പാറേല് മര്ത്ത്മറിയം ബസിലിക്കയുടെ കൂദാശ ചടങ്ങിന് ആര്ച്ച്ബിഷപ് മാര് തോമസ് തറയിലും മാര് ജോസഫ് പെരുന്തോട്ടവും നേതൃത്വം നൽകുന്നു.
ചങ്ങനാശേരി: ഏറ്റവും മനോഹരിയായ പരിശുദ്ധ അമ്മയുടെ നാമധേയത്തില് ഏറ്റവും മഹോഹരമായ ദേവാലയം വേണമെന്ന വിശ്വാസീസമൂഹത്തിന്റെ തീവ്രമായ ആഗ്രഹപൂര്ത്തീകരണമാണ് പാറേല് മര്ത്ത്മറിയം ബസിലിക്കയെന്ന് ആര്ച്ച്ബിഷപ് മാര് തോമസ് തറയില്.
പാറേല്മാതാവിനോടുള്ള പ്രാര്ഥനയില് ശക്തി കണ്ടെത്തിയവര്ക്കു മാത്രമല്ല, നാടിനുതന്നെ അഭിമാനമായി ഈ പള്ളി കൂദാശ ചെയ്യപ്പെടുമ്പോള് സര്വശക്തനായ ദൈവത്തിനു നന്ദിപറയാം. പരിശുദ്ധ ലെയോ പതിനാറാമന് പാപ്പ പറയുന്നതുപോലെ, നമ്മുടെ അമ്മയായ മറിയം നമ്മോടൊത്തു നടക്കാന് ആഗ്രഹിക്കുന്നു.
1904ല് പാറേല് പള്ളി പണിയാന് കല്പ്പന പുറപ്പെടുവിച്ച ധന്യന് മാര് മാത്യു മാക്കീല് പിതാവിനെയും, ഇതു സാക്ഷാത്കരിക്കാന് നേതൃത്വം നല്കിയ മോണ്. സിറിയക് കണ്ടങ്കരിയെയും പരിശുദ്ധ അമ്മയുടെ തിരുസ്വരൂപം ഫ്രാന്സില്നിന്നു കൊണ്ടുവന്ന എസ്തഫാനാസച്ചനേയും അനുസ്മരിക്കാം.
1974ല് അന്നത്തെ ആര്ച്ച്ബിഷപ് മാര് ആന്റണി പടിയറയാണ് രണ്ടാമത്തെ പള്ളി കൂദാശ ചെയ്തത്. ഈ പള്ളി നിര്മിക്കണമെന്ന് ആഗ്രഹിച്ച് പൂര്ത്തീകരണത്തിനായി ഏറെ ത്യാഗം ചെയ്ത മാര് ജോസഫ് പെരുന്തോട്ടം പുതിയ പള്ളി കൂദാശ ചെയ്യുമ്പോള്, പുതിയ പള്ളിക്ക് മാര്പാപ്പ ബസിലിക്കാ പദവി സമ്മാനിച്ചിരിക്കുകയാണ്.
വിശ്വാസത്തില് നമ്മെ ഉറപ്പിച്ച മാര്തോമാശ്ലീഹായുടെ തിരുനാള്ദിനത്തില് പാറേല് പള്ളി കൂദാശചെയ്ത് ബസിലിക്കയായി ഉയര്ത്തുന്നതില് ഏറെ അഭിമാനമുണ്ടെന്നും പള്ളിപണിയോട് സഹകരിച്ച ഏല്ലാവര്ക്കും, പ്രത്യേകിച്ച് പാറേല് ഇടവകയ്ക്കും നന്ദി അര്പ്പിക്കുന്നതായും മാര് തോമസ് തറയില് കൂട്ടിച്ചേര്ത്തു.
പാറേല് പള്ളിയുടെ നിര്മാണത്തിന് അത്യധ്വാനം ചെയ്തവര്ക്കും വിവിധരീതിയില് സഹായിച്ചവര്ക്കും മാതാവിന്റെ അനുഗ്രഹവും ദൈവത്തിന്റെ കൃപയും ലഭിക്കുമെന്ന് ആര്ച്ച്ബിഷപ് എമരിറ്റസ് മാര് ജോസഫ് പെരുന്തോട്ടം പറഞ്ഞു.

ചങ്ങനാശേരി: പാറേല് പള്ളി നിര്മാണത്തിനു നേതൃത്വം നല്കിയ വൈദികര്ക്കും നിര്മാണത്തിന്റെ വിവിധ മേഖലകളില് പ്രവര്ത്തിച്ചവര്ക്കും പാറേല് ബസലിക്കാ പള്ളിയുടെ ആദരം.
കൂദാശ കര്മങ്ങള്ക്കൊടുവിലാണ് ആര്ച്ച്ബിഷപ് മാര് തോമസ് തറയിലും ആര്ച്ച്ബിഷപ് മാര് ജോസഫ് പെരുന്തോട്ടവും ചേര്ന്ന് ആദരിച്ചത്.
പാറേല് പള്ളിയുടെയും മാതാവിന്റെയും ചിത്രങ്ങള് ആലേഖനം ചെയ്ത ഫലകമാണ് സമ്മാനിച്ചത്. വികാരി ഫാ. ജേക്കബ് വാരിക്കാട്ട്, ഫാ. ടെജി പുതുവീട്ടില്ക്കളം, ഫാ. ജേക്കബ് കൂരോത്ത്, ഫാ. ജോജോ പുതുവേലില്, ഫാ. ജിജോ മാറാട്ടുകളം എന്നിവരെയും ആര്ക്കിടെക്ട് ജോണ് ജെ. കോച്ചേരില്, സിവില് കോണ്ട്രാക്ടര് ആന്റണി തോമസ്, കെ.പി. സുരേഷ്കുമാര്, ഫെലിക്സ് വര്ക്കിക്കുഞ്ഞ്, ഡായി മാത്യു, ആന്റണി കുന്നിപ്പറമ്പില്, ബിനു കുര്യാക്കോസ്, ജോബ് ജോസഫ്, ജെബിന് മാത്യു ഫിലിപ്പ്, അരുണ് ഏബ്രഹാം, എന്. പ്രകാശം, പോളി നാലാപ്പാടന്, ജോമോന് പാണങ്ങാട്ട്, നോബല് മാത്യു, സി.ടി. ഓമനക്കുട്ടന്, കെ.എസ്. സനീഷ്, ഫ്രാന്സിസ് എയ്ഞ്ചലോസ്, ലാല്, സാബു ജോസഫ്, സി.ടി. കുര്യാക്കോസ്, ജോണ് ജേക്കബ്, തോമസ് ജോര്ജ്, കവിത ആര്. നായര് എന്നിവര്ക്കാണ് സ്നേഹോപഹാരങ്ങള് നല്കിയത്.
ചങ്ങനാശേരി: വിശിഷ്ട വ്യക്തികളുടെ സാന്നിധ്യം പാറേല് മര്ത്ത്മറിയം പള്ളി കൂദാശാചടങ്ങിനെ ധന്യമാക്കി.
കര്ദിനാള് മാര് ജോര്ജ് ആലഞ്ചേരി, മുന് അപ്പസ്തോലിക് നുണ്ഷ്യോ ആര്ച്ച്ബിഷപ് മാര് ജോര്ജ് കോച്ചേരി, ചങ്ങനാശേരി അതിരൂപതയുടെ മുന് മെത്രാപ്പോലീത്ത മാര് ജോസഫ് പെരുന്തോട്ടം, ചങ്ങനാശേരി ആര്ച്ച്ബിഷപ് മാര് തോമസ് തറയില്, പാലാ ബിഷപ് മാര് ജോസഫ് കല്ലറങ്ങാട്ട്, തിരുവല്ല ആര്ച്ച്ബിഷപ് ഡോ. തോമസ് മാര് കൂറിലോസ്, തിരുവനന്തപുരം ആര്ച്ച്ബിഷപ് ഡോ. തോമസ് ജെ. നെറ്റോ, മൂവാറ്റുപുഴ ബിഷപ് ഡോ. യൂഹാനോന് മാര് തിയോഡോഷ്യസ്, പത്തനംതിട്ട ബിഷപ് ഡോ. സാമുവല് മാര് ഐറേനിയോസ്, പുനലൂര് ബിഷപ് ഡോ. സെല്വിസ്റ്റര് പൊന്നുമുത്തന്, ആലപ്പുഴ ബിഷപ് ഡോ. ജെയിംസ് ആനാപറമ്പില്, ഷംഷാബാദ് സഹായമെത്രാന് മാര് തോമസ് പാടിയത്ത്, വിജയപുരം സഹായമെത്രാന് ഡോ. ജസ്റ്റിന് മഠത്തിൽപ്പറമ്പില്, കല്യാണ് മുന് ബിഷപ് മാര് തോമസ് ഇലവനാല്, ഗോരഖ്പുര് മുന്ബിഷപ് മാര് തോമസ് തുരുത്തിമറ്റം എന്നിവര് ശുശ്രൂഷകളില് പങ്കുചേര്ന്നു.
അതിരൂപതാ വികാരി ജനറാള്മാരായ മോണ്. ആന്റണി എത്തയ്ക്കാട്ട്, മോണ്. മാത്യു ചങ്ങങ്കരി, മോണ്. ജോണ് തെക്കേക്കര, മോണ്. സ്കറിയ കന്യാകോണില്, ചാന്സലര് ഫാ.ഡോ. ജോര്ജ് പുതുമനമൂഴി, പ്രോക്യുറേറ്റര് ഫാ.ആന്റണി മാളേയ്ക്കല്, പാറേല് മരിയന് തീര്ഥാടനകേന്ദ്രം വികാരി ഫാ. ജേക്കബ് വാരിക്കാട്ട്, നിര്മാണ കമ്മിറ്റി ഫിനാന്സ് ഓഫീസര് ഫാ. ടെജി പുതുവീട്ടിൽക്കളം തുടങ്ങിയവര് ചടങ്ങുകള്ക്ക് നേതൃത്വം നല്കി.
എംപിമാരായ കൊടിക്കുന്നില് സുരേഷ്, ആന്റോ ആന്റണി, ജോസ് കെ. മാണി, വിനു ജോബ് എംഎല്എ തുടങ്ങിയവര് ചടങ്ങില് സന്നിഹിതരായിരുന്നു.
ചങ്ങനാശേരി: പാറേല് മര്ത്ത് മറിയം ബസിലിക്കയില് തീര്ഥാടനം നടത്തുന്നവര്ക്ക് മാര്പാപ്പ പൂര്ണ ദണ്ഡവിമോചനം പ്രഖ്യാപിച്ചു. എല്ലാ വര്ഷവും താഴെപ്പറയുന്ന ദിവസങ്ങളില് വിശ്വാസപൂര്വം ബസിലിക്ക സന്ദര്ശിച്ചു പ്രാര്ഥിക്കുന്നവര്ക്ക് സഭ നിര്ദേശിക്കുന്ന സാധാരണ വ്യവസ്ഥകള് പാലിച്ചു പൂര്ണദണ്ഡവിമോചനം ലഭിക്കുന്നതാണ് .
►നവംബര് 21: പാറേല് മര്ത്ത്മറിയം അമലോത്ഭവ ബസിലിക്കയുടെ കൂദാശ വാര്ഷികം.
►നവംബര് 29 മുതല് ഡിസംബര് 21 വരെ:
പരിശുദ്ധ കന്യകമറിയത്തിന്റെ അമലോത്ഭവ തിരുനാളും തീര്ഥാടന വാരവും.
►ജൂണ് 29: വിശുദ്ധ പത്രോസ്-പൗലോസ് ശ്ലീഹന്മാരുടെ തിരുനാൾ.
►ഒക്ടോബര് ഏഴ്: മൈനര് ബസിലിക്ക പദവി ലഭിച്ചതിന്റെ വാര്ഷികദിനം, ജപമാല രാജ്ഞിയുടെ തിരുനാള്.
►മാര്ച്ച് 25: പരിശുദ്ധ കന്യകമറിയത്തിന്റെ മംഗളവാര്ത്ത തിരുനാള്.
ഇതിനോടൊപ്പം ഓരോ വിശ്വാസിക്കും വര്ഷത്തില് ഒരിക്കല് സ്വതന്ത്രമായി തെരഞ്ഞെടുക്കാവുന്ന ഒരുദിവസം കൂടി പൂര്ണ ദണ്ഡവിമോചനം പ്രാപിക്കാം.
Tags : Parel church Deepest Desires Fulfillment Mar Thomas Tharayil Believers Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash