Kerala
മലപ്പുറം: കർഷകനെ കൃഷിയിടത്തിൽ ഷോക്കേറ്റ് മരിച്ച നിലയിൽ കണ്ടെത്തി. പരിയാപുരം പട്ടിക്കുന്ന് കല്ലിപ്പറമ്പിൽ അബ്ദുൽ അസീസ് (55) ആണ് മരിച്ചത്. വാഴത്തോട്ടത്തിൽ പന്നി കയറാതിരിക്കാൻ സ്ഥാപിച്ച വൈദ്യുതവേലിയിൽനിന്ന് ഷോക്കേറ്റുള്ള മരണമെന്നാണു പ്രാഥമിക നിഗമനം. അബ്ദുൽ അസീസിന്റെ മൃതദേഹത്തിനു സമീപം ഒരു പന്നിയെ ചത്തനിലയിൽ കണ്ടെത്തി.
മൃതദേഹത്തിന് ഒരു ദിവസത്തെ പഴക്കമുണ്ട്. ആളൊഴിഞ്ഞ കൃഷിയിടത്തിൽ നിന്നു ദുർഗന്ധം വമിച്ചതിനെത്തുടർന്ന് നാട്ടുകാർ നടത്തിയ പരിശോധനയിലാണ് ഇന്നലെ വൈകിട്ട് മൃതദേഹം കണ്ടത്. അബ്ദുൽ അസീസ് ഇവിടെ ഭൂമി പാട്ടത്തിനെടുത്ത് വാഴക്കൃഷി ചെയ്യുകയായിരുന്നു. മൃതദേഹം പെരിന്തൽമണ്ണ ജില്ലാ ആശുപത്രി മോർച്ചറിയിൽ. പിതാവ്: പരേതനായ കുഞ്ഞിമൊയ്തു. മാതാവ്: ആസ്യ.
National
ഗാന്ധിനഗർ: ഗുജറാത്തിലെ മെഹ്സാനയിൽ വയോധികയെ കൊലപ്പെടുത്തി സ്വർണം കവർന്നു. ഇന്ദ്രാദ് സ്വദേശിനി ശാർദാബെൻ താക്കൂർ (60) ആണ് കൊല്ലപ്പെട്ടത്. മാർച്ച് 20 മുതൽ കാണാതായ ശാർദാബെനിനെ കൃഷിയിടത്തിൽ കുഴിച്ചുമൂടിയ നിലയിൽ കണ്ടെത്തുകയായിരുന്നു.
പുല്ല് ശേഖരിക്കാൻ പോയ ശാർദാബെൻ വൈകുന്നേരമായിട്ടും തിരിച്ചെത്താത്തതിനെത്തുടർന്ന് മകൻ ഗോവിന്ദ്ജി ബൽദേവ്ജി താക്കൂർ പോലീസിൽ പരാതി നൽകിയിരുന്നു. പോലീസ് സിസിടിവി ദൃശ്യങ്ങൾ പരിശോധിച്ചപ്പോഴാണ് ഒരു സ്വകാര്യ കന്പനിയുടെ കൃഷിയിടത്തെയ്ക്ക് ശാർദാബെൻ നടന്നുപോകുന്നത് കണ്ടത്. എന്നാൽ തിരികെ വരുന്നത് ദൃശ്യങ്ങളിൽ ഉണ്ടായിരുന്നില്ല.
ഇതിന്റെ അടിസ്ഥാനത്തിൽ പോലീസ് നടത്തിയ പരിശോധനയിൽ തോട്ടത്തിലെ കുറച്ച് ഭാഗങ്ങളിൽ മണ്ണ് ഇളകിക്കിടക്കുന്നത് ശ്രദ്ധയിൽപ്പെട്ടു. അവിടെ ഒരടി താഴ്ചയിൽ കുഴിച്ചപ്പോഴാണ് മൃതദേഹം കണ്ടെത്തിയത്.
തലയ്ക്കടിയേറ്റാണ് ശാർദാബെൻ കൊല്ലപ്പെട്ടത്. കൊലപ്പെടുത്താൻ ഉപയോഗിച്ച ആയുധങ്ങളും പ്രതികൾ സമീപത്ത് തന്നെ കുഴിച്ചുമൂടിയിരുന്നു. ശരീരത്തിലുണ്ടായിരുന്ന നാല് ലക്ഷം രൂപയുടെ സ്വർണാഭരണങ്ങൾ കവർന്ന ശേഷമാണ് മൃതദേഹം കുഴിച്ചുമൂടിയത്.
സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.