Deepika
ADVERTISEMENT
National
ന്യൂഡൽഹി: പ്രതിപക്ഷനിരയിൽ വിള്ളലുണ്ടാക്കാൻ ബിജെപി സജീവശ്രമം തുടരുമ്പോഴും വോട്ടർ പട്ടിക പരിഷ്കരണത്തിലെ ക്രമക്കേടുകൾക്കെതിരേ ഒറ്റക്കെട്ടായി പൊരുതി ഇന്ത്യാസഖ്യം.
കേന്ദ്രസർക്കാരിനെ ലക്ഷ്യമിട്ടു മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിനെതിരേ കഴിഞ്ഞ രണ്ടു ദിവസമായി തുടരുന്ന പ്രതിഷേധ സമരത്തിൽ സഖ്യനേതാക്കളും പ്രവർത്തകരും ഒന്നിച്ചണിനിരന്നു.
തെരഞ്ഞെടുപ്പു കമ്മിഷനെതിരേ ഇന്ത്യാസഖ്യം ഒന്നിക്കുന്ന ഇതു രണ്ടാം തവണയാണ്. ബിഹാറിലെ എസ്ഐആർ നടപ്പാക്കലിലെ ക്രമക്കേടുകൾ ചൂണ്ടിക്കാട്ടി 2025 ഓഗസ്റ്റ് 11നായിരുന്നു പ്രതിപക്ഷ നേതാക്കൾ ആദ്യമായി തെരുവിലിറങ്ങിയത്.
അന്നു പാർലമെന്റിൽനിന്നു തെരഞ്ഞെടുപ്പു കമ്മിഷൻ ആസ്ഥാനത്തേക്കു മാർച്ച് നടത്തിയവരിൽ പലരും ഇന്ന് മുന്നണിക്കൊപ്പമില്ല. എങ്കിലും പോരാട്ടവീര്യം ഒട്ടും ചോരാതെയാണ് ഇത്തവണയും പ്രതിപക്ഷം പ്രതിഷേധവുമായി രംഗത്തെത്തിയിരിക്കുന്നത്. അംഗസംഖ്യയിൽ കുറവുണ്ടെങ്കിലും സമരച്ചൂടിൽ തങ്ങൾ ഒപ്പമുണ്ടെന്ന ശക്തമായ സന്ദേശമാണ് കഴിഞ്ഞ രണ്ടു ദിവസമായി തലസ്ഥാനത്തുനിന്ന് ഉയർന്നുകേൾക്കുന്നത്.
രാഷ്ട്രീയകാരണങ്ങളാൽ നിലവിൽ സഖ്യത്തിനു പുറത്തുള്ള ഡിഎംകെയും ഗ്യാനേഷ് കുമാറിനെതിരായ പ്രതിഷേധത്തിന് പിന്തുണ പ്രഖ്യാപിച്ചിട്ടുണ്ട്. സമാജ്വാദി പാർട്ടിയും ഇടതുപക്ഷവും സഖ്യത്തിനൊപ്പം ഉറച്ചുനിൽക്കുമ്പോൾ, ചില അഭിപ്രായവ്യത്യാസങ്ങൾക്കിടയിലും മമതാ ബാനർജിയുടെ തൃണമൂൽ കോൺഗ്രസും സമരത്തിന് പിന്തുണയുമായുണ്ട്. അതേസമയം, ആം ആദ്മി പാർട്ടി സ്വന്തം നിലയിലാണു കമ്മിഷനെതിരേ പ്രതിഷേധിക്കുന്നത്.
“വോട്ട് കൊള്ള’’ എന്ന ആരോപണം രാഹുൽ ഗാന്ധിയുടെയും കോൺഗ്രസിന്റെയും മാത്രം സൃഷ്ടിയാണെന്ന ധാരണയായിരുന്നു ആദ്യഘട്ടത്തിൽ മറ്റു പ്രതിപക്ഷ പാർട്ടികൾക്കുണ്ടായിരുന്നത്.
എന്നാൽ, പരമ്പരാഗതമായി തങ്ങൾക്കു സ്വാധീനമുള്ള പല സംസ്ഥാനങ്ങളിലെയും നിയമസഭാ തെരഞ്ഞെടുപ്പുകളിൽ അപ്രതീക്ഷിത തിരിച്ചടി നേരിട്ടതോടെയാണു വിഷയം തങ്ങളെയും ഗുരുതരമായി ബാധിക്കുമെന്ന ബോധ്യം സഖ്യകക്ഷികൾക്കുണ്ടായത്. ഇതാണു തെരഞ്ഞെടുപ്പു കമ്മിഷനെതിരേ ഒന്നിച്ചുപോരാടാൻ പ്രതിപക്ഷത്തെ പ്രേരിപ്പിച്ചത്.
Leader Page
മിന്നലാക്രമണശൈലിയിലുള്ള സമരം. സ്വാതന്ത്ര‍്യനന്തര ഇന്ത്യ കണ്ടുശീലിച്ച സമരരീതികൾ മാറുന്ന അസാധാരണ കാഴ്ചകൾ. 2012ൽ നിർഭയ സംഭവത്തെത്തുടർന്ന് ഡൽഹി കണ്ട വ‍്യത‍്യസ്തമായ സമരത്തിനുശേഷം രാജ‍്യം കാണുന്ന പതിവു വിട്ട സമരം.
പതിറ്റാണ്ടിനുശേഷം ഒറ്റ ലക്ഷ‍്യത്തിൽ പ്രധാന പ്രതിപക്ഷ മുന്നണി നടത്തുന്ന സമര പരമ്പര. എന്തുകൊണ്ട് ഇത്തരം മിന്നലാക്രമണശൈലി? ആദ‍്യ ഉത്തരം പ്രതിപക്ഷസ്വരത്തിന് ചെവികൊടുക്കാത്ത ഭരണകൂടം എന്നതുതന്നെ. മാന‍്യവും ജനാധിപത‍്യപരവും മുൻകൂട്ടി അറിയിക്കുന്നതുമായ സമരങ്ങൾക്കും പ്രതിഷേധങ്ങൾക്കും ഭരണകൂടം പുല്ലുവിലയാണു നൽകുന്നത് എന്നതിൽ ഭരണകക്ഷിക്കുപോലും സംശയമുണ്ടാകില്ല. പ്രതിപക്ഷത്തിന്‍റെ ചോദ‍്യങ്ങൾക്ക് ഉത്തരം നൽകേണ്ടതില്ലെന്നാണല്ലോ ഭരണകക്ഷി നേതാക്കൾ പരസ‍്യമായിത്തന്നെ പറയുന്നത്.
സമരാവേശം ഏറ്റെടുത്ത പൊതുസമൂഹം
എന്തു വിമർശനം ഉന്നയിച്ചാലും സമരത്തിന്‍റെ മുദ്രാവാക‍്യം അതീവഗൗരവമുള്ളതാണെന്ന് പൊതുസമൂഹവും വിലയിരുത്തുന്നുണ്ട്. വോട്ട്കൊള്ളയാണെന്നും നിരവധി വോട്ടർമാരുടെ വോട്ടുകൾ തള്ളുകയും വിദേശികളെപോലും പട്ടികയിൽ ഉൾപ്പെടുത്തുകയും ചെയ്തുവെന്നും തെളിവുകൾ സഹിതം ലോക്സഭയിലെ പ്രതിപക്ഷ നേതാവ് രാഹുൽ ഗാന്ധി വാർത്താസമ്മേളനത്തിൽ ഉന്നയിച്ച ആരോപണങ്ങൾ തെറ്റായിരുന്നെങ്കിൽ എന്തുകൊണ്ട് തെരഞ്ഞെടുപ്പു കമ്മിഷൻ രാഹുലിനെതിരേ നിയമനടപടി സ്വീകരിച്ചില്ല. പിന്നീടും കൂടുതൽ തെളിവുകൾ വന്നപ്പോഴും ഒഴുക്കൻമട്ടിൽ പ്രസ്താവന നൽകി കമ്മിഷൻ തടിതപ്പിക്കൊണ്ടിരുന്നതും ജനങ്ങളുടെ മുന്നിലുണ്ട്.
ഒരു ജനാധിപത‍്യരാജ‍്യത്ത് ഇതാണോ സമരരീതിയെന്ന് ചോദ‍്യമുയരുന്നുണ്ട്. മാത്രമല്ല ജെൻ സി സമരംപോലെ വ‍്യവസ്ഥാപിതമല്ലാത്ത സമരമാർഗത്തിലേക്ക് എന്തുകൊണ്ടാണ് പ്രതിപക്ഷനേതാവടക്കം തിരിയുന്നത് എന്നതും ഏറെ ഗൗരവമുള്ളതാണ്.
പ്രതിപക്ഷത്തെ ഇത്തരം സമരരീതിയിലേക്ക് എത്തിച്ചതിന്‍റെ മുഖ‍്യകാരണക്കാർ ഭരണകക്ഷിയാണ് എന്നുതന്നെ വിലയിരുത്തേണ്ടിവരും. ജന്തർ മന്തർ ഇക്കാലമത്രയും രാജ‍്യതലസ്ഥാനത്തെ പ്രതിഷേധവേദിയാണ്. അവിടം കെട്ടിയടച്ച പൊലിസ് വേറെ എവിടെയാണ് സമരംചെയ്യേണ്ടതെന്ന് പറയുന്നുമില്ല.
അക്രമാസക്തമാകാതെ പ്രതിപക്ഷ സമരം
പ്രതിപക്ഷ സമരം ഒരുതരത്തിലും അക്രമാസക്തമായിരുന്നില്ല എന്നത് കാണാതിരുന്നുകൂടാ. എംപിമാരാണ് സമരത്തിനെത്തുന്നത്. അവരുടെ കൈവശം യാതൊരുവിധ ആയുധങ്ങളുമില്ല. പിന്നെ എന്തിനാണ് ജനാധിപത‍്യരീതിയിലുള്ള പ്രതിഷേധത്തെ ഭരണകൂടം ഇത്രമാത്രം ഭയപ്പെടുന്നത് എന്ന ചോദ‍്യത്തിന് ഇതുവരെ വ‍്യക്തമായ ഉത്തരം നൽകാൻ കേന്ദ്ര ആഭ‍്യന്തര മന്ത്രാലയത്തിന് കഴിഞ്ഞിട്ടില്ല. എംപിമാർ ജന്തർ മന്തറിൽ സമാധാനപരമായി സമരം ചെയ്താൽ എന്താണു കുഴപ്പമെന്ന് സർക്കാരാണ് വ‍്യക്തമാക്കേണ്ടത്. ഈ സമരം വലിയ നിയമലംഘനമാണെങ്കിൽ പ്രതിപക്ഷ നേതാവിനെയും പ്രതിഷേധിക്കുന്ന എംപിമാരെയും എന്തുകൊണ്ട് അറസ്റ്റ് ചെയ്ത് കോടതിയിൽ ഹാജരാക്കി നിയമപരമായ ശിക്ഷ നൽകുന്നില്ല എന്നതിനും പൊലിസ് ഉത്തരം പറയേണ്ടതുണ്ട്.
ചരിത്രയാഥാർഥ്യം മറക്കുന്ന ഭരണകൂടം
ജനാധിപത‍്യത്തിനുമേൽ കൈവയ്ക്കുന്നവർക്ക് ഇന്ത‍്യൻ ജനത മാപ്പു നൽകിയ ചരിത്രമില്ല. ഈ ചരിത്ര യാഥാർഥ‍്യത്തെ ബിജെപിയും പ്രധാനമന്ത്രി നരേന്ദ്ര മോദിയും മറക്കുകയാണെങ്കിൽ കനത്ത വില നൽകേണ്ടിവരും. നീറ്റ് പരീക്ഷാ ക്രമക്കേടിൽ രാജ‍്യത്ത് ഉയർന്നുവന്ന ജെൻ സി പ്രക്ഷോഭം വ‍്യക്തമായ സൂചന നൽകിയതാണ്. എസ്ഐആർ വിഷയത്തിലും യുവപ്രക്ഷോഭകർ മുന്നറിയിപ്പു നൽകിയിട്ടുണ്ട്.
കോക്രോച്ച് ജനതാ പാർട്ടിയുടെ സമരം മുന്നിൽക്കണ്ടായിരിക്കാം രാഹുൽ ഗാന്ധി പ്രകോപനപരമായ മിന്നലാക്രമണ സമരശൈലി സ്വീകരിച്ചിരിക്കുന്നത്. പൊലിസ് പറയുന്നതുപോലെ പ്രതിഷേധസമരം നടത്തുന്ന കാലം അവസാനിച്ചിരിക്കുന്നുവെന്ന് ഭരണകൂടം ഇനിയും തിരിച്ചറിയാത്തതാണ് അദ്ഭുതം.
ഇത്രമാത്രം ആരോപണം നേരിട്ട ഗ്യാനേഷ് കുമാറിനെ സംരക്ഷിക്കാൻ ശ്രമിക്കുംതോറും സർക്കാരിന്‍റെ പ്രതിഛായ മോശമായിക്കൊണ്ടേയിരിക്കുമെന്നതാണ് വസ്തുത. പ്രതിപക്ഷത്തിന് കരുത്തു കൂടുകയും ചെയ്യും.
പാർലമെന്‍റിൽ മാത്രമല്ല തെരുവിലും പോരാടാൻ ശക്തിയുണ്ടെന്ന് പ്രതിപക്ഷം തെളിയിച്ചുകഴിഞ്ഞു. ലോകം ഇതെല്ലാം കാണുന്നുണ്ട്.
ജനാധിപത‍്യത്തെ സംരക്ഷിക്കാനുള്ള പ്രക്ഷോഭമെന്നുതന്നെയാണ് ആഗോള മാധ‍്യമങ്ങൾ ഇതിനെ വിലയിരുത്തുന്നതും. അതിനാൽ എത്രയും പെട്ടന്ന് എസ്ഐആർ നടപടികളിൽ വന്ന വീഴ്ച തിരുത്തുന്നതായിരിക്കും പ്രധാനമന്ത്രി നരേന്ദ്ര മോദിക്കും അദ്ദേഹത്തിന്‍റെ സർക്കാരിനും ഗുണകരം. അതിൽ പ്രധാനം ഗ്യാനേഷ് കുമാറിനെ മാറ്റുക എന്നതും.
National
ന്യൂഡൽഹി: ഇന്ത്യാ സഖ്യം നടത്തിയ പ്രതിഷേധത്തിൽ സർപ്രൈസ് എൻട്രി നടത്തി കേരള മുഖ്യമന്ത്രി വി.ഡി.സതീശൻ.
മൂന്ന് ബസുകളിലായി ഇന്നലെ ജന്തർ മന്തറിലേക്കു നീങ്ങിയ പ്രതിപക്ഷ എംപിമാരെ ജന്തർ മന്തറിനടുത്തുള്ള ഷാംഗ്രി-ലാ ഇ റോസ് ഹോട്ടലിനുമുന്നിൽ ബാരിക്കേഡുകളിട്ടു തടഞ്ഞപ്പോൾ ഇവിടെനിന്ന് 300 മീറ്റർ മാത്രം മാറിയുള്ള കേരള ഹൗസിലായിരുന്നു വി.ഡി. സതീശൻ.
രാഹുൽ ഗാന്ധിയുൾപ്പടെയുള്ള നേതാക്കളെ ബാരിക്കേഡുകൾ നിരത്തി തടഞ്ഞപ്പോൾ കേരള ഹൗസിൽനിന്ന് വി.ഡി. സതീശൻ കാൽനടയായി പ്രതിഷേധസ്ഥലത്തെത്തി.
രാഹുൽ ഗാന്ധിയെ കസ്റ്റഡിയിലെടുത്ത് ബാരകാംബ പൊലിസ് സ്റ്റേഷനിലേക്കു കൊണ്ടുപോയപ്പോൾ മുഖ്യമന്ത്രി ഇവിടേക്കുമെത്തി.
നേതാക്കളെയാരെയും കടത്തിവിടില്ലെന്നായിരുന്നു പൊലിസിന്റെ ആദ്യനിലപാടെങ്കിലും ഏറെനേരം പൊലിസിനോടു തർക്കിച്ച് വി.ഡി. സതീശൻ സ്റ്റേഷനകത്തേക്കു കയറി രാഹുലിനെ കാണാനുള്ള അനുമതി നേടി.
National
ന്യൂഡൽഹി: മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടുള്ള പ്രതിഷേധം ശക്തമാക്കാൻ വീണ്ടും മിന്നൽ തന്ത്രങ്ങളൊരുക്കി പ്രതിപക്ഷ ഇന്ത്യാസഖ്യം.
ലോക്സഭാ പ്രതിപക്ഷ നേതാവ് രാഹുൽ ഗാന്ധിയുടെ ആകാശവാണി ആസ്ഥാനത്തെ അപ്രതീക്ഷിത നീക്കങ്ങളാണു ചൊവ്വാഴ്ച പ്രതിഷേധം ആളിക്കത്തിച്ചതെങ്കിൽ ഡൽഹി ജൻപഥിലുള്ള "സാഗർ രത്ന' എന്ന ദക്ഷിണേന്ത്യൻ റസ്റ്ററന്റിൽ ഒത്തുകൂടി തന്ത്രങ്ങളൊരുക്കിയാണ് ഇന്നലെ ഇന്ത്യാ സഖ്യം എംപിമാർ ജന്തർ മന്തറിലേക്കുള്ള പ്രതിഷേധം ആരംഭിച്ചത്.
ഗ്യാനേഷ് കുമാറിന്‍റെ രാജി ആവശ്യപ്പെട്ട് ഇന്ത്യാ സഖ്യം എംപിമാർ ചൊവ്വാഴ്ച പാർലമെന്റ് സമുച്ചയത്തിൽനിന്നു മാർച്ച് നടത്തിയിരുന്നെങ്കിലും എംപിമാരോട് ഡൽഹിയിൽ തുടരാൻ ആവശ്യപ്പെട്ടതിൽനിന്നുതന്നെ പ്രതിഷേധം വരുംദിവസങ്ങളിലും തുടരുമെന്നുള്ള സൂചന ലഭിച്ചിരുന്നു.
സഖ്യത്തിലെ എംപിമാർക്കായി ഇന്നലെ തലസ്ഥാനത്തിന്റെ നടുവിലായിത്തന്നെയുള്ള ജൻപഥ് കൊണാട്ട് സർക്കിളിലെ "സാഗർ രത്ന' റസ്റ്ററന്റിൽ കോൺഗ്രസ് അധ്യക്ഷൻ മല്ലികാർജുൻ ഖാർഗെ ഉച്ചഭക്ഷണത്തിന് ക്ഷണിച്ചതിൽനിന്നുതന്നെ ഒരു സാധാരണ വിരുന്നിനു പകരം രാഷ്ട്രീയലക്ഷ്യങ്ങളോടെയുള്ള സത്കാരമാണിതെന്ന് പൊലിസ് മനസിലാക്കിയിരുന്നു.
തുടർന്ന് റസ്റ്ററന്റിനു മുന്നിൽ കനത്ത സുരക്ഷാസന്നാഹം ഒരുക്കിയെങ്കിലും പ്രതിപക്ഷത്തിന്‍റെ "ഉള്ളിലിരുപ്പ് ' എന്താണെന്നു മനസിലാക്കാൻ പൊലിസിനായില്ല.
റസ്റ്ററന്റിനു മുന്നിലേക്ക് പെട്ടെന്ന് മൂന്ന് ടൂറിസ്റ്റ് ബസുകൾ കൂടി എത്തിയതോടെ പ്രതിഷേധം വീണ്ടും തെരുവിലേക്കു നീങ്ങുകയാണെന്ന് വ്യക്തമായി. എന്നാൽ എംപിമാരുമായി ബസ് എങ്ങോട്ടാണു പോകുന്നതെന്ന കാര്യത്തിൽ വ്യക്തതയില്ലാതിരുന്നത് പൊലിസിനെ ആശയക്കുഴപ്പത്തിലാക്കി.
ഒടുവിൽ ബസുകൾ ജന്തർ മന്തർ ലക്ഷ്യമാക്കിയാണു നീങ്ങുന്നതെന്ന് മനസിലായതോടെ, പൊലിസ് പ്രധാന പാതയിൽ വഴി തടസപ്പെടുത്തുകയും ജന്തർ മന്തറിന് ഒരു കിലോമീറ്റർ മുന്പ് ബാരിക്കേഡുകൾ ഉയർത്തി എംപിമാരെ തടയുകയുമായിരുന്നു.
രാഹുലിനും പ്രിയങ്കയ്ക്കും എതിരേ എഫ്ഐആർ
ഗ്യാനേഷ് കുമാറിന്‍റെ രാജി ആവശ്യപ്പെട്ടു കഴിഞ്ഞദിവസം ആകാശവാണി ഭവൻ ആസ്ഥാനത്തു നടത്തിയ പ്രതിഷേധത്തിൽ ലോക്സഭ പ്രതിപക്ഷനേതാവ് രാഹുൽ ഗാന്ധിക്കും പ്രിയങ്ക ഗാന്ധി എംപിക്കുമെതിരേ ഡൽഹി പൊലിസ് എഫ്ഐആർ രജിസ്റ്റർ ചെയ്തു.
ആകാശവാണി ഭവൻ സമുച്ചയത്തിൽ അതിക്രമിച്ചു കയറിയെന്ന ആരോപണത്തിലാണു കേസ്. രാഹുലും പ്രിയങ്കയും എംപിമാരും ആകാശവാണി ഭവൻ സമുച്ചയത്തിൽ അതിക്രമിച്ചുകയറിയെന്ന പരാതിയിൽ പാർലമെന്റ് സ്ട്രീറ്റ് പൊലിസ് സ്റ്റേഷനിൽ വിവിധ വകുപ്പുകൾ ചുമത്തി കേസെടുത്തിട്ടുണ്ടെന്നും പൊലിസ് വൃത്തങ്ങൾ അറിയിച്ചു.
National
ന്യൂഡൽഹി: മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടു പ്രതിപക്ഷ ഇന്ത്യാ സഖ്യം ഡൽഹിയിൽ നടത്തിയ പ്രതിഷേധമാർച്ചിനിടെ ജനപ്രതിനിധികൾക്കു നേരേ അതിക്രമം. ഡൽഹി പൊലിസും കേന്ദ്രസേനാ വിഭാഗങ്ങളും പ്രതിപക്ഷ എംപിമാരെ കൈയേറ്റം ചെയ്യുകയും മർദിക്കുകയും ചെയ്തതായി നേതാക്കൾ പരാതിപ്പെട്ടു.
കേരളത്തിൽനിന്നുള്ള എംപിമാർക്കു നേരേയും ശക്തമായ ബലപ്രയോഗമുണ്ടായി. പലരെയും റോഡിലൂടെ വലിച്ചിഴയ്ക്കുകയും പൊലിസ് വാഹനത്തിനുള്ളിലിട്ട് മർദിക്കുകയും ചെയ്തതായി പരാതിയുണ്ട്.
എഐസിസി ജനറൽ സെക്രട്ടറി കെ.സി. വേണുഗോപാൽ, അടൂർ പ്രകാശ്, കൊടിക്കുന്നിൽ സുരേഷ്, ജെബി മേത്തർ, ആന്റോ ആന്റണി, ഹൈബി ഈഡൻ, ഷാഫി പറമ്പിൽ, ഇ.ടി. മുഹമ്മദ് ബഷീർ, ഹാരിസ് ബീരാൻ, എം.പി. അബ്ദുസമദ് സമദാനി, ജോസ് കെ. മാണി, പി. സന്തോഷ് കുമാർ, എ.എ. റഹീം, ജോൺ ബ്രിട്ടാസ്, വി. ശിവദാസൻ തുടങ്ങിയ ജനപ്രതിനിധികളാണു കൈയേറ്റത്തിനിരയായത്.
ആകാശവാണി ഭവനുള്ളിൽ സത്യഗ്രഹമിരുന്ന കെ.സി. വേണുഗോപാൽ എംപിയെ തള്ളിമാറ്റി പ്രിയങ്ക ഗാന്ധി എംപിയെ ബലംപ്രയോഗിച്ച് രാത്രി എട്ടോടെ കസ്റ്റഡിയിലെടുക്കാൻ പൊലിസ് ശ്രമിച്ചതോടെ രംഗം കൂടുതൽ വഷളായി. ഈ നടപടിയിൽ ഇരുവർക്കും പരിക്കേറ്റു.
തൊട്ടുപിന്നാലെ ലോക്സഭാ പ്രതിപക്ഷ നേതാവ് രാഹുൽ ഗാന്ധി ഉൾപ്പടെയുള്ളവരെ പൊലിസ് വാഹനത്തിലേക്കു ബലമായി വലിച്ചിഴച്ചുകൊണ്ടു പോകുകയായിരുന്നു.
National
ന്യൂഡൽഹി: മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടുള്ള പ്രതിഷേധം ആളിക്കത്തിച്ച് ഇന്ത്യാ സഖ്യം. ഇന്ത്യാ സഖ്യത്തിലെ മുന്നൂറിലധികം എംപിമാരാണ് തെരഞ്ഞെടുപ്പു കമ്മിഷൻ ആസ്ഥാനത്തേക്ക് മാർച്ച് നടത്തിയത്.
നിതി ആയോഗ് ഓഫിസിനും ആകാശവാണി ഓഫിസിനുമിടയിലുള്ള വഴിയിൽ മാർച്ച് പൊലിസ് തടഞ്ഞതോടെ എംപിമാർ ബാരിക്കേഡുകൾക്കു മുന്നിൽ കുത്തിയിരുന്ന് പ്രതിഷേധിച്ചു. ബാരിക്കേഡുകൾ മറികടക്കാൻ എംപിമാർ ശ്രമിച്ചതോടെ ഇവരെ കസ്റ്റഡിയിലെടുത്തു നീക്കി.
പിടികൊടുക്കാതെ രാഹുൽ
പാർലമെന്റിന്റെ അഞ്ഞൂറ് മീറ്റർ മാത്രം മാറിയുള്ള പ്രധാനപാതയിൽ പൊലിസ് ബാരിക്കേഡുകളിട്ടു തടഞ്ഞും ജാമറുകളുപയോഗിച്ച് ഇന്റർനെറ്റ് കട്ട് ചെയ്തുമാണ് പ്രതിഷേധമാർച്ച് തകർക്കാൻ ശ്രമിച്ചത്. എന്നാൽ രാഹുൽ ഗാന്ധിയുടെ നേതൃത്വത്തിൽ സഖ്യത്തിലെ പ്രധാന നേതാക്കളെല്ലാം ധർണ നടത്തിയും ബാരിക്കേഡുകൾക്ക് മുകളിൽ കയറിയും പ്രതിഷേധം കനപ്പിച്ചതോടെ പൊലിസും വലഞ്ഞു.
ഒടുവിൽ ഇവരെയെല്ലാം കസ്റ്റഡിയിലെടുത്ത് നീക്കാനുള്ള ശ്രമമായി. എന്നാൽ ബാരിക്കേഡുകൾക്കിടയിലൂടെ മിന്നിപ്പാഞ്ഞ് കസ്റ്റഡി വെട്ടിച്ച രാഹുൽ ഗാന്ധി അപ്രതീക്ഷിതമായി ആകാശവാണി ഭവനിനുള്ളിലുള്ള ബോധിവൃക്ഷം തന്റെ സമരകേന്ദ്രമാക്കിയതോടെ പ്രതിഷേധം വീണ്ടും ആളിക്കത്തി.
National
ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ട് ഇന്ത്യാ സഖ്യം ഡൽഹിയിൽ നടത്തിയ പ്രതിഷേധ മാർച്ചിനിടെ സംഘർഷം. കേരളത്തിൽ നിന്നുള്ള രാജ്യസഭാംഗങ്ങളായ എ.എ.റഹീം, ജോൺ ബ്രിട്ടാസ്, പി.സന്തോഷ് കുമാർ, വി.ശിവദാസൻ എന്നിവരെ ഡൽഹി പൊലിസ് കസ്റ്റഡിയിലെടുത്തു.
കേന്ദ്ര തെരഞ്ഞെടുപ്പ് കമ്മീഷൻ ആസ്ഥാനത്തേക്ക് കോൺഗ്രസിന്റെ നേതൃത്വത്തിൽ നടത്തിയ മാർച്ച് ആകാശവാണി ഭവന് മുന്നിലെത്തിയതോടെയാണ് സംഘർഷാവസ്ഥയുണ്ടായത്. തുടർന്ന് ഇവിടെ കുത്തിയിരുന്ന് പ്രതിഷേധിച്ച ഇടത് എംപിമാരെ പൊലിസ് ബലപ്രയോഗത്തിലൂടെ കസ്റ്റഡിയിലെടുക്കുകയായിരുന്നു.
തങ്ങളെ റോഡിലൂടെ വലിച്ചിഴച്ചാണ് പൊലിസ് വാഹനത്തിൽ കയറ്റിയതെന്ന് എംപിമാർ ആരോപിച്ചു. പൊലിസ് വാഹനത്തിനുള്ളിൽ തങ്ങളെ മർദിച്ചത് ഡൽഹി പൊലിസല്ലെന്നും കേന്ദ്രസേനയിൽപ്പെട്ട ഉദ്യോഗസ്ഥരാണെന്നും എ.എ.റഹീം ആരോപിച്ചു.
രാജ്യസഭാംഗത്തിന് നേരെ കേന്ദ്രസേനാംഗങ്ങൾ മർദനം നടത്തിയെന്ന ആരോപണം ഗൗരവമേറിയ വിഷയമാണെന്നും അദ്ദേഹം പറഞ്ഞു. മർദനമേറ്റ റഹീമിന് അടിയന്തരമായി വൈദ്യസഹായം നൽകണമെന്ന് കസ്റ്റഡിയിലായ ജോൺ ബ്രിട്ടാസ് എംപി പൊലിസിനോട് ആവശ്യപ്പെട്ടു. സംഭവത്തിൽ പരാതി നൽകാനും തുടർനടപടികൾ സ്വീകരിക്കാനും പ്രതിപക്ഷ സഖ്യം തീരുമാനിച്ചിട്ടുണ്ട്.
National
ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ട് രാജ്യതലസ്ഥാനത്ത് വ്യാപക പ്രതിഷേധം. ഇന്ത്യാ സഖ്യ എംപിമാരുടെ നേതൃത്വത്തിൽ പാർലമെന്‍റിൽ നിന്ന് തെരഞ്ഞെടുപ്പ് കമ്മീഷൻ ആസ്ഥാനത്തേക്ക് നടത്തിയ മാർച്ച് ആകാശവാണി ഭവന് മുന്നിൽ പൊലീസ് തടഞ്ഞു. ഇതോടെ നേതാക്കളും എംപിമാരും റോഡിൽ കുത്തിയിരുന്ന് പ്രതിഷേധിച്ചു.
ബാരിക്കേഡ് മറികടക്കാൻ എസ്പി എംപിമാർ ശ്രമിച്ചതോടെ പൊലിസുമായി ഉന്തും തള്ളുമുണ്ടായി. പ്രതിപക്ഷ നേതാവ് രാഹുൽ ഗാന്ധിയുടെ നേതൃത്വത്തിലായിരുന്നു മാർച്ച്. ബിജു ജനതാദൾ നേതാക്കളും അഖിലേഷ് യാദവും പ്രതിഷേധത്തിൽ പങ്കെടുത്തു. കോൺഗ്രസ് അധ്യക്ഷൻ മല്ലികാർജുൻ ഖാർഗെ, പ്രിയങ്ക ഗാന്ധി, രാഹുൽ ഗാന്ധി, കെ.സി.വേണുഗോപാൽ തുടങ്ങിയ നേതാക്കളും പങ്കെടുക്കുന്നുണ്ട്.
മാർച്ച് കണക്കിലെടുത്ത് ഡൽഹിയിൽ പൊലിസ് സുരക്ഷ ശക്തമാക്കിയിട്ടുണ്ട്. പ്രതിഷേധക്കാരെ നേരിടുമ്പോൾ അമിത ബലപ്രയോഗം ഒഴിവാക്കണമെന്ന് പൊലിസിന് നിർദേശം നൽകിയിട്ടുണ്ട്. ഗ്യാനേഷ് കുമാറിന്‍റെ രാജി ആവശ്യപ്പെട്ട് ഗാന്ധിജയന്തി ദിനത്തിൽ ആരംഭിച്ച പ്രതിഷേധം അഞ്ചാം ദിവസത്തിലേക്ക് കടക്കുമ്പോൾ സമരം കൂടുതൽ വ്യാപിക്കുകയാണ്.
ഇന്നലെ രാജ‍്യതലസ്ഥാനത്തെ വിവിധ കേന്ദ്രങ്ങളിൽ വിദ്യാർഥി-യുവജന സംഘടനകളുടെ നേതൃത്വത്തിലായിരുന്നു പ്രതിഷേധം. ഇന്ന് കോൺഗ്രസും ഇന്ത്യാ സഖ്യവും നേരിട്ട് നേതൃത്വം ഏറ്റെടുത്തതോടെയാണ് പ്രതിഷേധം കൂടുതൽ ശക്തമായത്.
കനത്ത സുരക്ഷ, ഗതാഗതക്കുരുക്ക്
പ്രതിപക്ഷ പ്രതിഷേധം നേരിടുന്നതിനായി തലസ്ഥാനനഗര പ്രദേശത്തു നിരോധനാജ്ഞ പ്രഖ്യാപിച്ചിരിക്കുകയാണ്. ബിഎസ്എഫ്, സിഐഎസ്എഫ്, റാപ്പിഡ് ആക്ഷൻ ഫോഴ്സ് അടക്കമുള്ള ആയിരക്കണക്കിനു സുരക്ഷാ സേനയെയാണ് വഴിനീളെ വിന്യസിച്ചിരിക്കുന്നത്.
തെരഞ്ഞെടുപ്പു കമ്മിഷൻ ഓഫീസ്, പാർലമെന്റ് സ്ട്രീറ്റ്, ജന്തർ മന്തർ പ്രദേശങ്ങളിലെ മെട്രോ സ്റ്റേഷനുകൾ കേന്ദ്രീകരിച്ച് നിയന്ത്രണങ്ങൾ ഏർപ്പെടുത്തിയതോടെ സെൻട്രൽ ഡൽഹിയിൽ കനത്ത ഗതാഗതക്കുരുക്കാണ് അനുഭവപ്പെടുന്നത്.
ജന്തർ മന്തറിനു സമീപം അഞ്ചു ദിവസമായി തുടരുന്ന പ്രതിഷേധങ്ങളുമായി ബന്ധപ്പെട്ട് പൊതുമുതൽ നശിപ്പിക്കൽ, നിരോധനാജ്ഞ ലംഘനം എന്നിവയ്ക്ക് പോലീസ് ഒന്പത് എഫ്ഐആറുകൾ രജിസ്റ്റർ ചെയ്തു. ഇടത് സംഘടനകളായ ഐസ, എസ്എഫ്ഐ എന്നിവയുടെ പ്രവർത്തകരടക്കം 18 പേരെ അറസ്റ്റ് ചെയ്യുകയും മുന്നൂറോളം പേരെ കസ്റ്റഡിയിലെടുക്കുകയും ചെയ്തു.
വോട്ടർ പട്ടികയിൽനിന്നുള്ള പേര് വെട്ടലിനും തൊഴില്ലായ്മയ്ക്കുമെതിരേ കോക്രോച്ച് ജനതാ പാർട്ടി പത്തിന് ജന്തർ മന്തറിൽ വൻ പ്രതിഷേധ സമരം പ്രഖ്യാപിച്ചിട്ടുണ്ട്.
National
ന്യൂഡൽഹി: മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിനെതിരായ രാജിയിൽ മുറവിളി ശക്തമാകുന്നതിനിടയിൽ പ്രതിപക്ഷ ഐക്യം ഊട്ടിയുറപ്പിക്കാൻ ഇന്ത്യാ സഖ്യം.
ഗ്യാനേഷ് കുമാറിനെതിരായ നീക്കത്തിൽ ഒന്നിക്കാൻ 30ന് ഡൽഹി കോൺസ്റ്റിറ്റ്യൂഷൻ ക്ലബിൽ മുന്നണി യോഗം ചേരും.
എസ്ഐആറിൽ ഗ്യാനേഷ് കുമാറിനെതിരായ ആരോപണം പുറത്തുവന്നതിനു പിന്നാലെ തൃണമൂൽ കോൺഗ്രസ് അധ്യക്ഷ മമത ബാനർജി ലോക്സഭ പ്രതിപക്ഷ നേതാവ് രാഹുൽ ഗാന്ധിയുമായും സിപിഎം ജനറൽ സെക്രട്ടറി എം.എ. ബേബിയുമായും ഫോണിൽ സംസാരിച്ചിരുന്നു. തുടർന്നാണ് അടിയന്തര യോഗം വിളിച്ചുചേർക്കാൻ ധാരണയായത്.
National
ന്യൂഡൽഹി: രണ്ടാംഘട്ട തെരഞ്ഞെടുപ്പിന് മുന്നോടിയായി ബിഹാറിൽ പരസ്യ പ്രചാരണം ഇന്ന് അവസാനിക്കും. എൻഡിഎ സഖ്യത്തിന് വേണ്ടി കേന്ദ്ര ആഭ്യന്തരമന്ത്രി അമിത് ഷാ ഇന്നും റാലികളിൽ പങ്കെടുക്കും.
വൈകുന്നേരം അഞ്ചു മണിയോടെയാണ് പരസ്യ പ്രചാരണങ്ങൾ അവസാനിക്കുക. ചൊവ്വാഴ്ചയാണ് ബിഹാറിൽ അവസാനഘട്ട തെരഞ്ഞെടുപ്പ്. 122 മണ്ഡലങ്ങളാണ് രണ്ടാംഘട്ടത്തിൽ വിധിയെഴുതുന്നത്. നവംബർ 14ന് ആണ് ഫലപ്രഖ്യാപനം.
അതേസമയം എൻഡിഎ സർക്കാരിന്‍റെ സത്യപ്രതിജ്ഞയ്ക്ക് എത്താമെന്നാണ് നരേന്ദ്ര മോദിയുടെ ആത്മവിശ്വാസം. ഇന്ത്യ സഖ്യത്തിന്‍റെ നേതാക്കളും ഇന്ന് അവസാനിക്കുന്ന തെരഞ്ഞെടുപ്പ് റാലികളിൽ പങ്കെടുക്കും.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN