പാറേല് മര്ത്ത് മറിയം ബസിലിക്കയുടെ കൂദാശയ്ക്ക് മുന്നോടിയായി ആനവാതില് ആര്ച്ച്ബിഷപ് മാര് തോമസ് തറയില് വിശ്വാസികള്ക്കായി തുറന്നുകൊടുക്കുന്നു.
ചങ്ങനാശേരി: പാറേല് മര്ത്ത്മറിയം പള്ളിയുടെ കൂദാശ കര്മങ്ങള് ഭക്തിനിര്ഭരം. പുതിയ പള്ളിയിലെ അമലോത്ഭവ കപ്പേളയുടെ മുമ്പില്നിന്നു വൈദികരുടെ പ്രദക്ഷിണത്തോടെയാണ് കൂദാശ ചടങ്ങുകള് ആരംഭിച്ചത്.
പ്രദക്ഷിണത്തിന്റെ മുന്വശത്ത് ശ്മംശാനമാരുടെ പിന്നില് 2020 മുതല് തിരുപ്പട്ടം സ്വീകരിച്ച അതിരൂപതയിലെ യുവവൈദികർ അണിനിരുന്നു. തുടര്ന്ന് ഫൊറോന വികാരിമാരും കൂരിയാ അംഗങ്ങളും ചേര്ന്നു. പ്രദക്ഷിണ വീഥിയുടെ ഇരുവശങ്ങളിലും വെള്ളവസ്ത്രം ധരിച്ച വോളണ്ടിയേഴ്സ് മുത്തുക്കുടകളുമായി നിന്നു.
പ്രദക്ഷിണം അമല തിയോളജിക്കല് സെന്ററിനു മുന്നിലെത്തിയപ്പോള് കൂദാശകര്മത്തിലെ മുഖ്യകാര്മികരായ ബിഷപ്പുമാര് വൈദികര്ക്കൊപ്പം പള്ളിയുടെ പ്രധാന കവാടത്തിങ്കലെത്തി. ആര്ച്ച്ബിഷപ് മാര് തോമസ് തറയില് ആനവാതിൽക്കലെ നാട മുറിച്ചു. തുടര്ന്ന് ബിഷപ്പുമാരും വൈദികരും ദേവാലയത്തിനുള്ളില് പ്രവേശിച്ചു. ആര്ച്ച്ബിഷപ് മാര് തോമസ് തറയില് എല്ലാവര്ക്കും സ്വാഗതം ആശംസിച്ചു. തുടര്ന്ന് തിരുക്കര്മങ്ങള് ആരംഭിച്ചു. തിരുവചന വായനകള്ക്കുശേഷം മാര് ജോസഫ് കല്ലറങ്ങാട്ട് സന്ദേശം നല്കി.
തൈല കൂദാശയ്ക്കു ശേഷം ബലിപീഠത്തിന്റെയും ചുവരുകളുടെയും തിരുവസ്ത്രങ്ങളുടെയും അഭിഷേകം നടന്നു. ബലിപീഠം കൂദാശയ്ക്കുശേഷം തീര്ഥാടന കേന്ദ്രം റെക്ടര് മോൺ. മാത്യു ചങ്ങങ്കരിയുടെ നേതൃത്വത്തില് ബൈബിള് പ്രദക്ഷിണവും ബൈബിള് പ്രതിഷ്ഠയും നടത്തി.
പള്ളിയുടെ അകവും മോണ്ടളവും പ്രധാന കാര്മികനായ മാര് ജോസഫ് പെരുന്തോട്ടവും ആർച്ച്ബിഷപ് മാർ തോമസ് തറയിലും ചേർന്നു വെഞ്ചരിച്ചു. പള്ളിയുടെ ഇരുവശങ്ങളില് ആര്ച്ച്ബിഷപ് ഡോ. തോമസ് ജെ. നെറ്റോയും ആർച്ച്ബിഷപ് ഡോ. തോമസ് മാര് കൂറിലോസുമാണ് വിശുദ്ധ ജലം തളിച്ചത്. മദ്ബഹയിലെ വിശുദ്ധ സ്ലീവായും ഐക്കണുകളും ബാല്ക്കണിയും പ്രത്യേകം വെഞ്ചരിച്ചു. തുടര്ന്നാണ് ബസലിക്ക പ്രഖ്യാപനം നടന്നത്.
ചങ്ങനാശേരി: മുന്നിരയില് പാറേല് മാതാവിന്റെ ചിത്രം ആലേഖനം ചെയ്ത കൊടി, തൊട്ടുപിന്നില് പൊന്നിന്കുരിശ്, ഇരുവശങ്ങളിലും വ്യത്യസ്ത നിറങ്ങളുള്ള മുത്തുക്കുടകള്... പാറേല് പള്ളി കൂദാശാകര്മങ്ങള്ക്കു മുന്നോടിയായി നടന്ന പ്രദക്ഷിണം ഭക്തിസാന്ദ്രമായി.
അമലോത്ഭവ മാതാ പള്ളി അങ്കണത്തില്നിന്നാണ് പ്രദക്ഷിണം ആരംഭിച്ചത്. ചങ്ങനാശേരി അതിരൂപതയിലെയും സമീപ രൂപതകളിലെയും അഞ്ഞൂറോളം വൈദികര് തിരുവസ്ത്രങ്ങളിഞ്ഞ് പ്രദക്ഷിണപാതയില് പ്രാര്ഥനാപൂര്വം അണിനിരന്നു.
പ്രദക്ഷിണം അമല തിയോളജിക്കല് കോളജിനു സമീപം എത്തിയപ്പോള് മുഖ്യകാര്മികന് ആർച്ച്ബിഷപ് മാര് ജോസഫ് പെരുന്തോട്ടവും മറ്റു മെത്രാന്മാരും പങ്കുചേര്ന്നു. വിശ്വാസികള് ഇരുവശങ്ങളിലും മുത്തുക്കുടകളുമായി അണിനിരന്ന് പ്രദക്ഷിണത്തെ സ്വീകരിച്ചു. പ്രദക്ഷിണം ബസിലിക്കയിലേക്ക് എത്തിച്ചേര്ന്നപ്പോള് ഇടവകാംഗങ്ങൾ മെത്രാന്മാരെ പൂക്കൾ നൽകി സ്വീകരിച്ചു. ആര്ച്ച്ബിഷപ് മാര് തോമസ് തറയില് ആനവാതിലിലെ നാടമുറിച്ച് മെത്രാന്മാരെയും വൈദികരെയും പള്ളിക്കുള്ളിലേക്ക് ആനയിച്ചു.
Tags : Liturgical Rites Procession Parel Pally Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash