Kerala
കൊച്ചി: മഹാരാജാസ് കോളജിലെ എസ്എഫ്ഐ നേതാവ് അഭിമന്യുവിനെ കൊലപ്പെടുത്തിയ കേസില് ആറുപേര് കൂറുമാറി. വിചാരണയ്ക്കിടെ പ്രതികളുടെ ബന്ധുവും സുഹൃത്തുക്കളുമടക്കം 10 മുതല് 15 വരെ സാക്ഷികളായ ആറുപേര് പ്രതികള്ക്കനുകൂലമായി കൂറുമാറിയതായി പ്രോസിക്യൂഷന്റെ അപേക്ഷ അനുവദിച്ച എറണാകുളം പ്രിന്സിപ്പല് സെഷന്സ് കോടതി പ്രഖ്യാപിച്ചു.
ആറാം പ്രതി റജീബിന്റെ അയല്വാസിയായ മുഹമ്മദ് അബ്ദുള്, പൊലിസിന്റെ സെര്ച്ച് ലിസ്റ്റില് താന് ഒപ്പിട്ട സ്ഥലം മാറ്റിപ്പറഞ്ഞു. താന് പൊലിസിന്റെ ഒരു രേഖയിലും ഒപ്പിട്ടിട്ടില്ലെന്നാണു ഏഴാം പ്രതി അബ്ദുള് നാസറിന്റെ അയല്വാസി സിറാജ് പറഞ്ഞത്.
എട്ടാം പ്രതി ആദിലിനു ബൈക്ക് വിറ്റിരുന്നതായി പറയുന്ന അമാന്, നൗഫാന് സഹോദരങ്ങളും മൊഴി മാറ്റി. 12ാം പ്രതി മുഹമ്മദ് ഷാഹിമിന്റെ ഭാര്യയായ റൂബിയ ഭര്ത്താവ് ബൈക്ക് ഓടിക്കാറില്ലെന്നും ഒളിവില്പ്പോയതായി അറിയില്ലെന്നുമാണ് കോടതിയെ അറിയിച്ചത്.
16ാം പ്രതി സാനിദ് സല്സ്വഭാവിയായിരുന്നുവെന്ന മൊഴിയാണു സഹപ്രവര്ത്തകനായിരുന്ന ശ്രീനാഥ് നല്കിയത്. സാക്ഷിവിസ്താരം ഇന്നും തുടരും.
Kerala
തിരുവനന്തപുരം: പിഎസ്സി പരീക്ഷാ ക്രമക്കേട് കേസിൽ അറസ്റ്റിലായ മുൻ അഡീഷണൽ സെക്രട്ടറി ആർ. ഹരി, ഒന്നാം പ്രതി സതീഷ് എന്നിവരുടെ ജാമ്യാപേക്ഷയിൽ വാദം പൂർത്തിയായി. ഹർജികളിൽ തിരുവനന്തപുരം പ്രത്യേക വിജിലൻസ് കോടതി നാളെ വിധി പറയും.
പരീക്ഷാ നടത്തിപ്പിൽ ഉണ്ടായത് സാങ്കേതിക പിഴവ് മാത്രമാണെന്നും പ്രതികൾക്കെതിരായ കേസ് രാഷ്ട്രീയ പകപോക്കലാണെന്നും പ്രതിഭാഗം കോടതിയിൽ വാദിച്ചു. പൂർണമായും കംപ്യൂട്ടർ സംവിധാനത്തിലൂടെ നടത്തുന്ന പരീക്ഷയിൽ എങ്ങനെ തിരിമറി നടത്താൻ കഴിയുമെന്നും, സംവിധാനങ്ങൾ പരിശോധിച്ചാൽ ഇക്കാര്യം വ്യക്തമാകുമെന്നും പ്രതികളുടെ അഭിഭാഷകർ ചൂണ്ടിക്കാട്ടി. തങ്ങൾ നിരപരാധികളാണെന്നും അതിനാൽ ജാമ്യം അനുവദിക്കണമെന്നും പ്രതിഭാഗം കോടതിയിൽ വാദിച്ചു.
എന്നാൽ, പ്രതികൾക്കു ജാമ്യം നൽകുന്നതിനെ പ്രോസിക്യൂഷൻ ശക്തമായി എതിർത്തു. കേസന്വേഷണം പ്രാഥമിക ഘട്ടത്തിലാണെന്നും കൂടുതൽ തെളിവുകൾ ശേഖരിച്ചുവരികയാണെന്നും പ്രോസിക്യൂഷൻ കോടതിയെ അറിയിച്ചു. ഈ സാഹചര്യത്തിൽ പ്രതികൾക്കു ജാമ്യം അനുവദിക്കുന്നത് അന്വേഷണത്തെ പ്രതികൂലമായി ബാധിക്കുമെന്നും സർക്കാർ അഭിഭാഷക വ്യക്തമാക്കി.
കേസുമായി ബന്ധപ്പെട്ട് സതീഷ് ഉൾപ്പടെയുള്ള പ്രതികളെ വിജിലൻസ് നേരത്തെ കസ്റ്റഡിയിൽ വാങ്ങി വിശദമായി ചോദ്യം ചെയ്തിരുന്നു. ഇതിനു പിന്നാലെയാണ് പ്രതികൾ പ്രത്യേക വിജിലൻസ് കോടതിയിൽ ജാമ്യഹർജി സമർപ്പിച്ചത്. ജാമ്യാപേക്ഷയിലെ ഇരുവിഭാഗത്തിന്റെയും വാദം കേട്ട ശേഷമാണ് കോടതി വിധി പറയാനായി നാളത്തേക്കു മാറ്റിയത്.
Kerala
തിരുവനന്തപുരം: പുതിയ മദ്യനയത്തിലൂടെ ബെവ്കോ ഔട്ട്ലെറ്റുകളുടെ മുഖം മാറും. എന്നാൽ, എണ്ണം കൂട്ടില്ല. ഔട്ട്ലെറ്റുകളുടെ രൂപഘടന ഏകീകരിക്കും. സെൽഫ് ഹെൽപ് ഔട്ട്ലെറ്റുകൾക്ക് പ്രാധാന്യം നൽകും. ഈ ആഴ്ച തന്നെ നിർദേശങ്ങൾ മുഖ്യമന്ത്രിക്ക് മുന്നിലെത്തും എന്നാണ് വിവരം.
ഔട്ടലെറ്റുകളുടെയും വേർഹൗസുകളുടെയും നടത്തിപ്പ് ആവശ്യമെങ്കിൽ സഹകരണ സംഘങ്ങൾക്ക് ലഭ്യമാക്കും. ചില്ലറ വിൽപ്പനയിലും സഹകരണ സംഘങ്ങളുടെ പങ്കാളിത്തം വന്നേക്കും.
കള്ളുചെത്ത് മേഖലയിൽ സമഗ്ര പരിഷ്കരണം വരും. അതേസമയം, വീര്യം കുറഞ്ഞ മദ്യത്തിൽ നയപരമായ നിലപാട് യുഡിഎഫ് ഉപസമിതിക്കു ശേഷമായിരിക്കും സ്വീകരിക്കുക.
Kerala
കാസര്ഗോഡ്: നിറതോക്കുമായി സ്കൂട്ടറില് പോവുകയായിരുന്ന യുവാവ് അബദ്ധത്തിയല് വെടിയേറ്റു മരിച്ചു. മുളിയാര് കാട്ടിപ്പള്ളത്തെ മൊയ്തു-ജമീല ദമ്പതികളുടെ മകന് ഹൈദര് അലി (28) ആണു മരിച്ചത്.
ഞായറാഴ്ച രാത്രിയാണ് സംഭവം. കാട്ടിപ്പള്ളത്തെ ഗ്രൗണ്ടിൽ സ്കൂട്ടറില്നിന്നു വീണുകിടക്കുന്ന നിലയിലാണ് ഹൈദര് അലിയെ കണ്ടെത്തിയത്. വീണുകിടന്നിരുന്ന ഹൈദറിനെ ആശുപത്രിയിലെത്തിച്ചെങ്കിലും മരിച്ചിരുന്നു.
താഴെ വീഴാതിരിക്കാന് തോക്കിന്റെ പിന്ഭാഗം കാലുകള്ക്കിടയിലും തോക്കിന്കുഴല് ഷര്ട്ടിനിടയിലൂടെയും കയറ്റിവച്ചാണ് ഹൈദര് യാത്ര ചെയ്തത്. യാത്രയ്ക്കിടെ തോക്കില്നിന്ന് അബദ്ധത്തില് വെടിപൊട്ടിയതാകാമെന്നാണു സൂചന. വെടിയുണ്ട താടിയെല്ലിലൂടെ തുളച്ചുകയറി തലയിലൂടെ പുറത്തേക്കു പോകുകയായിരുന്നു.
മൃതദേഹം കാസര്ഗോഡ് ജനറല് ആശുപത്രി മോര്ച്ചറിയിലേക്കു മാറ്റി. ആദൂര് പൊലിസ് കേസെടുത്ത് അന്വേഷണം ആരംഭിച്ചു. വിദേശത്തായിരുന്ന ഹൈദര് അടുത്തിടെയാണു നാട്ടിലെത്തി ബോവിക്കാനത്ത് ടെക്സ്റ്റൈല് ഷോപ്പ് ആരംഭിക്കുന്നത്. സഹോദരങ്ങള്: ഖദീജ, നസീറ, ഷാഫി (ദുബായ്).
Kerala
കൊച്ചി: ചേരാനല്ലൂരില് ജഡ്ജിയുടെ മകന് ഓടിച്ച ആഡംബരക്കാര് ഇടിച്ചു കൊല്ലപ്പെട്ട ജയബാലകൃഷ്ണന്റെ തട്ടുകട ‘ശ്രീകൃഷ്ണ ടീ സ്റ്റാള്’ വീണ്ടും തുറന്നു.
മകള് ഭദ്രകീര്ത്തിയുടെ നേതൃത്വത്തില് ജയബാലകൃഷ്ണന്റെ ഭാര്യയും മകനും ചേര്ന്നാണു കട തുറന്നത്. ഹൈദരാബാദിലെ ജോലി ഉപേക്ഷിച്ച മകള്തന്നെയാണ് പ്രവര്ത്തനങ്ങള്ക്കു മുന്നില്.
ജയബാലകൃഷ്ണന്റെ വേര്പാടിലും നാട്ടുകാരുടെയും മാധ്യമങ്ങളുടെയും പൂര്ണ പിന്തുണയോടെയാണു കട പുനരാരംഭിക്കാന് കുടുംബം തീരുമാനിച്ചത്. ജയബാലകൃഷ്ണന് മുന്പ് നടത്തിവന്ന അതേ രീതിയില് യാതൊരു മാറ്റവുമില്ലാതെ ദോശയും ചമ്മന്തിയും ഓംലെറ്റും നല്കി തട്ടുകട മുന്നോട്ടുകൊണ്ടുപോകാനാണ് ഇവരുടെ തീരുമാനം.
ഇന്നലെ വൈകുന്നേരം ജയപാലകൃഷ്ണന്റെ ചിത്രത്തില് തിരിതെളിച്ചാണ് ചിറ്റൂര് നിവാസികള്ക്ക് ഏറെ പ്രിയപ്പെട്ട കടയുടെ പ്രവര്ത്തനം പുനരാരംഭിച്ചത്. ജയബാലകൃഷ്ണന്റെ കൈപ്പുണ്യം അറിഞ്ഞ ചിറ്റൂരിലെ പ്രദേശവാസികളും അവിടെയുണ്ടായിരുന്നു.
Kerala
കൊച്ചി: കാലടി സംസ്കൃത സര്വകലാശാലയില് സസ്പെന്ഷനില് കഴിയുന്ന 16 വിദ്യാര്ഥികള് നല്കിയ ഭേദഗതി ഹര്ജിയിലെ വാദം ഇന്നു നടക്കും.
സസ്പെന്ഷനെതിരേയും പരീക്ഷയെഴുതാന് അനുമതി തേടിയും നല്കിയ ആദ്യ ഹര്ജി മാപ്പപേക്ഷിച്ചാല് സസ്പെന്ഷന് പിന്വലിക്കാമെന്ന സര്വകലാശാലയുടെ തീരുമാനം കൂടി ചോദ്യം ചെയ്ത് ഭേദഗതി ചെയ്തു നല്കിയെങ്കിലും രജിസ്ട്രിയിലെ നടപടിക്രമങ്ങള് പൂര്ത്തിയാകാത്തതിനാല് ഇന്നലെ പരിഗണിക്കാനായില്ല. തുടര്ന്നാണു ജസ്റ്റീസ് പി.വി. കുഞ്ഞികൃഷ്ണന് ഹര്ജി മാറ്റിയത്.
തങ്ങള്ക്കെതിരായ കുറ്റങ്ങള് തെളിയിക്കാന് സര്വകലാശാലയുടെ പക്കല് തെളിവുകളില്ലെന്നും അന്വേഷണറിപ്പോര്ട്ടില് കൃത്യമായ കാരണങ്ങള് പറയുന്നില്ലെന്നും വിദ്യാര്ഥികള് നല്കിയ ഹര്ജിയില് പറയുന്നു.
സംഭവവുമായി ബന്ധപ്പെട്ടു പൊലിസ് രജിസ്റ്റര് ചെയ്ത രണ്ടാമത്തെ എഫ്ഐആര് വിസിയുടെ പരാതിയില് കെട്ടിച്ചമച്ചതാണെന്നും സിസിടിവി ദൃശ്യങ്ങള് പരിശോധിച്ചാല് സത്യാവസ്ഥ ബോധ്യപ്പടുമെന്നും ഹര്ജിയില് പറയുന്നു.
Kerala
ചങ്ങനാശേരി അതിരൂപതാ കേന്ദ്രത്തിന് കിഴക്ക് ഒരു കിലോമീറ്ററിനുള്ളില് വാഴൂര് റോഡ് സൈഡിലുള്ള പാറക്കൂട്ടത്തിനുമേല് നിര്മിച്ച പള്ളിയാണ് പാറേല് പള്ളി. ഇവിടെ ഈ പള്ളി പണിയപ്പെട്ടത് കേവലം യാദൃച്ഛികമല്ല, തികച്ചും ദൈവിക പദ്ധതിയാണ്. പരിശുദ്ധ അമലോത്ഭവ മാതാവിന്റെ പള്ളി നിര്മിക്കാന് ദൈവം അനാദിയിലേ മാറ്റിവച്ച പുണ്യസ്ഥലമാണ് ഈ പാറക്കൂട്ടം.
പത്രോസാകുന്ന പാറമേലാണ് കര്ത്താവ് സഭയെ പടുത്തുയര്ത്തിയത്. സമാനമായി പാറമേല് പണുതുയര്ത്തിയ ഈ പള്ളി ചങ്ങനാശേരി പ്രാദേശിക സഭയുടെ വിശ്വാസ സ്ഥൈര്യത്തിന്റെയും ആത്മീയ ഉറപ്പിന്റെയും പ്രതീകമാണ്.
പുതിയ പള്ളിസമുച്ചയത്തിന്റെ കല്ലിടീല് കര്മം എനിക്ക് വേറിട്ട ഒരോര്മയാണ്. 2014 നവംബര് 24ന് ഫ്രാന്സിസ് മാര്പാപ്പ ഇതിന്റെ അടിസ്ഥാന ശില വത്തിക്കാനില്വച്ച് ആശീര്വദിച്ചു. ഈ കല്ലാണ് 2015 ഓഗസ്റ്റ് 15ന് മാർ ജോസഫ് പെരുന്തോട്ടം മെത്രാപ്പോലീത്ത സ്ഥാപിച്ചത്. അതിനൊപ്പം മറ്റു പതിനാല് കല്ലുകള്കൂടി അന്നിട്ടു എന്നത് ഏറെ പ്രത്യേകതയും അര്ഥവ്യാപ്തിയും ഉള്ള കാര്യമാണ്.
മാർ ജോസഫ് പവ്വത്തില് പിതാവും കൂരിയാ അംഗങ്ങളും വൈദിക സന്യസ്ത അല്മായ പ്രതിനിധികളും നിര്മാണ കമ്മിറ്റി പ്രതിനിധികളുമാണ് അന്ന് മറ്റു ശിലകള് സ്ഥാപിച്ചത്. അതിരൂപതയുടെ അന്നത്തെ പാസ്റ്ററല് കൗണ്സില് സെക്രട്ടറി എന്ന നിലയില് ഒരു കല്ലിടുന്നതില് പങ്കാളിയാകാന് എനിക്ക് അവസരം ലഭിച്ചത് വലിയ ഭാഗ്യമായി കാണുന്നു.
ഈശോ മിശിഹായെയും പന്ത്രണ്ട് ശ്ലീഹന്മാരെയും മോശയെയും ഏലിയായെയും പ്രതിനിധാനം ചെയ്യുന്ന പതിനഞ്ച് ശിലകളാണ് അന്ന് സ്ഥാപിച്ചത്.
ഈശോമിശിഹാ ആകുന്ന മൂലക്കല്ലില് ശ്ലീഹന്മാരുടെയും പ്രവാചകന്മാരുടെയും അടിത്തറയില് പണുതുയര്ത്തപ്പെട്ട സഭയുടെ മനോഹര പ്രതീകമാണ് പാറേല് അമലോത്ഭവ മാതാ തീര്ഥാടന കേന്ദ്രം. ബസിലിക്കാ പദവി ലഭിച്ചതോടെ ഈ തീര്ഥാടന കേന്ദ്രത്തിന്റെ പ്രാധാന്യവും പ്രസക്തിയും വര്ധിച്ചു. വരും നാളുകളില് അന്തര്ദേശീയ തീര്ഥാടന കേന്ദ്രമായി ഇത് വളരും എന്നതില് സംശയമില്ല.
Kerala
തിരുവനന്തപുരം: സെക്രട്ടേറിയറ്റിനു മുന്നില് നടന്നുവരുന്ന എല്പിഎസ്ടി (ലോവര് പ്രൈമറി സ്കൂള് ടീച്ചര്) റാങ്ക് ഹോള്ഡേഴ്സ് അസോസിയേഷന് സമരത്തില് നിരാഹാര സമരം നടത്തുന്ന വളര്മതി ആശുപത്രിയില് തീവ്രപരിചരണ വിഭാഗത്തില് പ്രവേശിപ്പിച്ചിട്ടും നിരാഹാര സമരം തുടരുന്നു.
സമരസമിതിയുമായി ചര്ച്ച നടത്താന് സര്ക്കാര് തീരുമാനിച്ചെങ്കിലും ഇന്നലെ വൈകുന്നേരം വരെ ചര്ച്ചകളുണ്ടായില്ല.
സമരസമിതി സെക്രട്ടറി എസ്. വളര്മതിയുടെ ആരോഗ്യനില അതീവ ഗുരുതരമായി തുടരുന്ന സാഹചര്യത്തിലാണ് മുഖ്യമന്ത്രി വി.ഡി. സതീശന്റെ നേരിട്ടുള്ള ഇടപെടലില് ചര്ച്ചയ്ക്കു തയാറായത്.
പൊതുവിദ്യാഭ്യാസ മന്ത്രി എന്. ഷംസുദ്ദീന് സമരസമിതിയുമായി ചര്ച്ച നടത്തുമെന്നായിരുന്നു മുഖ്യമന്ത്രിയുടെ ഓഫിസ് അറിയിച്ചിരുന്നത്. ഇന്നലെ ആലപ്പുഴ ജില്ലയിലായിരുന്നു വിദ്യാഭ്യാസ മന്ത്രി എന്. ഷംസുദ്ദീന് ഔദ്യോഗിക പരിപാടികളുണ്ടായിരുന്നത്.
ചർച്ചയ്ക്ക് തയാറെന്ന് മന്ത്രി
ആലപ്പുഴ: എൽപിഎസ്ടി റാങ്ക് ലിസ്റ്റിലെ ഉദ്യോഗാർഥികളുമായി വീണ്ടും ചർച്ച നടത്താൻ സർക്കാർ തയാറാണെന്ന് മന്ത്രി എൻ. ഷംസുദ്ദീൻ. ചേർത്തലയിൽ മാധ്യമപ്രവർത്തകരോടു സംസാരിക്കുകയായിരുന്നു അദ്ദേഹം.
ഉദ്യോഗാർഥികളുമായി നേരത്തേയും പലതവണ ചർച്ച നടത്തിയിട്ടുണ്ട്. പ്രശ്നം പരിഹരിക്കാമെന്ന് സർക്കാർ ഉറപ്പുനൽകിയതുമാണ്. ചർച്ചയ്ക്ക് സർക്കാർ സന്നദ്ധമാണെങ്കിലും തീയതിയും സമയവും ഇതുവരെ തീരുമാനിച്ചിട്ടില്ലെന്നേയുള്ളൂവെന്നും അദേഹം പറഞ്ഞു.
Kerala
പാലക്കാട്: ഭക്തിയുടെ നിറവിൽ ആയിരങ്ങൾക്കു സായുജ്യമേകി കൽപാത്തിയിൽ ചരിത്രപ്രസിദ്ധമായ ദേവരഥ സംഗമം. ആയിരക്കണക്കിനു ഭക്തരെസാക്ഷിയാക്കി ശ്രീ വിശാലാക്ഷിസമേത വിശ്വനാഥ സ്വാമി ക്ഷേത്രത്തിനു സമീപമുള്ള തേരുമുട്ടിയിൽ ദേവരഥങ്ങൾ സംഗമിച്ചു.
വിശാലാക്ഷിസമേത വിശ്വനാഥസ്വാമി (ശിവൻ), മന്തക്കര മഹാഗണപതി, പഴയ കൽപാത്തി ലക്ഷ്മി നാരായണ പെരുമാൾ, ചാത്തപുരം പ്രസന്ന മഹാഗണപതി ക്ഷേത്രങ്ങളിൽനിന്നുള്ള അലങ്കരിച്ച രഥങ്ങൾ കൽപാത്തിയിലെ അഗ്രഹാര വീഥികളിലൂടെ ഗ്രാമപ്രദക്ഷിണം നടത്തിയ ശേഷമാണു ദേവസംഗമത്തിനായി തേരുമുട്ടിയിൽ എത്തിച്ചേർന്നത്.
ലക്ഷ്മി നാരായണ പെരുമാൾ ക്ഷേത്രത്തിൽനിന്നു വിഗ്രഹം തേരിലേറ്റിയതോടെ ആവേശം കൊടുമുടിയിലെത്തി. രഥസംഗമത്തിനുശേഷം തേരുമുട്ടിയിൽ രഥങ്ങൾ നിർത്തിയിട്ടു.
ഇന്നു പുലർച്ചെ 2.30ഓടെയാണ് എഴുന്നള്ളത്ത്. തുടർന്ന് രാവിലെ നാല് അഗ്രഹാര ക്ഷേത്രങ്ങളിലും ധ്വജ അവരോഹണം നടക്കുന്നതോടെ പത്തുനാൾ നീണ്ട രഥോത്സവത്തിന് പരിസമാപ്തിയാകും.
Kerala
തിരുവനന്തപുരം: തലസ്ഥാനത്തെ ചാലയിൽ വൈഷ്ണവി ജ്വല്ലറി ഉടമ നന്ദകുമാറിനെ ആക്രമിച്ച് സ്വർണം കവർന്ന കേസിൽ മോഷണം പോയ സ്വർണത്തിന്റെ ഒരു ഭാഗം കണ്ടെടുത്തു.
വെള്ളായണിയിൽ ആളൊഴിഞ്ഞ പറമ്പിൽ കുഴിച്ചിട്ട നിലയിലായിരുന്നു ആഭരണങ്ങൾ. പ്രതി അനൂപ് രാജാണ് സ്വർണം കുഴിച്ചിട്ടതെന്നാണ് പൊലിസ് നൽകുന്ന സൂചന.
വിശദമായ ചോദ്യം ചെയ്യലിന്റെ അടിസ്ഥാനത്തിൽ നടത്തിയ പരിശോധനയിൽ ഇന്നലെ വൈകുന്നേരത്തോടെയാണ് സ്വർണം കണ്ടെത്തിയത്. എന്നാൽ, സ്വർണ ത്തിന്റെ അളവ് എത്രയെ ന്നു പൊലിസ് വ്യക്തമാക്കിയിട്ടില്ല. അതേസമയം, കേസിലെ ഗൂഢാലോചനയുടെ കൂടുതൽ വിവരങ്ങൾ ഇന്നലെ പുറത്തു വന്നു.
25 ലക്ഷം രൂപയ്ക്കാണ് കവർച്ചയുടെ ക്വട്ടേഷൻ ഉറപ്പിച്ചതെന്നാണു സൂചന. കവർച്ചയ്ക്കു മുന്നോടിയായി പ്രതികൾ പനവിളയിലെ ഒരു ആഡംബര ഹോട്ടലിൽ ഒത്തുചേർന്ന് ൂഢാലോചന നടത്തി യെന്നാണ് പൊലിസ് നൽകുന്ന വിവരം.
മാളവിക ജ്വല്ലറി ഉടമ ജയറാം, അമോൽ, ദിലീപ് എന്നിവർ ചേർന്നാണ് കവർച്ച പദ്ധതി തയ്യാറാക്കിയതെങ്കിലും കൂടുതൽ ജ്വല്ലറി ഉടമകൾക്ക് ഇവരുമായി ബന്ധമുണ്ടോ എന്നും അന്വേഷിക്കുന്നുണ്ട്.ഇക്കാര്യത്തിൽ പിടിയിലായവർ നൽകിയ മൊഴികൾ പോലീസ് പരിശോധിച്ചു വരികയാണ്.
മാളവിക ജ്വല്ലറി ഉടമ ജയറാമിനെ ചോദ്യം ചെയ്യലിനു ശേഷം പൊലിസ് വിട്ടയച്ചെങ്കിലും ജയറാം ആണ് കവർച്ചയുടെ മുഖ്യ ആസൂത്രകൻ എന്നാണ് പിടിയിലായവർ പൊലിസിനു നൽകിയ മൊഴി.
Kerala
തൃശൂർ: ഒറ്റപ്പാലത്ത് യുഎപിഎ കേസിൽ അറസ്റ്റിലായ ലോറൻസ് ബിഷ്ണോയ് സംഘം ഗുരുമൂർത്തി ലക്ഷ്യമിട്ടതു മതപരമായ ഭിന്നതയെന്നു തൃശൂർ സിറ്റി പൊലിസ് കമ്മിഷണർ. ഇയാളുമായി ഒറ്റപ്പാലത്ത് തെളിവെടുപ്പു നടത്തി. ഇയാൾ ജോലിചെയ്തിരുന്ന തൃക്കങ്ങോട്ടെ സ്ഥാപനത്തിലാണു തെളിവെടുപ്പു നടത്തിയത്. മുഖം മറച്ചാണ് തെളിവെടുപ്പിനെത്തിച്ചത്. ഗുരുമൂർത്തിയും നേരത്തേ പിടിയിലായ യഷ്സിംഗും പരസ്പരം അറിയുന്നവരാണെന്നും ഉദുമൽപേട്ടയിലെ ഭാര്യവീട്ടിലും തെളിവെടുപ്പു നടത്തിയെന്നും പൊലിസ് വ്യക്തമാക്കി.
ലോറൻസ് ബിഷ്ണോയി സംഘവുമായി ബന്ധമുണ്ടെന്നു കണ്ടെത്തിയാണ് തിരുനെൽവേലി സ്വദേശി ഗുരുമൂർത്തി (27)യെ പൊലിസ് അറസ്റ്റ് ചെയ്തത്. മുംബൈയിലെ ജൂത പൗരന്മാരുടെ വിവരങ്ങളും സ്ഥലങ്ങളുടെ ചിത്രങ്ങളും പകർത്തി അയച്ചതിന് പിടിയിലായ യഷ് സിംഗിനെ റിക്രൂട്ട് ചെയ്തതു ഗുരുമൂർത്തിയാണെന്നും മുംബൈയിലെ ജൂതരുടെ വിവരങ്ങൾ ശേഖരിച്ചതിനു യഷ് സിംഗിന് 25,000 രൂപ പ്രതിഫലം നൽകിയെന്നും പൊലിസ് പറഞ്ഞു.
ഭീകരസംഘങ്ങൾക്കായി യുവാക്കളെ കണ്ടെത്തുന്നതും പണം നൽകി ദൗത്യമേൽപ്പിക്കുന്നതും ഗുരുമൂർത്തിയാണെന്നാണു കണ്ടെത്തൽ. ഇയാൾ ഏറെക്കാലം മുംബൈയിലായിരുന്നു താമസം. മുംബൈയിൽ ഫോട്ടോഗ്രാഫറായി പ്രവർത്തിച്ച് ശൃംഖല വിപുലമാക്കി.
നാലുമാസം മുൻപാണ് ഒറ്റപ്പാലത്ത് വന്നതെന്നാണു മൊഴി. ഒരുവർഷമായി ഗുരുമൂർത്തി കേരളത്തിലുണ്ടെന്നാണ് കണ്ടെത്തൽ. ഇതെന്തിനാണെന്നും പൊലിസ് അന്വേഷിക്കുന്നുണ്ട്. ആറ് ബാങ്ക് അക്കൗണ്ടുകൾ ഇയാളുടെ കൈവശമുണ്ടെന്നും പണമിടപാടു പരിശോധിക്കുകയാണെന്നും, ഇയാളുടെ ഭാര്യയുടെ അക്കൗണ്ടിലേക്കു വിദേശത്തുനിന്നു പണമെത്തിയെന്നും പൊലിസ് പറയുന്നു.
Kerala
കൊച്ചി: റോഡ് മുറിച്ചുകടക്കുന്നതിനിടെ വാഹനമിടിച്ച് വീട്ടമ്മ മരിച്ചു. ഹൈക്കോടതി റിട്ടയേഡ് ജഡ്ജി പി.ആർ. രാമന്റെ ഭാര്യ എൻ.പി വിജയലക്ഷ്മിയാണ് മരിച്ചത്.
തിങ്കളാഴ്ച വൈകുന്നേരം കടവന്ത്രയിലാണ് സംഭവം. കടവന്ത്ര സിഗ്നലിൽ റോഡ് മുറിച്ചുകടക്കുന്നതിനിടെ കോൺക്രീറ്റ് മിക്സിംഗ് വാഹനം ഇടിച്ചാണ് അപകടം ഉണ്ടായത്.
Kerala
കോഴിക്കോട്: ജപ്തി നടപടികള്ക്കിടെ വീട്ടമ്മ ആത്മഹത്യചെയ്ത സംഭവത്തില് വിശദീകരണവുമായി സൗത്ത് ഇന്ത്യന് ബാങ്ക്.
വായ്പാ തിരിച്ചുപിടിക്കൽ നടപടികൾ നിലവിലുള്ള നിയമവ്യവസ്ഥകളും കോടതി നിർദേശങ്ങളും കൃത്യമായി പാലിച്ചുകൊണ്ട് മാത്രമാണെന്നും വായ്പാ കുടിശിക തീർപ്പാക്കുന്നതിനായി ഒറ്റത്തവണ തീർപ്പാക്കൽ (ഒടിഎസ്) ഉൾപ്പടെയുള്ള അവസരങ്ങളും സാവകാശവും നൽകിയിരുന്നുവെങ്കിലും അവ പ്രയോജനപ്പെടുത്താൻ ഇടപാടുകാർക്ക് സാധിക്കാതെ വരികയായിരുന്നുവെന്നും ബാങ്ക് അധികൃതര് വാര്ത്താ കുറിപ്പില് വ്യക്തമാക്കി. നിലവിലെ സാഹചര്യത്തില് ഡിസംബര് 15 വരെ തുടര് നടപടികള് നിര്ത്തിവച്ചതായും അധികൃതര് അറിയിച്ചു.
കൂത്താളി കുഞ്ഞോത്ത് കുയ്യോടന്കണ്ടി ബാബു നടുവണ്ണൂർ ശാഖയിൽനിന്ന് 2018ൽ 7,68,000 രൂപയും ഭാര്യ കവിത 16,80,000 രൂപയും പരിധിയുള്ള രണ്ടു ഭവന വായ്പകൾ എടുത്തിരുന്നു.19 സെന്റ് ഭൂമി ഈടായി നൽകിയായിരുന്നു. വായ്പ തിരിച്ചടവ് മുടങ്ങിയതോടെ പലിശയും മറ്റ് ബാധ്യതകളും ഉൾപ്പടെ കുടിശിക 49.59 ലക്ഷം രൂപയായി.
2021 ഫെബ്രുവരി അഞ്ചിന് വായ്പാ അക്കൗണ്ടുകൾ നിഷ്ക്രിയ ആസ്തിയായി പ്രഖ്യാപിച്ചു. തുടർന്ന് സർഫാസി നിയമത്തിലെ വകുപ്പ് പ്രകാരം സ്വത്ത് ഏറ്റെടുക്കാൻ 2023 മാർച്ച് 14ന് അനുമതി ലഭിച്ചു. ഇതിന്റെ ഭാഗമായി അഡ്വ. കമ്മിഷണർ അഞ്ചുതവണ ഒഴിപ്പിക്കൽ നോട്ടീസ് നൽകി.
2024 സെപ്റ്റംബർ രണ്ടിലെ നോട്ടീസിനെതിരേ കവിത നൽകിയ ഹർജി 2025 ജൂൺ അഞ്ചിന് എറണാകുളം ഡെബ്റ്റ് റിക്കവറി ട്രൈബ്യൂണൽ തള്ളി. തിരിച്ചുപിടിക്കൽ നടപടികൾക്കെതിരേ കേരള ഹൈക്കോടതിയിൽ മൂന്ന് റിട്ട് ഹർജികളും നൽകിയിരുന്നു. ഇവ തീർപ്പാക്കിയതല്ലാതെ നടപടികൾക്ക് സ്റ്റേ ലഭിച്ചിട്ടില്ല.
2026 ജനുവരി ഏഴിലെ ഒഴിപ്പിക്കൽ നോട്ടീസിനെ തുടർന്ന് കുടിശിക തീർക്കാൻ വായ്പക്കാർ രണ്ടുമാസത്തെ സാവകാശം തേടി. ഇതിനിടെ ബാബു ഡെബ്റ്റ് റിക്കവറി ട്രൈബ്യൂണലിൽ നൽകിയ ഹർജിയിൽ വീട് ഏറ്റെടുക്കൽ നടപടികൾക്ക് സ്റ്റേ അനുവദിക്കണമെന്ന ആവശ്യവും തള്ളപ്പെട്ടു.
ജൂലൈ 15ന് നടന്ന വായ്പാ അദാലത്തിൽ 37 ലക്ഷം രൂപയ്ക്ക് ഒറ്റത്തവണ തീർപ്പാക്കൽ (ഒടിഎസ്) സൗകര്യം ബാങ്ക് അനുവദിച്ചു.
ജൂലൈ 31നകം 7.5 ലക്ഷവും സെപ്റ്റംബർ 25നകം ബാക്കി തുകയും അടയ്ക്കണമെന്നായിരുന്നു വ്യവസ്ഥ. എന്നാൽ വായ്പാ ഇടപാടുകാർ ഈ വ്യവസ്ഥകൾ പാലിച്ചില്ല. തുടര്ന്ന് ഒഴിപ്പിക്കൽ നോട്ടീസ് വായ്പാ ഇടപാടുകാർക്ക് നേരിട്ട് കൈമാറുകയായിരുന്നുവെന്നും ബാങ്ക് അധികൃതര് വ്യക്തമാക്കി.
Kerala
കാക്കനാട്: മൂന്നുപേരുടെ ദാരുണാന്ത്യത്തിനിടയാക്കിയ നെടുമ്പാശേരി മിനി കൂപ്പർ വാഹനാപകടക്കേസിലെ ഒന്നാംപ്രതി സുഹൈൽ സജീവ്(19) ബോസ്റ്റൽ സ്കൂളിൽനിന്നു മോചിതനായി.
ഹൈക്കോടതി ജാമ്യം അനുവദിച്ചതിനെത്തുടർന്ന് 36 ദിവസത്തെ റിമാൻഡ് കാലാവധി പൂർത്തിയാക്കിയാണ് സുഹൈൽ കാക്കനാട് ബോസ്റ്റൽ സ്കൂളിൽനിന്ന് ഇന്നലെ ഉച്ചകഴിഞ്ഞ് 2.30ന് പുറത്തിറങ്ങിയത്.
മാധ്യമങ്ങളുടെ മുന്നിൽനിന്ന് മറച്ചുപിടിച്ചു കൊണ്ടുപോകുന്നതിനായി ബോസ്റ്റൽ സ്കൂളിനുമുന്നിൽ സുഹൈലിന്റെ ബന്ധുക്കൾ വൻ സന്നാഹമാണ് ഒരുക്കിയിരുന്നത്. സുരക്ഷയൊരുക്കാനെത്തിയ ബന്ധുകൾ മാധ്യമസംഘത്തിനുനേരേ ബലപ്രയോഗം നടത്തിയതായും ആരോപണമുണ്ട്.
മജിസ്ട്രേറ്റ് കോടതിയും സെഷൻസ് കോടതിയും ജാമ്യാപേക്ഷ തള്ളിയതിനെത്തുടർന്ന് പ്രതികൾ ഹൈക്കോടതിയെ സമീപിക്കുകയായിരുന്നു. കഴിഞ്ഞ ആറിന് കേസിലെ നാലു പ്രതികൾക്കും ഹൈക്കോടതി ജാമ്യം അനുവദിച്ചെങ്കിലും ഒന്നാംപ്രതിയായ സുഹൈലിനെ പത്തു ദിവസത്തിനുശേഷം മാത്രമേ മോചിപ്പിക്കാവൂവെന്ന കർശന വ്യവസ്ഥ മുന്നോട്ടുവച്ചിരുന്നു. ഇതനുസരിച്ചാണ് ഇന്നലെ മോചനം സാധ്യമായത്.
ഒരു ലക്ഷം രൂപയുടെ ബോണ്ടും രണ്ട് ആൾജാമ്യവും നൽകണമെന്ന വ്യവസ്ഥയിലാണു കോടതി ജാമ്യം അനുവദിച്ചിരിക്കുന്നത്. കേസിലെ മറ്റു പ്രതികളായ ജോയൽ എസ്. ആന്റോ, നിനവ്, അമീൻ ഷാ എന്നിവർ നേരത്തേ ജാമ്യം ലഭിച്ച് പുറത്തിറങ്ങിയിരുന്നു.
Kerala
കൊച്ചി: ലഹരിമരുന്നിനെതിരായ നടപടികളുമായി പൊലിസിന് ശക്തമായി മുന്നോട്ടു പോകാമെന്നു ഹൈക്കോടതി. അതേസമയം, ലഹരിമരുന്ന് ഉപയോഗമുണ്ടെന്ന മുന്വിധിയോടെ പൊലിസ് പെരുമാറരുതെന്ന് ജസ്റ്റീസ് ദേവന് രാമചന്ദ്രന്, ജസ്റ്റീസ് ബസന്ത് ബാലാജി എന്നിവരുള്പ്പെട്ട ഡിവിഷന് ബെഞ്ച് അഭിപ്രായപ്പെട്ടു.
ഡിജെ പാര്ട്ടിയാണെങ്കിലും മറ്റെന്തു കൂട്ടായ്മയാണെങ്കിലും കുറ്റകൃത്യം തടയാന് പൊലിസിന് ഉത്തരവാദിത്വമുണ്ട്. ലഹരിമരുന്ന് ഒരു കാരണവശാലും അനുവദിക്കരുത്. ഡിജെ പാര്ട്ടിക്കു പോകുന്നവരെ പൊലിസ് നിരീക്ഷിക്കുന്നതില് തടസമില്ലെന്നു കോടതി ചൂണ്ടിക്കാട്ടി. പൊലിസ് സാന്നിധ്യമുണ്ടെങ്കില് പങ്കെടുക്കുന്നവര്ക്ക് ഒരു ഭയമുണ്ടാകും.
മാനേജര്മാരെ വ്യക്തിപരമായി ഉത്തരവാദികളാക്കിയാല് ഫലമുണ്ടാകുകയും ചെയ്യും. കുറ്റകൃത്യം നടന്നിട്ട് നടപടിയെടുക്കുന്നതിനേക്കാള് നല്ലത് കുറ്റകൃത്യം തടയുന്നതാണ്. എന്നാല്, ഇതിന്റെ പേരില് നൈറ്റ് ലൈഫ് വേണ്ടെന്നു പറയാനാകില്ല. പൊതുജനങ്ങള്ക്കു ശല്യമുണ്ടാകാത്തപക്ഷം സ്വകാര്യയിടങ്ങളില് നടക്കുന്ന ഡിജെ അടക്കം പാര്ട്ടികള് തടയാനാകില്ല.
പഞ്ചനക്ഷത്ര ബാറുകളുടെ പ്രവര്ത്തനത്തില് പൊലിസ് ഏര്പ്പെടുത്തിയ നിയന്ത്രണം റദ്ദാക്കിയ സിംഗിള് ബെഞ്ച് ഉത്തരവിനെതിരേ സര്ക്കാര് നല്കിയ അപ്പീലാണ് ഡിവിഷന് ബെഞ്ച് പരിഗണിച്ചത്. നക്ഷത്ര ഹോട്ടലുകളിലെ ഡിജെ പാര്ട്ടികള്ക്കും പ്രവര്ത്തന സമയത്തിനും നിയന്ത്രണമേര്പ്പെടുത്തിയായിരുന്നു കൊച്ചി സിറ്റി പൊലിസ് നേരത്തേ നോട്ടിസുകള് നല്കിയത്.
നിയമപരമായും അനുവദനീയമായ രീതിയിലും ക്രമസമാധാനം നടപ്പാക്കാന് സിംഗിള് ബെഞ്ച് ഉത്തരവ് തടസമാകില്ലെന്നു നേരത്തേ ഡിവിഷന് ബെഞ്ച് ഇടക്കാല ഉത്തരവിട്ടിരുന്നു.
Kerala
മണ്ണാർക്കാട്: മുപ്പതാമത് സംസ്ഥാന സ്കൂൾ ശാസ്ത്രോത്സവത്തിന് ഇന്ന് തുടക്കമാകും. വൈകിട്ട് നാലിന് നെല്ലിപ്പുഴ ഡിഎച്ച്എസ്എസിൽ വിദ്യാഭ്യാസമന്ത്രി എൻ. ഷംസുദ്ദീൻ ഉദ്ഘാടനം ചെയ്യും. വി.കെ. ശ്രീകണ്ഠൻ എംപി അധ്യക്ഷത വഹിക്കും.
ശാസ്ത്രോത്സവ വിളംബര ഘോഷയാത്ര ഉച്ചകഴിഞ്ഞ് മൂന്നിന് ജിഎംയുപി സ്കൂൾ പരിസരത്തുനിന്ന് ആരംഭിക്കും.
നാളെ മുതൽ വിവിധ വേദികളിൽ മത്സരങ്ങൾ നടക്കും. പ്രവൃത്തി പരിചയ മേള ഡിഎച്ച്എസ്എസിലും ഗണിത ശാസ്ത്രമേള കല്ലടി ഹയർ സെക്കൻഡറി സ്കൂളിലും നടക്കും. ശാസ്ത്രമേള, ഐടി മേള, യൂത്ത് ഇന്നവേറ്റീവ് പ്രോഗ്രാം എന്നിവ എംഇഎസ് എച്ച്എസ്എസിലും സ്കിൽ ഫെസ്റ്റ് മത്സരങ്ങൾ ജിഎംയുപി സ്കൂളിലും സ്കിൽ ഫെസ്റ്റ് പ്രദർശനം, കരിയർ ഫെസ്റ്റ് എന്റർടെയ്ൻമെന്റ് പ്രോഗ്രാം എന്നിവ മിനി മുബാസ് ഗ്രൗണ്ടിലും നടക്കും. ഭക്ഷണശാല യൂണിറ്റി എയുപി സ്കൂളിലാണ് സജ്ജമാക്കിയിരിക്കുന്നത്.
രാവിലത്തെയും രാത്രിയിലെയും ഭക്ഷണം ഭക്ഷണശാലയിലും ഉച്ചയ്ക്ക് മത്സരാർഥികൾക്ക് അതത് വേദികൾക്കടുത്ത് സജ്ജീകരിച്ച ഇടങ്ങളിലും ഭക്ഷണം വിതരണംചെയ്യും. ഏഴായിരം മത്സരാർഥികൾ ഉൾപ്പടെ പന്ത്രണ്ടായിരത്തിലേറെ പേർക്ക് ഭക്ഷണമൊരുക്കും.
യാത്രാ സൗകര്യങ്ങൾക്കായി സ്കൂൾ ബസുകൾ ഉപയോഗപ്പെടുത്തിയുള്ള സംവിധാനങ്ങൾ ഒരുക്കിയിട്ടുണ്ട്.
Kerala
തിരുവനന്തപുരം: സംസ്ഥാന സർക്കാരിലെ ബോർഡ്-കോർപറേഷൻ ചെയർമാൻ സ്ഥാനങ്ങളുടെ വിഭജനത്തെച്ചൊല്ലി യുഡിഎഫിലെ ഘടകകക്ഷികൾക്കിടയിലും കടുത്ത അതൃപ്തി പുകയുന്നു.മുസ്ലിം ലീഗിന് അമിത പരിഗണന ലഭിക്കുമ്പോൾ തങ്ങളെ അവഗണിക്കുന്നു എന്നാണ് മറ്റുഘടകകക്ഷികളുടെ പ്രധാന പരാതി.
ബോര്ഡ്- കോര്പറേഷന് നിയമനങ്ങള് അനിശ്ചിതമായി വൈകുന്ന സാഹചര്യത്തിലാണ് ഘടകകക്ഷികള് അതൃപ്തി പരസ്യമാക്കിയത്. യുഡിഎഫിലെ പ്രധാന ഘടകകക്ഷികളായ കേരള കോണ്ഗ്രസ്, ആര്എസ്പി ഉള്പ്പടെ മുഖ്യമന്ത്രിയെ അതൃപ്തി അറിയിച്ചതുകൂടാതെ പരസ്യപ്രതിഷേധത്തിനും തയാറായിട്ടുണ്ട്. മന്ത്രിമാരായ മോൻസ് ജോസഫും ഷിബു ബേബി ജോണും പരസ്യപ്രതികരണത്തിലേക്കു കടന്നതും പാർട്ടി അവഗണിക്കപ്പെടുന്ന സ്ഥിതിയിലെത്തിയപ്പോഴാണ്.
മാണി സി. കാപ്പന് കാബിനറ്റ് പദവിയോടുകൂടിയ നോർക്ക വൈസ് ചെയർമാൻ സ്ഥാനം നൽകാമെന്നു മുന്നണിയിൽ നേരത്തേ ധാരണയായിരുന്നു. എന്നാൽ, അദ്ദേഹത്തിനെതിരേ ഉയർന്നുവന്ന ചില കേസുകളുടെ പേരിൽ നിയമനം നീണ്ടുപോകുകയാണ്. ഇതിൽ മാണി സി. കാപ്പനും അതൃപ്തിയുണ്ട്.
തെരഞ്ഞെടുപ്പിനുമുന്പേ കേരള കോൺഗ്രസ് ചെയർമാൻ പി.ജെ. ജോസഫിനു വാഗ്ദാനംചെയ്ത പദവി നൽകാൻ കോൺഗ്രസ് തയാറായിട്ടില്ലെന്നതും അമർഷത്തിനു ആക്കംകൂട്ടുന്നു. കാർഷിക മേഖലയുമായി ബന്ധപ്പെട്ട പദവിയോ വയോജന കമ്മിഷൻ അധ്യക്ഷസ്ഥാനമോ വേണമെന്ന ആവശ്യവും അവർ മുന്നോട്ടുവച്ചിട്ടുണ്ട്. 15 സ്ഥാപനങ്ങളുടെ അധ്യക്ഷപദവി ആവശ്യപ്പെട്ട കേരള കോൺഗ്രസിന് ഏഴുസ്ഥാനങ്ങൾ മാത്രമാണ് കോൺഗ്രസ് വാഗ്ദാനം ചെയ്തിരിക്കുന്നത്. കുറഞ്ഞത് പത്തു പദവികളെങ്കിലും വേണമെന്ന ആവശ്യത്തിൽ ഉറച്ചുനിൽക്കുകയാണ് പാർട്ടി.
ആർഎസ്പിക്ക് കാപ്പെക്സ്, കില, രണ്ട് ക്ഷേമനിധികൾ ഉള്പ്പടെ നാല് അധ്യക്ഷ പദവികളാണ് വാഗ്ദാനം ചെയ്തിരിക്കുന്നത്. എന്നാൽ, മുൻകാലങ്ങളിൽ ഒമ്പത് സ്ഥാനങ്ങൾ വരെ തങ്ങൾക്ക് ലഭിച്ചിട്ടുണ്ടെന്ന് ചൂണ്ടിക്കാട്ടി സംസ്ഥാന സെക്രട്ടറി ഷിബു ബേബി ജോൺ കോണ്ഗ്രസ് നേതൃത്വത്തിന് കത്ത് നൽകിയിരുന്നു. നിയമസഭയിൽ പ്രാതിനിധ്യവും മന്ത്രിസ്ഥാനവുമുള്ള തങ്ങൾക്ക് വെറും നാല് സ്ഥാനങ്ങൾ മാത്രമാണ് വാഗ്ദാനം ചെയ്തിട്ടുള്ളതെന്ന് ആർഎസ്പി നേതാക്കൾ ചൂണ്ടിക്കാട്ടുന്നു. മുന്നണി യോഗങ്ങൾ കൃത്യമായി ചേരുന്നില്ലെന്നും ഘടകകക്ഷികളുടെ അഭിപ്രായങ്ങൾ കേൾക്കാൻ വേദിയില്ലെന്നും മുതിർന്ന നേതാവ് എ.എ. അസീസ് പരസ്യമായി വിമർശിച്ചു കഴിഞ്ഞു.
പ്രാഥമിക ധാരണ പ്രകാരം 32 മുതൽ 35വരെ ബോർഡ്-കോർപറേഷൻ പദവികളാണ് മുസ്ലിം ലീഗിന് നൽകാൻ തീരുമാനിച്ചിരിക്കുന്നത്. ഇതോടെ ലീഗ് മാത്രമാണ് നിലവിൽ തൃപ്തരായിട്ടുള്ളതെന്നും കോൺഗ്രസും അവഗണിക്കപ്പെടുകയാണെന്നും പാർട്ടിക്കുള്ളിൽ വിമർശനം ഉയരുന്നുണ്ട്.
ഘടകകക്ഷികൾക്ക് ഇത്രയധികം സ്ഥാനങ്ങൾ നൽകാനാവില്ലെന്ന നിലപാടിലാണ് കോൺഗ്രസ്. ഉമ്മൻചാണ്ടി സർക്കാരിന്റെ കാലത്ത് സംയുക്ത കേരള കോൺഗ്രസിന് 10 സ്ഥാനങ്ങളാണ് നൽകിയിരുന്നത്. നിലവിൽ മാണി വിഭാഗം മുന്നണിയിലില്ലാത്തതിനാൽ ജോസഫ് വിഭാഗത്തിന് ഏഴു സ്ഥാനങ്ങൾ വരെ നൽകാനേ സാധിക്കൂ എന്നാണ് കോൺഗ്രസ് നിലപാട്.
Kerala
പെരുമ്പാവൂർ: ഹോളോബ്രിക്സ് ലോറിയിൽ കയറ്റുന്നതിനിടെ അട്ടി മറിഞ്ഞ് ദേഹത്തു വീണ് ഒഡീഷ സ്വദേശി മരിച്ചു.
പോഞ്ഞാശേരി ചെമ്പാരത്ത്കുന്ന് അഫ്സിയ ഹോളോബ്രിക്സ് കമ്പനിയിലെ തൊഴിലാളി രുദ്ര മാജിയാണു (20 ) മരിച്ചത്.
ഇന്നലെ ഉച്ചയ്ക്ക് രണ്ടരയോടെയായിരുന്നു അപകടം. സ്റ്റോക്ക് ചെയ്തിരുന്ന സ്ഥലത്തുനിന്ന് മൂന്നു തൊഴിലാളികളാണ് ലോറിയിൽ ഹോളോബ്രിക്കുകൾ കയറ്റിക്കൊണ്ടിരുന്നത്.
ലോറിക്കുമുകളിൽ ഒരു തൊഴിലാളിയും താഴെ രണ്ടുപേരുമാണ് ഉണ്ടായിരുന്നത്. രുദ്ര ബാജിയോടൊപ്പം താഴെ നിന്നിരുന്ന തൊഴിലാളി ഓടി മാറിയതിനാൽ തലനാരിഴയ്ക്ക് രക്ഷപ്പെട്ടു.
Kerala
കൊല്ലം: ഉളിയക്കോവിൽ വയോധിക ദമ്പതികളെ വീട്ടിനുള്ളിൽ മരിച്ച നിലയിൽ കണ്ടെത്തി. അപ്പുക്കുട്ടൻ മുകുന്ദൻ (78), ബീന മുകുന്ദൻ (74) എന്നിവരാണ് മരിച്ചത്.
അപ്പുക്കുട്ടൻ മുകുന്ദനെ വീട്ടിലെ ഹാളിൽ വീണു കിടക്കുന്ന നിലയിലും ഭാര്യയെ കട്ടിലിൽ മരിച്ച നിലയിലും ആണ് കണ്ടെത്തിയത്.
രണ്ട് ദിവസമായി വീട് അടച്ചിട്ട നിലയിലായിരുന്നുവെന്ന് പ്രദേശവാസികൾ പറയുന്നു. ഈസ്റ്റ് പൊലിസ് വാതിൽ തുറന്ന് വീട്ടിൽ കയറിയപ്പോഴാണ് മൃതദേഹങ്ങൾ കണ്ടത്. ദമ്പതികളുടെ മക്കൾ വിദേശത്താണ്.
Kerala
കൊച്ചി: തിരുവനന്തപുരത്ത് അടച്ചുറപ്പില്ലാത്ത ഒറ്റമുറിയില് കഴിയുന്ന പ്രായമായ അമ്മയുടെയും ഓട്ടിസം ബാധിച്ച 30കാരി മകളുടെയും ദുരിതജീവിതത്തില് ഇടപെട്ട് ഹൈക്കോടതി.
ചെറിയ കച്ചവടം നടത്തി മകള്ക്കൊപ്പം ജീവിക്കുന്ന അമ്മയുടെ ജീവിതം മാധ്യമങ്ങളില് വന്നത് അമിക്കസ് ക്യൂറി രാം കുമാര് നമ്പ്യാര് ശ്രദ്ധയില്പ്പെടുത്തിയതിനെത്തുടര്ന്ന് ജസ്റ്റീസുമാരായ ദേവന് രാമചന്ദ്രന്, ബസന്ത് ബാലാജി എന്നിവരടങ്ങുന്ന ഡിവിഷന് ബെഞ്ചാണു വിഷയത്തില് ഇടപെട്ടത്.
ഇവരുടെ സുരക്ഷ ഉറപ്പാക്കാന് നടപടി വേണമെന്ന് കോടതി നിര്ദേശിച്ചു. നിലവില് താമസിക്കുന്ന സ്ഥലം സുരക്ഷിതമല്ലെന്നു വിലയിരുത്തിയാണ് ആവശ്യമായ സുരക്ഷ ഉറപ്പാക്കാന് പൊലിസിനു നിര്ദേശം നല്കിയത്.
ജില്ലാ സാമൂഹിക നീതി ഓഫിസര് മെഡിക്കല് കോളജിലെ ക്ലിനിക്കല് സൈക്കോളജിസ്റ്റ് അടക്കമുള്ളവര്ക്കൊപ്പം ഇരുവരെയും സന്ദര്ശിച്ചു റിപ്പോര്ട്ട് നല്കണം. എന്തൊക്കെ സഹായം ലഭ്യമാക്കാനാകുമെന്ന് ജില്ലാ കളക്ടര് അറിയിക്കണമെന്നും കോടതി നിര്ദേശിച്ചു.
വിഷയം വീണ്ടും 24ന് പരിഗണിക്കും. സംസ്ഥാനത്തെ മാനസികാരോഗ്യ കേന്ദ്രങ്ങളുടെ പ്രവര്ത്തനവുമായി ബന്ധപ്പെട്ട് സ്വമേധയാ സ്വീകരിച്ച ഹര്ജി പരിഗണിക്കുകയായിരുന്നു കോടതി.
Kerala
കാഞ്ഞിരപ്പള്ളി: ശാസ്ത്രതത്വങ്ങൾ പുസ്തകത്താളുകൾക്കപ്പുറം നേരിട്ടു കണ്ടും തൊട്ടറിഞ്ഞും മനസിലാക്കാൻ അവസരമൊരുക്കുന്ന നൂതന ശാസ്ത്ര പഠനകേന്ദ്രമായ സയൻസ് സ്റ്റുഡിയോ കാഞ്ഞിരപ്പള്ളി അമൽ ജ്യോതി എൻജിനിയറിംഗ് കോളജിൽ പ്രവർത്തനമാരംഭിച്ചു.
കാഞ്ഞിരപ്പള്ളി രൂപത കോർപറേറ്റ് മാനേജർ ഫാ. ഡൊമിനിക് ആയിലൂപറമ്പിൽ ഉദ്ഘാടനം നിർവഹിച്ചു. ഡയറക് ടർ അഡ്മിനിസ്ട്രേറ്റർ ഫാ.ഡോ. റോയി അബ്രഹാം പഴേപറമ്പിൽ, പ്രിൻസിപ്പൽ ഡോ. ലില്ലിക്കുട്ടി ജേക്കബ്, ഡീൻ അക്കാദമിക് ഫാ.ഡോ. റൂബിൻ തോട്ടുപുറത്ത് ജോസ്, ബേസിക് സയൻസ് വിഭാഗം മേധാവി ഡോ. സാബു അഗസ്റ്റ്യൻ, അസിസ്റ്റന്റ് പ്രഫ.ജെ.പി. സെൻ തുടങ്ങിയവർ സയൻസ് സ്റ്റുഡിയോയുടെ പ്രവർത്തനത്തെപ്പറ്റി വിശദ്ധീകരിച്ചു.
കോളജിലെ റിസർച്ച് സ്ക്വയർ എട്ടാം നിലയിൽ സജ്ജീകരിച്ചിരിക്കുന്ന ഈ ലേണിംഗ് മ്യൂസിയം വിദ്യാർഥികളിൽ ശാസ്ത്രാഭിമുഖ്യവും ഗവേഷണ താൽപര്യവും വളർത്തുക എന്ന ലക്ഷ്യത്തോടെയാണ് രൂപകൽപ്പന ചെയ്തിരിക്കുന്നത്. തൊട്ടറിഞ്ഞ് പഠിക്കാവുന്ന പരീക്ഷണങ്ങൾ, ശാസ്ത്രത്തിലെയും എൻജിനിയറിംഗിലെയും സങ്കീർണമായ ആശയങ്ങൾ ലളിതമായി മനസിലാക്കാൻ സഹായിക്കുന്ന നിരവധി ഇന്ററാക്ടീവ് പ്രദർശനങ്ങൾ, പ്രവൃത്തിപരിചയ മാതൃകകൾ എന്നീ പ്രധാന സവിശേഷതകൾ സ്റ്റുഡിയോയിൽ ഒരുക്കിയിട്ടുണ്ട്.
ടെലികമ്മ്യൂണിക്കേഷൻ രംഗത്തെ പ്രമുഖരായ ബിഎസ്എൻഎൽ പ്രത്യേകം സജ്ജമാക്കിയ വാർത്താവിനിമയ സാങ്കേതികവിദ്യാ വിഭാഗം സ്റ്റുഡിയോയുടെ പ്രധാന ആകർഷണമാണ്. വാർത്താവിനിമയ സംവിധാനങ്ങളുടെ പരിണാമവും ആധുനിക സാങ്കേതികവിദ്യകളും വിദ്യാർഥികൾക്ക് ഇവിടെ നേരിട്ടു മനസിലാക്കാം.
എല്ലാ പ്രവൃത്തിദിവസങ്ങളിലും രാവിലെ 9.30 മുതൽ വൈകുന്നേരം 4.30 വരെ സയൻസ് സ്റ്റുഡിയോ പ്രവർത്തിക്കുന്നതായിരിക്കും. തുടക്കത്തിൽ മുൻകൂട്ടി ബുക്ക് ചെയ്ത് അധ്യാപകരോടൊപ്പം എത്തുന്ന സ്കൂൾ, കോളജ് വിദ്യാർഥികൾക്കാണ് പ്രവേശനം അനുവദിക്കുന്നത്.
ഏതാനും നാളുകൾക്കുള്ളിൽ പൊതുജനങ്ങൾക്കും സയൻസ് സ്റ്റുഡിയോ സന്ദർശിക്കാനുള്ള സൗകര്യം ലഭ്യമാക്കും. കൂടുതൽ വിവരങ്ങൾക്കും സന്ദർശന സമയം ബുക്ക് ചെയ്യുന്നതിനുമായി 7012492807 എന്ന നമ്പറിൽ ബന്ധപ്പെടാം.
Kerala
തിരുവനന്തപുരം: നാലു തസ്തികകളിലേക്കു ചുരുക്കപ്പട്ടിക പ്രസിദ്ധീകരിക്കുന്നതിന് ഇന്നലെ ചേര്ന്ന പിഎസ്സി യോഗം തീരുമാനിച്ചു.
വ്യാവസായിക പരിശീലന വകുപ്പില് ജൂനിയര് ഇന്സ്ട്രക്ടര് (കാറ്ററിംഗ് ആൻഡ് ഹോസ്പിറ്റാലിറ്റി അസിസ്റ്റന്റ്), മെഡിക്കല് വിദ്യാഭ്യാസ വകുപ്പില് അസി. പ്രഫസര് ഇന് ജനറല് സര്ജറി, സാമൂഹിക നീതി വകുപ്പില് ഇന്സ്ട്രക്ടര് (ബുക്ക് ബൈന്ഡിംഗ്), കേരള സ്റ്റേറ്റ് ഇന്ഡസ്ട്രിയല് എന്റര്പ്രൈസസ് ലിമിറ്റഡില് റിസപ്ഷണിസ്റ്റ് തസ്തികകളിലേക്കാണ് ചുരുക്കപ്പട്ടിക പ്രസിദ്ധീകരിക്കുന്നത്.
മലപ്പുറം ജില്ലയില് മൃഗസംരക്ഷണ വകുപ്പില് ലൈവ് സ്റ്റോക്ക് ഇന്സ്പെക്ടര് ഗ്രേഡ് 2/ പൗള്ട്രി അസിസ്റ്റന്റ്/മില്ക്ക് റെക്കോര്ഡര്/സ്റ്റോര് കീപ്പര്/എന്യൂമറേറ്റര്, കേരള ഖാദി ആൻഡ് വില്ലേജ് ഇന്ഡസ്ട്രീസ് ബോര്ഡില് ബീ കീപ്പിംഗ് ഫീല്ഡ്മാന് തസ്തികകളിലേക്ക് സാധ്യതാപ്പട്ടിക പ്രസിദ്ധീകരിക്കുന്നതിനും ഇന്നലെ ചേര്ന്ന പിഎസ് സി യോഗം തീരുമാനിച്ചു.
Kerala
തിരുവനന്തപുരം: ഭാരത് ഗൗരവ് ട്രെയിന് പദ്ധതി പ്രകാരം സൗത്ത് സ്റ്റാര് റെയില് ടൂര് ടൈംസുമായി സഹകരിച്ച് കേരളത്തില്നിന്ന് വടക്കുകിഴക്കന് സംസ്ഥാനങ്ങളിലേക്കും ഭൂട്ടാനിലേക്കും 13 ദിവസം നീളുന്ന സ്പെഷ്യല് ടൂറിസ്റ്റ് ട്രെയിന് യാത്ര സംഘടിപ്പിക്കുന്നു.
ഡാര്ജിലിംഗ്–ഗാങ്ടോക്ക്, നോര്ത്ത് ഈസ്റ്റ് ഇന്ത്യ, ഭൂട്ടാന്, സപ്തശക്തിപീഠം എന്നിങ്ങനെ നാല് വ്യത്യസ്ത പാക്കേജുകളുണ്ട്.
ഇന്ഷ്വറന്സ്, ഹോട്ടല് താമസം, കാഴ്ചകള് കാണുന്നതിനുള്ള വാഹനങ്ങള്, ബുഫെ സൗത്ത് ഇന്ത്യന് ഭക്ഷണം എന്നിവ ഉൾപ്പെട്ടതാണ് പാക്കേജ്. തേര്ഡ് എസിയില് ഡാര്ജിലിംഗ്–ഗാങ്ടോക്ക് 55,650 രൂപ, നോര്ത്ത് ഈസ്റ്റ് 72,860 രൂപ, ഭൂട്ടാന് 78,860 രൂപ, സപ്തശക്തിപീഠം 45,650 രൂപ എന്നിങ്ങനെയാണ് പാക്കേജുകള്.
ഡിസംബര് ഒന്പതിനു കോയമ്പത്തൂര് നോര്ത്തില് നിന്ന് ആരംഭിക്കുന്ന ട്രെയിനില് പാലക്കാട്, ഒറ്റപ്പാലം, തൃശൂര്, എറണാകുളം, കോട്ടയം, കായംകുളം, കൊല്ലം സ്റ്റേഷനുകളില് നിന്ന് യാത്രക്കാര്ക്ക് കയറാം. കൂടുതല് വിവരങ്ങള്ക്ക് 7305 85 85 85 എന്ന നമ്പറില് ബന്ധപ്പെടാം.
Kerala
കൊച്ചി: ചേരാനല്ലൂർ വാഹനാപകടത്തിൽ മരിച്ച ജയബാലകൃഷ്ണന്റെ കുടുംബം ജീവിതത്തിലേക്ക് തിരികെ നടക്കാൻ അദ്ദേഹം നടത്തിയിരുന്ന തട്ടുകട വീണ്ടും തുറന്നു. ചിറ്റൂരിൽ ജയബാലകൃഷ്ണൻ കച്ചവടം നടത്തിയിരുന്ന അതേ സ്ഥലത്ത് തന്നെയാണ് ഭാര്യ ബിന്ദുവും മക്കളായ ഭദ്രകീർത്തിയും സഹോദരനും ചേർന്ന് ഇന്ന് വൈകുന്നേരത്തോടെ തട്ടുകടയുടെ പ്രവർത്തനം പുനരാരംഭിച്ചത്.
കുടുംബത്തിന്റെ ഏക വരുമാനമാർഗമായിരുന്ന തട്ടുകട അടച്ച് വീട്ടിലേക്ക് മടങ്ങുന്നതിനിടെയാണ് പ്രായപൂർത്തിയാകാത്ത കുട്ടി ഓടിച്ച ആഡംബര കാറിടിച്ച് ജയബാലകൃഷ്ണൻ കൊല്ലപ്പെട്ടത്.
അതേസമയം, കേസിൽ പ്രതിയായ 17-കാരന്റെ ജാമ്യം റദ്ദാക്കണമെന്നാവശ്യപ്പെട്ട് ജയബാലകൃഷ്ണന്റെ മക്കൾ ഹൈക്കോടതിയെ സമീപിച്ചിരുന്നു. പ്രതിയുടെ പിതാവ് ജുഡീഷ്യറിയിലെ ഉന്നത പദവി വഹിക്കുന്നയാളായതിനാൽ ഔദ്യോഗിക അധികാരം ഉപയോഗിച്ച് സാക്ഷികളെ സ്വാധീനിക്കാനും ഭീഷണിപ്പെടുത്താനും സാധ്യതയുണ്ടെന്നും അതിനാൽ ജാമ്യം റദ്ദാക്കണമെന്നുമാണ് കുടുംബത്തിന്റെ പ്രധാന ആവശ്യം. ഈ ഹർജി ഹൈക്കോടതി ചൊവ്വാഴ്ച പരിഗണിക്കും.
അപകടമുണ്ടാക്കിയ വാഹനമോടിച്ച 17-കാരന്റെ പിതാവും കേസിലെ പ്രതിയുമായ ജഡ്ജി വീണ്ടും കോടതിയിലെത്തി കേസുകൾ പരിഗണിച്ചു തുടങ്ങി. അപകടത്തിന് പിന്നാലെ കോടതി നടപടികളിൽ നിന്ന് വിട്ടുനിന്നിരുന്ന ഇദ്ദേഹം, ഹൈക്കോടതിയിൽ നിന്ന് മുൻകൂർ ജാമ്യം ലഭിച്ചതിന് പിന്നാലെയാണ് തിരികെ ജോലിയിൽ പ്രവേശിച്ചത്.
Kerala
കൊച്ചി: അന്താരാഷ്ട്ര നാളികേര സമൂഹത്തിന്റെ 62-ാമത് സമ്മേളനവും മന്ത്രിതല യോഗവും ഇന്നുമുതല് 20 വരെ കൊച്ചി ഇന്ഫോപാര്ക്കിലുള്ള കോര്ട്ട്യാര്ഡ് ബൈ മാരിയറ്റ് ഹോട്ടലില് നടക്കും.
കേന്ദ്രസര്ക്കാരിന്റെ കൃഷികര്ഷക ക്ഷേമ മന്ത്രാലയത്തിനു കീഴിലുള്ള നാളികേര വികസന ബോര്ഡ്, ഇന്തോനേഷ്യയിലെ ജക്കാര്ത്ത ആസ്ഥാനമായുള്ള ഇന്റര്നാഷണല് കോക്കനട്ട് കമ്യൂണിറ്റി എന്നിവ സംയുക്തമായാണു പരിപാടി സംഘടിപ്പിക്കുന്നത്.
ഇന്നു രാവിലെ 9.30ന് കോര്ട്ട്യാര്ഡ് ബൈ മാരിയറ്റില് നടക്കുന്ന സമ്മേളനം കേന്ദ്ര കൃഷി-കര്ഷകക്ഷേമ സഹമന്ത്രി രാം നാഥ് ഠാക്കൂര് ഉദ്ഘാടനം ചെയ്യും. കേന്ദ്ര കൃഷിവകുപ്പ് സെക്രട്ടറി അതിഷ് ചന്ദ്ര അധ്യക്ഷത വഹിക്കും.