ്രതിയുടെ പേരിന് സമീപം 'KL 07 CR1001 കാറിന്‍റെ ഡ്രൈവര്‍' എന്നാണ് എഫ്ഐആറില് രജിസ്റ്റര്‍ ചെയ്തിരിക്കുന്നത്.
അപകടത്തില്‍ മരിച്ച ഇയാസ്, ഗോപിക, ദേവിക എന്നിവരുടെ പേരും മറ്റു വിവരങ്ങളും ഉണ്ടെങ്കിലും സുഹൈലിന്‍റെ പേരോ വിവരങ്ങളോ ഇല്ല. വിലാസം അജ്ഞാതം എന്നാണ് നല്‍കിയിരിക്കുന്നത്. അപകടത്തിന്‍റെ എല്ലാ വിവരങ്ങളും രേഖപ്പെടുത്തിയിട്ടുണ്ടെങ്കിലും മദ്യപിച്ച് വാഹനം ഓടിച്ചതിനെക്കുറിച്ച് സൂചിപ്പിച്ചിട്ടില്ല.
19കാരനായ പ്രതി എറണാകുളത്തെ മൂന്നു ബാറുകളില്‍നിന്നു മദ്യപിച്ച ശേഷമാണ് അപകടമുണ്ടാക്കിയതെന്നാണ് പോലീസ് പറയുന്നത്. അതിനാല്‍ എക്‌സൈസ് സുഹൈലിനെതിരെയും മദ്യം നല്‍കിയ ബാറുകള്‍ക്കെതിരെയും കേസ് എടുത്തിട്ടുണ്ട്.
അതേസമയം, പ്രതിയെ ആലുവ മജിസ്ട്രേറ്റ് കോടതിയില്‍ ഹാജരാക്കിയതിനു ശേഷം സബ് ജയിലിലേക്ക് അയക്കാതെ കാക്കനാട് ബോസ്റ്റര്‍ ഹോമിലേക്ക് അയച്ചതും വിമര്‍ശനങ്ങള്‍ക്ക് ഇടയാക്കിയിട്ടുണ്ട്. ജയില്‍ചട്ടം 324 പ്രകാരം, മുമ്പ് കേസുകളിൽ അകപ്പെട്ട ആൾ അല്ലെങ്കിൽ 21 വയസു വരെ ഇത്തരം കുറ്റങ്ങള്‍ ചെയ്യുന്ന പ്രതികള ബോസ്റ്റര്‍ ഹോമില്‍ അയയ്ക്കാമെന്നാണ് പൊലിസിന്‍റെ വിശദീകരണം.
എന്നാല്‍, കുറ്റകൃത്യത്തിനു ശിക്ഷിക്കപ്പെടുന്ന 16നും 21നും പ്രായത്തില്‍ ഇടയിലുള്ളവരെയാണ് ബോസ്റ്റല്‍ സ്‌കൂളിലേക്ക് അയക്കണ്ടതെന്നു ചൂണ്ടിക്കാട്ടി ഇതിനെതിരെ മരിച്ച വയനാട് സ്വദേശി ദേവികയുടെയും പാലക്കാട് സ്വദേശി ഗോപികയുടെയും കുടുംബം രംഗത്തെത്തിയിട്ടുണ്ട്.
അതേസമയം, എഫ്ഐആറിൽ പേരില്ലെന്ന വാദത്തിൽ കഴമ്പില്ലെന്നും ഇതു പ്രാഥമിക എഫ്ഐആർ മാത്രമാണെന്നും പോലീസ് വൃത്തങ്ങൾ ചൂണ്ടിക്കാട്ടി. പ്രതികളുടെ റിമാൻഡ് റിപ്പോർട്ടിലാണ് ഇത്തരം കൂടുതൽ വിവരങ്ങൾ വരികയെന്ന് ആഭ്യന്തരമന്ത്രി രമേശ് ചെന്നിത്തലയും മാധ്യമങ്ങളോടു പറഞ്ഞു. ഇതിനു പിന്നാലെ പ്രതിക്കെതിരേ കൂടുതൽ വകുപ്പുകൾ ചുമത്തിയ വിവരവും പോലീസ് പുറത്തുവിട്ടു.
Deepika
Corehub Solutions
E-paper LOGIN
LOGIN