Deepika.com | Largest Malayalam Internet Read

ഒരു സമൂഹത്തിന്‍റെ അവകാശങ്ങൾ ഉറപ്പാക്കാൻ അതിന്‍റെ കാലാകാലങ്ങളിലുള്ള അവസ്ഥ പഠിക്കുകയും രേഖപ്പെടുത്തുകയും ചെയ്യേണ്ടതുണ്ട്. കേരളത്തിൽ ക്രൈസ്തവ സമുദായത്തിനുവേണ്ടി നടന്ന അത്തരത്തിലുള്ള ഒരു രേഖപ്പെടുത്തലിനെക്കുറിച്ചാണ് പറയുന്നത്.

കേരള സർക്കാരിന്‍റെ 05-11-2020-ലെ ഉത്തരവനുസരിച്ച് ജസ്റ്റീസ് ജെ.ബി. കോശി കമ്മീഷൻ രൂപീകരിച്ച് കേരളത്തിലെ ക്രൈസ്തവ ന്യൂനപക്ഷങ്ങളുടെ വിദ്യാഭ്യാസ, സാമൂഹ്യ-സാമ്പത്തിക അവസ്ഥകൾ സമഗ്രമായി പഠിക്കാൻ ചുമതലപ്പെടുത്തി. കമ്മീഷൻ വിശദമായ പഠനവും വിശകലനവും നടത്തി 17-05-2023ന് മുഖ്യമന്ത്രിക്ക് റിപ്പോർട്ട് സമർപ്പിച്ചു. സർക്കാർ അത് തത്വത്തിൽ അംഗീകരിച്ച് 26-02-2026ന് ഔദ്യോഗികമായി പ്രസിദ്ധീകരിച്ചു. ജസ്റ്റീസ് ജെ.ബി. കോശി കമ്മീഷൻ റിപ്പോർട്ട് കേരള സർക്കാർ ഡോക്യുമെന്‍റ് പോർട്ടലിൽ പൊതുജനങ്ങൾക്ക് ലഭ്യമാണ്; https://document.kerala.gov.in/documents/cabinetdecisions/cabinet2802202612:04:52.pdf
420 പേജുള്ള ഈ റിപ്പോർട്ട് നൂറുകണക്കിന് ശിപാർശകൾ ഉൾക്കൊള്ളുന്ന സമഗ്ര പഠനരേഖയാണ്. കമ്മീഷന്‍റെ സിറ്റിംഗിനിടെ വിവിധ മാർഗങ്ങളിലൂടെ 4,45,500 നിവേദനങ്ങൾ ലഭിക്കുകയും അവയെല്ലാം പരിഗണിക്കുകയും ചെയ്തതായി രേഖപ്പെടുത്തുന്നു. വിവിധ സർക്കാർ വകുപ്പുകളിൽനിന്നുള്ള രേഖകളും പ്രമുഖ വ്യക്തികളും സ്ഥാപനങ്ങളും സഭാകേന്ദ്രങ്ങളും നൽകിയ തെളിവുകളും ഈ പഠനത്തിന്‍റെ വ്യാപ്തിയും വിശ്വാസ്യതയും വ്യക്തമാക്കുന്നു. റിപ്പോർട്ട് 284 പ്രധാന ശിപാർശകളും 45 ഉപശിപാർശകളും ഉൾക്കൊള്ളുന്നു.

മുമ്പ് ഇന്ത്യയിലെ മുസ്‌ലിം സമൂഹത്തിന്‍റെ സാമൂഹികവും സാമ്പത്തികവും വിദ്യാഭ്യാസപരവുമായ പിന്നാക്കാവസ്ഥ പഠിക്കാൻ 2005ൽ ജസ്റ്റീസ് രജീന്ദർ സച്ചാർ അധ്യക്ഷനായ സമിതിയെ കേന്ദ്രസർക്കാർ നിയമിക്കുകയും ആ റിപ്പോർട്ടിന്‍റെ അടിസ്ഥാനത്തിൽ 2007ൽ കേരളത്തിൽ പാലോളി മുഹമ്മദ് കുട്ടി അധ്യക്ഷനായ കമ്മിറ്റി വഴി ശിപാർശകൾ മുൻഗണനാക്രമമുണ്ടാക്കി നടപ്പാക്കി എന്നതും ശ്രദ്ധേയമായ ഒരു പ്രക്രിയ ആയിരുന്നു

അതുപോലെതന്നെ കേരളത്തിലെ ക്രൈസ്തവ സമൂഹത്തിന്‍റെ വിദ്യാഭ്യാസവും സാമൂഹ്യ-സാമ്പത്തിക അവസ്ഥയും പഠിച്ച് ഭാവിയിലേക്കുള്ള മാർഗരേഖ നിർദ്ദേശിക്കുന്നതിനായി രൂപീകരിക്കപ്പെട്ടതാണ് ജസ്റ്റീസ് ജെ. ബി. കോശി കമ്മീഷൻ.

പശ്ചാത്തലവും കണ്ടെത്തലുകളും

കേരളത്തിലെ ക്രൈസ്തവ ന്യൂനപക്ഷങ്ങളുടെ വിദ്യാഭ്യാസ, സാമൂഹ്യ-സാമ്പത്തിക പിന്നാക്കാവസ്ഥയും ക്ഷേമവുമായി ബന്ധപ്പെട്ട ആവശ്യങ്ങളും സംബന്ധിച്ച് വിവിധ സംഘടനകളും വ്യക്തികളും സർക്കാരിനു മുന്നിൽ നിരവധി നിവേദനങ്ങൾ സമർപ്പിച്ചിരുന്നു. സീറോമലബാർ സഭ ഉൾപ്പെടെയുള്ള സഭാനേതൃത്വവും സാമൂഹിക സംഘടനകളും ഈ വിഷയത്തിൽ സർക്കാരിന്‍റെ ശ്രദ്ധ ക്ഷണിച്ചു. ഈ സാഹചര്യത്തിലാണ് ജെ.ബി. കോശി കമ്മീഷൻ രൂപീകരിച്ചത്.

റിപ്പോർട്ടിന്‍റെ പതിനാലാം പേജ് മുതൽ ക്രൈസ്തവ സമൂഹത്തിന്‍റെ വിവിധ ഉപവിഭാഗങ്ങൾ നേരിടുന്ന സവിശേഷമായ പ്രശ്നങ്ങൾ വിശദമായി പ്രതിപാദിക്കുന്നു. പ്രധാനമായും നാല് മേഖലകളിലാണ് റിപ്പോർട്ട് ഊന്നൽ നൽകുന്നത്.

വിദ്യാഭ്യാസപരമായ പിന്നാക്കാവസ്ഥ

ഉന്നതവിദ്യാഭ്യാസരംഗത്ത് ക്രൈസ്തവ വിദ്യാർഥികളുടെ പങ്കാളിത്തം ജനസംഖ്യാനുപാതികമായി കുറഞ്ഞുവരുന്നതായി റിപ്പോർട്ട് ചൂണ്ടിക്കാണിക്കുന്നു. പ്രഫഷണൽ കോഴ്സുകളിൽ പ്രവേശിക്കാൻ സാമ്പത്തിക ബുദ്ധിമുട്ടുകൾ ഒരു പ്രധാന തടസമായി തുടരുന്നു. പ്രത്യേകിച്ച് തീരദേശ മേഖലകളിലും തോട്ടം തൊഴിലാളികളായ ക്രൈസ്തവ സമൂഹങ്ങളിലും മികച്ച വിദ്യാഭ്യാസ സൗകര്യങ്ങളുടെ അഭാവം വ്യക്തമായി രേഖപ്പെടുത്തിയിട്ടുണ്ട്.

സാമ്പത്തിക സാഹചര്യങ്ങൾ

പരമ്പരാഗതമായി കൃഷിയെ ആശ്രയിച്ചുള്ള വലിയൊരു വിഭാഗം കർഷകർ കാർഷിക ഉത്പന്നങ്ങളുടെ വിലയിടിവും വന്യജീവി ആക്രമണവും മൂലം ഗുരുതര പ്രതിസന്ധിയിലാണ്. അതുപോലെ തീരദേശ മേഖലകളിലെ മത്സ്യത്തൊഴിലാളികളായ ലത്തീൻ കത്തോലിക്ക സമൂഹം കടലാക്രമണവും അടിസ്ഥാന സൗകര്യങ്ങളുടെ കുറവും കാരണം സാമ്പത്തികമായി വലിയ ബുദ്ധിമുട്ടുകൾ നേരിടുന്നുവെന്ന് റിപ്പോർട്ട് വ്യക്തമാക്കുന്നു.

സാമൂഹിക സുരക്ഷ

ചെറുകിട കർഷകർക്കും തീരദേശവാസികൾക്കും അർഹമായ ക്ഷേമപദ്ധതികൾ കൃത്യമായി ലഭിക്കുന്നില്ലെന്ന് റിപ്പോർട്ട് ചൂണ്ടിക്കാണിക്കുന്നു. കൂടാതെ, അഗതിമന്ദിരങ്ങളും അനാഥാലയങ്ങളും ഉൾപ്പെടെയുള്ള സാമൂഹിക സേവന സ്ഥാപനങ്ങൾ നടത്തുന്ന ക്രൈസ്തവ സംഘടനകൾക്കു കൂടുതൽ സർക്കാർ പിന്തുണ ആവശ്യമാണ് എന്നും റിപ്പോർട്ട് വ്യക്തമാക്കുന്നു.

ഈ റിപ്പോർട്ട് ഓരോ വിഭാഗത്തിന്‍റെയും സവിശേഷമായ പ്രശ്നങ്ങളെ തിരിച്ചറിഞ്ഞ് അവ പരിഹരിക്കാനാവശ്യമായ പ്രത്യേക പാക്കേജുകളും നിയമപരമായ പരിരക്ഷകളും നിർദേശിക്കുന്നു. പ്രത്യേകിച്ച് ലത്തീൻ കത്തോലിക്കർ, ദളിത് ക്രൈസ്തവർ, മലയോര കർഷകർ, തീരദേശവാസികൾ തുടങ്ങിയ വിഭാഗങ്ങളുടെ പ്രശ്നങ്ങൾ പ്രത്യേകം പഠിച്ച് അവർക്കായുള്ള പ്രത്യേക പരിഹാരമാർഗങ്ങൾ നിർദേശിച്ചിരിക്കുന്നു.

റിപ്പോർട്ടിന് രണ്ടു വാല്യങ്ങൾ

റിപ്പോർട്ടിന് രണ്ടു വാല്യങ്ങളാണുള്ളത്. 10 അധ്യായങ്ങളായി തിരിച്ചിട്ടുണ്ട്. ആമുഖ ഭാഗത്തിനുശേഷം ക്രൈസ്തവ ന്യൂനപക്ഷങ്ങളുടെ പൊതുവായ പ്രശ്നങ്ങൾ വിശദമായി അവതരിപ്പിക്കുകയും തുടർന്ന് ലത്തീൻ ക്രൈസ്തവർ, പരിവർത്തിത ക്രൈസ്തവർ, കുട്ടനാട് മേഖല, മലയോര മേഖല, തീരദേശ മേഖല എന്നീ മേഖലകളുടെ പ്രത്യേക സാഹചര്യങ്ങൾ പ്രത്യേകം അധ്യായങ്ങളായി പഠിക്കുകയും ചെയ്യുന്നു. തുടർന്ന് ശിപാർശകളുടെ സമഗ്രസംഗ്രഹവും ഉപസംഹാരവും അനുബന്ധങ്ങളും ഉൾപ്പെടുത്തി റിപ്പോർട്ട് സമാപിക്കുന്നു. തുടർന്ന് അവതരിപ്പിക്കുന്നത് ആ റിപ്പോർട്ടിന്‍റെ സമഗ്രമായ വിശകലനമാണ്.

അധ്യായം 1-ആമുഖം (Page: 1-13)
അധ്യായം 2-ക്രൈസ്തവ ന്യൂനപക്ഷങ്ങളുടെ പൊതു പ്രശ്നങ്ങൾ
(Page: 14-105)
അധ്യായം 3-ലത്തീൻ ക്രിസ്ത്യാനികൾ (Page: 106-126)
അധ്യായം 4-പരിവർത്തിത ക്രിസ്ത്യാനികൾ (Page: 127-150)
അധ്യായം 5-കുട്ടനാട് മേഖല (Page: 151-175)
അധ്യായം 6-മലയോര മേഖല (Page: 176-201)
അധ്യായം 7-തീരദേശ മേഖല (Page: 202-244)
അധ്യായം 8-ശിപാർശാസംഗ്രഹം (Page: 245-349)
അധ്യായം 9-ഉപസംഹാരം (Page: 350-357)
അധ്യായം 10-അനുബന്ധങ്ങൾ (Page: 358-364)

റിപ്പോർട്ടിന്‍റെ ഉള്ളടക്കം മനസിലാക്കുകയും അതിന്‍റെ സത്തയെ-ആത്മാവിനെ-സമൂഹജീവിതത്തിൽ പ്രാവർത്തികമാക്കുകയും ചെയ്യുമ്പോഴാണ് അതിന്‍റെ ലക്ഷ്യം കൈവരിക്കുന്നത്. അതിനാൽ ഈ റിപ്പോർട്ട് നമ്മെ എന്താണ് പഠിപ്പിക്കുന്നത്, അതിന്‍റെ ശിപാർശകൾ നമ്മുടെ സമുദായത്തിന്‍റെ ഭാവിയെ എങ്ങനെ സ്വാധീനിക്കും എന്നതിനെക്കുറിച്ചാണ് അടുത്ത ഘട്ടത്തിൽ നാം കൂടുതൽ ആഴത്തിൽ ചിന്തിക്കേണ്ടത്.

വരാനിരിക്കുന്ന നിയമസഭാ തെരഞ്ഞെടുപ്പ് കേരളരാഷ്‌ട്രീയത്തിൽ നിർണായകമായിരിക്കുമെന്നതിൽ സംശയമില്ല. അതിൽതന്നെ ക്രൈസ്തവ സമുദായ അംഗങ്ങളുടെ തീരുമാനത്തിന് ഏറെ പ്രാധാന‍്യവുമുണ്ട്. ഇത്തവണത്തെ നിയമസഭാ തെരഞ്ഞെടുപ്പിൽ ക്രൈസ്തവസമുദായം അവരനുഭവിക്കുന്ന അനീതിക്കും ബോധപൂർവകമായ അവഗണനയ്ക്കും വഞ്ചനയ്ക്കുമെതിരേ വ്യക്തമായ വിധിനിർണയം നടത്തും എന്നതിലും സംശയമില്ല. ജസ്റ്റീസ് ജെ.ബി. കോശി കമ്മീഷൻ റിപ്പോർട്ട് നടപ്പാക്കാത്തത് ചരിത്രപരമായ അനീതിയാണെന്ന് ക്രൈസ്തവസമൂഹം ഒന്നടങ്കം രാഷ്‌ട്രീയപാർട്ടികളെ ശക്തമായി അറിയിച്ചിട്ടുള്ളതാണ്.

വിവിധ മേഖലകളിൽ പിന്നാക്കാവസ്ഥ നേരിടുന്ന ക്രൈസ്തവ വിഭാഗങ്ങളുടെ കേരളത്തിലെ സാമൂഹ്യ-സാമ്പത്തിക യാഥാർഥ്യങ്ങൾ ശാസ്ത്രീയമായി പഠിച്ച കമ്മീഷനായിരുന്നു ജെ.ബി. കോശി കമ്മീഷൻ. അത് വികാരപരമായി മെനഞ്ഞെടുത്ത തട്ടിക്കൂട്ട് രേഖയല്ല; സ്ഥിതിവിവരക്കണക്കുകളും യാഥാർഥ്യങ്ങളും അടിസ്ഥാനമാക്കി ശാസ്ത്രീയമായി തയാറാക്കിയ ഒരു നീതിപത്രമാണ് എന്നാണ് പൊതുവെ വിലയിരുത്തപ്പെടുന്നത്. എന്നാൽ, ആ നീതിപത്രം മാസങ്ങളും വർഷങ്ങളും കടന്നുപോയിട്ടും ഭരണകൂടത്തിന്‍റെ മേശവലിപ്പിൽ പുറംലോകം കാണാതെ പൊടിപിടിച്ചു കിടക്കുകയാണ്.

റിപ്പോർട്ട് ഉണ്ടായി; നീതി ഉണ്ടായില്ല

മുന്നാക്ക-പിന്നാക്ക വിഭാഗങ്ങളിലെ കത്തോലിക്കർ, മത്സ്യത്തൊഴിലാളി ക്രൈസ്തവർ, മലയോര മേഖലകളിലെ കർഷക സമൂഹങ്ങൾ, പരമ്പരാഗത തൊഴിൽ മേഖലകളിൽ കഴിയുന്ന ക്രൈസ്തവർ, കുട്ടനാട്ടിലെയും തീരദേശത്തെയും ക്രൈസ്തവർ എന്നിവരൊക്കെ കേരളത്തിന്‍റെ വികസനചരിത്രത്തിൽ പലപ്പോഴും സൗകര്യപൂർവം പിന്നോട്ട് തള്ളപ്പെട്ടവരാണ്. വിദ്യാഭ്യാസം, തൊഴിൽ, ഭൂമി, ക്ഷേമപദ്ധതികൾ തുടങ്ങി എല്ലായിടത്തും പിന്നാക്കാവസ്ഥ വ്യക്തമായിട്ടും, അതിനു പരിഹാരം നിർദേശിക്കുന്ന കോശി കമ്മീഷൻ റിപ്പോർട്ട് നടപ്പാക്കാൻ സർക്കാർ തയാറായില്ല എന്നത് ഒരു ഭരണപരമായ വീഴ്ചയല്ല, മറിച്ച് ഒരു സമൂഹത്തോടുള്ള രാഷ്‌ട്രീയ വഞ്ചനയാണ്; സാമൂഹ്യനീതി എന്ന ആശയത്തോടുള്ള തുറന്ന അവഹേളനമാണ് എന്ന് പറയാതെ വയ്യ.

വോട്ടിനായി മാത്രം ന്യൂനപക്ഷ പ്രേമം

തെരഞ്ഞെടുപ്പ് കാലങ്ങളിൽ മാത്രം ന്യൂനപക്ഷ സംരക്ഷണം പറയുന്ന രാഷ്‌ട്രീയ സംസ്കാരം കേരളത്തിൽ മാറിമാറി പരീക്ഷിക്കുക പതിവാണ്. എന്നാൽ, അധികാരം ലഭിച്ചാൽ, റിപ്പോർട്ടുകളും ശിപാർശകളും സൗകര്യപൂർവം മറക്കുന്നു. ജെ.ബി. കോശി കമ്മീഷൻ അതിന്‍റെ ഏറ്റവും ഒടുവിലത്തെ ഉദാഹരണമാണ്. തങ്ങളുടെ പിന്നാക്കാവസ്ഥ പഠിക്കാൻ കമ്മീഷൻ വേണം; പക്ഷേ പരിഹരിക്കാൻ രാഷ്‌ട്രീയ മനസ് വേണ്ടെന്നാണോ? ഈ ചോദ്യം ക്രൈസ്തവ സമൂഹം ഇനി സൗമ്യമായി ചോദിച്ചാൽ മതിയാകില്ല. ഇച്ഛാശക്തിയോടെ, സുവ്യക്തമായി രാഷ്‌ട്രീയ കേരളത്തോട് ചോദിക്കേണ്ട സമയമാണ് വരാൻ പോകുന്നത്.

ത്രിതല പഞ്ചായത്ത് തെരഞ്ഞെടുപ്പ് ഫലം ഭരണപക്ഷത്തിനു നൽകിയ വ്യക്തമായ മുന്നറിയിപ്പിന്‍റെ ജനസ്വരമായിരുന്നു. അതുകൊണ്ട് സമീപകാല തെരഞ്ഞെടുപ്പ് ഫലങ്ങൾ രാഷ്‌ട്രീയ പാർട്ടികൾ ഗൗരവത്തോടെ വിലയിരുത്തേണ്ടതാണ്. ഈ ഫലങ്ങളിൽ ക്രൈസ്തവ അവഗണനയ്ക്കെതിരായ ശക്തമായ പ്രതികരണമുണ്ടെന്ന യാഥാർഥ‍്യം തിരിച്ചറിയണം. പല പ്രദേശങ്ങളിലും ഭരണകക്ഷികൾക്ക് സംഭവിച്ച വോട്ട് ചോർച്ച, പരമ്പരാഗത രാഷ്‌ട്രീയ വിശ്വാസങ്ങളിൽ പൊതുജനത്തിനുണ്ടാകുന്ന നിസംഗത, തങ്ങളുടെ കോട്ടകളെന്നു പാർട്ടികൾ കരുതിപ്പോന്ന പല സ്ഥലങ്ങളിലും സ്വതന്ത്രരും പ്രാദേശിക കൂട്ടായ്മകളും ശക്തമായി കളം പിടിക്കുന്ന കാഴ്ച ഇതൊന്നും വികാരാധീനമായ പ്രതിഷേധമായി തള്ളിക്കളയാനാവില്ല. സാധാരണ പൗരന്‍റെ സർക്കാരിനോടുള്ള ബോധപൂർവമായ അകൽച്ചയാണ് ഇവിടെ വെളിവാകുന്നത്. “ഞങ്ങളെ കേൾക്കുന്നില്ലെങ്കിൽ, ഞങ്ങളും നിങ്ങളെ കേൾക്കില്ല” എന്ന ജനാധിപത്യ സന്ദേശം കഴിഞ്ഞ ലോക്സഭാ, ത്രിതല പഞ്ചായത്ത്‌ തെരഞ്ഞെടുപ്പ് ഫലങ്ങൾ ഭരണവർഗത്തിന് നൽകുന്നുണ്ട് എന്നത് നിസ്തർക്കമാണ്.

ക്രൈസ്തവർക്ക് അന്യായമായതൊന്നും ആവശ്യമില്ല. എന്നാൽ, ഭരണഘടന അനുവദിക്കുന്ന ന്യായമായ അവകാശങ്ങൾപോലും നിഷേധിക്കുന്നത് പ്രതിഷേധാർഹമാണ്. വിദ്യാഭ്യാസ കാര്യങ്ങളിലും ന്യൂനപക്ഷ അവകാശങ്ങളുടെ കാര്യങ്ങളിലും സാമൂഹ്യനീതിയുടെ ദൃശ്യമായ ഫലങ്ങൾ വെളിപ്പെടുത്തുന്ന നിലപാടുകളും പ്രവർത്തനങ്ങളും സർക്കാരിന്‍റെ ഭാഗത്തുനിന്ന് ഉണ്ടാകേണ്ടതായിരുന്നു. എന്നാൽ, ഇതൊന്നും സംഭവിച്ചില്ല. അതിനാൽതന്നെ അടിസ്ഥാനതലത്തിൽ നടന്ന തെരഞ്ഞെടുപ്പു വിശകലനം കാണിക്കുന്നത് സർക്കാരിനോടുള്ള രാഷ്‌ട്രീയ വിശ്വാസം അടിസ്ഥാനവർഗങ്ങൾക്ക് പ്രത്യേകിച്ച് ക്രൈസ്തവ വിഭാഗങ്ങൾക്ക് നഷ്ടമായിരിക്കുന്നു എന്നതാണ്. വരാനിരിക്കുന്ന നിയമസഭാ തെരഞ്ഞെടുപ്പ് രാഷ്‌ട്രീയ പാർട്ടികൾക്ക് അവസാന മുന്നറിയിപ്പല്ല; അവസാന അവസരമാണ്.

ജെ.ബി. കോശി കമ്മീഷൻ റിപ്പോർട്ട് നടപ്പാക്കുമെന്ന വ്യക്തമായ രാഷ്‌ട്രീയ പ്രതിജ്ഞ ഇല്ലാതെ, ക്രൈസ്തവ സമൂഹത്തിന്‍റെ വിശ്വാസം തിരിച്ചുപിടിക്കാൻ ഒരു മുന്നണിക്കും കഴിയില്ല.

ഇത് ഒരു സമുദായത്തിന് പ്രത്യേക ആനുകൂല്യം ആവശ്യപ്പെടുന്ന പോരാട്ടമല്ല, മറിച്ച് ഭരണഘടന ഉറപ്പുനൽകുന്ന സാമൂഹ്യനീതിക്കായുള്ള അവകാശസംരക്ഷണ പോരാട്ടമാണ്. ഇത് തുല്യതയ്ക്കും നീതിക്കും വേണ്ടിയുള്ള ഒരു സമൂഹത്തിന്‍റെ സമരമാണെന്ന് കത്തോലിക്ക കോൺഗ്രസ് ആവർത്തിച്ചു വ്യക്തമാക്കിയിട്ടുള്ളതാണ്. കത്തോലിക്ക കോൺഗ്രസ് ഒരു രാഷ്‌ട്രീയ പാർട്ടിയല്ല. എന്നാൽ, സാമൂഹ്യനീതിയുടെ കാവൽക്കാരാണ്.

അതുകൊണ്ട് വ്യക്തമായി പറയാനുള്ളത്:

•ജെ.ബി. കോശി കമ്മീഷൻ റിപ്പോർട്ട് പൂർണമായി നടപ്പാക്കണം.

•അതിന് സമയബന്ധിതമായ നിയമനിർമാണവും പദ്ധതികൾക്ക് വേണ്ട തുകയും ബജറ്റിൽ ഉറപ്പാക്കണം.

അല്ലെങ്കിൽ, ക്രൈസ്തവ സമൂഹം കത്തോലിക്ക കോൺഗ്രസിന്‍റെ നേതൃത്വത്തിൽ ജനാധിപത്യപരമായ എല്ലാ മാർഗങ്ങളിലൂടെയും പ്രതികരിക്കും. അവഗണിക്കപ്പെട്ട സമൂഹങ്ങൾ ഒടുവിൽ രാഷ്‌ട്രീയ ചരിത്രം മാറ്റും എന്നത് കേരളത്തിന്‍റെ ഗതകാല ചരിത്രം പഠിപ്പിക്കുന്ന പാഠമാണ്.

(എകെസിസി ഗ്ലോബൽ ഡയറക്ടറാണ് ലേഖകന്‍)

4

E Paper

Deepika
E-Paper

Filter By Tag : Commission Report

ജസ്റ്റീസ് ജെ.ബി. കോശി കമ്മീഷൻ റിപ്പോർട്ട് സവിശേഷതകളും ശിപാർശകളും

ജെ.ബി. കോശി കമ്മീഷൻ റിപ്പോർട്ട് പ്രസിദ്ധീകരിക്കണം: മലങ്കര കത്തോലിക്കാസഭ സൂനഹദോസ്

ജെ. ബി. കോശി കമ്മീഷന്‍ റിപ്പോര്‍ട്ട്; കെസിബിസി എസ്‌സി എസ്ടി കമ്മീഷന്‍ സ്വാഗതം ചെയ്തു

ജെ.ബി. കോശി കമ്മീഷന്‍ റിപ്പോര്‍ട്ട് അംഗീകരിച്ചത് സ്വാഗതാര്‍ഹം: സിഎസ്എസ്

ജെ.ബി. കോശി കമ്മീഷന്‍റെ റിപ്പോര്‍ട്ട് ; സര്‍ക്കാര്‍ തീരുമാനം സ്വാഗതാര്‍ഹമെന്ന് കെആര്‍എല്‍സിസി

ജസ്റ്റീസ് ജെ.ബി. കോശി കമ്മീഷൻ റിപ്പോർട്ട് പുറത്തുവിടണം; ക്രൈസ്തവ മഹാറാലി നടത്തി കേരള കൗണ്‍സിൽ ഓഫ് ചർച്ചസ്

ജെ.ബി. കോശി കമ്മീഷൻ റിപ്പോർട്ട് വേഗം പുറത്തുവിടണം: കെസിവൈഎം

ജെ.ബി. കോശി കമ്മീഷൻ റിപ്പോർട്ട് പ്രസിദ്ധീകരിക്കണം: സീറോമലബാർ പബ്ലിക് അഫയേഴ്സ് കമ്മീഷൻ

ജെ.ബി. കോശി കമ്മീഷൻ റിപ്പോർട്ട് ; മുഖ്യമന്ത്രി യോഗം വിളിക്കണമെന്നു കെആർഎൽസിസി

ജെ.ബി. കോശി കമ്മീഷൻ റിപ്പോർട്ട് പൂർണമായും പ്രസിദ്ധീകരിക്കണം: ഇന്‍റർ ചർച്ച് കൗൺസിൽ

ജെ.ബി. കോശി കമ്മീഷൻ റിപ്പോർട്ട് പൂർണരൂപത്തിൽ പുറത്തുവിടണം: ബിജെപി

ജെ.ബി. കോശി കമ്മീഷന്‍ റിപ്പോര്‍ട്ട്: കണ്‍വന്‍ഷനുകളുമായി കെഎല്‍സിഎ

ജെ.ബി. കോശി കമ്മീഷൻ റിപ്പോർട്ട്; അവഗണിക്കപ്പെട്ട നീതിയും മറക്കരുതാത്ത മുന്നറിയിപ്പും

ജെ.ബി. കോശി കമ്മീഷൻ റിപ്പോർട്ട്: കെഎൽസിഎ പ്രക്ഷോഭത്തിലേക്ക്

Latest News

CATEGORIES

FEATURING

RASHTRA DEEPIKA LTD

Dr. Francis Cleetus

Michael Vettickatt

George Kudilil

4

E Paper

DeepikaE-Paper

NEWS

SECTIONS

FEATURED

PUBLICATIONS

Important Links

Follow