NRI
ഷിക്കാഗോ: ഷിക്കാഗോ അന്താരാഷ്ട്ര വടംവലി മത്സരത്തിന്റെ പന്ത്രണ്ടാമത് ടൂർണമെന്റ് ഷിക്കാഗോയിൽ അരങ്ങേറുമ്പോൾ, അനൗൺസ്മെന്റിൽ അഗ്രഗണ്യരായ കമന്റേറ്റർമാരുടെ ഇടിമുഴക്കവും ഇത്തവണ വടംവലിക്കളത്തെ ആവേശഭരിതമാക്കും.
കമന്ററിയിലൂടെ വടംവലി പ്രേമികളുടെ ആവേശം വാനോളമുയർത്തുന്ന മൂവർസംഘം ഇത്തവണയും ഷിക്കാഗോ സോഷ്യൽ ക്ലബിന്റെ വടംവലിക്ക് ശബ്ദമാകുവാനായി എത്തുകയാണ്.
12 വർഷക്കാലമായി, ഷിക്കാഗോ വടംവലി മത്സരം ആരംഭിച്ചതു മുതൽ കമന്ററി സംഘത്തിന്റെ നെടുംതൂണായിരുന്ന സജി പുതൃക്കയിൽ, കുറെ വർഷങ്ങളായി ഷിക്കാഗോ സോഷ്യൽ ക്ലബിന്റെ വടംവലിയുടെയും നോർത്ത് അമേരിക്കയിലെ വിവിധ വടംവലി മത്സരങ്ങളുടെയും കമന്ററിക്ക് നേതൃത്വം നൽകിയ ഷിക്കാഗോ സോഷ്യൽ ക്ലബ് പ്രസിഡന്റ് റോണാൾഡ് പൂക്കുമ്പേൽ, അവരോടൊപ്പം കേരളത്തിലെ നിരവധി വടംവലി മത്സരങ്ങളിൽ കമന്ററി പറഞ്ഞ് കൈയടികൾ നേടിയ സിജിൽ രാജു എന്നിവരാണ് കമന്ററി ഗംഭീരമാക്കുവാൻ തയാറെടുക്കുന്നത്.
വടംവലിക്കളത്തിലെ ഓരോ നീക്കവും ആവേശവും കാണികളിലേക്ക് എത്തിച്ചുകൊണ്ട്, മത്സരത്തിന്റെ ചൂടും വീറും ഇരട്ടിയാക്കുന്ന ഈ മൂവർസംഘത്തിന്റെ ശബ്ദമുഴക്കം ഇത്തവണയും ഷിക്കാഗോയിലെ വടംവലി വേദിയിൽ ആവേശത്തിന്റെ ഇടിമുഴക്കമാകുമെന്നാണ് സംഘാടകരുടെ പ്രതീക്ഷ.
സെപ്റ്റംബർ ആറിന് ബെൻസൺവില്ലിലെ എനർജി സ്പോർട്സ് കോംപ്ലെക്സിൽ വച്ചാണ് വടംവലി മത്സരങ്ങൾ അരങ്ങേറുക. മത്സരം ആസ്വദിക്കുവാനും വിജയിപ്പിക്കുവാനും എല്ലാ വടംവലി പ്രേമികളെയും സ്വാഗതം ചെയ്യുന്നതായി ചെയർമാൻ സിറിയക് കൂവക്കാട്ടിൽ അറിയിച്ചു.
NRI
ഷിക്കാഗോ: ഷിക്കാഗോ സോഷ്യൽ ക്ലബിന്റെ ആഭിമുഖ്യത്തിൽ നടത്തപ്പെടുന്ന പന്ത്രണ്ടാമത് അന്താരാഷ്ട്ര വടംവലിയിൽ പ്രമുഖ സിനിമാ നടി അൻസിബ ഹസനും ഗായകൻ സുധീഷ് ശശികുമാറും മുഖ്യാതിഥികളായി പങ്കെടുക്കും.
അൻസിബ ഷിക്കാഗോയിലേക്ക് എത്തുന്നത് ഏറെ താത്പര്യത്തോടെയാണ് വടംവലി പ്രേമികളും സിനിമാ ആരാധകരും നോക്കി കാണുന്നത്. അതോടൊപ്പം നിരവധി സിനിമകളിലും സ്റ്റേജുകളിലും ഗാനങ്ങൾ ആലപിച്ചിട്ടുള്ള സുധീഷ് ശശികുമാർ കൂടി എത്തുന്നതോടെ വടംവലി മത്സരങ്ങൾ ആഘോഷങ്ങളുടെ കൂടി വേദിയാകും.
ഞായറാഴ്ച ഷിക്കാഗോ നഗരത്തിന്റെ പ്രാന്തപ്രദേശമായ ബെൻസൺ വില്ലിലെ എനർജി ഇൻഡോർ സ്പോർട്സ് കോംപ്ലക്സിലാണ് വടംവലി നടത്തപ്പെടുക.
ലോകത്തിന്റെ വിവിധ ഭാഗങ്ങളിൽ നിന്നായി 16 ടീമുകൾ ഇത്തവണത്തെ വടംവലി മതസരത്തിൽ പങ്കെടുക്കുവാൻ എത്തുമെന്ന് ഇതിനകം തന്നെ അറിയിച്ചിട്ടുണ്ട്.
ലോകത്തിലെ തന്നെ ഏറ്റവും വലിയ സമ്മാനത്തുക നൽകപ്പെടുന്ന ചിക്കാഗോ അന്താരാഷ്ട്ര വടംവലിയിൽ പങ്കെടുക്കുവാനായി നോർത്ത് അമേരിക്കയിലെ വിവിധ നഗരങ്ങളിൽ നിന്നും വടംവലി പ്രേമികൾ ഷിക്കാഗോയിലേക്ക് ഒഴുകിയെത്തുമെന്ന് ഉറപ്പായിട്ടുണ്ട്.
വടംവലി മത്സരം കാണികളിലേക്ക് ഒരു നവ്യാനുഭവമായി എത്തിക്കുവാനായി വിപുലമായ തയാറെടുപ്പുകളാണ് നടത്തിവരുന്നത്.
പാർക്കിംഗ് സൗകര്യങ്ങളും വിശാലമായ ഇൻഡോർ സ്റ്റേഡിയവും മികച്ച ഓഡിയോ വിഷ്വൽ സംവിധാനങ്ങളും സ്വാദിഷ്ടമായ ഭക്ഷണ സൗകര്യങ്ങളുമൊക്കെയായി തയാറെടുപ്പുകൾ പൂർത്തിയായി വരുന്നതായി സംഘാടക സമിതിക്ക് വേണ്ടി ചെയർമാൻ സിറിയയ്ക്ക് കൂവക്കാട്ടിൽ അറിയിച്ചു.
NRI
ഹൂസ്റ്റണ്: ആവേശത്തിമിര്പ്പിന്റെ പോര്ക്കളത്തില് കാരിരുമ്പിന്റെ കരുത്തുമായി കാലുറപ്പിച്ച് കമ്പക്കയറില് സിംഹഗര്ജനത്തോടെ ആഞ്ഞുവലിച്ച് ആയിരങ്ങളുടെ ആവേശമായിമാറിയ കോട്ടയം ബ്രദേഴ്സ് കാനഡ ബ്ലൂ, ടെക്സസ് ഇന്റര്നാഷണല് സ്പോര്ട്സ് ആൻഡ് ആര്ട്സ് ക്ലബിന്റെ (ടിസാക്ക്) അന്താരാഷ്ട്ര വടംവലി മത്സരത്തില് തുടർച്ചയായ അഞ്ചാം തവണയും ചാമ്പ്യന്മാരായി.
മെയ്ക്കരുത്തും മനക്കരുത്തും സ്വന്തമാക്കിയ ഗ്ലാഡിയേറ്റേഴ്സ് കാനഡ റണ്ണറപ്പായി ട്രോഫി ഉയര്ത്തി. കായികശേഷി പരീക്ഷിച്ച് മൂന്നാം സ്ഥാനം കോട്ടയം ബ്രദർസ് കാനഡ ബ്ലാക്ക് ടീമാണ് സ്വന്തമാക്കിയത്. നാലാം സ്ഥാനത്ത് തോടുകൻസ് ന്യൂയോർക് കിംഗ്സ് ടീം നേടി.
ശനിയാഴ്ച രാവിലെ രാവിലെ മുതല് രാത്രി 10ന് വരെ ഫോര്ട്ബെന്ഡ് കൗണ്ടി എപ്പിസെന്ററിലായിരുന്നു മല്ലന്മാര് ചേരിതിരിഞ്ഞ് ചുവടുറപ്പിച്ച് താളത്തിനൊത്ത് കയറില് പിടിമുറുക്കിയ വടംവലിയുടെ പെരുംപോരാട്ടം അരങ്ങേറിയത്.
NRI
മെയ്ഡ്സ്റ്റോൺ: മെയ്ഡ്സ്റ്റോൺ മലയാളി അസോസിയേഷൻ (എംഎംഎ) ആദ്യമായി സംഘടിപ്പിക്കുന്ന ഓൾ യുകെ വടംവലി മത്സരം ഞായറാഴ്ച ഇംഗ്ലണ്ടിലെ കെന്റിലുള്ള മെയ്ഡ്സ്റ്റോൺ ലിഷർ സെന്ററിൽ (Mote Park, ME15 7RN) നടക്കും.
യുകെയുടെ വിവിധ ഭാഗങ്ങളിൽ നിന്നായി ഇരുപതോളം പ്രമുഖ ടീമുകൾ മാറ്റുരയ്ക്കുന്ന വടംവലി മാമാങ്കത്തിനാണ് മെയ്ഡ്സ്റ്റോൺ സാക്ഷിയാകുന്നത്. രാവിലെ ഒമ്പതിന് ടീമുകളുടെ രജിസ്ട്രേഷൻ ആരംഭിക്കും.
തുടർന്ന് 10ന് ആവേശകരമായ മത്സരങ്ങൾക്ക് തുടക്കമാകും. ആഷ്ഫോർഡ് എംപി സോജൻ ജോസഫ് ചടങ്ങിൽ മുഖ്യാതിഥിയായിരിക്കും. ചലച്ചിത്ര താരം നന്ദു മത്സരങ്ങൾ ഔദ്യോഗികമായി ഉദ്ഘാടനം ചെയ്യും.
ആകർഷകമായ സമ്മാനങ്ങൾ
വിജയികളെ കാത്ത് കാഷ് അവാർഡുകളും ട്രോഫികളുമാണ് ഒരുക്കിയിരിക്കുന്നത്:
ഇതിനുപുറമെ മികച്ച പുള്ളർ, ഫ്രണ്ട്, ബാക്ക്, എമർജിംഗ് ടീം, സ്പിരിറ്റ് ഓഫ് ദി ഗെയിം എന്നീ പ്രത്യേക അവാർഡുകളും നൽകും.
കലാപരിപാടികളും തത്സമയ സംപ്രേഷണവും
കാണികൾക്കായി ഒരു ദിവസം മുഴുവൻ ആഘോഷമാക്കാവുന്ന രീതിയിലാണ് പരിപാടികൾ ക്രമീകരിച്ചിരിക്കുന്നത്. രാവിലെ 10 മുതൽ ലൈവ് ഇന്ത്യൻ ഫുഡ് കോർട്ടും ലഘുഭക്ഷണശാലകളും പ്രവർത്തിക്കും.
സ്റ്റേജിൽ ലൈവ് ഡിജെ, ഡാൻസ്, മ്യൂസിക് എന്നിവ അരങ്ങേറും. കുട്ടികൾക്കായി ഫേസ് പെയിന്റിംഗും പ്രത്യേകം സജ്ജീകരിച്ചിട്ടുണ്ട്. മത്സരങ്ങൾ ഗർഷോം ടിവി തത്സമയം സംപ്രേഷണം ചെയ്യും.
കൂടാതെ വേദിയിലെത്തുന്ന കാണികൾക്കായി മത്സരങ്ങൾ ലൈവായി എൽഇഡി സ്ക്രീനുകളിൽ പ്രദർശിപ്പിക്കും.
എല്ലാവരെയും സ്വാഗതം ചെയ്യുന്നതായി ശ്രീജിത്ത് കുറുവൻകാട്ടിൽ (പ്രസിഡന്റ്), പ്രവീൺ രാമകൃഷ്ണൻ (സെക്രട്ടറി), വി. സന്തോഷ് (ട്രഷറർ), അനീഷ് പള്ളിയാലിൽ, ജോഷി ആനിത്തോട്ടത്തിൽ (സ്പോർട്സ് കോർഡിനേറ്റേഴ്സ്) എന്നിവർ അറിയിച്ചു.