2

ഗ്ലാസ്‌ഗോ: കോമൺവെൽത്ത് ഗെയിംസ് ബോക്സിംഗ് റിംഗിൽ ഇന്ത്യയുടെ സുവർണ കുതിപ്പ് തുടരുന്നു. 51 കിലോഗ്രാം വിഭാഗത്തിൽ സാക്ഷി ചൗധരിയും 60 കിലോഗ്രാം വിഭാഗത്തിൽ പ്രിയ ഗൻഗാസുമാണ് സ്വർണം നേടിയത്.

വനിതകളുടെ 60 കിലോഗ്രാം വിഭാഗം ഫൈനലിൽ കനേഡിയൻ താരം മേരി ബത്തോളിനെതിരെ ആധികാരിക ജയമാണ് പ്രിയ ഗൻഗാസ് നേടിയത്. 4-1 എന്ന സ്കോറിലാണ് പ്രിയ എതിരാളിയെ പരാജയപ്പെടുത്തി സ്വർണം നേടിയത്.

51 കിലോഗ്രാം വിഭാഗത്തിന്‍റെ ഫൈനലിൽ സാക്ഷി ചൗധരിയും എതിരാളിക്ക് ഒരവസരവും നൽകാതെയാണ് വിജയം പിടിച്ചെടുത്തത്. ഇംഗ്ലണ്ടിന്‍റെ റൂബി വൈറ്റിനെ 5-0 എന്ന ഏകപക്ഷീയമായ സ്കോറിനാണ് സാക്ഷി ഇടിച്ചിട്ടത്.

നേരത്തെ വനിതകളുടെ 54 കിലോഗ്രാം വിഭാഗത്തിൽ പ്രീതി പവാറും, 57 കിലോഗ്രാം വിഭാഗത്തിൽ ജയ്‌സ്മിൻ ലംബോറിയയും സ്വർണ മെഡലുകൾ നേടിയിരുന്നു. ബോക്സിംഗിൽ ഇതുവരെ നടന്ന അഞ്ച് ഫൈനലുകളിൽ നിന്ന് നാല് സ്വർണവും ഒരു വെള്ളിയുമാണ് ഇന്ത്യയുടെ സമ്പാദ്യം.