District News
ഇടുക്കി: വൈദ്യുതി ഉത്പാദന, പ്രസരണ, വിതരണ മേഖലയിലെ പ്രശ്നങ്ങളും ആശങ്കകളും പരിഹരിച്ച് കൂടുതല് ജനസൗഹൃദമാക്കാനാണ് സര്ക്കാര് ശ്രമിക്കുന്നതെന്ന് മന്ത്രി സണ്ണി ജോസഫ്. ജില്ലയിലെ വൈദ്യുതി മേഖലയുമായി ബന്ധപ്പെട്ട വിവിധ വിഷയങ്ങള് അവലോകനം ചെയ്ത ശേഷം സംസാരിക്കുകയായിരുന്നു മന്ത്രി. മൂലമറ്റം പവര് ഹൗസും ഇടുക്കി ഡാമും സന്ദര്ശിച്ച ശേഷമാണ് കളക്ടറേറ്റില് അവലോകന യോഗം ചേര്ന്നത്. ജില്ലയുടെ പ്രത്യേക ഭൂപ്രകൃതി, ഗതാഗത പ്രശ്നം തുടങ്ങിയവയെല്ലാം കണക്കിലെടുത്ത് ഇടുക്കിക്ക് പ്രത്യേക പരിഗണന നല്കും. ജനങ്ങളുടെ ആവശ്യങ്ങള് കണ്ടറിഞ്ഞ് പരാതികള്ക്ക് വേഗത്തില് പരിഹാരം കാണും.
1976ല് ഇടുക്കി വികസന അഥോറിറ്റിക്കായി ഏറ്റെടുത്ത ഭൂമി കൈമാറുന്നതുമായി ബന്ധപ്പെട്ട് ജില്ലാ പഞ്ചായത്തുമായുള്ള തര്ക്കം പരിഹരിക്കുന്നതിന് വനം, വൈദ്യുതിമന്ത്രിമാരുടെ നേതൃത്വത്തില് ജനപ്രതിനിധികളുടെയും ഉദ്യോഗസ്ഥരുടെയും യോഗം ചേരും. പുതിയ സെക്ഷന് ഓഫീസുകളും സബ് സ്റ്റേഷനുകളും ആരംഭിക്കണമെന്ന ആവശ്യവും പരിഗണിക്കും. പരിസ്ഥിതി ലോല മേഖലയില്നിന്ന് ജനവാസമേഖലകളും കൃഷിസ്ഥലങ്ങളും തോട്ടങ്ങളും ഒഴിവാക്കണമെന്ന സര്ക്കാര് നിലപാട് കൂടുതല് ശക്തമായി കേന്ദ്രത്തിനു മുന്നില് ഉന്നയിക്കുമെന്നും മന്ത്രി പറഞ്ഞു.
ഇടമലക്കുടിയില് വൈദ്യുതിയെത്താത്ത വീടുകളില് ഇതുള്പ്പെടെയുള്ള സൗകര്യങ്ങള് എത്തിക്കാന് സമഗ്ര വികസന പാക്കേജ് നടപ്പാക്കണമെന്ന് ഡീന് കുര്യാക്കോസ് എംപി യോഗത്തില് ആവശ്യപ്പെട്ടു. മൂന്നാര് മാട്ടുപ്പെട്ടി ഡാമിനു മുകളിലൂടെയുള്ള ട്രാഫിക് ബ്ലോക്ക് ഒഴിവാക്കാന് നടപടി സ്വീകരിക്കണം. കെഎസ്ഇബി. ക്വാര്ട്ടേഴ്സുകള് സംരക്ഷിക്കണമെന്നും എംപി ആവശ്യപ്പെട്ടു. വീടുകളില് സ്ഥാപിച്ച സോളാര് പാനലുകളില് നിന്ന് തിരിച്ച് വൈദ്യുതി ഗ്രിഡിലേക്ക് നല്കുമ്പോഴുള്ള സാങ്കേതികപ്രശ്നങ്ങള് പരിഹരിക്കണമെന്ന് ചീഫ് വിപ്പ് അപു ജോണ് ജോസഫ് ആവശ്യപ്പെട്ടു. വൈദ്യുതി പോസ്റ്റുകളുടെ സുരക്ഷ ഉറപ്പാക്കണം. മെറ്റീരിയല് മാനേജ്മെന്റ് കാര്യക്ഷമമാക്കണമെന്നും അദ്ദേഹം പറഞ്ഞു.
ഓണത്തോടനുബന്ധിച്ച് പത്തു ദിവസം ഇടുക്കി ഡാം തുറന്നുകൊടുക്കുന്നത് ഓണത്തിനു ശേഷവും തുടരണമെന്ന് റോയ് കെ. പൗലോസ് എംഎല്എ ആവശ്യപ്പെട്ടു. നിര്മലസിറ്റി സബ് സ്റ്റേഷന് നിര്മാണവുമായി ബന്ധപ്പെട്ട് പട്ടയമുള്ളവര്ക്കും ഇല്ലാത്തവര്ക്കും ഒരേ നഷ്ടപരിഹാരം നല്കണം. 16 കോടി ചെലവില് നടപ്പാക്കിയ ആമപ്പാറ സോളാര് പ്ലാന്റ് പദ്ധതി കാടുപിടിച്ചുകിടക്കുകയാണെന്ന് സേനാപതി വേണു എംഎല്എ അറിയിച്ചു. ആനയിറങ്കല് ഡാമില് ബോട്ടിംഗ് പുനരാരംഭിക്കണമെന്നും കല്ലാര് ഡാമില് ചെളിയും എക്കലും നീക്കം ചെയ്യണമെന്നും എംഎല്എ ആവശ്യപ്പെട്ടു.
വാഗമണ്ണില് പുതിയ സെക്ഷന് ഓഫീസ് ആരംഭിക്കണമെന്ന് സിറിയക് തോമസ് എംഎല്എ ആവശ്യപ്പെട്ടു. കട്ടപ്പന നഗരസഭാ ചെയര്മാന് ജോയി വെട്ടിക്കുഴി, തൊടുപുഴ നഗരസഭാ ചെയര്പേഴ്സണ് സാബിറ ജലീല്, ജില്ലാ കളക്ടര് ഡോ. ദിനേശന് ചെറുവാട്ട്, ജനറേഷന് ഇലക്ട്രിക്കല് ആന്ഡ് സിവില് വിഭാഗം ഡയറക്ടര് എം.പി. രാജന് തുടങ്ങിയവര് പങ്കെടുത്തു.
ഇടുക്കി ഡാമും മൂലമറ്റം പവര് ഹൗസും മന്ത്രി സന്ദര്ശിച്ചു
ഇടുക്കി: മന്ത്രി സണ്ണി ജോസഫ് മൂലമറ്റം പവര് ഹൗസ്, ഇടുക്കി ഡാം എന്നിവിടങ്ങളില് സന്ദര്ശനം നടത്തി. മൂലമറ്റം പവര് ഹൗസിലെ രക്തസാക്ഷി മണ്ഡപത്തില് പുഷ്പചക്രം അര്പ്പിച്ചു. റോയ് കെ. പൗലോസ് എംഎല്എയും മന്ത്രിയോടൊപ്പമുണ്ടായിരുന്നു. പവര് ഹൗസിന്റെ പ്രവര്ത്തനങ്ങള് മന്ത്രി നേരില്കണ്ട് വിലയിരുത്തി. ജനറേഷന് ഇലക്ട്രിക്കല് ആന്ഡ് സിവില് വിഭാഗം ഡയറക്ടര് രാജന് എംപി, ചീഫ് എന്ജിനിയർ അനില് കുമാര് ജി, മധ്യമേഖലാ വിതരണ വിഭാഗം ചീഫ് എന്ജിനിയര് കെ. ദിനേശ്, ഡപ്യൂട്ടി ചീഫ് എന്ജിനിയര് എം. പാര്വതി എന്നിവര് പവര് ഹൗസിന്റെ പ്രവര്ത്തനങ്ങള് വിശദീകരിച്ചു.
District News
ഇരിട്ടി: വെല്ലുവിളികളും പ്രതിസന്ധികളും അതിജീവിച്ച് മണ്ണിൽ പണിയെടുക്കുന്ന കർഷകരെ ചേർത്തുപിടിക്കുകയും അവരെ സമൂഹത്തിന് മാതൃകയാക്കുകയും വേണമെന്ന് വൈദ്യുതി മന്ത്രി സണ്ണി ജോസഫ്. കാർഷിക വികസന കർഷക ക്ഷേമ വകുപ്പും ആറളം ഗ്രാമപഞ്ചായത്തും കൃഷിഭവനും ചേർന്ന് എടൂരിൽ സംഘടിപ്പിച്ച കർഷകദിനാഘോഷത്തിന്റെ ജില്ലാതല ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി.
വന്യമൃഗശല്യം, കാലാവസ്ഥാ വ്യതിയാനം, പ്രകൃതിക്ഷോഭം, കാർഷിക ഉത്പന്നങ്ങളുടെ വിലത്തകർച്ച തുടങ്ങിയവ കർഷകർ നേരിടുന്ന പ്രധാന പ്രതിസന്ധികളാണ്. ഇത്തരം പ്രതിസന്ധികളിൽനിന്ന് കർഷകരെ കൈപിടിച്ചുയർത്തുന്നതിനുള്ള കർമപദ്ധതികൾക്കാണ് സർക്കാർ തുടക്കം കുറിച്ചിരിക്കുന്നതെന്ന് മന്ത്രി പറഞ്ഞു.
പ്രകൃതിക്ഷോഭത്തിൽ കൃഷിനാശം സംഭവിച്ച കർഷകർക്കുള്ള നഷ്ടപരിഹാരം 25 ശതമാനമായി ഉയർത്തിയത് ഇതിന്റെ തുടക്കമാണ്. വന്യമൃഗശല്യം സൃഷ്ടിക്കുന്ന ദുരിതം നേരിട്ട് മനസിലാക്കുന്നതിനാണ് മന്ത്രിതല സംഘം ആറളം ഫാം സന്ദർശിച്ചതെന്നും സണ്ണി ജോസഫ് പറഞ്ഞു. എല്ലാവർക്കും സർക്കാർ ജോലി ലഭ്യമാകണമെന്നില്ല. അതിനാൽ കാർഷിക മേഖലയെ ശാസ്ത്രീയമായി പ്രയോജനപ്പെടുത്തി സ്വയംപര്യാപ്തമായ ജീവിതരീതി വളർത്തിയെടുക്കണമെന്നും മന്ത്രി പറഞ്ഞു.
ആറളം ഗ്രാമപഞ്ചായത്ത് പ്രസിഡന്റ് വി. ശോഭ അധ്യക്ഷത വഹിച്ചു.
കൃഷി അസിസ്റ്റന്റ് ഡയറക്ടർ പി.ടി. സന്ധ്യ, ഡെപ്യൂട്ടി ഡയറക്ടർ സീമ സഹദേവൻ, പഞ്ചായത്ത് വൈസ് പ്രസിഡന്റ് ജിമ്മി അന്തിനാട്ട്, സ്റ്റാൻഡിംഗ് കമ്മിറ്റി അധ്യക്ഷരായ റഹിയാനത്ത് സുബി, രജിത മാവില, ജോർജ് ആലാംപള്ളി, ബ്ലോക്ക് പഞ്ചായത്ത് അംഗങ്ങളായ കെ. വേലായുധൻ, ഷിജി നടുപ്പറമ്പിൽ, കൃഷി അസിസ്റ്റന്റ് എസ്.ആർ. സൂരജ്, ഗ്രാമപഞ്ചായത്ത് അംഗങ്ങൾ, ജനപ്രതിനിധികൾ തുടങ്ങിയവർ പങ്കെടുത്തു. കർഷകോത്തമ അവാർഡ് ജേതാവ് പി.വി. അനീഷ് ക്ലാസെടുത്തു.
ജില്ലയിലെ മികച്ച വനിതാ കർഷകയായി തെരഞ്ഞെടുക്കപ്പെട്ട കെ.വി. സിമിയെയും മികച്ച കർഷകരായ നാരായണൻ കുറിഞ്ഞേരി, ഇ.ടി. ജോസഫ്, ജെസി റെജി ഉമ്മിക്കുഴിയിൽ, അനീഷ് ജോസഫ്, രാധാമണി പുതുകുളങ്ങര, സി.സി. കേളു, പി.ടി. മൈക്കിൾ പൊടിമറ്റത്തിൽ, റജീന തൊടിയിൽ, സി.ജെ. സ്കറിയ, ജോസഫ് വലിയപറമ്പിൽ, സരോജിനി ബാബു, അഡോൺ ബിജു എന്നിവരെയും ഒരുമ ജിഎൽജി ഗ്രൂപ്പ് വെള്ളരിവയൽ, ഗ്രീൻസ് കൃഷിക്കൂട്ടം പൂതക്കുണ്ട് എന്നിവരെയും അനുമോദിച്ചു.
District News
കണ്ണൂർ: പോരാട്ടങ്ങളിലൂടെ നാം നേടിയെടുത്ത സ്വാതന്ത്ര്യവും ഭരണഘടനയും ഉയര്ത്തിപ്പിടിക്കുന്ന മൂല്യങ്ങള് കാത്തുസൂക്ഷിക്കാനും അവ ശക്തമായി മുന്നോട്ടുകൊണ്ടുപോവാനും സ്വാതന്ത്യദിന ചിന്തകള് നമ്മുക്ക് ശക്തിപകരുമെന്ന് മന്ത്രി സണ്ണി ജോസഫ്. എണ്പതാമത് സ്വാതന്ത്ര്യദിനാഘോഷ ങ്ങളുടെ ഭാഗമായി കണ്ണൂർ കളക്ടറേറ്റ് മൈതാനിയില് നടന്ന സ്വാതന്ത്ര്യദിന പരേഡില് ദേശീയപതാക ഉയര്ത്തി അഭിവാദ്യം സ്വീകരിച്ചു പ്രസംഗിക്കുകയായിരുന്നു മന്ത്രി.
രാജ്യത്ത് വിഘടനവാദവും ഭീകരവാദവും വര്ഗീയവാദവും ശക്തിപ്പെടുമ്പോള് രാജ്യസ്നേഹത്തിന്റെ കൊടിക്കീഴില് ഒന്നിച്ചുനില്ക്കാന് നമ്മുക്ക് കഴിയണം. അക്രമരഹിതവും സത്യഗ്രഹ മാര്ഗത്തിലുള്ള തുമായ ഇന്ത്യന് സ്വാതന്ത്ര്യസമരത്തിന്റെ ചരിത്രം ലോകചരിത്രത്തില് തങ്കലിപികളാല് എഴുതപ്പെട്ട വയാണ്. രാഷ്ട്രപിതാവ് മഹാത്മാ ഗാന്ധിജിയും രാഷ്ട്ര ശില്പി പണ്ഡിറ്റ് നെഹ്റുവും ഉള്പ്പെടെ അറിയപ്പെടുന്നവരും അറിയപ്പെടാത്തവരുമായ സ്വാതന്ത്ര്യപ്പോരാളികളുടെ ത്യാഗത്തിന്റേയും സമര്പ്പണത്തിന്റേയും ഫലമായാണ് നമ്മുടെ രാജ്യം സ്വാതന്ത്ര്യം സ്വായത്തമാക്കിയത്.
ഈ സ്വാതന്ത്ര്യം രാജ്യത്തിന്റെ നന്മയ്ക്കും പുരോഗതിക്കുമായി വിനിയോഗിക്കുകയെന്ന ലക്ഷ്യത്തോടെയാണ് ജനാധിപത്യവും മതേതരത്തവും വിഭാവന ചെയ്യുന്ന മാതൃകാപരമായ ഒരു ഭരണഘടന നാം സ്വന്തമാക്കിയത്. ലോകത്തിനു മുമ്പില് ഇന്ത്യ തലയെടുപ്പുള്ള ജനാധിപത്യ മതേതര പരമാധികാര രാജ്യമായി നിലനില്ക്കണമെങ്കില് നാം നേടിയെടുത്ത വിലപ്പെട്ട സ്വാതന്ത്ര്യം കാത്തുസൂക്ഷിക്കേ ണ്ടതുണ്ട്. ജനങ്ങളുടെ ജീവിത സൗകര്യങ്ങള് വര്ധിപ്പിക്കാനാവണം. ശാസ്ത്ര സാങ്കേതിക രംഗങ്ങളിലും വാണിജ്യ- വ്യവസായ-കാര്ഷിക- ആരോഗ്യ- വിദ്യാഭ്യാസ മേഖലകളിലും വന് കുതിച്ചുചാട്ടമാണ് രാജ്യം ഇതിനകം കൈവരിച്ചത്. കൂടുതല് വലിയ ഉയരങ്ങളിലേക്ക് രാജ്യത്തെ നയിക്കാനുള്ള പ്രതിജ്ഞ പുതുക്കാനുള്ള അവസരമാണിതെന്നും മന്ത്രി പറഞ്ഞു.
ഇന്നലെ രാവിലെ ഒന്പതോടെ ദേശീയ പതാക ഉയര്ത്തിയ മന്ത്രി പരേഡ് പരിശോധിച്ചു. തുടര്ന്ന് നടന്ന വര്ണശബളമായ മാര്ച്ച് പാസ്റ്റില് വിവിധ വിഭാഗങ്ങളിലായി 24 പ്ലാറ്റൂണുകള് അണിനിരന്നു. തുടര്ന്ന് റിവ്യൂ ഓര്ഡര് മാര്ച്ച് വിശിഷ്ടാതിഥിക്ക് അഭിവാദ്യം അര്പ്പിച്ചു. പരേഡില് മികച്ച പ്രകടനം കാഴ്ചവച്ച വിവിധ വിഭാഗങ്ങളിലെ ജേതാക്കള്ക്ക് മന്ത്രി സമ്മാനം വിതരണം ചെയ്തു.
ജില്ലാ കളക്ടര് പി.വിഷ്ണുരാജ്, സിറ്റി പോലിസ് കമ്മീഷണര് ബി.വി. വിജയ ഭരത് റെഡ്ഡി, റൂറല് പോലിസ് മേധാവി ഉമേഷ് ഗോയല് എന്നിവരും പരേഡിന് അഭിവാദ്യം അര്പ്പിച്ചു. മേയര് പി. ഇന്ദിര, എംഎല്എമാരായ ടി.ഒ. മോഹനന്, കെ.വി. സുമേഷ്, ജില്ലാ പഞ്ചായത്ത് പ്രസിഡന്റ് ബിനോയ് കുര്യന്, അസിസ്റ്റന്റ് കളക്ടര് എസ്. സ്വാതി, മുന് മന്ത്രി കടന്നപ്പള്ളി രാമചന്ദ്രന്, കോര്പറേഷന് വികസനകാര്യ സ്റ്റാന്ഡിംഗ് കമ്മിറ്റി ചെയര്പേഴ്സണ് ലിഷ ദീപക്, എഡിഎം പി.എന്. പുരുഷോത്തമന്, എച്ച്എസ് രാജേഷ് ഖന്ന, ജനപ്രതിനിധികള്, വിവിധ വകുപ്പുകളിലെ ഉദ്യോഗസ്ഥര്, അധ്യാപകര്, പൊതുജനങ്ങള് തുടങ്ങിയവര് സ്വാതന്ത്ര്യദിനാഘോഷ ചടങ്ങില് പങ്കാളികളായി.
മാങ്ങാട്ട്പറമ്പ് കെഎപി നാലാം ബറ്റാലിയന് , കണ്ണൂര് സിറ്റി പോലീസ്, കണ്ണൂര് റൂറല് ജില്ലാ പോലീസ്, വനിതാ പോലീസ്, എക്സൈസ്, വനംവകുപ്പ്, എന്സിസി-4, എസ്പിസി-6, സ്കൗട്ട്-2, ഗൈഡ്സ്-2, റെഡ് ക്രോസ്-4 എന്നിങ്ങനെ 24 പ്ലറ്റൂണുകളാണ് പരേഡില് അണിനിരന്നത്. മട്ടന്നൂര് എയര്പോര്ട്ട് പോലീസ് ഇന്സ്പെക്ടര് കെ.ആര്. ബിജുവായിരുന്നു പരേഡ് കമാൻഡര്. ജില്ലാ ഹെഡ്ക്വാര്ട്ടേഴ്സ് റിസര്വ് സബ് ഇന്സ്പെക്ടര് കെ സുജിത്ത് കുമാര് സെക്കൻഡ് ഇന് കമാന്ഡായി. ഡിഎസ്സി, ആര്മി പബ്ലിക് സ്കൂള്, കടമ്പൂര് എച്ച്എസ്എസ് എന്നിവയുടെ ബാന്ഡുകള് പരേഡിന് താളക്കൊഴുപ്പേകി. ജില്ലയിലെ സംഗീത അധ്യാപകര് ചേര്ന്നാലപിച്ച ദേശഭക്തിഗാനത്തോടെ ആഘോഷച്ചടങ്ങുകള് സമാപിച്ചു.
സേനാവിഭാഗത്തില് മാങ്ങാട്ടുപറമ്പ് കെപി നാലാം ബറ്റാലിയന്, എന്സിസി സീനിയര് വിഭാഗത്തില് എസ്എന് കോളജ്, എന്സിസി ജൂണിയര് വിഭാഗത്തില് ആര്മി പബ്ലിക് സ്കൂള്, എസ്പിസി വിഭാഗത്തില് അഞ്ചരക്കണ്ടി ഹയര്സെക്കന്ഡറി സ്കൂള്, സ്കൗട്ട് വിഭാഗത്തില് എസ്എന് ട്രസ്റ്റ് തോട്ടട, ഗൈഡ്സ് വിഭാഗത്തില് കടമ്പൂര് ഹയര് സെക്കന്ഡറി സ്കൂള്, റെഡ് ക്രോസ് ബോയ്സ് വിഭാഗത്തില് കാടാച്ചിറ ഹയര് സെക്കന്ഡറി സ്കൂള്, റെഡ് ക്രോസ് ഗേള്സ് വിഭാഗത്തില് കൂടാളി ഹയര്സെക്കന്ഡറി സ്കൂള് എന്നിവ മികച്ച പ്ലറ്റൂണുകളായി തെരഞ്ഞെടുക്കപ്പെട്ടു.
District News
ഇരിട്ടി: സംസ്ഥാനത്ത് മഴക്കെടുതി നേരിടുന്നതിൽ സംസ്ഥാന സർക്കാരും ജില്ലാ, പ്രാദേശിക ഭരണകൂടങ്ങളും വിവിധ വകുപ്പുകളും സന്നദ്ധസംഘടനകളും ജനങ്ങളും ഏകോപനത്തോടെ നടത്തിയ ഇടപെടലുകൾ ഫലപ്രദമായിരുന്നുവെന്ന് വൈദ്യുതി മന്ത്രി സണ്ണി ജോസഫ്. മഴക്കെടുതിയെ തുടർന്ന് ആകെ 4,80,614 വൈദ്യുതി കണക്ഷനുകളാണ് തകരാറിലായത്. ഇതിൽ 92 ശതമാനവും വളരെ വേഗത്തിൽ പുനഃസ്ഥാപിച്ചതായും ഇനി 35,118 കണക്ഷനുകൾ മാത്രമാണ് പുനഃസ്ഥാപിക്കാനുള്ളതെന്നും മന്ത്രി ഇരിട്ടിയിലെ വസതിയിൽ നടത്തിയ പത്രസമ്മേളനത്തിൽ അറിയിച്ചു. 2,892 ട്രാൻസ്ഫോമറുകൾക്ക് തകരാറുണ്ടായി.
വെള്ളം ഇറങ്ങിയതിനെത്തുടർന്ന് ഇതിൽ 2,600 ട്രാൻസ്ഫോമറുകൾ അറ്റകുറ്റപ്പണി പൂർത്തിയാക്കി ചാർജ് ചെയ്തിട്ടുണ്ട്. 1,872 വൈദ്യുതി തൂണുകൾക്കും നാശനഷ്ടമുണ്ടായതായും അവ അതിവേഗം പുനഃസ്ഥാപിച്ചുവരികയാണെന്നും അദ്ദേഹം പറഞ്ഞു. വൈദ്യുതി മേഖലയിൽ ഏറ്റവും വലിയ നാശനഷ്ടം പത്തനംതിട്ട ജില്ലയിലും തുടർന്ന് കണ്ണൂർ ജില്ലയിലുമാണുണ്ടായത്. കണ്ണൂരിൽ ശ്രീകണ്ഠപുരം സർക്കിളിലെ ചെറുപുഴ ഉൾപ്പെടെയുള്ള പ്രദേശങ്ങളെയും ഇരിട്ടി സർക്കിളിലെ മലയോര മേഖലകളെയും കൂടുതലായി ബാധിച്ചു.
ഈ മേഖലകളിൽ വൈദ്യുതി വിതരണം പൂർണമായി പുനഃസ്ഥാപിക്കുന്നതിനുള്ള പ്രവർത്തനങ്ങൾ പുരോഗമിക്കുകയാണെന്നും മന്ത്രി വ്യക്തമാക്കി. സംസ്ഥാനത്തെ ജലവൈദ്യുത പദ്ധതികളുള്ള അണക്കെട്ടുകളിലെ ആകെ ജലനിരപ്പ് നിലവിൽ 42.5 ശതമാനമാണ്. ഇടുക്കി അണക്കെട്ടിലെ ജലനിരപ്പ് 30 ശതമാനത്തിൽ നിന്ന് 40 ശതമാനമായി ഉയർന്നിട്ടുണ്ട്. കഴിഞ്ഞവർഷം ഇതേ സമയത്ത് ഇത് 73 ശതമാനമായിരുന്നുവെന്നും മന്ത്രി ചൂണ്ടിക്കാട്ടി.
വീടുകളുടെ നാശനഷ്ടം: മാനദണ്ഡങ്ങൾ പരിഷ്കരിക്കണമെന്ന് മന്ത്രി
ഇരിട്ടി: മഴക്കെടുതിയിൽ തകർന്ന വീടുകളുടെ നാശനഷ്ടം വിലയിരുത്തുന്നതിനുള്ള നിലവിലെ മാനദണ്ഡങ്ങൾ പരിഷ്കരിക്കണമെന്ന് മുഖ്യമന്ത്രിയോട് ആവശ്യപ്പെട്ടതായി മന്ത്രി സണ്ണി ജോസഫ്. 2018-ലെ പ്രളയകാലത്തേതിന് സമാനമായ രീതിയിൽ കരിക്കോട്ടക്കരി ഉൾപ്പെടെയുള്ള പ്രദേശങ്ങളിൽ മണ്ണിടിഞ്ഞ് വീടുകൾക്ക് ഗുരുതരമായ കേടുപാടുകൾ സംഭവിച്ച സാഹചര്യമാണ്. ഇത്തരം വീടുകളും പൂർണ നാശനഷ്ട വിഭാഗത്തിൽ ഉൾപ്പെടുത്തി നഷ്ടപരിഹാരം നൽകേണ്ടതുണ്ടെന്നും മന്ത്രി പറഞ്ഞു.
തകർന്ന പാലങ്ങൾ എത്രയും വേഗം പുനർനിർമിക്കണമെന്നും മുഖ്യമന്ത്രിയോട് ആവശ്യപ്പെട്ടിട്ടുണ്ടെന്ന് മന്ത്രി പറഞ്ഞു. പുഴകളിൽ മണ്ണടിഞ്ഞ് ഒഴുക്ക് തടസപ്പെടുന്ന സാഹചര്യം ഗൗരവമുള്ളതാണെന്നും ഇത് അടിയന്തരമായി പരിഹരിക്കേണ്ട വിഷയമാണെന്നും അദ്ദേഹം കൂട്ടിച്ചേർത്തു.
District News
പാലക്കാട്: ജില്ലയിലെ വൈദ്യുതി ഉത്പാദന- വിതരണ- പ്രസരണ മേഖലയിലെ വിഷയങ്ങൾ പരിഹരിക്കുന്നതിന് മണ്ഡലാടിസ്ഥാനത്തില് സമിതി രൂപീകരിക്കണമെന്നു വൈദ്യുതിമന്ത്രി സണ്ണി ജോസഫ്. വൈദ്യുതി മേഖലയിലെ പ്രവര്ത്തനങ്ങള് വിലയിരുത്താന് കെപിഎം റെസിഡന്സിയില് ചേര്ന്ന അവലോകന യോഗത്തില് അധ്യക്ഷനായ മന്ത്രി തദ്ദേശ സ്ഥാപനതലത്തിലും സമിതികള് രൂപീകരിക്കണമെന്നും നിര്ദേശം നല്കി.
കെഎസ്ഇബി ഉദ്യോഗസ്ഥര് മുന്കൈയെടുത്ത് രണ്ടോ മൂന്നോ മാസത്തില് യോഗം ചേരണം. എംഎല്എ ചെയര്പേഴ്സണും എക്സിക്യൂട്ടിവ് എന്ജിനീയര് കണ്വീനറുമായ സമിതി മണ്ഡലതലത്തിലെ പ്രവൃത്തികൾ കൃത്യമായി വിലയിരുത്തണമെന്നും ആവശ്യപ്പെട്ടു. അപകടങ്ങളുണ്ടാകാതിരിക്കാൻ ജനപ്രതിനിധികളുടെ സഹായത്തോടെ ഉദ്യോഗസ്ഥര് ജനങ്ങള്ക്ക് അവബോധം നല്കണമെന്നും നിര്ദേശിച്ചു. കഞ്ചിക്കോട് വ്യവസായ മേഖലയിലെ പ്രശ്നങ്ങള് പരിഹരിക്കുന്നതിനുള്ള പദ്ധതിക്ക് അംഗീകാരം ലഭ്യമാക്കുന്നതിന് നടപടി സ്വീകരിക്കും. കടമ്പഴിപ്പുറം സാമൂഹികാരോഗ്യ കേന്ദ്രത്തിലെ എക്സ്റേ യൂണിറ്റ് പ്രവര്ത്തിപ്പിക്കുന്നതിനുള്ള തടസങ്ങൾക്കു പരിഹാരം കാണും. പറമ്പിക്കുളത്തെ വൈദ്യുതിലഭ്യത ഉറപ്പാക്കാന് നടപടി സ്വീകരിക്കും.
വൈദ്യുതി പ്രസരണത്തിന് പുതിയ സബ് സ്റ്റേഷനുകള് നിര്മിക്കുമെന്നും സെക്്ഷന് ഓഫീസുകളുടെ വിഭജനം പരിഗണിക്കുമെന്നും മന്ത്രി പറഞ്ഞു. നിലവില് 300 കോടി രൂപയുടെ പ്രവൃത്തികള് ജില്ലയിൽ പുരോഗമിക്കുകയാണെന്നും മാര്ച്ചില് പൂര്ത്തിയാക്കാനാണ് ലക്ഷ്യമെന്നും കെഎസ്ഇബി അധികൃതര് അറിയിച്ചു.
എംഎല്എമാരായ സുമേഷ് അച്യുതന്, എ. പ്രഭാകരന്, കെ. പ്രേംകുമാര്, പി. മമ്മിക്കുട്ടി, കെ. പ്രേമന്, ടി.എം. ശശി, കെഎസ്ഇബി ഡയറക്ടര് എം.പി. രാജന്, കോഴിക്കോട് ഡിസ്ട്രിബ്യൂഷന് നോര്ത്ത് ചീഫ് എന്ജിനീയര് മായ തമ്പാന്, വിവിധ ട്രേഡ് യൂണിയന് പ്രതിനിധികള് തുടങ്ങിയവര് പ്രസംഗിച്ചു.
Kerala
തൃശൂര്: ദേവസ്വം സ്പെഷല് പ്ലീഡര് നിയമനം ദേവസ്വംമന്ത്രിയാണ് തീരുമാനിച്ചതെന്നും മുഖ്യമന്ത്രിയും അദ്ദേഹവും അക്കാര്യം വിശദീകരിച്ചിട്ടുണ്ടെന്നും വൈദ്യുതി മന്ത്രി സണ്ണി ജോസഫ് പറഞ്ഞു.
മന്ത്രി കെ. മുരളീധരന് നേരത്തേ പറഞ്ഞതിനു വിരുദ്ധമായാണ് മന്ത്രി പ്രതികരിച്ചത്. മുഖ്യമന്ത്രിക്കു വിഷയം വിട്ടുകൊടുത്തെന്നായിരുന്നു ദേവസ്വം മന്ത്രിയുടെ നിലപാട്.
വിഷയത്തില് അവര് ഇടപെടുന്നതിനാല് കൂടുതല് പ്രതികരണത്തിനില്ല. ഏതെങ്കിലും കാര്യങ്ങള് ശ്രദ്ധയില്പെടുത്തിയാല് പരിശോധിക്കും. വീഴ്ചയോ അപാകതയോ ഉണ്ടെന്നുതോന്നിയാല് പരിഹരിക്കും.
സര്ക്കാർകാര്യങ്ങള് പാര്ട്ടിതലത്തില് ചര്ച്ചചെയ്യാറില്ല, സര്ക്കാര്തലത്തിലാണ് അതൊക്കെ പരിശോധിക്കുക. നിയമനങ്ങളില് ജാഗ്രത പാലിക്കുമെന്നും സണ്ണി ജോസഫ് വ്യക്തമാക്കി.
District News
ഇരിട്ടി: പഴശിപദ്ധതിയിൽ നിന്നുള്ള അധിക ജലം ഉപയോഗിച്ച് പഴശി സാഗർ മിനി ജല വൈദ്യുത പദ്ധതിയിൽ നിന്നുള്ള ഉത്പാദനം അടുത്ത വർഷം ആരംഭിക്കുമെന്ന് മന്ത്രി സണ്ണി ജോസഫ്. 2027 മേയ് 31നകം പദ്ധതി കമ്മീഷൻ ചെയ്യുമെന്നും ഇതുമായി ബന്ധപ്പെട്ട നിർദേശം ബന്ധപ്പെട്ട ഉദ്യോഗസ്ഥർക്കും കരാറുകാർക്കും നൽകിയിട്ടുണ്ടെന്നും മന്ത്രി പറഞ്ഞു.
പദ്ധതി പ്രദേശത്തെ നിർമാണ പ്രവർത്തനങ്ങൾ വിലയിരുത്തിയശേഷം നടന്ന അവലോകന യോഗത്തിലാണ് മന്ത്രി ഇക്കാര്യം അറിയിച്ചത്. പദ്ധതിയുടെ ആകെ സംഭരണശേഷിയായ 26.52 മീറ്ററിൽ നിന്ന് 24 മീറ്റർ വരെ സംഭരണ ശേഷി നിലനിർത്തി കുടിവെള്ള പദ്ധതിയെ ബാധിക്കാത്ത തരത്തിലാണ് വൈദ്യുതി ഉത്പാദനം നടത്തുക. ഉത്പാദനത്തിന് ശേഷമുള്ള വെള്ളം വളപട്ടണം പുഴയിലേക്ക് ഒഴുക്കിവിടുമെന്നും മന്ത്രി പറഞ്ഞു.
പദ്ധതിയുടെ പൂർത്തീകരണം ഒന്നോ രണ്ടോ മാസം വൈകിയാൽ ഒരു സീസണിലെ ഉത്പാദനം പൂർണമായും നഷ്ടപ്പെടുന്ന സാഹചര്യം ഉണ്ടാകും. പദ്ധതിയിലേക്കുള്ള നീരൊഴുക്കിനെയും കാലാവസ്ഥയെയും അടിസ്ഥാനമാക്കി മാത്രം പ്രവർത്തിക്കുന്ന പദ്ധതിയാണിത്. അതുകൊണ്ട് തന്നെ സമയബന്ധിതമായി നിർമാണം പൂർത്തിയാക്കും.
പദ്ധതിയിൽ നിന്ന് 7.5 മെഗാവാട്ട് വൈദ്യുതിയാണ് ഉത്പാദിപ്പിക്കുക. കാലവർഷത്തിൽ പഴശിയിൽ നിന്ന് വളപട്ടണം പുഴയിലേക്ക് ഒഴുക്കി വിടുന്ന വെള്ളം പ്രധാന തുരങ്കം വഴി മൂന്ന് തുരങ്കങ്ങളിലേക്ക് കടത്തി വിട്ട് 2.5 മെഗാവാട്ടിന്റെ മൂന്ന് യന്ത്രം പ്രവർത്തിപ്പിച്ചാണ് വൈദ്യുതി ഉത്പാദിപ്പിക്കുക.
പ്രധാന തുരങ്കത്തിന്റെയും ഉപ തുരങ്കങ്ങളുടെയും നിർമാണം പൂർത്തിയായിട്ടുണ്ട്. പവർഹൗസിന്റെ നിർമാണം 30 ശതമാനവും പൂർത്തിയായതായി ഉദ്യോഗസ്ഥർ മന്ത്രിയെ അറിയിച്ചു. സിവിൽ വർക്കിന് 56.91 കോടിയും മെക്കാനിക്കൽ ആൻഡ് ഇലക്ട്രിക്കൽ പ്രവൃത്തിക്ക് 57.87കോടിയുമാണ് ചെലവ് കണക്കാക്കിയിരിക്കുന്നത്.
വൈദ്യുതി ജനറേഷൻ വിഭാഗം ഡയറക്ടർ എം.പി. രാജൻ, ചീഫ് എൻജിനീയർ വി.വിനോദ്, ഡെപ്യൂട്ടി ചീഫ് എൻജിനീയർ ഇ.കെ. സിന്ധു, കെഎസ്ഇബി എക്സിക്യൂട്ടീവ് എൻജിനിയർ സി.കെ. അനിൽ,അസിസ്റ്റന്റ് എക്സിക്യൂട്ടീവ് എൻജിനിയർമാരായ മെഹറൂഫ്, അബ്ദുൾ കരീം, കെ. മണികണ്ഠൻ, ബി. ഷിബു എന്നിവരും സംബന്ധിച്ചു. പഴശി പദ്ധതിയിൽ നിന്നുള്ള 3.05 ഹെക്ടർ സ്ഥലം ഉപയോഗപ്പെടുത്തിയാണ് പദ്ധതി നടപ്പിലാക്കുന്നത്. പദ്ധതിയുടെ പ്രവർത്തനവുമായി ബന്ധപ്പെട്ട ജലസേചന വിഭാഗവും കെഎസ്ഇബി ബോർഡും ധാരാണാപത്രം ഒപ്പുവച്ചിരുന്നു.