കൊച്ചി: ക്രൈസ്തവ ജനവിഭാഗങ്ങളുടെ പിന്നാക്കാവസ്ഥ പഠിച്ചു സർക്കാരിന് സമർപ്പിച്ച ജസ്റ്റീസ് ജെ. ബി. കോശി കമ്മീഷൻ റിപ്പോർട്ട് നടപ്പിലാക്കാൻ പുതിയ സർക്കാർ അടിയന്തര നടപടികൾ സ്വീകരിക്കണമെന്ന് കത്തോലിക്ക കോൺഗ്രസ് കേന്ദ്ര സമിതി ആവശ്യപ്പെട്ടു.
റിപ്പോർട്ടിലെ ശിപാർശകൾ മുൻഗണനാ ക്രമത്തിൽ നടപ്പിലാക്കുന്നതിന് സർക്കാർ തലത്തിൽ പ്രത്യേക സമിതി രൂപീകരിക്കണം. ഇതിന് സംസ്ഥാന ബജറ്റിൽ തുക വകയിരുത്തണം. സമിതി സമുദായനേതൃത്വവുമായി ചർച്ചകൾ നടത്തി മുൻഗണനാക്രമം നിശ്ചയിക്കണം.
വർഷങ്ങൾ നീണ്ട പഠനങ്ങൾക്കും ചർച്ചകൾക്കും ശേഷം തയാറാക്കിയ റിപ്പോർട്ട് നിരവധി സമ്മർദങ്ങൾക്കും സമരങ്ങൾക്കും ശേഷമാണു പ്രസിദ്ധീകരിച്ചത്.
എല്ലാവിഭാഗം ജനങ്ങൾക്കും നീതി ലഭ്യമാക്കാൻ സർക്കാരിനു കടമയുണ്ട്. ജെ.ബി. കോശി കമ്മീഷൻ റിപ്പോർട്ട് സാധാരണക്കാരുടെയും കർഷകരുടെയും ജീവിതപ്രശ്നങ്ങൾ തുറന്നുകാണിക്കുന്നതും പരിഹാരങ്ങൾ നിർദേശിക്കുന്നതുമാണ് -കത്തോലിക്ക കോൺഗ്രസ് ചൂണ്ടിക്കാട്ടി.
പ്രസിഡന്റ് രാജീവ് കൊച്ചുപറമ്പിൽ അധ്യക്ഷത വഹിച്ച യോഗത്തിൽ ഡയറക്ടർ ഫാ. ഡോ. ഫിലിപ്പ് കവിയിൽ, ജനറൽ സെക്രട്ടറി ഡോ. ജോസ്കുട്ടി ഒഴുകയിൽ, അഡ്വ. ടോണി പുഞ്ചക്കുന്നേൽ, ഡോ. കെ.എം. ഫ്രാൻസിസ്, ബെന്നി ആന്റണി, ട്രീസ ലിസ് സെബാസ്റ്റ്യൻ, രാജേഷ് ജോൺ, തോമസ് ആന്റണി എന്നിവർ പ്രസംഗിച്ചു.
Tags : J.B. Koshy Commission report implemented Catholic Congress