Deepika
ADVERTISEMENT
National
ചെന്നൈ: തമിഴ്നാട് സര്‍ക്കാരിന്‍റെ ഡല്ഹിയിലെ പ്രത്യേക പ്രതിനിധിയായി സിനിമാ നിര്‍മാതാവ് വെങ്കിട്ട് കെ.നാരായണയെ നിയമിച്ചു. മുഖ്യമന്ത്രി വിജയ് മുഖ്യവേഷത്തില് എത്തിയ ജനനായകൻ സിനിമയുടെ നിർമാതാവാണ്.
ഒരു വര്ഷത്തേക്കുള്ള താത്കാലിക നിയമനമാണെന്നും നിയമനത്തിന്റെ നിബന്ധനകൾ പിന്നീട് വ്യക്തമാക്കുമെന്നും കഴിഞ്ഞ 23 ന് ചീഫ് സെക്രട്ടറി എം. സായികുമാര് പുറത്തിറക്കിയ ഉത്തരവില് പറഞ്ഞിട്ടുണ്ട്.
തുടക്കത്തിൽ സര്‍ക്കാര്‍ രൂപീകരണവുമായി ബന്ധപ്പെട്ട് ഗവര്ണറെ സന്ദര്ശിക്കുമ്പോള് വെങ്കിട്ട് നാരായണയ്ക്കൊപ്പമാണ് വിജയ് എത്തിയത്.
അധികാരത്തിലെത്തിയ ഉടന് സ്വകാര്യ ജോത്സ്യൻ രാധന് പണ്ഡിറ്റ് വെട്രിവേലിനെ സ്പെഷല് ഡ്യൂട്ടി ഓഫീസറായി വിജയ് നിയമിച്ചിരുന്നു. സഖ്യകക്ഷികളും പ്രതിപക്ഷവും ശക്തമായ എതിര്ത്തതോടെ ദിവസങ്ങള്ക്കുള്ളില് തീരുമാനം പിന്വലിക്കുകയായിരുന്നു. പുതിയ നിയമനവും ഡിഎംകെ ഉൾപ്പെടെ കക്ഷികളുടെ രൂക്ഷവിമർശനം ക്ഷണിച്ചുവരുത്തിയിരിക്കുകയാണ്.
National
ചെന്നൈ: നവജാത ശിശുക്കള്ക്കുള്ള ഒരു ഗ്രാം സ്വര്ണ മോതിരം പദ്ധതി നടപ്പിലാക്കി തമിഴ്നാട് സർക്കാർ.
‘തായ്മാമന് തങ്ക മോതിരം തിട്ടം’ എന്ന പദ്ധതിയുടെ ഉദ്ഘാടനം സെപ്റ്റംബര് 15ന് മുഖ്യമന്ത്രി സി. ജോസഫ് വിജയ് നിർവഹിക്കും. എന്നാല്, വിജയുടെ ജന്മദിനമായ കഴിഞ്ഞ 22 മുതല് പദ്ധതി മുന്കാല പ്രാബല്യത്തില് വരുമെന്നു സര്‍ക്കാര്‍ അറിയിച്ചു.
പദ്ധതി പ്രകാരം സംസ്ഥാനത്തെ സര്‍ക്കാര്‍ ആശുപത്രികളില് ജനിക്കുന്ന ഓരോ നവജാത ശിശുവിനും 13,600 രൂപ വിലയുള്ള ഒരു സ്വര്ണ മോതിരം ലഭിക്കും. സംസ്ഥാനത്ത് പ്രതിവര്ഷം ഏകദേശം 7.8 ലക്ഷം പ്രസവങ്ങള് നടക്കുന്നുണ്ട്. അതില് ഏകദേശം 4.2 ലക്ഷം പ്രസവങ്ങളും സര്‍ക്കാര്‍ ആരോഗ്യ കേന്ദ്രങ്ങളിലാണ്.
പുതിയ പദ്ധതിക്കായി പ്രതിവര്ഷം 755.83 കോടി രൂപ അനുവദിച്ചിട്ടുണ്ട്.
ഏപ്രില് 23നു നടന്ന നിയമസഭാ തെരഞ്ഞെടുപ്പിന് മുന്നോടിയായി സംസ്ഥാനത്ത് ജനിക്കുന്ന ഓരോ കുട്ടിക്കും അമ്മാവന് എന്ന നിലയില് ഒരു സ്വര്ണമോതിരം സമ്മാനമായി നല്കുമെന്ന് വിജയ് പ്രഖ്യാപിച്ചിരുന്നു.
National
മംഗളൂരു: തമിഴ്നാട് മുഖ്യമന്ത്രി സി. ജോസഫ് വിജയ് കൊല്ലൂർ മൂകാംബിക ക്ഷേത്രത്തിൽ ദർശനം നടത്തി.
ഡൽഹി സന്ദർശനത്തിനു ശേഷം പ്രത്യേക വിമാനത്തിൽ ഉച്ചയ്ക്ക് 1.20ന് മംഗളൂരു വിമാനത്താവളത്തിലിറങ്ങിയ അദ്ദേഹം അവിടെനിന്ന് കാറിലാണ് കൊല്ലൂരിലെത്തിയത്. മൂന്നോടെ കൊല്ലൂരിലെത്തിയ മുഖ്യമന്ത്രിയെ ക്ഷേത്ര ഭരണസമിതി അംഗങ്ങളുടെയും തന്ത്രിമാരുടെയും നേതൃത്വത്തിൽ വരവേറ്റു.
ക്ഷേത്രത്തിൽ ദേവീദർശനവും പ്രാർഥനയും നടത്തിയതിനുശേഷം സങ്കല്പ ദീപാരാധനയിലും വിജയ് പങ്കാളിയായി. ദേവിക്ക് വഴിപാടായി 1.6 കിലോഗ്രാം തൂക്കം വരുന്ന വെള്ളിവാൾ സമർപ്പിച്ചു. തുടർന്ന് ക്ഷേത്ര കമ്മിറ്റി ഓഫീസിലെത്തി ഭാരവാഹികളുമായി കൂടിക്കാഴ്ച നടത്തി. 30 മിനിറ്റോളം ക്ഷേത്രത്തിൽ ചെലവഴിച്ചതിനു ശേഷം വിമാനത്താവളത്തിലേക്കു മടങ്ങി.
തമിഴ്നാട്, കർണാടക സംസ്ഥാനങ്ങളിൽ നിന്നുള്ള പോലീസ് സംഘം മുഖ്യമന്ത്രിയെ അനുഗമിച്ചിരുന്നു. ക്ഷേത്രത്തിലേക്കുള്ള മാർഗമധ്യേ വിജയിയെ കാണാൻ നിരവധി പേർ തടിച്ചുകൂടിയിരുന്നു. ്ള കൊല്ലൂർ മൂകാംബിക ക്ഷേത്രത്തിൽ ശ്രീലങ്കൻ പ്രസിഡന്റായിരുന്ന റെനിൽ വിക്രമസിംഗെ ഉൾപ്പെടെയുള്ള നേതാക്കൾ നേരത്തേ ദർശനം നടത്തിയിട്ടുണ്ട്.
National
ചെന്നൈ: മെഡിക്കൽ പ്രവേശത്തിനുള്ള നീറ്റ് പരീക്ഷയിൽനിന്ന് തമിഴ്നാടിനെ ഒഴിവാക്കണമെന്ന ആവശ്യവുമായി മുഖ്യമന്ത്രി ജോസഫ് വിജയ്. ഡൽഹിയിൽ പ്രധാനമന്ത്രി നരേന്ദ്രമോദിയുടെ സാന്നിധ്യത്തിൽ നിതി ആയോഗ് യോഗത്തിലാണ് വിജയ് ആവശ്യമറിയിച്ചത്. സംസ്ഥാനത്തിന് കിട്ടാനുള്ള വിദ്യാഭ്യാസ വിഹിതം ഉടൻ അനുവദിക്കണമെന്നും കേന്ദ്ര സർക്കാരിനോട് ജോസഫ് വിജയ് ആവശ്യപ്പെട്ടു. കൂടാതെ തമിഴ്നാടിന്റെ രണ്ടാമത്തെ എയിംസ് കോയമ്പത്തൂരിൽ അനുവദിക്കണമെന്നും ആവശ്യപ്പെട്ടു.
വിദ്യാഭ്യാസ വിഹിതമായി സംസ്ഥാനത്തിന് ലഭിക്കാനുള്ള 3,284 കോടി രൂപ ഉടൻ അനുവദിക്കണമെന്ന് അദ്ദേഹം ആവശ്യപ്പെട്ടു. നീറ്റ് ഒഴിവാക്കി പ്ലസ് ടു മാർക്കിന്റെ അടിസ്ഥാനത്തിൽ മെഡിക്കൽ പ്രവേശനം നടത്താൻ തമിഴ്നാടിനെ അനുവദിക്കണമെന്ന ദീർഘകാല ആവശ്യം വിജയ് പ്രധാനമന്ത്രിക്കു മുന്നിൽവച്ചു.
2017ൽ കേന്ദ്രം നീറ്റ് നിർബന്ധമാക്കുന്നതു വരെ പ്ലസ്ടു മാർക്കിന്റെ അടിസ്ഥാനത്തിലായിരുന്നൂ തമിഴ്നാട്ടിൽ മെഡിക്കൽ പ്രവേശനം. തമിഴ്നാട്ടിലെ വിദ്യാർഥികൾക്ക് നീറ്റ് യോഗ്യത പരിഗണിക്കാതെ പ്ലസ്ടു മാർക്കിന്റെ അടിസ്ഥാനത്തിൽ മെഡിക്കൽ പ്രവേശനം നടത്താൻ അനുവദിക്കുന്ന ബിൽ നിയമസഭ രണ്ടുതവണ പാസാക്കി അയച്ചെങ്കിലും ഇതുവരെ അതിന് രാഷ്ട്രപതിയുടെ അംഗീകാരം ലഭിച്ചിട്ടില്ല.
National
ന്യൂഡല്‍ഹി: തമിഴ്‌നാട്ടില്‍ വിജയ് നേതൃത്വം നല്‍കുന്ന തമിഴക വെട്രി കഴകം (ടിവികെ) സര്‍ക്കാര്‍ ഇന്നു സഭയില്‍ വിശ്വാസവോട്ട് തേടും. ഇടപ്പാടി കെ. പളനിസ്വാമിയുടെ നേതൃത്വത്തിലുള്ള അണ്ണാ ഡിഎംകെയുമായി ഇടഞ്ഞുനില്‍ക്കുന്ന 30 വിമത എംഎല്‍എമാര്‍ ഒപ്പമെത്തിയതു സര്‍ക്കാരിന്‍റെ ആത്മവിശ്വാസം ഇരട്ടിപ്പിച്ചിട്ടുണ്ട്.
സർക്കാരിനെ പിന്തുണച്ചുള്ള കത്ത് കൈമാറാൻ മുഖ്യമന്ത്രിയുമായി കൂടിക്കാഴ്ച നടത്തിയെന്ന് വിമതനേതാവ് സി.വി. ഷൺമുഖം നേരത്തേ മാധ്യമപ്രവർത്തകരോടു പറഞ്ഞിരുന്നു.
234 അംഗ സഭയില്‍ ടിവികെയ്ക്ക് 108 സീറ്റുകളാണുള്ളത്. കോണ്‍ഗ്രസും ഇടതുകക്ഷികളും ഉള്‍പ്പെടെ 120 അംഗങ്ങൾ നേരത്തേ വിജയിനൊപ്പമുണ്ട്. അണ്ണാ ഡിഎംകെ വിമതര്‍കൂടിചേരുന്നതോടെ ഭരണപക്ഷത്ത് 150 ഓളം എംഎല്‍എമാരാകും.
ഇന്നലെ വൈകുന്നേരം അണ്ണാ ഡിഎംകെ വിമത നേതാവ് സി.വി. ഷണ്മുഖവുമായി വിജയ് കൂടിക്കാഴ്ച നടത്തി. ഷണ്മുഖത്തിന്‍റെ ചെന്നൈയിലെ വസതിയിയില്‍ അപ്രതീക്ഷിതമായി മുഖ്യമന്ത്രി എത്തുകയായിരുന്നു. കോൺഗ്രസ് ആസ്ഥാനത്തും മുഖ്യമന്ത്രി നേരിട്ടെത്തി. ഇന്നു നടക്കുന്ന വിശ്വാസവോട്ടെടുപ്പ് ലക്ഷ്യമിട്ടാണ് സന്ദർശനമെന്നു വിലയിരുത്തപ്പെടുന്നു.
വിശ്വാസപ്രമേയവുമായി ബന്ധപ്പെട്ട നീക്കങ്ങൾ എംജിആർ സ്ഥാപിച്ച അണ്ണാ ഡിഎംകെയെ പിളർപ്പിന്‍റെ വക്കിൽ എത്തിച്ചിരിക്കുകയാണ്. മുതിർന്ന നേതാക്കളായ സി.വി. ഷൺമുഖത്തിന്‍റെയും എസ്.പി. വേലുമണിയുടെയും നേതൃത്വത്തിലാണു വിമതർ ഒന്നിച്ചിരിക്കുന്നത്.
ബദ്ധവൈരികളായ ഡിഎംകെയുമായി തെരഞ്ഞെടുപ്പിനുശേഷം സഖ്യമുണ്ടാക്കാൻ പാർട്ടി അധ്യക്ഷൻ ഇടപ്പാടി കെ. പളനിസ്വാമി ശ്രമിച്ചുവെന്നാണു വിമതപക്ഷത്തിന്‍റെ ആരോപണം. ഡിഎംകെയെ തൂത്തെറിയാനാണ് അണ്ണാ ഡിഎംകെ രൂപീകരിച്ചതെന്നും എന്നാൽ പാർട്ടിയുടെ അടിസ്ഥാന തത്വങ്ങളെത്തന്നെ വെല്ലുവിളിക്കാനാണ് പളനിസ്വാമി ശ്രമിച്ചതെന്നും രണ്ട് നേതാക്കളും കുറ്റപ്പെടുത്തുന്നു.
നിയമസഭാ തെരഞ്ഞെടുപ്പിൽ 164 സീറ്റുകളിൽ അണ്ണാ ഡിഎംകെ മത്സരിച്ചെങ്കിലും 47 സീറ്റുകളിൽ മാത്രമാണു വിജയിക്കാനായത്. അന്നുമുതൽ പാർട്ടിക്കുള്ളിൽ അസ്വാരസ്യങ്ങൾ തലപൊക്കിയിരുന്നു.
അതേസമയം വിമതരുടെ ആരോപണങ്ങൾ ഇടപ്പാടി ക്യാന്പ് തള്ളിക്കളയുകയാണ്. വേലുമണിയും ഷണ്മുഖവും മറ്റൊരു മുതിർന്ന നേതാവ് വിജയ്ഭാസ്കറും മന്ത്രിപദവി ഉറപ്പാക്കിയെന്ന് ഇടപ്പാടി ക്യാന്പ് പറയുന്നു. ഏതാനും എംഎൽഎമാർ പോയെങ്കിലും അണികൾ അണ്ണാഡിഎംകെയ്ക്ക് ഒപ്പമാണെന്നുമാണ് നേതൃത്വത്തിന്‍റെ അവകാശവാദം.
തെരഞ്ഞെടുപ്പിനുശേഷം സഖ്യസർക്കാർ രൂപീകരിക്കുന്നതിന് ചർച്ച നടത്തിയെന്ന അണ്ണാഡിഎംകെ വിമതപക്ഷത്തിന്‍റെ ആരോപണം ഡിഎംകെയും തള്ളിക്കളഞ്ഞു. ടിവികെ സർക്കാരിനെ പിന്തുണയ്ക്കുന്നതിന് തീരുമാനിച്ചതോടെയാണ് അടിസ്ഥാനരഹിത ആരോപണങ്ങൾ സൃഷ്ടിക്കുന്നത്. പ്രതിപക്ഷമായി പ്രവർത്തിക്കുമെന്ന് ഡിഎംകെ നേതാവ് എം.കെ. സ്റ്റാലിൻ വ്യക്തമാക്കിയിരുന്നതായും ഓർഗനൈസിംഗ് സെക്രട്ടറി ആർ.എസ്. ഭാരതി പറഞ്ഞു.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN