Sports
തൃശൂർ: കേരള വിമണ്സ് ലീഗ് ഫുട്ബോൾ മത്സരങ്ങൾക്ക് ഇന്നു കൊട്ടിക്കലാശം. തൃശൂർ മുനിസിപ്പൽ സ്റ്റേഡിയത്തിൽ വൈകുന്നേരം നാലിനു നടക്കുന്ന ഫൈനലിൽ ഗോകുലം എഫ്സി, കൊച്ചി ലോഡ്സ് ഫുട്ബോൾ അക്കാഡമിയുമായി ഏറ്റുമുട്ടും.
ഫെബ്രുവരി 27ന് ആരംഭിച്ച ടൂർണമെന്റിന്റെ ലീഗ് ഘട്ടത്തിൽ എട്ട് ടീമുകൾ മാറ്റുരച്ചു. മികച്ച നാലു ടീമുകൾ സൂപ്പർ ഫോറിലേക്കു യോഗ്യത നേടി. സൂപ്പർ ഫോറിലെ കടുത്ത പോരാട്ടങ്ങൾക്കൊടുവിൽ തുല്യപോയിന്റ് നേടിയ ഗോകുലം എഫ്സി ഗോൾ ആവറേജിൽ ഒന്നാംസ്ഥാനത്തെത്തി. ലോഡ്സ് എഫ്എ കൊച്ചി രണ്ടാംസ്ഥാനക്കാരായും ഫൈനലിൽ കടന്നു.
ലീഗ് ഘട്ടത്തിൽ ഗോകുലത്തിനു മേൽക്കൈ ഉണ്ടായിരുന്നെങ്കിലും സൂപ്പർ ഫോറിൽ ലോഡ്സ് എഫ്എയുടെ ശക്തമായ തിരിച്ചുവരവായിരുന്നു. മികച്ച ഒത്തിണക്കവും ആക്രമണനിരയുടെ മികവും ലോഡ്സിനെ ഫൈനലിലേക്ക് എത്തിച്ചു. മറുവശത്ത്, സ്ഥിരതയാർന്ന പ്രകടനവും ശക്തമായ പ്രതിരോധവും ഗോകുലത്തിനു കരുത്തായി.
ഗോളടിയിൽ ലോഡ്സ് എഫ്എ കൊച്ചിയുടെ കണ്ണൂർ സ്പോർട്സ് ഡിവിഷൻ താരം നേഹ സജി ഏഴു ഗോളുകളുമായി ടോപ് സ്കോറർ പട്ടികയിൽ മുന്നിലാണ്.
ഗോകുലം എഫ്സിയുടെ വൈഷ്ണവി ധർമരാജും മസ്കാൻ സുബ്ബയും ആറു ഗോളുകൾ വീതം നേടി തൊട്ടുപിന്നിലുണ്ട്. ഫൈനലിൽ ഇവരുടെ പ്രകടനം നിർണായകമാകും. ലീഗിൽ ഇന്റർ കേരള എഫ്സിയെ 14-0 സ്കോറിന് ലോഡ്സ് തറപറ്റിച്ചതാണ് ടൂർണമെന്റിലെ ഏറ്റവും വലിയ വിജയം.
മലയാളിതാരങ്ങൾ മാത്രമുള്ള ലോഡ്സ് എഫ്എ ഇരിങ്ങാലക്കുട സെന്റ് ജോസഫ്സ് കോളജുമായി കൈകോർത്താണ് ടീമിനെ ഇറക്കിയത്. ജയത്തിൽകുറഞ്ഞതൊന്നും പ്രതീക്ഷിക്കുന്നില്ലെന്ന് ഹെഡ് കോച്ചും മുൻ സന്തോഷ് ട്രോഫി താരവുമായ സോളി സേവ്യറും ടീം എംഡി ഡെറിക് ഡിക്കോത്തും പറഞ്ഞു. പ്രിയങ്ക പ്രശാന്ത് ഹെഡ് കോച്ചായ ഗോകുലം എഫ്സിയും തികഞ്ഞ കിരീടപ്രതീക്ഷയിലാണ്.
Kerala
പറശ്ശാല: വനിതാ ഫിറ്റ്നസ് ട്രെയിനർക്ക് കുത്തേറ്റു. പാറശാലയിലെ മിഥില ലയൺസ് ക്ലബിലെ ഫിറ്റ്നസ് ട്രെയിനർ കാവ്യക്കാണ് കുത്തേറ്റത്. ഇവരെ സ്വകാര്യ ആശുപത്രിയിലേക്ക് മാറ്റി.
നെഞ്ചിലാണ് കുത്തേറ്റത്. കെട്ടിടത്തിനുള്ളില് കയറി അശ്വന്ത് എന്ന യുവാവാണ് കുത്തിപരിക്കേൽപ്പിച്ചത്. അക്രമം നടത്തിയ ശേഷം പ്രതി ജീവനൊടുക്കാൻ ശ്രമിച്ചു.
രാവിലെ തെരഞ്ഞെടുപ്പ് പ്രചരണത്തിന് ഇറങ്ങിയസമയത്താണ് യുവതിയെ രക്തത്തിൽ കുളിച്ച് നിലയിൽ കണ്ടതെന്ന് പൊതു പ്രവർത്തകൻ പ്രശാന്ത് പറഞ്ഞു.
തലയുടെ പുറകിലും നെഞ്ചിലുമാണ് കുത്തേറ്റതെന്നും യുവതിയെ കുത്തി പരിക്കേൽപ്പിച്ച ശേഷം അശ്വന്ത് ജിമ്മിൽ ഇരിക്കുകയായിരുന്നുവെന്നും പറയുന്നു. അശ്വന്തിനെ പാറശാല താലൂക്ക് ആശുപത്രിയിലേക്ക് മാറ്റി
Sports
സിഡ്നി: രാജ്യത്തേക്കു മടങ്ങിയാൽ പീഡനത്തിനും ശിക്ഷയ്ക്കും വിധേയരാകാമെന്ന ഭയത്തെത്തുടർന്ന് ഇറാന്റെ ദേശീയ വനിതാ ഫുട്ബോൾ ടീമിലെ രണ്ടു താരങ്ങൾക്കൂടി ഓസ്ട്രേലിയയിൽ അഭയം തേടി.
ടീമിലെ താരം സോൽഫി, സപ്പോർട്ടിംഗ് സ്റ്റാഫംഗം സാറ സൊൽതാൻ മെഷ്ഖെ കാർ എന്നിവരാണ് അഭയം തേടിയത്.
ഇതോടെ ഓസ്ട്രേലിയയിൽ അഭയം തേടിയ ഇറാൻ വനിതാതാരങ്ങളുടെ എണ്ണം ഏഴായി. ഇവർക്ക് മാനുഷിക വീസ നൽകിയ സർക്കാർ അതീവസുരക്ഷയിൽ രഹസ്യകേന്ദ്രത്തിലേക്കു മാറ്റി.
രാജ്യത്ത് അഭയം തേടിയ ആറു താരങ്ങളും സപ്പോർട്ടിംഗ് സ്റ്റാഫംഗവും ഹിജാബ് ഒഴിവാക്കി ഷോർട്സുകൾ ധരിച്ച് നിൽക്കുന്ന ഫോട്ടോ ഓസ്ട്രേലിയൻ ആഭ്യന്തരമന്ത്രി ടോണി ബർക്ക് പുറത്തുവിട്ടിട്ടുണ്ട്.
ഏഴുപേർ ഒഴികെയുള്ള ഇറാൻ ടീമംഗങ്ങൾ ഇന്നലെ സ്വന്തം രാജ്യത്തേക്കു മടങ്ങി. ഏഷ്യൻ കപ്പ് ഫുട്ബോൾ ടൂർണമെന്റിൽ പങ്കെടുക്കാനായി ഓസ്ട്രേലിയയിലെത്തിയ ഇറാൻ ടീം ഫിലിപ്പീൻസിനോട് 2–0ന് തോറ്റതോടെ പുറത്തായിരുന്നു.
അതേസമയം, മലേഷ്യൻ വിമാനത്തിൽ മടങ്ങിയ മറ്റു താരങ്ങൾ ഇറാനിലേക്കാണോ പോകുന്നതെന്ന കാര്യത്തിൽ വ്യക്തതയില്ലെന്ന് ഓസ്ട്രേലിയൻ സർക്കാർ വൃത്തങ്ങൾ അറിയിച്ചു.