National
ന്യൂഡല്ഹി: മരിച്ച സര്ക്കാര് ജീവനക്കാരുടെ വിധവകള് പുനര്വിവാഹം ചെയ്താലും അവര്ക്ക് കുടുംബ പെന്ഷന് ലഭിക്കാന് അര്ഹതയുണ്ടെന്ന് ഡല്ഹി ഹൈക്കോടതി. കേന്ദ്ര റിസര്വ് പോലീസ് സേനയിലെ അന്തരിച്ച ജവാന്റെ വിധവയ്ക്ക് പെന്ഷന് നല്കാനുള്ള ഉത്തരവ് ശരിവെച്ചുകൊണ്ടാണ് ഡൽഹി ഹൈക്കോടതിയുടെ ഈ സുപ്രധാന നിരീക്ഷണം.
1972ലെ സെന്ട്രല് സിവില് സര്വീസസ് പെന്ഷന് ചട്ടങ്ങളിലെ 54ാം വകുപ്പിന്റെ ഭരണഘടനാപരമായ സാധുത കോടതി ശരിവെച്ചു. കുട്ടികളില്ലാത്ത വിധവകള് പുനര്വിവാഹം ചെയ്താലും അവര്ക്ക് മറ്റ് വരുമാനമാര്ഗങ്ങള് ഇല്ലെങ്കില് പെന്ഷന് നല്കുന്നത് നിയമപരമാണെന്ന് കോടതി വ്യക്തമാക്കി.
ജവാന്റെ മരണശേഷം പെന്ഷന് ലഭിച്ചുകൊണ്ടിരുന്ന വിധവ പുനര്വിവാഹം ചെയ്തതോടെ, പെന്ഷന് തങ്ങള്ക്ക് ലഭിക്കണമെന്ന് ആവശ്യപ്പെട്ട് മരിച്ച ജവാന്റെ മാതാപിതാക്കളാണ് കോടതിയെ സമീപിച്ചത്. വിധവയ്ക്ക് പെന്ഷന് നല്കുന്നത് വിവേചനപരമാണെന്ന ഇവരുടെ വാദം കോടതി തള്ളി.
നിയമപ്രകാരം പെന്ഷന് ലഭിക്കുന്നതില് ആദ്യ മുന്ഗണന വിധവയ്ക്കോ കുട്ടികള്ക്കോ ആണ്. ഇവര് ഇല്ലാത്ത പക്ഷം മാത്രമേ മാതാപിതാക്കള്ക്ക് പെന്ഷന് അര്ഹതയുണ്ടാവുകയുള്ളൂ എന്ന് കോടതി വ്യക്തമാക്കി.
District News
ചെറുപുഴ: പെരിങ്ങോം സിആര്പിഎഫ് ട്രെയിനിംഗ് സെന്ററില് പരിശീലനം പൂര്ത്തിയാക്കിയ 159-ാമത് ബാച്ച് രാജ്യസേവനത്തിനായി പുറത്തിറങ്ങി. 1333 പേരടങ്ങിയ 159 ാം ബാച്ചിന്റെ പാസിംഗ് ഔട്ട് പരേഡ് പെരിങ്ങോം ക്യാമ്പ് മൈതാനത്ത് നടന്നു. സിആര്പിഎഫ് സ്പെഷല് ഡയറക്ടര് ജനറല് ദീപക് കുമാര് മുഖ്യാതിഥിയായി സല്യൂട്ട് സ്വീകരിച്ചു.
കര്ണാടക-കേരള സെക്ടര് ഇന്സ്പെക്ടര് ജനറല് വിപുല്കുമാര്, ക്യാമ്പ് മേധാവിയും പ്രിൻസിപ്പലുമായ ഡിഐജി മാത്യു എ. ജോണ്, കണ്ണൂര് റേഞ്ച് ഡിഐജി യതീഷ് ചന്ദ്ര, ഋഷിരാജ് സഹായി, ഏഴിമല നാവിക അക്കാദമി കമാൻഡർ സുബല് നാഥന്, കണ്ണൂര് ഡിഐസി കമാൻഡന്റ് പരംവീര് സിംഗ് നാഗ്ര, കണ്ണൂര് റൂറല് എസ്പി അനൂജ് പലിവാള്, കണ്ണൂര് സിറ്റി പോലീസ് കമ്മീഷണർ നിതിന്രാജ്, റീജണൽ ക്യാമ്പ് വെൽഫെയർ അസോസിയേഷൻ പ്രസിഡന്റ് പ്രഫ. ലൂസി മാത്യു തുടങ്ങി ഉന്നത പോലീസ് ഉദ്യോഗസ്ഥരും സിവില് ഓഫീസര്മാരും പെരിങ്ങോം സിആര്പിഎഫ് സേനാംഗങ്ങളും പരിശീലനം പൂർത്തിയാക്കിയവരുടെ കുടുംബാംഗങ്ങളും പങ്കെടുത്തു.
പരേഡിനെ തുടർന്ന് പരിശീലനം പൂര്ത്തിയാക്കിയവരുടെ കായികാഭ്യാസ പ്രകടനങ്ങളും നടന്നു. ഇന്ത്യയിലെ ഏറ്റവും മികച്ച സിആര്പിഎഫ് പരിശീലന കേന്ദ്രത്തിനുള്ള കേന്ദ്ര ആഭ്യന്തര മന്ത്രിയുടെ പുരസ്കാരം ഉൾപ്പെടെ നേടിയിട്ടുള്ള പെരിങ്ങോം സിആര്പിഎഫ് റിക്രൂട്ട് ട്രെയിനിംഗ് സെന്റർ ഇന്ത്യയിലെ ഏറ്റവും മികച്ച സൈനിക പരിശീലന കേന്ദ്രമാണ്.
Kerala
ശബരിമല: ശബരിമലയിൽ സുരക്ഷാ ക്രമീകരണങ്ങൾ ശക്തമാക്കി. ഇതിന്റെ ഭാഗമായി കേരള പോലീസ്, സിആർപിഎഫ് - ആർഎഎഫ്, എൻഡിആർഎഫ് , ആന്റി സബോട്ടേജ് ചെക്ക് ടീം, ബോംബ് ഡിറ്റക്ഷൻ ആൻഡ് ഡിസ്പോസൽ സ്ക്വാഡ്, സ്പെഷൽ ബ്രാഞ്ച് എന്നീ സേനാ വിഭാഗങ്ങൾ സംയുക്തമായി റൂട്ട് മാർച്ച് നടത്തി. ചില സംഘടനകൾ ബാബറി ദിനാചരണം ആഹ്വാനം ചെയ്ത പശ്ചാത്തലത്തിലാണ് ക്രമീകരണങ്ങൾ.
ഇന്നലെയും ഇന്നുമായാണ് അധിക സുരക്ഷാ ക്രമീകരണങ്ങളെന്ന് പോലീസ് സ്പെഷൽ ഓഫീസർ ആർ. ശ്രീകുമാർ അറിയിച്ചു. രാത്രി നട അടച്ചു കഴിഞ്ഞാൽ ഭക്തരെ പതിനെട്ടാം പടി കയറാൻ അനുവദിക്കില്ല. നടയടച്ച ശേഷം വരുന്ന ഭക്തർക്ക് നടപ്പന്തലിലെ ക്യൂവിൽ കാത്തുനിൽക്കാം, പിറ്റേന്ന് രാവിലെ മാത്രമേ പടി കയറാൻ സാധിക്കൂ എന്നും അദ്ദേഹം പറഞ്ഞു.