കൊച്ചി: നെടുമ്പാശേരിയില്‍ മൂന്നുപേരുടെ മരണത്തിനിടയാക്കിയ വാഹനാപകടത്തില്‍ പ്രതി സുഹൈല്‍ സജീവിനെതിരെ എക്‌സൈസും കേസ് എടുത്തു. പ്രായപൂര്‍ത്തിയാകാതെ മദ്യം വാങ്ങി ഉപയോഗിച്ചുവെന്ന കുറ്റത്തിനാണ് എക്സൈസ് കേസ് എടുത്തത്.

രണ്ടു വര്‍ഷം തടവും 5,000 രൂപ പിഴയും ശിക്ഷ ലഭിക്കാവുന്ന കുറ്റമാണ് ചുമത്തിയിരിക്കുന്നത്. പ്രതിയെ വിശദമായി ചോദ്യം ചെയ്യാനാണ് എക്സൈസിന്‍റെയും പൊലിസിന്‍റെയും തീരുമാനം.

19 വയസുകാരനായ സുഹൈലിന് മദ്യം നല്‍കിയ എറണാകുളത്തെ മൂന്ന് ബാറുകള്‍ക്കെതിരേ തിങ്കളാഴ്ച എക്‌സൈസ് കേസ് എടുത്തിരുന്നു. കേരള അബ്കാരി നിയമപ്രകാരം 23 വയസാണ് മദ്യം വാങ്ങുന്നതിനുള്ള പ്രായപരിധി. 23 വയസിന് താഴെയുള്ളവര്‍ക്ക് മദ്യം നല്‍കാന്‍ പാടില്ലെന്ന കേരള അബ്കാരി ആക്ട് പ്രകാരമാണ് ബാറുകള്‍ക്കെതിരെ കേസ് എടുത്തത്. ബാറുകള്‍ക്കെതിരെ പിഴ ചുമത്തും.

അപകടം നടന്ന ദിവസം ശനിയാഴ്ച ഉച്ച മുതല്‍ പ്രതി മദ്യലഹരിയിലായിരുന്നു. ശനിയാഴ്ച ഉച്ച മുതല്‍ മദ്യ ലഹരിയിലാണ് പ്രതി വാഹനം ഓടിച്ചിരുന്നത്. ഉച്ചയ്ക്ക് കടവന്ത്രയിലെ ബാറിലും വൈകിട്ടോടെ പാലാരിവട്ടത്തെ ബാര്‍ ഹോട്ടലിലും വച്ച് പ്രതി മദ്യപിച്ചു.

പിന്നീട് രാത്രിയില്‍ നെടുമ്പാശേരിയിലെ ബാര്‍ ഹോട്ടലില്‍ നിന്ന് മദ്യപിച്ചിറങ്ങി വാഹനവുമായി പോകുന്നതിനിടയിലാണ് അപകടമുണ്ടായത്. മൂന്ന് ബാറുകളിലും പ്രതി എത്തുന്നതിന്‍റെയും മദ്യപിച്ചതിന്‍റെയും സിസിടിവി ദൃശ്യങ്ങള്‍ കേന്ദ്രീകരിച്ചാണ് തുടരന്വേഷണം നടക്കുന്നത്.

അതേസമയം, സുഹൈലിനെ കസ്റ്റഡിയില്‍ വേണമെന്ന് ആവശ്യപ്പെട്ട് പൊലിസ് ഇന്ന് അപേക്ഷ സമര്‍പ്പിക്കും. കസ്റ്റഡിയില്‍ ലഭിച്ച ശേഷം കൂടുതല്‍ തെളിവെടുപ്പ് നടത്താനാണ് പൊലിസിന്‍റെ നീക്കം. സുഹൈലിന്‍റെ ലൈസന്‍സ് സസ്പെന്‍ഡ് ചെയ്യാനുള്ള നടപടികളിലേക്ക് എംവിഡിയും കടന്നിട്ടുണ്ട്. കാക്കനാട് ബോസ്റ്റല്‍ സ്‌കൂളിലാണ് നിലവില്‍ സുഹൈല്‍.

പിറന്നാളിന് മാതാപിതാക്കള്‍ സമ്മാനിച്ച സുഹൈലിന് മിനി കൂപ്പര്‍ കാറാണ് അമിത വേഗത്തില്‍ ഓടിച്ച് മൂന്നു ജീവനുകള്‍ എടുത്തത്. ഞായറാഴ്ച പുലര്‍ച്ചെ രണ്ടോടെയായിരുന്നു അപകടം. കര്‍ണാടക സ്വദേശി ഇയ്യാസ് (21), പാലക്കാട് സ്വദേശി ഗോപിക (21), വയനാട് സ്വദേശി ദേവിക (21) എന്നിവരാണ് മരിച്ചത്. സംഭവത്തില്‍ സുഹൈലിന്‍റെ മൂന്ന് സുഹൃത്തുക്കളെയും പ്രേരണക്കുറ്റം ചുമത്തി അറസ്റ്റ് ചെയ്തിട്ടുണ്ട്.

Tags : Excise Case Suhail Police Custody Nedumbassery Accident