പ്രതീകാത്മക ചിത്രം
മലപ്പുറം: മെർക്കുറി അടങ്ങിയ ഫേസ് ക്രീം ഉപയോഗിച്ചതിനെത്തുടർന്ന് 17കാരിക്ക് ഗുരുതരമായ വൃക്കരോഗം ബാധിച്ച സംഭവത്തിൽ അരീക്കോട് പൊലിസ് അന്വേഷണം ആരംഭിച്ചു. പൊലിസ് പെൺകുട്ടിയുടെ വീട്ടിലെത്തി വിവരങ്ങൾ ചോദിച്ചറിഞ്ഞു. കുട്ടി ഉപയോഗിച്ച ക്രീമിന്റെ സാമ്പിൾ തിങ്കളാഴ്ച പരിശോധനയ്ക്ക് അയക്കും.
സംഭവത്തിൽ കേസെടുക്കുന്നതടക്കമുള്ള നിയമനടപടികളുമായി മുന്നോട്ട് പോകാനാണ് പൊലിസിന്റെ തീരുമാനം. അതേസമയം മെർക്കുറി അടങ്ങിയ ഫേസ് ക്രീമുകളുടെ വിൽപന തടയാൻ പ്രത്യേക അന്വേഷണസംഘം രൂപീകരിക്കണമെന്ന ആവശ്യം പരിശോധിക്കാൻ മുഖ്യമന്ത്രിയുടെ ഓഫിസ് നിർദേശം നൽകിയിട്ടുണ്ട്.
ആരോഗ്യവകുപ്പ് മെഡിക്കൽ ഓഫീസർ ഡോ. കെ. പ്രതിഭ നൽകിയ പരാതിയിലാണ് തുടർനടപടികൾ സ്വീകരിക്കാൻ ആരോഗ്യവകുപ്പ് അഡീഷണൽ ചീഫ് സെക്രട്ടറിക്കു നിർദേശം നൽകിയത്. സംസ്ഥാനത്തെ എല്ലാ ജില്ലകളിലും പരിശോധനകൾക്കായി പ്രത്യേക സംഘം രൂപീകരിച്ച് ഇത്തരം ക്രീമുകളുടെ വിതരണവും വിൽപനയും തടയണമെന്നാണു പരാതിയിലെ പ്രധാന ആവശ്യം.
കടകൾ കേന്ദ്രീകരിച്ചും ഓൺലൈൻ മുഖേനയും മെർക്കുറി കലർന്ന സൗന്ദര്യവർധക വസ്തുക്കളുടെ വിൽപന സംസ്ഥാനത്തു വ്യാപകമാകുകയാണ്.
Tags : Malappuram Kidney FaceCream Mercury Police