15

  
കീവ്: ഇലോൺ മസ്കിന്‍റെ സ്റ്റാർലിങ്കിനു ബദലായി റഷ്യ വികസിപ്പിക്കുന്ന ഇന്‍റർനെറ്റ് പദ്ധതിയിലെ ഉപഗ്രങ്ങൾ വിക്ഷേപിക്കാനുള്ള റോക്കറ്റ് ഉത്പാദിപ്പിക്കുന്ന കേന്ദ്രത്തിൽ യുക്രെയ്ന്‍റെ മിസൈൽ ആക്രമണം. സമാരാ മേഖലയിലുള്ള പ്രോഗ്രസ് റോക്കറ്റ് ആൻഡ് സ്പേസ് സെന്‍ററിർ മിസൈൽ നേരിട്ടു പതിച്ചതായി യുക്രെയ്ൻ അവകാശപ്പെട്ടു.

യുക്രെയ്ൻ അതിർത്തിയിൽനിന്ന് 900 കിലോമീറ്റർ അകലെയാണ് ആക്രമണം നടത്തിയതെന്ന് പ്രസിഡന്‍റ് സെലൻസ്കി അറിയിച്ചു. യുക്രെയ്ൻ വികസിപ്പിച്ച ഫ്ലെമിങ്കോ മിസൈലുകളാണ് ആക്രമണത്തിന് ഉപയോഗിച്ചത്.
റോക്കറ്റ് ഉത്പാദനകേന്ദ്രത്തിൽ മിസൈൽ പതിച്ചതായി യുക്രെയ്ൻ സൈന്യവും അറിയിച്ചു. അതേസമയം, സമാരായിലുണ്ടായ വൻ മിസൈൽ ആക്രമണത്തെ വ്യോമപ്രതിരോധ സംവിധാനം ഉപയോഗിച്ചു പരാജയപ്പെടുത്തിയെന്നാണ് റഷ്യ അറിയിച്ചത്.

റഷ്യ വികസിപ്പിക്കുന്ന റാസ്‌വെറ്റ് ഇന്‍റർനെറ്റ് ബ്രോഡ്ബാന്‍റ് സംവിധാനത്തിലെ ഉപഗ്രഹങ്ങൾ വിക്ഷേപിക്കാനുള്ള റോക്കറ്റുകളാണ് ഇവിടെ ഉത്പാദിപ്പിക്കുന്നത്. അമേരിക്കൻ ശതകോടീശ്വരൻ ഇലോൺ മസ്കിന്‍റെ സ്പേസ് കന്പനിയുടെ സ്റ്റാർലിങ്ക് ഇന്‍റർനെറ്റ് പദ്ധതിക്കു സമാനമാണിത്. സ്റ്റാർലിങ്ക് യുക്രെയ്നിൽ പ്രവർത്തിക്കുന്നുണ്ടെങ്കിലും റഷ്യയിൽ ഇല്ല. സ്റ്റാർ ലിങ്ക് മൂലം ഡ്രോൺ ആക്രമണങ്ങളിൽ യുക്രെയ്നു മേൽക്കൈയുണ്ട്.
റഷ്യയിലെ നിഷ്നി നൊവ്ഗൊരോദിലുള്ള ഒരു മിലിട്ടറി എയർഫീൽഡിലും മിസൈൽ ആക്രമണം നടത്തിയതായി യുക്രെയ്ൻ അവകാശപ്പെട്ടു.

Tags : Russia Ukraine Missile attack