International
ലണ്ടൻ: യൂറോപ്യൻ യൂണിയനിൽനിന്ന് ബ്രിട്ടൻ പുറത്തുപോയതിലൂടെ രാജ്യത്തിന് നേട്ടത്തേക്കാൾ കൂടുതൽ നഷ്ടമാണുണ്ടായതെന്ന് പ്രധാനമന്ത്രി ആൻഡി ബേർനാം.
ബ്രെക്സിറ്റ് നടപ്പാക്കിയ രീതി പ്രതീക്ഷിച്ച ഫലങ്ങൾ നൽകിയില്ലെന്നും യൂറോപ്യൻ രാജ്യങ്ങളുമായുള്ള ബന്ധം പുനഃസ്ഥാപിക്കുന്നതിനും കൂടുതൽ ശക്തിപ്പെടുത്തുന്നതിനും പുതിയ സമീപനം ആവശ്യമാണെന്നും അദ്ദേഹം വ്യക്തമാക്കി. ബ്രെക്സിറ്റിന്റെ ഭാഗമായി ബ്രിട്ടൻ സ്വീകരിച്ച കടുത്ത നിലപാടുകൾ രാജ്യത്തെ വ്യാപാരമേഖലയ്ക്ക് നിരവധി തടസങ്ങൾ സൃഷ്ടിക്കുകയും സാമ്പത്തികവളർച്ചയ്ക്കുള്ള സാധ്യതകളെ ബാധിക്കുകയും ചെയ്തുവെന്നാണ് പ്രധാനമന്ത്രിയുടെ വിലയിരുത്തൽ.
പുതിയ കരാറിന് മൂന്ന് നിബന്ധനകൾ
യൂറോപ്യൻ യൂണിയനുമായി ഭാവിയിൽ ഉണ്ടാക്കുന്ന ഏതൊരു കരാറും മൂന്ന് പ്രധാന നിബന്ധനകൾ പാലിക്കണമെന്നാണ് പ്രധാനമന്ത്രി മുന്നോട്ടു വയ്ക്കുന്നത്. ലേബർ പാർട്ടിയുടെ തെരഞ്ഞെടുപ്പ് പ്രകടനപത്രികയിലും സർക്കാർ പ്രഖ്യാപിച്ച നയപരമായ പരിധികളിലും ഉറച്ചുനിൽക്കണം.
നിലവിലുള്ള ബ്രെക്സിറ്റ് കരാറിനേക്കാൾ മെച്ചപ്പെട്ടതായിരിക്കണം പുതിയ കരാർ. സാധാരണ ജനങ്ങളുടെ ദൈനംദിന ജീവിതത്തിൽ വ്യക്തമായ ഗുണപരമായ മാറ്റങ്ങൾ ഉണ്ടാക്കണം. അതേസമയം, യൂറോപ്യൻ യൂണിയന്റെ സിംഗിൾ മാർക്കറ്റിലേക്കുള്ള തിരിച്ചുപോക്ക്, കസ്റ്റംസ് യൂണിയനിൽ വീണ്ടും അംഗമാകൽ, സ്വതന്ത്ര സഞ്ചാരാവകാശം പുനഃസ്ഥാപിക്കൽ എന്നിവ നിലവിലെ സർക്കാരിന്റെ പ്രഖ്യാപിത നയപരിധികൾക്ക് പുറത്താണെന്നും റിപ്പോർട്ടിൽ വ്യക്തമാക്കുന്നു.
വ്യാപാരത്തിലും യുവജന കൈമാറ്റത്തിലും പുതിയ കരാറുകൾ
വെള്ളിയാഴ്ച നടക്കുന്ന ബ്രിട്ടൻ-യൂറോപ്യൻ യൂണിയൻ ഉച്ചകോടിയിൽ ഭക്ഷ്യവ്യാപാരം, കാർബൺ പുറന്തള്ളൽ നിയന്ത്രണവുമായി ബന്ധപ്പെട്ട വ്യാപാരം, യുവജനങ്ങൾക്ക് പരസ്പരം രാജ്യങ്ങളിൽ താമസിക്കാനും ജോലി ചെയ്യാനും അവസരമൊരുക്കുന്ന പദ്ധതി തുടങ്ങിയ വിഷയങ്ങളിൽ ധാരണയിലെത്താനാണ് പ്രധാനമന്ത്രിയുടെ ശ്രമം. യൂറോപ്യൻ രാജ്യങ്ങളുമായുള്ള ബന്ധം ഏറ്റുമുട്ടലിന്റേതല്ല; മറിച്ച്, സഹകരണത്തിന്റെയും സൗഹൃദത്തിന്റെയും അടിസ്ഥാനത്തിലായിരിക്കണമെന്നാണ് പ്രധാനമന്ത്രിയുടെ നിലപാട്.
പ്രതിപക്ഷ വിമർശനം
എന്നാൽ, പ്രധാനമന്ത്രിയുടെ പുതിയ യൂറോപ്യൻ നയത്തിനെതിരേ കൺസർവേറ്റീവ് പാർട്ടി രംഗത്തെത്തിയിട്ടുണ്ട്. ക്ഷേമപദ്ധതികൾക്കുള്ള ചെലവുകൾ വർധിക്കുകയും പ്രതിരോധ മേഖലയിലെ സാമ്പത്തിക പ്രതിസന്ധികൾ നിലനിൽക്കുകയും ചെയ്യുന്ന സാഹചര്യത്തിൽ യൂറോപ്യൻ യൂണിയനുമായുള്ള ബന്ധത്തിന് അമിതപ്രാധാന്യം നൽകുന്നത് ആഭ്യന്തര പ്രശ്നങ്ങളിൽനിന്ന് ശ്രദ്ധ തിരിക്കാനുള്ള ശ്രമമാണെന്നാണ് ഡെപ്യൂട്ടി കൺസർവേറ്റീവ് നേതാവ് അലക്സ് ബർഗ്ഹാർട്ട് ആരോപിച്ചത്.
International
ബാങ്കോക്ക്: തെക്കൻ തായ്ലൻഡിലുണ്ടായ തീപിടിത്തത്തിൽ 11 പേർ മരിച്ചു.ഫുക്കറ്റിൽ ഇന്നലെ പുലർച്ചെ രണ്ടോടെയാണു തീപിടിത്തമുണ്ടായത്.
താഴത്തെ നിലയിൽ മോട്ടോർ സൈക്കിൾ റെന്റൽ ഷോപ്പും മുകളിലത്തെ നിലകളിൽ പാർപ്പിടങ്ങളുമുള്ള കെട്ടിടത്തിലാണു തീപിടിത്തമുണ്ടായത്. 17 പേർക്കു പരിക്കേറ്റു.
International
ബെയ്ജിംഗ്: ഷി, പുടിൻ, ട്രംപ് കൂടിക്കാഴ്ച സുപ്രധാന നാഴികക്കല്ലാണെന്ന് ചൈന. ഏഷ്യ-പസഫിക് സാമ്പത്തിക സഹകരണ ഉച്ചകോടിയുടെ ഭാഗമായി ചൈനയിലെ ഷെൻഷെനിലാണു കൂടിക്കാഴ്ച.
യുഎസ് പ്രസിഡന്റ് ഡോണൾഡ് ട്രംപ്, റഷ്യൻ പ്രസിഡന്റ് വ്ളാദിമിർ പുടിൻ എന്നിവരെ ചൈനീസ് പ്രസിഡന്റ് ഷി ജിൻപിംഗ് സ്വീകരിക്കുമെന്ന് ചൈനീസ് വിദേശകാര്യ മന്ത്രാലയം അറിയിച്ചു. ചൈനീസ്, റഷ്യൻ, യുഎസ് രാഷ്ട്രത്തലവന്മാർ ആദ്യമായാണ് ഒരുമിച്ച് ഒരു മേശയ്ക്കു ചുറ്റുമെത്തുന്നത്.
നാളെയും മറ്റെന്നാളുമാണു കൂടിക്കാഴ്ച. ചൈനയും റഷ്യയും യുഎസും രക്ഷാസമിതിയിലെ സ്ഥിരാംഗങ്ങളാണ്. ഇറാൻ സംഘർഷം, ആണവായുധ നിയന്ത്രണം, ആർട്ടിഫിഷ്യൽ ഇന്റലിജൻസ് തുടങ്ങി വിവിധ വിഷയങ്ങൾ ചർച്ചയാകുമെന്നാണ് കരുതുന്നത്. യുക്രെയ്ൻ യുദ്ധം ചർച്ചകളിൽ ഉൾപ്പെടില്ലെന്നു മുതിർന്ന യുഎസ് ഉദ്യോഗസ്ഥൻ പറഞ്ഞു.
International
ഇസ്ലാമാബാദ്: ജയിലിൽ തനിക്കും ഭാര്യ ബുഷ്റ ബീവിക്കും ചികിത്സ നിഷേധിക്കപ്പെടുകയാണെന്നും ജീവനോടെ പുറത്തുവരുമെന്ന് ഉറപ്പില്ലെന്നും ആരോപിച്ച് മുൻ പാക്കിസ്ഥാൻ പ്രധാനമന്ത്രി ഇമ്രാൻ ഖാൻ.
സുപ്രീംകോടതി, ഫെഡറൽ ഭരണഘടനാ കോടതി, ഇസ്ലാമാബാദ് ഹൈക്കോടതി എന്നിവയിലെ ചീഫ് ജസ്റ്റീസുമാർക്ക് അയച്ച തുറന്ന കത്തിലാണ് അദ്ദേഹം ഇക്കാര്യങ്ങൾ വ്യക്തമാക്കിയത്. ഇമ്രാൻ ഖാന്റെ അഭിഭാഷകൻ സൽമാൻ സഫ്ദർ ആണ് എക്സ് പ്ലാറ്റ്ഫോമിലൂടെ കത്ത് പുറത്തുവിട്ടത്.
അഡിയാല ജയിലിൽ കഴിയുന്ന 74കാരനായ ഇമ്രാൻ ഖാൻ ദിവസം 22 മണിക്കൂർ വരെ ഏകാന്തതടവിൽ തന്നെ പാർപ്പിച്ചിരിക്കുകയാണെന്ന് കത്തിൽ ആരോപിക്കുന്നു. കുടുംബാംഗങ്ങളെയോ അഭിഭാഷകരെയോ കാണാനോ മക്കളായ കാസിം, സുലൈമാൻ എന്നിവരെ ഫോണിൽ വിളിക്കാനോ പുസ്തകങ്ങളും ടെലിവിഷനും ഉപയോഗിക്കാനോ അനുവദിക്കുന്നില്ലെന്നും അദ്ദേഹം പറഞ്ഞു.
തന്റെ വലതുകണ്ണിന്റെ 85 ശതമാനം കാഴ്ച നഷ്ടപ്പെട്ടതായും കഴിഞ്ഞ പത്തിന് രക്തസമ്മർദം അപകടകരമായ നിലയിലേക്ക് ഉയർന്നതായും ഇമ്രാൻ ഖാൻ വെളിപ്പെടുത്തി. ഹൃദയാഘാതത്തിനും മസ്തിഷ്ക രക്തസ്രാവത്തിനും സാധ്യതയുണ്ടെന്ന് ഡോക്ടർമാർ മുന്നറിയിപ്പ് നൽകിയിട്ടുണ്ട്.
ജയിലിൽ കഴിയുന്ന ഭാര്യ ബുഷ്റ ബീവിക്ക് ഏപ്രിലിൽ കണ്ണിന് അടിയന്തര ശസ്ത്രക്രിയ നടത്തിയിരുന്നുവെന്നും തുടർചികിത്സ ലഭിച്ചില്ലെങ്കിൽ അവരുടെ കാഴ്ച പൂർണമായി നഷ്ടപ്പെടുമെന്നും കത്തിൽ ആശങ്ക പ്രകടിപ്പിക്കുന്നു.
നിരപരാധിത്വം തെളിയിക്കാൻ ഞാൻ ജീവനോടെ ഇരിക്കേണ്ടതുണ്ടെന്നും വൈകുന്നതിനുമുന്പ് മാനുഷിക പരിഗണന നൽകി നീതി നടപ്പാക്കണമെന്നുമുള്ള അഭ്യർഥനയോടെയാണ് ഇമ്രാൻ ഖാൻ കത്ത് അവസാനിപ്പിക്കുന്നത്. 2023 ഓഗസ്റ്റ് മുതൽ ഇമ്രാൻ ഖാനും 2025 ജനുവരി മുതൽ ബുഷ്റ ബീവിയും ജയിലിൽ കഴിയുകയാണ്.
International
വാഷിംഗ്ടൺ: ചാരവൃത്തി വിവാദത്തെത്തുടർന്ന് കഴിഞ്ഞയാഴ്ച രാജിവെച്ച പ്രമുഖ എഐ ചിപ്പ് നിർമാണ കമ്പനിയായ എൻവിഡിയയുടെ സിഇഒ ജെൻസൻ ഹുവാംഗ് കമ്പനി തലപ്പത്തേക്ക് തിരിച്ചെത്തുന്നതിനെ സ്വാഗതം ചെയ്ത് യുഎസ് പ്രസിഡന്റ് ഡോണൾഡ് ട്രംപ്. ചൈനയിലേക്കുള്ള യാത്രയ്ക്കിടെ മാധ്യമപ്രവർത്തകരോട് സംസാരിക്കവെയാണ് ട്രംപ് തന്റെ നിലപാട് വ്യക്തമാക്കിയത്.
ജെൻസൻ ഹുവാംഗിനെ തിരികെ കൊണ്ടുവരണമെന്ന് ആവശ്യപ്പെട്ട് ഇലോൺ മസ്ക് ഉൾപ്പെടെ 1.58 ലക്ഷത്തിലധികം ആളുകൾ ഒപ്പിട്ട തുറന്ന കത്തിനെക്കുറിച്ചും ട്രംപ് പരാമർശിച്ചു. "അദ്ദേഹം തിരിച്ചെത്തുന്നതിൽ എനിക്ക് തീർച്ചയായും എതിർപ്പില്ല. അദ്ദേഹം ഒരു വലിയ പാഠം പഠിച്ചുവെന്ന് ഞാൻ കരുതുന്നു. അദ്ദേഹത്തെ തിരികെ കൊണ്ടുവരുന്നത് മോശം ആശയമല്ല," ട്രംപ് പറഞ്ഞു.
ജെൻസൻ ഹുവാംഗിന് ബന്ധമുണ്ടായിരുന്ന ആലീസ് ഹുവാംഗ് ചൈനയ്ക്ക് വേണ്ടി ചാരവൃത്തി നടത്തിയെന്ന ആരോപണങ്ങളെയും ട്രംപ് സംശയത്തോടെയാണ് വീക്ഷിച്ചത്. "അവർ ഒരു ചാരവനിതയാണോ എന്ന് എനിക്കറിയില്ല. സാധാരണയായി ചൈനയിൽ നിന്ന് വരുന്ന ഏതൊരു സുന്ദരിയായ സ്ത്രീയെയും ചാരവനിതയാണെന്നാണ് ഇക്കൂട്ടർ മുദ്രകുത്തുന്നത്. "ട്രംപ് പറഞ്ഞു.
ആലീസ് ഹുവാംഗ് ചാരവനിതയാണെന്ന് സ്റ്റേറ്റ് സെക്രട്ടറി മാർക്കോ റൂബിയോ തനിക്ക് ഇന്റലിജൻസ് വിവരം നൽകിയെന്ന റിപ്പോർട്ടുകളും ട്രംപ് തള്ളിക്കളഞ്ഞു. എൻവിഡിയയുടെ സാങ്കേതികവിദ്യ അനധികൃതമായി ചൈനയിലേക്ക് കടത്തിയെന്ന് സംശയിക്കുന്ന സിംഗപ്പൂർ ആസ്ഥാനമായുള്ള 'മെഗാസ്പീഡ്' എന്ന കമ്പനിയിലെ മുൻ എക്സിക്യൂട്ടീവായിരുന്നു ആലീസ് ഹുവാംഗ്.
International
ബ്രസൽസ്: ശൈത്യകാലം അടുത്തിരിക്കെ യുക്രെയ്ന്റെ ഊർജകേന്ദ്രങ്ങൾ ലക്ഷ്യമിട്ട് റഷ്യ ആക്രമണം തുടരുകയും സമാധാന ചർച്ച വൈകിക്കുകയുമാണെന്നു യൂറോപ്യൻ യൂണിയൻ രാജ്യങ്ങൾ. ചർച്ചകളിൽ, വെടിനിർത്തൽ ഉറപ്പാക്കുന്നതിനും പിന്നീട് ശരിയായ സമാധാന കരാറിലെത്തുക എന്നതിനുമായിരിക്കണം മുൻഗണന നൽകേണ്ടതെന്നു യൂറോപ്യൻ യൂണിയൻ വിദേശകാര്യ മന്ത്രിമാർ പറഞ്ഞു.
യുദ്ധം ആരംഭിച്ചത് റഷ്യയാണെന്നും പുതിയ ഉപാധികൾ ഉന്നയിക്കാതെ യുദ്ധത്തിൽനിന്നു പിന്മാറണമെന്നും അവർ ആവശ്യപ്പെട്ടു. ചർച്ചകൾക്കു മുന്നോടിയായി യൂറോപ്യൻ യൂണിയൻ വിദേശനയ മേധാവി കാജ കല്ലാസ് പറഞ്ഞു. ചർച്ചകൾ നടന്നിട്ടും റഷ്യ തങ്ങളുടെ നിലപാടിൽ മാറ്റമൊന്നും വരുത്തിയിട്ടില്ലെന്നും സാധാരണക്കാർക്കു നേരേയും അവരുടെ അടിസ്ഥാന സൗകര്യങ്ങൾക്കു നേരേയും ആക്രമണങ്ങൾ തുടരുകയാണെന്നും അയർലൻഡ് വിദേശകാര്യ മന്ത്രി ഹെലൻ മക്എൻറ്റി പറഞ്ഞു.
International
വാഷിംഗ്ടൺ ഡിസി: അമേരിക്കയുടെ മൂന്നാം വിമാനവാഹിനി "തിയോഡോർ റൂസ്വെൽറ്റ്’ പശ്ചിമേഷ്യയിലെത്തി.
പശ്ചിമേഷ്യയിലെത്തിയ മൂന്നാമത്തെ വിമാനവാഹിനിയാണിത്. യുഎസ് അധികൃതർ ഇക്കാര്യം സ്ഥിരീകരിച്ചു.
യുഎസ്എസ് ജോർഡ് എച്ച്ഡബ്ല്യു ബുഷ്, യുഎസ്എസ് ജോർജ് വാഷിംഗ്ടൺ എന്നിവയാണ് പശ്ചിമേഷ്യയിലുള്ള മറ്റു വിമാനവാഹിനികൾ. ഇതുകൂടാതെ ഒട്ടേറെ ചെറു നാവികകപ്പലുകളുമുണ്ട്.
International
മനില: തെക്കുകിഴക്കന് ഏഷ്യന് രാജ്യങ്ങളുമായി ഉഭയകക്ഷിബന്ധം ശക്തിപ്പെടുത്തുക ലക്ഷ്യമിട്ട് ആസിയാൻ ഉച്ചകോടിക്കായി പ്രധാനമന്ത്രി നരേന്ദ്രമോദി ഫിലിപ്പീന്സ് തലസ്ഥാനമായ മനിലയിലെത്തി.
ഫിലിപ്പീന്സ് പ്രസിഡന്റ് ഫെര്ഡിനാന്ഡ് ആര്. മാര്ക്കോസ് ജൂണിയറിന്റെ ക്ഷണപ്രകാരമെത്തിയ പ്രധാനമന്ത്രി ഇന്നു നടക്കുന്ന ആസിയാന്-ഇന്ത്യ ഉച്ചകോടിയിലും ഈസ്റ്റ് ഏഷ്യ ഉച്ചകോടിയിലും പങ്കെടുക്കും.
ഫിലിപ്പീന്സിലെ ഇന്ത്യന് സമൂഹവുമായുള്ള പ്രധാനമന്ത്രിയുടെ കൂടിക്കാഴ്ചയും നിശ്ചയിച്ചിട്ടുണ്ട്. ഇന്ത്യയും യുഎസും ഓസ്ട്രേലിയയും ജപ്പാനും അടങ്ങുന്ന ക്വാഡ് രാജ്യങ്ങളിലെ നേതാക്കളുടെ കൂടിക്കാഴ്ച ഇന്നു മനിലയിൽ നടക്കുമെന്ന് വൈറ്റ്ഹൗസ് അസിസ്റ്റന്റ് പ്രസ് സെക്രട്ടറി ഒലിവിയ വെയ്ൽസ് അറിയിച്ചു.
രണ്ടുവര്ഷത്തിലൊരിക്കല് ചേരുന്ന സമ്മേളനത്തിൽ യുഎസ് പ്രസിഡന്റ് ഡോണള്ഡ് ട്രംപ്, ഓസ്ട്രേലിയന് പ്രധാനമന്ത്രി ആന്റണി ആല്ബനിസ്, ജപ്പാന് പ്രധാനമന്ത്രി തകയ്ചി സനെ എന്നിവരും പങ്കെടുക്കും. ഈ യോഗത്തിനുമുന്പ് മോദിയും ട്രംപും ഹ്രസ്വചര്ച്ച നടത്തിയേക്കുമെന്നു സൂചനയുണ്ട്. ഇന്ത്യ-യുഎസ് വ്യാപാരക്കരാര് ഉള്പ്പടെ ചർച്ചയിൽ ഇടംപിടിച്ചേക്കുമെന്നും റിപ്പോർട്ടുകൾ പറയുന്നു.
International
ബ്രസൽസ്: യൂറോപ്പിൽ നിയമപരമായി തുടരാൻ അവകാശമില്ലാത്തവരെ പാർപ്പിക്കുന്നതിനായി റുവാണ്ടയിൽ ഓഫ്ഷോർ കേന്ദ്രം സ്ഥാപിക്കുമെന്ന് അഞ്ച് യൂറോപ്യൻ യൂണിയൻ അംഗരാജ്യങ്ങൾ പ്രഖ്യാപിച്ചു.
ജർമനി, ഓസ്ട്രിയ, നെതർലാൻഡ്സ്, ഡെന്മാർക്ക്, ഗ്രീസ് എന്നീ രാജ്യങ്ങളാണ് ഈ പദ്ധതിക്കു പിന്നിൽ. യൂറോപ്പിൽനിന്നുള്ള നാടുകടത്തലിനെതിരേ നൽകിയ എല്ലാ അപ്പീലുകളും തള്ളപ്പെട്ടവരെ മൂന്നാം രാജ്യത്തേക്ക് അയക്കാൻ അനുവാദം നൽകുന്ന, യൂറോപ്യൻ യൂണിയന്റെ പുതിയ തിരിച്ചുവരവ് നിയമം പ്രയോജനപ്പെടുത്തുന്ന ആദ്യ രാജ്യങ്ങളാണിവ.
ഇന്നലെ പുറത്തിറക്കിയ പ്രസ്താവനയിൽ, പദ്ധതി നടപ്പിലാക്കുന്നതിനായി പങ്കാളിരാജ്യമായ റുവാണ്ടയുമായി കൃത്യമായ ചർച്ചകൾ ഉടൻ ആരംഭിക്കുമെന്ന് ഈ അഞ്ചു രാജ്യങ്ങളും വ്യക്തമാക്കി.
നിയമവിരുദ്ധ കുടിയേറ്റം തടയുന്നതിനും മനുഷ്യക്കടത്തുകാരുടെ ശൃംഖല തകർക്കുന്നതിനും തങ്ങളുടെ ജനങ്ങളുടെ മേലുള്ള ഭാരം ലഘൂകരിക്കുന്നതിനും ഈ പദ്ധതി വലിയ സംഭാവനയാകുമെന്ന് അവർ അവകാശപ്പെട്ടു.
ഈ മാതൃക പരീക്ഷിക്കുന്നതിനായി അടുത്ത വർഷം ആദ്യം 100 പേരെ റുവാണ്ടയിലേക്ക് അയക്കാനാണ് അധികൃതർ ലക്ഷ്യമിടുന്നത്. അഭയാർഥികൾക്കും യൂറോപ്യൻ യൂണിയനിൽ ജീവിക്കാൻ നിയമപരമായ അവകാശമില്ലാത്തവർക്കുമാണ് പദ്ധതി ബാധകമാകുക.
നയതന്ത്രവൃത്തങ്ങളുടെ വിവരമനുസരിച്ച്, കുടിയേറ്റക്കാർ ഏതാനും മാസങ്ങൾ റുവാണ്ടയിലെ സ്വീകരണകേന്ദ്രത്തിൽ കഴിയുകയും തുടർന്ന് ആ രാജ്യത്തെ ജീവിതവുമായി ഇണങ്ങിച്ചേരുകയോ സ്വന്തം നാട്ടിലേക്കു മടങ്ങുകയോ ചെയ്യാം. പദ്ധതിക്കെതിരേ പ്രതിഷേധവും ഉയർന്നുകഴിഞ്ഞു.
International
ദുബായി: അന്താരാഷ്ട്ര ക്രിക്കറ്റ് കൗൺസിലിന്റെ (ഐസിസി) ചെയർമാനായി ജയ് ഷായെ രണ്ടാം തവണയും എതിരില്ലാതെ തെരഞ്ഞെടുത്തു. ഇന്തോനേഷ്യയിലെ ബാലിയിൽ ചേർന്ന ഐസിസി ബോർഡ് യോഗത്തിലാണ് മുപ്പത്തിയെട്ടുകാരനായ ജയ് ഷായെ രണ്ട് വർഷത്തെ പുതിയ ടേമിലേക്ക് വീണ്ടും നിയമിച്ചത്.
ക്രിക്കറ്റിന്റെ ആഗോള വ്യാപനം, ആരാധകരുടെ എണ്ണത്തിലുള്ള വർധനവ്, വാണിജ്യപരമായ വളർച്ച എന്നിവയ്ക്ക് പ്രാധാന്യം നൽകുന്ന നിർണായക ഘട്ടത്തിൽ അദ്ദേഹത്തിന്റെ നേതൃത്വം കായികരംഗത്തിന് കരുത്താകുമെന്ന് ഐസിസി ബോർഡ് വിലയിരുത്തി.
2028ലെ ലോസ്ആഞ്ചലസ് ഒളിമ്പിക്സിലൂടെ ക്രിക്കറ്റ് ഒളിമ്പിക്സ് വേദിയിലേക്ക് തിരിച്ചെത്തുന്നതും അടുത്തിടെ പ്രഖ്യാപിച്ച ദീർഘകാല മത്സര കലണ്ടറും മുന്നിൽ നിൽക്കെയാണ് ഈ തീരുമാനം.
വനിതാ ക്രിക്കറ്റിന്റെ വളർച്ച, അസോസിയേറ്റ് അംഗരാജ്യങ്ങൾക്ക് കൂടുതൽ അവസരങ്ങൾ നൽകൽ, അന്താരാഷ്ട്ര ക്രിക്കറ്റിന്റെ വിശ്വാസ്യത സംരക്ഷിക്കൽ എന്നിവയ്ക്കായി തുടർന്നും പ്രവർത്തിക്കണമെന്ന് ബോർഡ് വ്യക്തമാക്കി.
തന്നിൽ അർപ്പിച്ച വിശ്വാസത്തിൽ ഐസിസി ബോർഡിനോട് നന്ദി പറഞ്ഞ ജയ് ഷാ, ക്രിക്കറ്റ് ചരിത്രത്തിലെ ഏറ്റവും ആവേശകരമായ ഘട്ടത്തിലൂടെയാണ് നാം കടന്നുപോകുന്നതെന്ന് പ്രതികരിച്ചു. ഒളിമ്പിക്സിലേക്കുള്ള തിരിച്ചുവരവ് പുതിയ പ്രേക്ഷകരിലേക്ക് കളി എത്തിക്കാനും പുതിയ തലമുറയെ പ്രചോദിപ്പിക്കാനും വലിയ അവസരമാണ് നൽകുന്നതെന്നും ജയ് ഷാ കൂട്ടിച്ചേർത്തു.
International
ലണ്ടൻ: ഹലാൽ ഭക്ഷണം വിൽക്കാൻ വിസമ്മതിച്ചെന്ന ആരോപണത്തെ തുടർന്ന് ലണ്ടനിലെ ഇന്ത്യൻ റെസ്റ്റോറന്റിന് പുറത്ത് വൻ പ്രതിഷേധം. കഴിഞ്ഞ ദിവസം രാത്രി നൂറുകണക്കിന് ആളുകളാണ് റെസ്റ്റോറന്റിന് മുന്നിൽ തടിച്ചുകൂടിയത്. സ്ഥാപനം അടച്ചുപൂട്ടണമെന്ന് ആവശ്യപ്പെട്ടായിരുന്നു പ്രതിഷേധം. ഹാമർസ്മിത്ത് ഗ്രോവിന് സമീപമുള്ള സിംഗ്സ് ഡൈനിംഗ് എന്ന സ്ഥാപനത്തിനു പുറത്തായിരുന്നു സംഭവം.
റെസ്റ്റോറന്റിന്റെ മുൻവശത്ത് അഭിമാനത്തോടെ നോൺ ഹലാൽ എന്നെഴുതിയിരുന്നതാണ് പ്രതിഷേധത്തിന് കാരണമായത്. ഉടമ ഹർമൻ സിംഗ് കപൂർ ഹലാൽ മാംസം വിളമ്പാൻ വിസമ്മതിച്ചെന്നായിരുന്നു പ്രതിഷേധക്കാരുടെ ആരോപണം. മുസ്ലിംങ്ങൾക്കും ഗാസയിലെ സംഘർഷത്തിനുമെതിരെ വിദ്വേഷം പ്രചരിപ്പിക്കുന്ന തരത്തിൽ കപൂർ നേരത്തെ സാമൂഹിക മാധ്യമങ്ങളിൽ നടത്തിയ പ്രതികരണങ്ങളും വിമർശനത്തിന് ഇടയാക്കിയിരുന്നു.
ഇതിനിടെ വെള്ളിയാഴ്ചത്തെ പ്രതിഷേധത്തിന് തൊട്ടുമുമ്പ് കപൂറിനെ മെട്രോപൊളിറ്റൻ പൊലിസ് അറസ്റ്റ് ചെയ്തു. എന്നാൽ അറസ്റ്റിന്റെ കൃത്യമായ കാരണത്തെക്കുറിച്ചുള്ള കൂടുതൽ വിവരങ്ങൾ പുറത്തുവന്നിട്ടില്ല. റെസ്റ്റോറന്റിന് പുറത്ത് പലസ്തീൻ പതാകകളുമായി എത്തിയ പ്രതിഷേധക്കാർ സ്ഥാപനം അടച്ചുപൂട്ടണമെന്നും ആവശ്യപ്പെട്ടു. ഇതിന്റെ ദൃശ്യങ്ങൾ സാമൂഹിക മാധ്യമങ്ങളിൽ പ്രചരിക്കുന്നുണ്ട്.
International
ലിമ: പെറുവിയൻ വ്യോമസേനയുടെ എംഐ-17 ഹെലികോപ്റ്ററിന്റെ കോക്പിറ്റിൽ പൈലറ്റുമാർക്കൊപ്പം യാത്ര ചെയ്ത് ലെയോ പതിനാലാമൻ മാർപാപ്പ. ശനിയാഴ്ച ചിക്ലായോയിൽനിന്നു കാജമാർക്ക മേഖലയിലെ വിദൂരഗ്രാമമായ സാന്താ ക്രൂസ് ഡി സുച്ചബാംബയിലേക്കായിരുന്നു അദ്ദേഹത്തിന്റെ ഈ ആകാശയാത്ര.
സാധാരണ യാത്രക്കാരുടെ സീറ്റിനു പകരം കോക്പിറ്റിൽ ഇരിക്കാൻ മാർപാപ്പ താത്പര്യം പ്രകടിപ്പിക്കുകയായിരുന്നു. പൈലറ്റുമാരായ ജിനോ ബർഗോസ്, ഹാവിയർ റോജാസ് എന്നിവർക്കൊപ്പം ഏകദേശം 45 മിനിറ്റോളം അദ്ദേഹം കോക്പിറ്റിൽ ചെലവഴിച്ചു.
ഹെഡ്സെറ്റ് ധരിച്ച്, പൈലറ്റുമാരോടു കുശലം പറഞ്ഞും താഴെ തടിച്ചുകൂടിയ ഗ്രാമീണർക്കുനേരേ കൈവീശിയും യാത്ര ആസ്വദിക്കുന്ന മാർപാപ്പയുടെ ദൃശ്യങ്ങൾ സമൂഹമാധ്യമങ്ങളിൽ 'പാപ്പാകോപ്റ്റർ' എന്നപേരിൽ വൈറലായിട്ടുണ്ട്.
ഏകദേശം മൂന്നു പതിറ്റാണ്ടായി ഒരുമിച്ച് പ്രവർത്തിക്കുന്ന തങ്ങൾക്ക് മാർപാപ്പയോടൊപ്പമുള്ള ഈ യാത്ര വലിയൊരു ബഹുമതിയും അവിസ്മരണീയമായ ഓർമയുമാണെന്ന് പൈലറ്റുമാരും വ്യോമസേനയും സമൂഹമാധ്യമത്തിൽ കുറിച്ചു.
വലത് ശ്വാസകോശത്തിന്റെ ഒരു ഭാഗം നീക്കം ചെയ്യുന്ന ശസ്ത്രക്രിയ കഴിഞ്ഞ് ഒരു മാസം മാത്രം പിന്നിടുമ്പോഴാണ് 71കാരനായ മാർപാപ്പയുടെ ഈ ഊർജസ്വലമായ പര്യടനം. തീരദേശ മരുഭൂമിയിൽനിന്ന് ആൻഡീസ് പർവതനിരകളിലേക്കും തുടർന്ന് ആമസോൺ മഴക്കാടുകളിലേക്കും എത്തിയ അദ്ദേഹം യാത്രയിലുടനീളം ക്ഷീണത്തിന്റെ യാതൊരു ലക്ഷണവും പ്രകടിപ്പിച്ചില്ല.
1985 മുതൽ 2023 വരെ പെറുവിൽ മിഷനറിയായും ബിഷപ്പായും പ്രവർത്തിച്ച് പ്രാദേശിക സമൂഹങ്ങളുമായി അടുത്ത ബന്ധം പുലർത്തിയിരുന്ന മാർപാപ്പയ്ക്ക് ആവേശോജ്വല വരവേല്പാണു വിശ്വാസികൾ നൽകിയത്.
കുസ്കോയിലെ ജനസാഗരം
ഞായറാഴ്ച തെക്കൻ ആൻഡീസ് പർവതനിരകളിലുള്ളതും പഴയ ഇൻകാ സാമ്രാജ്യത്തിന്റെ സിരാകേന്ദ്രവുമായിരുന്ന കുസ്കോയിൽ മാർപാപ്പ എത്തിച്ചേർന്നു. വിമാനത്താവളത്തിൽനിന്ന് അദ്ദേഹത്തെ വരവേൽക്കാൻ അഞ്ചു ലക്ഷത്തോളം ആളുകളാണ് തെരുവോരങ്ങളിൽ അണിനിരന്നത്.
പ്രായാധിക്യത്തിന്റെ അവശതകൾ മറന്ന് കുന്നുകയറി എത്തിയ തെക്കൻ പെറുവിലെ അരെക്വിപ സ്വദേശിനി അന മരിയ നീന ഡെൽഗാഡോയെപ്പോലുള്ള നിരവധി വിശ്വാസികൾക്ക് മാർപാപ്പയെ നേരിട്ടു കാണാനായത് വലിയ ആത്മീയ അനുഭവമായി.
സമുദ്രനിരപ്പിൽനിന്ന് 12,000 അടിയിലധികം ഉയരത്തിലുള്ള പുരാതന ഇൻക കേന്ദ്രമായ സക്സായ്വാമൻ നാഷണൽ ആർക്കിയോളജിക്കൽ പാർക്കിൽ നടന്ന പ്രാർഥനാശുശ്രൂഷയ്ക്ക് മാർപാപ്പ നേതൃത്വം നൽകി.
ഭിന്നതകളും മുറിവുകളും അവിശ്വാസവും നിറഞ്ഞ ഈ കാലഘട്ടത്തെ മറികടക്കാൻ മതപരമായ പാരമ്പര്യങ്ങൾക്കു സാധിക്കുമെന്നും വിശ്വാസവും സ്നേഹവും പകരുന്ന വെളിച്ചത്തിൽ ജനങ്ങളെ ഒന്നിപ്പിക്കാനാണു മതവിശ്വാസം ഉതകേണ്ടതെന്നും അദ്ദേഹം ഓർമിപ്പിച്ചു. പരമ്പരാഗത ഉത്സവങ്ങളെ സാഹോദര്യത്തിന്റെയും ഉപവിയുടെയും വിദ്യാലയങ്ങളാക്കി മാറ്റാൻ വിശ്വാസികളോട് അദ്ദേഹം ആഹ്വാനം ചെയ്തു.
തുടർന്ന് കുസ്കോ കത്തീഡ്രലിനുമുന്നിലെ ചത്വരത്തിൽ ത്രികാലജപം നയിച്ച മാർപാപ്പ 1650ലെ ഭൂകമ്പത്തിൽനിന്നു നഗരത്തെ അത്ഭുതകരമായി രക്ഷിച്ചുവെന്ന് വിശ്വസിക്കപ്പെടുന്ന 'ലോർഡ് ഓഫ് ദ എർത്ത്ക്വേക്സ്' എന്ന ക്രൂശിതരൂപത്തെ അണിയിക്കാനുള്ള തിരുവസ്ത്രവും സമ്മാനിച്ചു.
ആമസോൺ മഴക്കാടുകളിൽ
ഉച്ചകഴിഞ്ഞ് ആമസോൺ താഴ്വരയിലെ പുകാൽപ നഗരത്തിലെത്തിയ മാർപാപ്പ, കായിക മൈതാനത്ത് അർപ്പിച്ച വിശുദ്ധ കുർബാനയിൽ രണ്ടു ലക്ഷത്തോളം വിശ്വാസികൾ പങ്കെടുത്തു. ആമസോൺ മഴക്കാടുകളെ സംരക്ഷിക്കുക എന്നത് അവിടെ വസിക്കുന്ന ജനങ്ങളുടെ അവകാശങ്ങൾ സംരക്ഷിക്കുക എന്നതുതന്നെയാണെന്നും ഭൂമിയുടെ നിലവിളിയും പാവപ്പെട്ടവരുടെ നിലവിളിയും വേർതിരിക്കാനാകാത്തതാണെന്നും വചനസന്ദേശത്തിൽ അദ്ദേഹം വ്യക്തമാക്കി.
കുർബാനയ്ക്കുമുമ്പ് തദ്ദേശീയ ജനവിഭാഗങ്ങളുടെ പ്രതിനിധികളുമായും മിഷനറിമാരുമായും അദ്ദേഹം കൂടിക്കാഴ്ച നടത്തിയിരുന്നു. ഞായറാഴ്ച വൈകുന്നേരം ലിമയിൽ തിരിച്ചെത്തിയ മാർപാപ്പ, ഇന്നു രാവിലെ അവിടെ വിശുദ്ധ കുർബാന അർപ്പിച്ചശേഷം ഉച്ചയോടെ റോമിലേക്കു മടങ്ങും.
International
വാഷിംഗ്ടൺ ഡിസി: ഇറാനിലെ സ്കൂളിനുനേരെയുണ്ടായ മിസൈൽ ആക്രമണത്തെ തുടർന്ന് രണ്ട് അമേരിക്കൻ നാവിക ഉദ്യോഗസ്ഥരെ പേരെടുത്ത് ഭീഷണിപ്പെടുത്തി ഇറാൻ. യുദ്ധക്കപ്പലായ യുഎസ്എസ് സ്പ്രൂവൻസിന്റെ കമാൻഡിംഗ് ഓഫിസർ ലീ ആർ. ടേറ്റ്, എക്സിക്യൂട്ടീവ് ഓഫിസർ ലഫ്റ്റനന്റ് കമാൻഡർ ജെഫ്രി ഇ. യോർക്ക് എന്നിവർക്കെതിരെയാണ് ഇറാന്റെ ഭാഗത്തുനിന്ന് ഭീഷണി ഉയർന്നിരിക്കുന്നത്.
ഫെബ്രുവരി 28-നാണ് ഇറാനിലെ മിനാബിലുള്ള ഷജാറെ തയ്യിബ എലിമെന്ററി സ്കൂളിന് നേരെ യുഎസ് സേന ടോമാഹോക്ക് മിസൈൽ ആക്രമണം നടത്തിയതും ഇതിൽ 168 കുട്ടികൾ കൊല്ലപ്പെട്ടതും. ഈ ആക്രമണത്തിന് പിന്നിൽ ഈ രണ്ട് ഉദ്യോഗസ്ഥരാണെന്നാണ് ഇറാന്റെ ആരോപണം.
ഇതേ തുടർന്ന് ദക്ഷിണാഫ്രിക്കയിലെ ഇറാൻ എംബസിയുടെ ഔദ്യോഗിക എക്സ് അക്കൗണ്ടിലൂടെയാണ് ഉദ്യോഗസ്ഥരുടെ ചിത്രങ്ങൾ സഹിതം"ഞങ്ങൾ നിങ്ങളെ കണ്ടെത്തും" എന്ന ഭീഷണി മുന്നറിയിപ്പ് പുറത്തുവിട്ടിരിക്കുന്നത്. മാർച്ച് മാസത്തിലും സമാനമായ രീതിയിൽ "ഈ രണ്ട് കുറ്റവാളികളെയും ഓർക്കുക, അവർക്ക് സ്വന്തമായി കുട്ടികളില്ലേ?" എന്ന ചോദ്യത്തോടൊപ്പം ഇവരുടെ ചിത്രങ്ങൾ ഇറാൻ പങ്കുവച്ചിരുന്നു.
357 ദിവസത്തെ ദീർഘകാല സേവനത്തിനും മേഖലയിലെ പോരാട്ടങ്ങൾക്കും ശേഷം യുഎസ്എസ് സ്പ്രൂവൻസ് കപ്പൽ കാലിഫോർണിയയിലെ സാൻ ഡെഗോയിലേക്ക് മടങ്ങിയതിന് പിന്നാലെയാണ് ഇറാന്റെ ഭാഗത്തുനിന്ന് വീണ്ടും പ്രകോപനപരമായ നീക്കമുണ്ടായിരിക്കുന്നത്.
വ്യക്തിഗതമായി അമേരിക്കൻ സൈനിക ഉദ്യോഗസ്ഥരെ ലക്ഷ്യമിട്ടുള്ള ഇറാന്റെ പരസ്യമായ ഈ ഭീഷണി വാഷിംഗ്ടണിൽ വലിയ തോതിലുള്ള സുരക്ഷാ ആശങ്കകളാണ് സൃഷ്ടിച്ചിരിക്കുന്നത്. രാജ്യത്തേക്ക് മടങ്ങിയെത്തുന്ന സൈനികർക്കെതിരായ ഏത് നീക്കത്തെയും ശക്തമായി പ്രതിരോധിക്കുമെന്ന് പ്രതിരോധ വൃത്തങ്ങൾ വ്യക്തമാക്കി.
International
റോം: അയൽവാസിയെ കൊലപ്പെടുത്തിയെന്നാരോപിച്ച് 25 വർഷം തടവിന് ശിക്ഷിക്കപ്പെട്ട് ജയിലിൽ കഴിഞ്ഞിരുന്ന നഴ്സ് മോണിക്ക ബുസെട്ടോ 14 വർഷത്തെ ജയിൽവാസത്തിന് ശേഷം മോചിതയായി. ട്രെന്റോ അപ്പീൽ കോടതി ഈ കേസിന്റെ പുനഃപരിശോധനാ ഹർജി അംഗീകരിച്ചതിനെ തുടർന്നാണ് മോചനം സാധ്യമായത്.
2012 ഡിസംബറിലാണ് ഇറ്റലിയിലെ മെസ്ട്രെയിൽ ലിഡ ടാഫി പമിയോ എന്ന സ്ത്രീയെ സ്വന്തം വീട്ടിൽ കൊല്ലപ്പെട്ട നിലയിൽ കണ്ടെത്തിയത്. ഈ കേസിൽ അയൽവാസിയായ നഴ്സ് മോണിക്ക ബുസെട്ടോയെ പൊലിസ് അറസ്റ്റ് ചെയ്യുകയും കോടതി കുറ്റക്കാരിയായി കണ്ടെത്തി 25 വർഷത്തെ തടവിന് ശിക്ഷിക്കുകയും ചെയ്തിരുന്നു.
മോണിക്ക ശിക്ഷിക്കപ്പെട്ട് മൂന്ന് വർഷത്തിന് ശേഷം 100 യൂറോ കടം തിരികെ ചോദിച്ചദിനു ഫ്രാൻസെസ്ക വിയാനെല്ലോ എന്ന മറ്റൊരു സ്ത്രീ കൂടി കൊല്ലപ്പെട്ടു. ഈ കേസിൽ അറസ്റ്റിലായ സുസന്ന മില്ലി ലസാരിനി എന്ന സ്ത്രീ, താൻ തന്നെയാണ് ലിഡ ടാഫി പമിയോയെയും കൊലപ്പെടുത്തിയതെന്ന് പൊലിസിനോട് കുറ്റസമ്മതം നടത്തുകയായിരുന്നു.
ഇതിനുപുറമെ, ഒരു ടിവി ഷോ നടത്തിയ അന്വേഷണത്തിൽ കണ്ടെത്തിയ പുതിയ തെളിവുകളും കേസിൽ നിർണായകമായി. മോണിക്കയിൽ നിന്ന് പിടിച്ചെടുത്ത നെക്ലേസും സംഭവസമയത്ത് ഇരയുടെ കൈവശമുണ്ടായിരുന്ന നെക്ലേസും തമ്മിൽ വലിപ്പത്തിലും രൂപത്തിലും തികച്ചും വ്യത്യാസമുണ്ടെന്ന് ഈ അന്വേഷണത്തിൽ വ്യക്തമായി.
കൂടാതെ, കേസ് അന്വേഷണത്തിനിടയിൽ തെളിവുകൾ സൂക്ഷിക്കുന്നതിൽ ഗുരുതരമായ വീഴ്ചകൾ സംഭവിച്ചിട്ടുണ്ടെന്നും നഴ്സിന്റെ അഭിഭാഷകൻ സ്റ്റെഫാനോ ബുസെട്ടോ വ്യക്തമാക്കി.
"ഞങ്ങൾ എപ്പോഴും നിയമത്തിൽ വിശ്വസിച്ചിരുന്നു. ഇപ്പോൾ നമ്മൾ മോണിക്കയോട് 'വൈകിയതിന് മാപ്പ്' എന്ന് പറയേണ്ടിയിരിക്കുന്നു," അഭിഭാഷകൻ സ്റ്റെഫാനോ ബുസെട്ടോ പ്രതികരിച്ചു. പുതിയ തെളിവുകളുടെയും യഥാർഥ പ്രതിയുടെ കുറ്റസമ്മതത്തിന്റെയും അടിസ്ഥാനത്തിൽ കോടതി ശിക്ഷ റദ്ദാക്കുകയായിരുന്നു.
International
ബാങ്കോക്ക്: തായ്ലൻഡിലെ വിനോദസഞ്ചാര കേന്ദ്രമായ ഫുക്കേറ്റിലുണ്ടായ തീപിടിത്തത്തിൽ പതിനൊന്നുപേർ മരിച്ചു. സംഭവത്തിൽ പതിനാറുപേർക്ക് ഗുരുതരമായി പരിക്കേറ്റിട്ടുണ്ട്. തിങ്കളാഴ്ച പുലർച്ചെ മൂന്നരയ്ക്കാണ് തീപിടിത്തം.
കടകളും ഭക്ഷണശാലകളും വാടകമുറികളും പ്രവർത്തിച്ചിരുന്ന നാലുനില കെട്ടിടത്തിലാണ് ആദ്യം തീപിടിത്തമുണ്ടായത്. പെട്ടെന്നുതന്നെ ആളിപ്പടർന്ന തീ സമീപത്തെ മറ്റ് കെട്ടിടങ്ങളിലേക്കും വ്യാപിക്കുകയായിരുന്നു. വിവരമറിഞ്ഞ് ഉടൻ സ്ഥലത്തെത്തിയ അഗ്നിരക്ഷാസേനയുടെ നേതൃത്വത്തിൽ രണ്ടുമണിക്കൂറോളം നീണ്ട പരിശ്രമത്തിനൊടുവിലാണ് സ്ഥിതിഗതികൾ നിയന്ത്രണവിധേയമാക്കാൻ കഴിഞ്ഞത്.
തായ്ലൻഡ്, മ്യാൻമർ സ്വദേശികളാണ് മരിച്ചതെന്നാണ് പ്രാഥമിക വിവരം. സംഭവത്തിൽ പൊലിസ് അന്വേഷണം ആരംഭിച്ചിട്ടുണ്ട്.
International
ടെഹ്റാൻ: ‘യുദ്ധവുമില്ല സമാധാനവുമില്ല’ എന്ന അവസ്ഥയിൽ ഇറാൻ തുടരില്ലെന്ന് പാർലമെന്റ് സ്പീക്കർ മുഹമ്മദ് ബാഗർ ഗാലിബാഫ്. യുഎസ് തെറ്റായ കണക്കുകൂട്ടലുകൾ നടത്തരുതെന്നും ഏതെങ്കിലും തരത്തിലുള്ള സംഘർഷമുണ്ടായാൽ അതിന്റെ അതിരുകൾ ഇറാൻ സായുധ സേന തീരുമാനിക്കുമെന്നും അദ്ദേഹം മുന്നറിയിപ്പ് നൽകി. അമേരിക്കയുമായി നിലനിൽക്കുന്ന സംഘർഷങ്ങളുടെയും സമാധാന ചർച്ചകളിലെ അനിശ്ചിതത്വത്തിന്റെയും പശ്ചാത്തലത്തിലാണ് ഗാലിബാഫിന്റെ പരാമർശം.
അമേരിക്ക ചർച്ചകളുടെ പാതയാണോ അതോ യുദ്ധമാണോ തെരഞ്ഞെടുക്കുന്നത് എന്നത് ഞങ്ങൾക്ക് വിഷയമല്ല. ഞങ്ങളുടെ ന്യായമായ ഏഴ് വ്യവസ്ഥകൾ അംഗീകരിക്കുകയാണെങ്കിൽ കരാറിലേക്കുള്ള വാതിൽ തുറന്നിരിക്കുമെന്ന് ഗാലിബാഫ് പറഞ്ഞു.
International
ടെക്സസ്: ബഹിരാകാശ വിക്ഷേപണ ചരിത്രത്തിൽ അത്യപൂർവ നേട്ടം സ്വന്തമാക്കി ഇലോൺ മസ്കിന്റെ സ്പേസ് എക്സ്. ഭീമൻ സ്റ്റാർഷിപ്പ് വിക്ഷേപണ സംവിധാനത്തിന്റെ മുകൾഭാഗമായ 171 അടി ഉയരമുള്ള പേടകത്തെ ഭ്രമണപഥത്തിലെ ദൗത്യത്തിനുശേഷം ദക്ഷിണ ടെക്സസിലെ വിക്ഷേപണത്തറയിലുള്ള ‘മെക്കാസില്ല’ ടവറിന്റെ യന്ത്രക്കൈകൾ ഉപയോഗിച്ച് സുരക്ഷിതമായി പിടിച്ചെടുത്തു.
റോക്കറ്റിന്റെ മുകൾഭാഗം വിക്ഷേപണത്തിനുശേഷം വീണ്ടും ഉപയോഗിക്കാൻ സാധിക്കുന്ന വിധത്തിൽ വിക്ഷേപണത്തറയിലേക്കുതന്നെ കൃത്യതയോടെ തിരികെയെത്തിച്ച് പിടിച്ചെടുക്കുന്നത് ലോകചരിത്രത്തിൽ ഇതാദ്യമായാണ്.
വെള്ളിയാഴ്ച പ്രാദേശിക സമയം വൈകുന്നേരം 5.47നാണ് സ്പേസ് എക്സിന്റെ 15-ാമത് പരീക്ഷണദൗത്യമായ ‘ഫ്ലൈറ്റ് 15’ വിക്ഷേപിച്ചത്. യുഎസ് ഫെഡറൽ ഏവിയേഷൻ അഡ്മിനിസ്ട്രേഷൻ(എഫ്എഎ) രാജ്യവ്യാപകമായി വിമാന സർവീസുകൾ നിർത്തിവച്ച സമയത്തായിരുന്നു വിക്ഷേപണമെങ്കിലും വ്യത്യസ്ത നാവിഗേഷൻ സംവിധാനങ്ങൾ ഉപയോഗിക്കുന്നതിനാൽ റോക്കറ്റ് വിക്ഷേപണത്തെ ഇതു ബാധിച്ചില്ല.
ഭൂമിയുടെ ഭ്രമണപഥത്തിലെത്തിയ സ്റ്റാർഷിപ്പ് പേടകം സ്റ്റാർലിങ്ക് ഇന്റർനെറ്റ് ഉപഗ്രഹങ്ങളെ വിന്യസിക്കുകയും 22 മണിക്കൂർ ബഹിരാകാശത്ത് തുടരുകയും ചെയ്തു. ഭൂമിയെ 14 തവണ വലംവച്ച ശേഷമാണു പേടകം പ്രാദേശികസമയം ശനിയാഴ്ച ഉച്ചകഴിഞ്ഞ് 3.20ഓടെ(ഇന്ത്യൻ സമയം ഇന്നലെ പുലർച്ചെ 2.50) ടെക്സസിലെ സ്റ്റാർബേസിലേക്കു തിരിച്ചിറങ്ങിയത്.
അതേസമയം, വിക്ഷേപണത്തിന് തൊട്ടുപിന്നാലെ റോക്കറ്റിന്റെ താഴത്തെ ഭാഗമായ ‘സൂപ്പർ ഹെവി’ ബൂസ്റ്ററിനെയും സമാന രീതിയിൽ ടവറിൽ പിടിച്ചെടുക്കാൻ സ്പേസ് എക്സ് ശ്രമിച്ചെങ്കിലും ഇന്ധനക്കുറവ് കാരണം ആ ശ്രമം ഉപേക്ഷിച്ചു. തുടർന്ന് ബൂസ്റ്ററിനെ കടലിലേക്ക് തിരിച്ചുവിടുകയും സമുദ്രോപരിതലത്തിന് തൊട്ടുമുകളിലായി അതു തീഗോളമായി പതിക്കുകയും ചെയ്തു.
International
വാഷിംഗ്ടൺ ഡിസി: ടെക്സസിലെ തടങ്കൽ കേന്ദ്രത്തിൽ ഉദ്യോഗസ്ഥൻ തന്നെ ലൈംഗികമായി പീഡിപ്പിച്ചെന്നും ലൈംഗികബന്ധത്തിനു പകരമായി ഗ്രീൻ കാർഡ് വാഗ്ദാനം ചെയ്തതായും ആരോപിച്ച് ലബനീസ് യുവതി. ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് (ഐസിഇ) ഉദ്യോഗസ്ഥനാണ് പീഡിപ്പിച്ചതെന്ന് 21കാരിയായ യുവതി പറഞ്ഞു.
ലൂസി വൈസ് എന്നറിയപ്പെടുന്ന റഹഫ് അലി അൽമെർഹിജ് എന്ന യുവതിയാണ് ഉദ്യോഗസ്ഥനെതിരെ രംഗത്തെത്തിയത്. എന്നാൽ അമേരിക്കൻ അധികൃതർ ആരോപണങ്ങൾ പൂർണമായും തള്ളിക്കളഞ്ഞു. റെയ്മണ്ട്വില്ലിലെ എൽ വാലെ ഡിറ്റൻഷൻ ഫെസിലിറ്റിയിലെ ഉദ്യോഗസ്ഥനായ മാർക്കെൽ വാലസ് സമ്മതമില്ലാതെ തന്നെ ലൈംഗികമായി പീഡിപ്പിച്ചതായാണ് യുവതിയുടെ വെളിപ്പെടുത്തൽ.
വഴങ്ങിയില്ലെങ്കിൽ ഭർത്താവിനെ ജയിലിലടയ്ക്കുമെന്നും നാടുകടത്തുമെന്നും ഉദ്യോഗസ്ഥൻ ഭീഷണിപ്പെടുത്തിയതായി ന്യൂസ്വീക്കിനു നൽകിയ അഭിമുഖത്തിൽ അൽമെർഹിജ് ആരോപിച്ചു. ‘‘ഞാൻ നിനക്ക് ഗ്രീൻ കാർഡ് നൽകാം, നിന്റെ ഭർത്താവ് പ്രായമായ ആളാണെന്നും അയാൾക്ക് നിന്നെ സഹായിക്കാൻ കഴിയില്ലെന്നും തനിക്ക് മാത്രമേ സഹായിക്കാൻ കഴിയൂ എന്നും ഉദ്യോഗസ്ഥൻ പറഞ്ഞു’’ - യുവതി വെളിപ്പെടുത്തി.
2026 ഏപ്രിലിൽ തന്റെ മുൻ അഭിഭാഷകൻ കേസിൽനിന്ന് പിന്മാറിയതോടെ നിയമസഹായമില്ലാതെ നിൽക്കുന്ന സമയത്താണ് അതിക്രമം നടന്നതെന്ന് യുവതി പറയുന്നു. ഹോംലാൻഡ് സെക്യൂരിറ്റി വകുപ്പിനു നൽകിയ സത്യവാങ്മൂലത്തിൽ യുവതി നേരിട്ട ക്രൂരതകൾ വിവരിക്കുന്നുണ്ട്.
International
സിയൂൾ: ദക്ഷിണ കൊറിയയിലെ ദേശീയ ടാക്സ് അക്കൗണ്ടന്റ് പരീക്ഷയിൽ ഒന്നാം റാങ്ക് നേടിയ ഉദ്യോഗാർഥി ജനറേറ്റീവ് എഐയുടെ സഹായത്തോടെ കോപ്പിയടിച്ചെന്ന് സമ്മതിച്ചു. ജൂലൈയിൽ നടന്ന രണ്ടു ഘട്ടപരീക്ഷയിലും നൂറുകണക്കിന് ചോദ്യങ്ങൾക്ക് ഏതാണ്ട് മുഴുവൻ മാർക്കും നേടിയതോടെ ഉയർന്ന സംശയങ്ങൾക്കൊടുവിലാണ് ഇന്നലെ ‘ഹാൻ’ എന്നുപേരുള്ള ഉദ്യോഗാർഥി കുറ്റം സമ്മതിച്ചത്.
മൈക്രോ കാമറ ഉപയോഗിച്ച് ചോദ്യപേപ്പറിന്റെ ചിത്രങ്ങളെടുത്ത് എഐ ടൂളിലേക്ക് അയച്ചശേഷം സ്മാർട്ട്ഫോണിലൂടെ ലഭിച്ച ഉത്തരങ്ങൾ എഴുതുകയായിരുന്നുവെന്ന് ഇയാൾ വെളിപ്പെടുത്തി. ഇലക്ട്രോണിക് ഉപകരണങ്ങളും എഐയും ഉപയോഗിച്ചാണു തട്ടിപ്പ് നടത്തിയതെന്ന് മുഖംമൂടി ധരിച്ച് യുട്യൂബ് ചാനലിലൂടെ പുറത്തുവിട്ട കുറ്റസമ്മതത്തിൽ ഇയാൾ പറഞ്ഞു. പൊലിസിനും രേഖാമൂലം മൊഴി നൽകിയിട്ടുണ്ട്.
വാർഷിക കോളജ് പ്രവേശനപരീക്ഷ നടക്കാനിരിക്കെയാണു തട്ടിപ്പ് പുറത്തുവന്നിരിക്കുന്നത്. ഇതോടെ പരീക്ഷകളിലെ എഐ അധിഷ്ഠിത കോപ്പിയടിയെക്കുറിച്ച് ആശങ്ക ശക്തമായി. സമാനമായ തട്ടിപ്പുകൾ അക്കൗണ്ടന്റ് പരീക്ഷയിലും നടന്നെന്ന റിപ്പോർട്ടുകളെത്തുടർന്ന് വിഷയം ചർച്ച ചെയ്യാൻ ഉന്നതതല യോഗവും വിളിച്ചിട്ടുണ്ട്.
International
അമ്മാൻ: ജോർദാനെ ഞെട്ടിച്ച പള്ളിയാക്രമണത്തിൽ കുറ്റക്കാരെന്നു കണ്ടെത്തിയ മൂന്നു പ്രതികളെ തൂക്കിക്കൊല്ലാൻ കോടതിവിധി. പ്രതികളിൽ രണ്ടുപേർ സഹോദരങ്ങളും മൂന്നാമൻ ഇവരുടെ അടുത്ത ബന്ധുവുമാണ്.
കഴിഞ്ഞമാസം 23ന് കരാക്കിലെ ഗ്രീക്ക് ഓർത്തഡോക്സ് പള്ളിയിൽ മൃതസംസ്കാരച്ചടങ്ങ് നടക്കുന്നതിനിടെയുണ്ടായ വെടിവയ്പിൽ ഒന്പതു പേരാണു കൊല്ലപ്പെട്ടത്. 34 പേർക്കു പരിക്കേൽക്കുകയും ചെയ്തു. വെടിവയ്പിനു ശേഷം കടന്നുകളഞ്ഞ മൂന്നു പേരെയും മൂന്നു ദിവസത്തിനുശേഷം ഏറ്റുമുട്ടലിലാണ് പിടികൂടിയത്. ഇവരുടെ പേരുവിവരങ്ങൾ പുറത്തുവിട്ടിട്ടില്ല. ജോർദാൻ പൗരന്മാരാണെന്നാണു സൂചന.
പ്രതികൾ തീവ്രവാദ പ്രവർത്തനം, തീവ്രവാദ ആശയങ്ങൾ പ്രചരിപ്പിക്കൽ, ഗൂഢാലോചന, ആയുധം കൈവശം വയ്ക്കൽ തുടങ്ങിയ കുറ്റങ്ങൾ ചെയ്തതായി കോടതി കണ്ടെത്തിയെന്ന് ജോർദാൻ സായുധ സേന അറിയിച്ചു. ന്യൂനപക്ഷ ക്രൈസ്തവർക്കു നേരേയുണ്ടായ ആക്രമണത്തെ ഉരുക്കുമുഷ്ടിയോടെ നേരിടാൻ ജോർദാനിലെ അബ്ദുള്ള രാജാവ് നിർദേശം നല്കി. ഇതിനു പിന്നാലെ സിറിയയിലെ ഇസ്ലാമിക് സേറ്റ് ഭീകരതാവളങ്ങളിൽ ജോർദാൻ സേന വ്യോമാക്രമണം നടത്തിയിരുന്നു.
International
അന്റാലിയ (തുർക്കി): ആഗോളതാപനത്തെ ചെറുക്കാൻ അടിയന്തരവും നിർണായകവുമായ നടപടികൾ സ്വീകരിക്കണമെന്ന് തുർക്കിയിൽ ആരംഭിച്ച യുഎൻ കാലാവസ്ഥാ ഉച്ചകോടിയിൽ ലോകനേതാക്കൾ ആഹ്വാനം ചെയ്തു. കാലാവസ്ഥാവ്യതിയാനം ലോകത്തിലെ ഏറ്റവും ദുർബലരായ രാജ്യങ്ങളെ വലിയതോതിലാണു ബാധിക്കുന്നതെന്നും നേതാക്കൾ ചൂണ്ടിക്കാട്ടി.
ഭൗമരാഷ്ട്രീയ സംഘർഷങ്ങൾ കാലാവസ്ഥാ വ്യതിയാനത്തിൽനിന്നുള്ള ശ്രദ്ധ തിരിച്ചതായും നേതാക്കൾ അഭിപ്രായപ്പെട്ടു.
ഫോസിൽ ഇന്ധനങ്ങളെ ആശ്രയിക്കുന്നത് അവസാനിപ്പിക്കുക, ചൂടേറുന്ന ലോകവുമായി പൊരുത്തപ്പെടുക, കാലാവസ്ഥാ വ്യതിയാനത്തിന്റെ ദുരിതം പേറുന്ന ദരിദ്രരാജ്യങ്ങൾക്കുള്ള സാമ്പത്തികസഹായം വർധിപ്പിക്കുക, സംഘർഷങ്ങൾക്കുപകരം സഹകരണം പ്രോത്സാഹിപ്പിക്കുക എന്നിവയ്ക്ക് ചർച്ചകളിൽ മുൻഗണന നൽകണമെന്ന് യുഎൻ സെക്രട്ടറി ജനറൽ അന്റോണിയോ ഗുട്ടെറസ് ഉദ്ഘാടന പ്രസംഗത്തിൽ പറഞ്ഞു. നമ്മുടെ ജീവനും കുട്ടികളുടെ ഭാവിക്കുംവേണ്ടിയുള്ള പോരാട്ടത്തിലാണു നമ്മളെന്നും അദ്ദേഹം പറഞ്ഞു.
യുദ്ധങ്ങളും പണപ്പെരുപ്പവും ഭൗമരാഷ്ട്രീയ സംഘർഷങ്ങളും കാരണം കാലാവസ്ഥാവ്യതിയാനം എന്ന വിഷയം പിന്തള്ളപ്പെട്ടതായി ബ്രസീൽ പ്രസിഡന്റ് ലൂയിസ് ഇനാസിയോ ലുല ഡ സിൽവ പറഞ്ഞു. ലോകത്തിലെ ഏറ്റവും വലിയ മഴക്കാടായ ആമസോണിനെ സംരക്ഷിക്കുമെന്ന് പ്രതിജ്ഞയെടുത്ത അദ്ദേഹം, സുസ്ഥിരമായ ഭാവിക്കായി ലോകനേതാക്കൾ ഒന്നിച്ചുനിൽക്കണമെന്നും അഭ്യർഥിച്ചു.
തങ്ങൾ അനുഭവിക്കുന്ന കാലാവസ്ഥാവ്യതിയാനത്തിന്റെ കെടുതികളെക്കുറിച്ച് ദ്വീപുരാജ്യമായ പലാവുവിന്റെ പ്രസിഡന്റ് സുരംഗൽ വിപ്സ് ജൂനിയറും ബാർബഡോസ് പ്രധാനമന്ത്രി മിയ മോട്ട്ലിയും ഉൾപ്പടെയുള്ള നേതാക്കൾ വികാരഭരിതമായാണു സംസാരിച്ചത്.
മാരകമായ വെള്ളപ്പൊക്കങ്ങളും ഉഷ്ണതരംഗങ്ങളും മറ്റു പ്രകൃതിദുരന്തങ്ങളും നാശം വിതച്ച ഒരു വർഷത്തിനുശേഷമാണ് ഈ വാർഷിക ഉച്ചകോടി ചേരുന്നത്. കഴിഞ്ഞ ഒന്പതിന് ആരംഭിച്ച ഉച്ചകോടി 20ന് സമാപിക്കും. വിവിധ ദിവസങ്ങളിലെ സെഷനുകളിൽ 102 ലോകനേതാക്കൾ പങ്കെടുക്കും.
International
മനാമ: ബഹറിനിലെ യുഎസ് സൈനികതാവളത്തിൽ ഡ്രോൺ ആക്രമണം നടത്തിയതായി ഇറാനിലെ വിപ്ലവഗാർഡ് അവകാശപ്പെട്ടു. അതേസമയം, ഇറാന്റെ വ്യോമാക്രമണം പരാജയപ്പെടുത്തിയെന്ന് ബഹ്റിനും അറിയിച്ചു.
അമേരിക്കയുടെ അഞ്ചാം കപ്പൽപ്പടയുടെ ആസ്ഥാനമായ ബഹറിനിൽ ദിവസങ്ങൾക്കിടെ ഇറാൻ നടത്തുന്ന രണ്ടാമത്തെ ആക്രമണമാണിത്. അൽ റിഫയിലെ ഹെലികോപ്റ്റർ താവളത്തിനു നേർക്ക് ആറ് ഡ്രോണുകളാണു തൊടുത്തതെന്ന് വിപ്ലവഗാർഡ് പറഞ്ഞു. അമേരിക്ക ശത്രുതാ നടപടികൾ തുടരുന്ന സാഹചര്യത്തിലാണിതെന്നും കൂട്ടിച്ചേർത്തു.
ഇറേനിയൻ ആക്രമണത്തിന്റെ പശ്ചാത്തലത്തിൽ ബഹറിനിൽ മുന്നറിയിപ്പു സൈറണുകൾ മുഴങ്ങി. ജനങ്ങൾ സുരക്ഷിത സ്ഥാനങ്ങളിലേക്കു മാറാൻ ആഭ്യന്തര മന്ത്രാലയം നിർദേശിച്ചു. ഏതാനും ദിവസം മുന്പ് ബഹറിനിലെ അമേരിക്കൻ റഡാർ ആക്രമിച്ചു നശിപ്പിച്ചതായി ഇറേനിയൻ വിപ്ലവഗാർഡ് അവകാശപ്പെട്ടിരുന്നു. എന്നാൽ, ഇതു നിഷേധിച്ച അമേരിക്ക, ഇറാന്റെ രണ്ടു ഡ്രോണുകൾ നിർവീര്യമാക്കിയെന്നറിയിച്ചു.
International
സനാ: യെമനിലെ സൗദി പിന്തുണയുള്ള ഔദ്യോഗിക ഭരണകൂട സേന, ബാൽ അൽ മൻഡെപ് കടലിടുക്കിനു സമീപമുള്ള പ്രദേശങ്ങളിൽനിന്ന് പിൻവാങ്ങി. ഇതോടെ തന്ത്രപ്രധാന കടലിടുക്കിന്റെ പൂർണ നിയന്ത്രണം ഇറാന്റെ പിന്തുണയുള്ള ഹൂതികൾക്കായി. ഔദ്യോഗിക സർക്കാരിന്റെ ആസ്ഥനമായ ഏദനും പരിസരപ്രദേശങ്ങളും സുരക്ഷിതമാക്കാനുള്ള നീക്കത്തിന്റെ ഭാഗമായിട്ടാണ് പിൻവാങ്ങലെന്ന് സേന അറിയിച്ചു. ഹൂതികളുടെ ആക്രമണത്തിൽ ഏദൻ സർക്കാർ കടുത്ത സമ്മർദം നേരിടുന്നതായി റിപ്പോർട്ടുണ്ട്.
യെമന്റെ തലസ്ഥാനമായ സനാ അടക്കം പ്രധാന ജനവാസ കേന്ദ്രങ്ങൾ നിയന്ത്രിക്കുന്ന ഹൂതി വിമതർ ഒക്ടോബറിൽ മിന്നലാക്രമണം നടത്തി ബാബ് അൽ മൻഡെപ് നിയന്ത്രണത്തിലാക്കിയിരുന്നു. ഇതു തിരിച്ചുപിടിക്കാനായി നവംബറിൽ സൗദിയുടെ പിന്തുണയോടെ ഏദൻ സർക്കാരിന്റെ സേന പോരാട്ടത്തിറങ്ങുകയായിരുന്നു. എന്നാൽ ഹൂതികളുടെ ആക്രമണത്തിൽ ഏദൻ സേന വലിയ തിരിച്ചടികൾ നേരിടുന്നതായി സൂചനയുണ്ട്. തെക്കുപടിഞ്ഞാറൻ യെമനിലെ തെയിസ് നഗരത്തിന്റെ നിയന്ത്രണത്തിനായി ഹൂതികളും ഏദൻ സേനയും ഉഗ്രപോരാട്ടം നടത്തുന്നതായി റിപ്പോർട്ടുണ്ട്.
തെയിസിലെ ജനത വലിയ ദുരിതം നേരിടുന്നു. യുദ്ധം മൂലം യെമനിൽ അഭയാർഥികളായ മൂന്നു ലക്ഷം പേരിൽ പാതിയും തെയിസ് നിവാസികളാണ്. ഇപ്പോൾ നഗരം ഉപരോധിക്കപ്പെട്ടിരിക്കുകയാണ്. സഹായവസ്തുക്കൾ നഗരത്തിലെത്തുന്നില്ല. ജനങ്ങൾക്കു നഗരം വിടാനും കഴിയുന്നില്ല. ബാബ് അൽ മൻഡെപിന്റെ പൂർണ നിയന്ത്രണം ഹൂതികൾക്കു ലഭിക്കുന്നത് സൗദിയുടെ എണ്ണകയറ്റുമതിയെ കൂടുതൽ പ്രതിസന്ധിയിലാക്കും.
International
വാഷിംഗ്ടൺ ഡിസി: പതിറ്റാണ്ടുകൾ പഴക്കമുള്ള ടെലികോം ശൃംഖല നവീകരിക്കുന്നതിനിടെയുണ്ടായ സാങ്കേതിക പിഴവാണ് 2001 സെപ്റ്റംബർ 11ലെ ഭീകരാക്രമണത്തിനുശേഷം അമേരിക്ക നേരിട്ട ഏറ്റവും ദൈർഘ്യമേറിയ വ്യോമഗതാഗത സ്തംഭനത്തിനു വഴിവച്ചത്.
എയർ ട്രാഫിക് കൺട്രോളർമാരും പൈലറ്റുമാരും തമ്മിൽ ആശയവിനിമയം നടത്തുന്ന നിർണായക സംവിധാനത്തിലെ പഴയ ചെമ്പ് വയറുകൾ മാറ്റി ഫൈബർ ലൈനുകൾ സ്ഥാപിക്കുന്നതിനിടെ വെള്ളിയാഴ്ചയാണു പ്രശ്നമുണ്ടായതെന്ന് യുഎസ് ഗതാഗത സെക്രട്ടറി ഷോൺ ഡഫി വ്യക്തമാക്കി.
നാലു മണിക്കൂറിലധികം നേരം വിമാനങ്ങൾ നിലത്തിറക്കിയതോടെ ആയിരക്കണക്കിനു സർവീസുകളെയും ലക്ഷക്കണക്കിന് യാത്രക്കാരെയും ഇതു ബാധിച്ചു. സംഭവത്തിനുപിന്നിൽ സൈബർ ആക്രമണത്തിന്റെ സൂചനകളൊന്നുമില്ലെന്നും എല്ലാവരും സുരക്ഷിതരാണെന്നും ആഭ്യന്തര സുരക്ഷാ സെക്രട്ടറി മാർക്ക്വെയ്ൻ മുള്ളിൻ നേരത്തേ വ്യക്തമാക്കിയിരുന്നു.
വെള്ളിയാഴ്ച ഉച്ചകഴിഞ്ഞു സർക്കാർ കരാറുകാരായ ‘എൽ3ഹാരിസ്’ ഏവിയേഷൻ ടെലികോം ശൃംഖല നവീകരിക്കുന്ന ജോലികൾ നടത്തിവരികയായിരുന്നു. യുഎസിലെ ഒരു വിദൂരകേന്ദ്രത്തിൽ ചെമ്പ് ലൈനുകൾ മാറ്റി ഫൈബർ സ്ഥാപിക്കുന്നതിനിടെ കമ്പനി ഒരു പുതിയ റൂട്ടർ ഘടിപ്പിച്ചു.
ഈ റൂട്ടർ എയർ ട്രാഫിക് കൺട്രോൾ സംവിധാനത്തിലെ മറ്റു റൂട്ടറുകളിലേക്ക് ഓരോ നാലോ അഞ്ചോ സെക്കൻഡിലും ആയിരത്തോളം കണക്ഷൻ ശ്രമങ്ങൾ അയച്ചുകൊണ്ട് ശൃംഖലയിൽ അമിതഭാരമുണ്ടാക്കി. ഇതോടെ രാജ്യത്തെ 22 എയർ റൂട്ട് ട്രാഫിക് കൺട്രോൾ സെന്ററുകളിൽ 17 എണ്ണത്തിലും ശബ്ദ, ഗ്രൗണ്ട് ആശയവിനിമയ സംവിധാനങ്ങളിൽ അസ്ഥിരത അനുഭവപ്പെട്ടതായി ഫെഡറൽ ഏവിയേഷൻ അഡ്മിനിസ്ട്രേഷൻ (എഫ്എഎ) അഡ്മിനിസ്ട്രേറ്റർ ബ്രയാൻ ബെഡ്ഫോർഡ് അറിയിച്ചു.
സിസ്റ്റം പൂർണമായും നവീകരിക്കേണ്ടതുണ്ടെന്നും ഇതിനായി 50 ബില്യൺ ഡോളർ ചെലവ് വരുമെന്നും അദ്ദേഹം പറഞ്ഞു. തകരാറിനുപിന്നിൽ ഉദ്യോഗസ്ഥരുടെ അനാസ്ഥയാണോ അതോ ഉപകരണത്തിന്റെ തകരാറാണോയെന്നു പരിശോധിക്കുമെന്നും പകൽസമയങ്ങളിൽ ഇത്തരം നവീകരണ പ്രവർത്തനങ്ങൾ അനുവദിക്കുന്നത് പുനഃപരിശോധിക്കുമെന്നും അദ്ദേഹം കൂട്ടിച്ചേർത്തു.
അറ്റകുറ്റപ്പണികളുടെ വിവരങ്ങൾ കടലാസിൽ എഴുതി സൂക്ഷിക്കുന്ന രീതിയായതിനാൽ പ്രശ്നം എവിടെയാണെന്നു കണ്ടെത്താൻ വ്യോമയാന അഥോറിറ്റിക്ക് 45 മിനിറ്റോളം സമയമെടുത്തു. ആരൊക്കെയാണ് ഏതൊക്കെ ജോലികൾ ചെയ്യുന്നതെന്ന് അറിയാൻ രേഖകൾ ഓരോന്നായി പരിശോധിക്കേണ്ടിവന്നുവെന്ന് ബെഡ്ഫോർഡ് സമ്മതിച്ചു. കാരണം കണ്ടെത്തുന്നതിനുള്ള മുൻകരുതലെന്ന നിലയിലാണ് മുഴുവൻ വിമാനങ്ങളും നിർത്തിവയ്ക്കാൻ തീരുമാനിച്ചത്.
യുഎസ് വ്യോമയാന സംവിധാനത്തെ ‘പൊളിച്ചുമാറ്റാറായ ഒരു വീടിനോടാണ്’ വ്യോമയാന വിശകലന വിദഗ്ധൻ മൈൽസ് ഒബ്രിയൻ ഉപമിച്ചത്. എഫ്എഎയുടെ അന്വേഷണത്തോട് സഹകരിക്കുന്നുണ്ടെന്നും യാത്രക്കാർക്കും വിമാനക്കമ്പനികൾക്കുമുണ്ടായ ബുദ്ധിമുട്ടുകൾ ഗൗരവമായി കാണുന്നുവെന്നും എൽ3ഹാരിസ് പ്രസ്താവനയിൽ അറിയിച്ചു.