ന്യൂഡൽഹി: മണ്ഡല പുനർനിർണയവുമായി ബന്ധപ്പെട്ട് പ്രതിപക്ഷ പാർട്ടികളുമായി സർക്കാർ ഇതിനകം കൂടിക്കാഴ്ച നടത്തിയിട്ടുണ്ടെന്നും അതിനാൽ അതേ ആവശ്യം വീണ്ടും ഉന്നയിക്കുന്നതിനു പകരം പ്രതിപക്ഷം ക്രിയാത്മകമായ സഹകരണമാണു നൽകേണ്ടതെന്നും പാർലമെന്‍ററി കാര്യ മന്ത്രി കിരൺ റിജിജു.
മണ്ഡല പുനർനിർണയവുമായി ബന്ധപ്പെട്ട് കൂടിയാലോചനകൾ നടത്തുന്നതിന് സർവകക്ഷി യോഗം വിളിക്കണമെന്നാവശ്യപ്പെട്ടു കോൺഗ്രസ് അധ്യക്ഷൻ മല്ലികാർജുൻ ഖാർഗെ പ്രധാനമന്ത്രി നരേന്ദ്ര മോദിക്ക് അയച്ച കത്തിനുള്ള മറുപടിയിലാണ് റിജിജു ഇക്കാര്യം വ്യക്തമാക്കിയത്.
ബില്ലിനെക്കുറിച്ചു ചർച്ച ചെയ്യാൻ സർവകക്ഷിയോഗം വിളിക്കണമെന്നും ഓഗസ്റ്റ് 13ന് സഭ അനിശ്ചിതകാലത്തേക്കു പിരിഞ്ഞതിനുശേഷം 64 ദിവസം കഴിഞ്ഞിട്ടും ഔദ്യോഗിക വിജ്ഞാപനം പുറപ്പെടുവിച്ചില്ലെന്നും ചൂണ്ടിക്കാട്ടിയാണു ഖാർഗെ പ്രധാനമന്ത്രിക്കു കത്തയച്ചത്.
സഭ പിരിച്ചുവിടുന്നതിന് കൃത്യമായ സമയപരിധി നിശ്ചയിക്കുന്ന ഭരണഘടനാവ്യവസ്ഥകളില്ലെന്നും 1987, 2008 വർഷങ്ങളിലുൾപ്പടെ മുൻകാലങ്ങളിലും സഭകൾ ദീർഘകാലത്തേക്കു പിരിച്ചുവിടാതിരുന്ന നടപടികൾ ഉണ്ടായിട്ടുണ്ടെന്നും റിജിജു മറുപടിയിൽ ചൂണ്ടിക്കാട്ടി.
മണ്ഡല പുനർനിർണയവുമായി ബന്ധപ്പെട്ട് കോൺഗ്രസ് നേതൃത്വവുമായി മാർച്ച് 16, മാർച്ച് 26, ഏപ്രിൽ 12 എന്നീ തീയതികളിൽ കത്തുകൾ വഴിയും നേരിട്ടും ചർച്ചകൾ നടത്താൻ ശ്രമിച്ചിരുന്നതായും ലോക്സഭ പ്രതിപക്ഷനേതാവ് രാഹുൽ ഗാന്ധിയുമായും ചർച്ചകൾ നടത്തിയിരുന്നതായും റിജിജു വ്യക്തമാക്കി.
എന്നാൽ കോൺഗ്രസിന്‍റെ ഭാഗത്തുനിന്ന് ചർച്ചയ്ക്കുള്ള തീയതികൾ ലഭിക്കാത്തതിനെത്തുടർന്നാണ് ഡിഎംകെ, എസ്പി, വൈഎസ്ആർസിപി, എൻസിപി, ശിവസേന (യുബിടി), എഐഎംഐഎം, ബിജെഡി തുടങ്ങിയ പാർട്ടികളുമായി സർക്കാർ കൂടിയാലോചനകൾ നടത്തിയതെന്ന് റിജിജു കൂട്ടിച്ചേർത്തു. ഇതിനകം നിരവധി കൂടിയാലോചനകൾ നടത്തിയിട്ടുള്ളതിനാൽ വീണ്ടും അതേ ആവശ്യം ഉന്നയിക്കുന്നതിനുപകരം പ്രതിപക്ഷം ക്രിയാത്മകമായ സഹകരണമാണു നൽകേണ്ടതെന്നും സുപ്രധാന നിയമനിർമാണങ്ങളെ പാർട്ടി തടസപ്പെടുത്തരുതെന്നും റിജിജു പറഞ്ഞു.
അതേസമയം എല്ലാ പാർട്ടികളെയും ഒരുമിച്ചിരുത്തി ചർച്ച നടത്തണമെന്നാണു കോൺഗ്രസ് അധ്യക്ഷൻ ഉന്നയിച്ച ആവശ്യം. നിലവിൽ പ്രതിപക്ഷപാർട്ടികളുമായി വെവ്വേറെയാണ് സർക്കാർ കൂടിക്കാഴ്ച നടത്തിയിട്ടുള്ളത്.
Deepika
Corehub Solutions
E-paper LOGIN
LOGIN