National
ചെന്നൈ: കേന്ദ്ര സർക്കാർ വീണ്ടും കൊണ്ടുവരാൻ ഒരുങ്ങുന്ന മണ്ഡല പുനർനിർണയ ബില്ലിനോടുള്ള നിലപാടിൽ യാതൊരു മാറ്റവുമില്ലെന്ന് വ്യക്തമാക്കി ഡിഎംകെ നേതാവ് ഉദയനിധി സ്റ്റാലിൻ. ബില്ലിന്റെ കാര്യത്തിൽ ഡിഎംകെ നിലപാട് മയപ്പെടുത്തിയെന്ന തരത്തിലുള്ള അഭ്യൂഹങ്ങൾ ശക്തമാകുന്നതിനിടെയാണ് അദ്ദേഹം ഈ നിർണായക പ്രസ്താവന നടത്തിയിരിക്കുന്നത്.
മണ്ഡല പുനർനിർണയത്തെ ഡിഎംകെ തുടക്കം മുതൽ എതിർത്തിരുന്നെന്നും ആ നിലപാടിൽ ഇപ്പോഴും ഉറച്ചുനിൽക്കുന്നുണ്ടെന്നും ഇന്ത്യാ ടുഡേയ്ക്ക് നൽകിയ പ്രത്യേക അഭിമുഖത്തിൽ അദ്ദേഹം വ്യക്തമാക്കി.
ദേശീയ തലത്തിലെ രാഷ്ട്രീയ മാറ്റങ്ങളുടെ പശ്ചാത്തലത്തിൽ ഡിഎംകെ നിലപാട് മാറ്റുമെന്ന പ്രചാരണങ്ങളെയാണ് ഉദയനിധി പൂർണമായി തള്ളിക്കളഞ്ഞിരിക്കുന്നത്. ബില്ലിനെതിരെ ഭാവിയിലും ശക്തമായ രാഷ്ട്രീയ പോരാട്ടം തുടരുമെന്നും അദ്ദേഹം ആവർത്തിച്ചു വ്യക്തമാക്കി.
2011-ലെ സെൻസസ് അടിസ്ഥാനമാക്കി ലോക്സഭാ മണ്ഡലങ്ങൾ പുനർനിർണയിക്കാനാണ് കേന്ദ്ര സർക്കാർ ഈ ബില്ലിലൂടെ ലക്ഷ്യമിടുന്നത്. ഈ പദ്ധതി നടപ്പിലായാൽ രാജ്യത്തെ നിലവിലെ 543 ലോക്സഭാ സീറ്റുകളുടെ എണ്ണം 850 ആയി ഉയരുമെന്നാണ് കണക്കാക്കപ്പെടുന്നത്.
എന്നാൽ ജനസംഖ്യാ നിയന്ത്രണം വിജയകരമായി നടപ്പിലാക്കിയ ദക്ഷിണേന്ത്യൻ സംസ്ഥാനങ്ങൾക്ക് ഇത് വലിയ തിരിച്ചടിയാകുമെന്ന ആശങ്ക ശക്തമാണ്. 2011-ലെ സെൻസസിന് പകരം അടുത്ത 25 വർഷത്തേക്ക് 1971-ലെ സെൻസസ് വിവരങ്ങൾ തന്നെ മാനദണ്ഡമായി ഉപയോഗിക്കണമെന്നാണ് ഡിഎംകെയുടെ പ്രധാന ആവശ്യം.
കൂടാതെ, മണ്ഡലപുനർനിർണയം നടത്തുമ്പോൾ ജനസംഖ്യാടിസ്ഥാനത്തിൽ അല്ലാതെയുള്ള പ്രത്യാഘാതങ്ങൾ ഒഴിവാക്കാനായി എല്ലാ സംസ്ഥാനങ്ങൾക്കും തുല്യമായി ലോക്സഭാ സീറ്റുകളിൽ 50 ശതമാനം വർധനവ് വേണമെന്നും പാർട്ടി ശക്തമായി വാദിക്കുന്നു.
ജനസംഖ്യ നിയന്ത്രണത്തിൽ മാതൃകാപരമായ മുന്നേറ്റം നടത്തിയ സംസ്ഥാനങ്ങളെ ശിക്ഷിക്കുന്ന തരത്തിലുള്ള ഒരു നീക്കവും അംഗീകരിക്കാൻ കഴിയില്ലെന്നാണ് പാർട്ടിയുടെ നിലപാടെന്നും ഉദയനിധി കൂട്ടിച്ചേർത്തു.
National
ന്യൂഡൽഹി: തമിഴ്നാട് മുൻ ഉപമുഖ്യമന്ത്രിയും പ്രതിപക്ഷ നേതാവുമായ ഉദയിനധി സ്റ്റാലിന് നേർക്ക് കടുത്ത വിമർശനവുമായി ബിജെപി നേതാവും നടിയുമായ ഖുഷ്ബു സുന്ദർ. ഉദയനിധിയുടെ വാക്കുകൾ നീചവും സ്ത്രീവിരുദ്ധവുമാണെന്നും സ്വയം ഒരു നേതാവെന്ന് വിളിക്കുന്നതിൽ ഉദയനിധി ലജ്ജിക്കണമെന്നും ഖുഷ്ബു സുന്ദർ പറഞ്ഞു.
കാവേരി നദീജല തർക്കവുമായി ബന്ധപ്പെട്ട് തഞ്ചാവൂരിൽ ഡിഎംകെ സംഘടിപ്പിച്ച പ്രതിഷേധ പരിപാടിക്കിടെയാണ് വിവാദങ്ങൾക്ക് തുടക്കമായത്. മുഖ്യമന്ത്രി സി. ജോസഫ് വിജയിയെ വിമർശിച്ച് പ്രസംഗിക്കുന്നതിനിടെ, സദസിൽ നിന്ന് ചിലർ നടി തൃഷയുടെ പേര് വിളിച്ച് മുദ്രാവാക്യം വിളിക്കുകയായിരുന്നു. ഇതിന് മറുപടിയായി ഉദയനിധി നടത്തിയ ദ്വയാർഥ പ്രയോഗം നടിയെ ലക്ഷ്യമിട്ടുള്ളതാണെന്ന് ആരോപിക്കപ്പെടുകയും തുടർന്ന് വ്യാപക പ്രതിഷേധത്തിന് വഴിവെക്കുകയും ചെയ്തിരുന്നു.
പൊതുസമൂഹത്തിൽ നിന്ന് കടുത്ത എതിർപ്പുയർന്നതിനെ തുടർന്ന്, സ്ത്രീകളുടെ അന്തസിനെ ഹനിച്ചതിനും ഭീഷണിപ്പെടുത്തിയതിനും ഉദയനിധിക്കെതിരെ തമിഴ്നാട് പോലീസ് കേസെടുത്തു. ചൊവ്വാഴ്ച രാവിലെ കസ്റ്റഡിയിലെടുത്ത ഉദയനിധിയെ ചോദ്യം ചെയ്യലിന് ശേഷം മദ്രാസ് ഹൈക്കോടതിയുടെ ഇടപെടലിനെ തുടർന്ന് രാത്രി എട്ടരയോടെയാണ് വിട്ടയച്ചത്.