19

മലപ്പുറം: പൂച്ചയുടെ മൂത്രാശയത്തില്‍നിന്നു രണ്ടു കല്ലുകള്‍ നീക്കം ചെയ്തു. മഞ്ചേരി സ്വദേശിയും പയ്യനാട് ഹോമിയോ ആശുപത്രിയിലെ മെഡിക്കല്‍ ഓഫീസറുമായ ഡോ.ശുഭയുടെ പത്തു മാസം പ്രായമുള്ള പെണ്‍ പൂച്ചയെയാണ് അടിയന്തര ശസ്ത്രക്രിയയ്ക്കു വിധേയമാക്കി കല്ലുകള്‍ പുറത്തെടുത്തത്. മലപ്പുറം ജില്ല മൃഗാശുപത്രിയിലായിരുന്നു ശസ്ത്രക്രിയ.

പൂച്ചക്കുട്ടി ജനിച്ച് മൂന്നാം മാസം മുതല്‍ തന്നെ പലപ്പോഴായി മൂത്രാശയ സംബന്ധമായ രോഗങ്ങളുടെ ലക്ഷണങ്ങള്‍ പ്രകടിപ്പിച്ചിരുന്നു. മൂത്രത്തില്‍ രക്തസ്രാവം ഉണ്ടായതോടെ അടുത്തുള്ള സ്വകാര്യ ക്ലിനിക്കില്‍ എത്തിച്ച് ചികിത്സിച്ചെങ്കിലും രോഗം ഭേദമായില്ല.

ഒരാഴ്ച മുമ്പ് രോഗം മൂര്‍ച്ഛിച്ചു പൂച്ചക്കുട്ടിയുടെ കാഴ്ച നഷ്ടപ്പെട്ടു. തുടര്‍ന്നാണ് മലപ്പുറം ജില്ലാ മൃഗാശുപത്രിയിലേക്ക് എത്തിച്ചത്. സ്‌കാന്‍, എക്‌സ്‌റേ പരിശോധനകളില്‍ പൂച്ചയുടെ മൂത്രാശയത്തില്‍ വലിപ്പമുള്ള രണ്ട് കല്ലുകള്‍ ഉണ്ടെന്നു കണ്ടെത്തുകയായിരുന്നു.

മലപ്പുറം ജില്ലാ വെറ്ററിനറി ആശുപത്രിയിലെ സര്‍ജന്‍മാരായ ഡോ.നൈസാബ്, ഡോ.അമല്‍ പ്രകാശ് എന്നിവരുടെ നേതൃത്വത്തില്‍ നടത്തിയ ശസ്ത്രക്രിയയിലൂടെ രണ്ട് സെന്‍റിമീറ്ററിലേറെ വലിപ്പമുള്ള രണ്ടു കല്ലുകള്‍ നീക്കം ചെയ്തു.

ജന്മനായുള്ള മൂത്രനാളിയിലെ തകരാറുകള്‍, വെള്ളം കുടിയുടെ കുറവ്, പ്രോട്ടീന്‍ കൂടുതല്‍ അടങ്ങിയ ഭക്ഷണം, അണുബാധ ഇതൊക്കെയാകാം മൂത്രാശയത്തില്‍ കല്ലുകള്‍ ഉണ്ടാകാനുള്ള കാരണമെന്നു പൂച്ചയെ ചികില്‍സിച്ച ഡോക്ടര്‍മാര്‍ പറഞ്ഞു. ശസ്ത്രക്രിയയ്ക്കു ശേഷം പൂച്ചക്കുട്ടി സുഖം പ്രാപിച്ചു വരികയാണ്.