വല്ലാർപാടം അന്താരാഷ്ട്ര കണ്ടെയ്നർ ടെർമിനൽ
കൊച്ചി: വല്ലാർപാടം അന്താരാഷ്ട്ര കണ്ടെയ്നർ ടെർമിനലിൽ ട്രെയ്ലർ തൊഴിലാളികൾ നടത്തിവന്ന സമരം അവസാനിപ്പിക്കാൻ തീരുമാനം. തിങ്കളാഴ്ച മുതൽ തുറമുഖത്തെ ചരക്കുനീക്കം സാധാരണ നിലയിൽ പുനഃരാരംഭിക്കും.
ഹൈബി ഈഡൻ എംപി, കൊച്ചി എംഎൽഎ മുഹമ്മദ് ഷിയാസ്, എറണാകുളം ജില്ലാ കളക്ടർ എന്നിവരുടെ നേതൃത്വത്തിൽ നടത്തിയ ചർച്ചയിലാണ് ഇതുസംബന്ധിച്ച തീരുമാനമുണ്ടായത്. കണ്ടെയ്നറുകൾ സ്കാൻ ചെയ്യുമ്പോൾ ഡ്രൈവർ ക്യാബിനുകളെ റേഡിയേഷൻ ബാധിക്കുന്നില്ലെന്ന് തൊഴിലാളികളെ ബോധ്യപ്പെടുത്തുന്നതിനായി തിങ്കളാഴ്ച പരസ്യ പ്രദർശനം നടത്തും.
ജില്ലാ മെഡിക്കൽ ഓഫിസറുടെ നേതൃത്വത്തിലുള്ള പ്രത്യേക വൈദ്യസംഘം തൊഴിലാളികളുടെ ആരോഗ്യസ്ഥിതി പരിശോധിച്ച് വിശദമായ റിപ്പോർട്ട് സമർപ്പിക്കും. സുരക്ഷാ കാരണങ്ങളാൽ ഇറക്കുമതി കണ്ടെയ്നറുകൾ പൂർണമായും സ്കാൻ ചെയ്യണമെന്ന നിർദേശം പ്രാബല്യത്തിലായതോടെയാണ് റേഡിയേഷൻ ഭീഷണി ആരോപിച്ച് ട്രെയ്ലർ തൊഴിലാളികൾ സമരം ആരംഭിച്ചത്.
സമരത്തെത്തുടർന്ന് ആയിരക്കണക്കിന് കണ്ടെയ്നറുകൾ ടെർമിനലിൽ കെട്ടിക്കിടക്കുന്ന സാഹചര്യമുണ്ടായിരുന്നു. ചർച്ചയിൽ ആശങ്കകൾക്ക് പരിഹാരമായതോടെയാണ് സമരം പിൻവലിക്കാൻ തൊഴിലാളി സംഘടനകൾ തയാറായത്.