സാങ്കേതിക മേഖല വളരെ വേഗതയിലാണ് വികസിച്ചുകൊണ്ടിരിക്കുന്നത്. വരും വർഷങ്ങളിൽ നമ്മുടെ നാട്ടിലുണ്ടായേക്കാവുന്ന സാങ്കേതിക മാറ്റങ്ങളെക്കുറിച്ച് എപ്പോഴെങ്കിലും സങ്കൽപ്പിച്ചു നോക്കിയിട്ടുണ്ടോ? അങ്ങനെ സാങ്കേതിക മേഖലയുടെ വളർച്ച റോബോട്ടുകളുടെ രൂപകല്പനയും നിര്മാണവും വ്യാവസായികാടിസ്ഥാനത്തില് വളര്ച്ച പ്രാപിക്കും. അനുബന്ധമായി റോബോട്ടിക്സ് എന്ന പഠന ഗവേഷണ ശാഖയും കൂടുതല് ശക്തി പ്രാപിക്കും.
യന്ത്രങ്ങള് അഥവാ യന്ത്രമനുഷ്യരുടെ രൂപകല്പന, നിര്മാണം, പ്രവര്ത്തന സാങ്കേതികത, നിയന്ത്രണം, ഘടനാ രൂപീകരണം എന്നിവയുമായി ബന്ധപ്പെട്ട പഠന മേഖലയാണ് റോബോട്ടിക്സ്. സങ്കീര്ണമായ സാങ്കേതികതകള് നിറഞ്ഞ വ്യാവസായിക സംരംഭങ്ങൾ, ഖനന വ്യവസായങ്ങള്, സമുദ്രാന്തര ഗവേഷണങ്ങള്, ബഹിരാകാശ ഗവേഷണ പദ്ധതികള്, സൈനികാവശ്യങ്ങള് എന്നിവയില് ഇപ്പോള് ചെറിയ തോതിലെങ്കിലും റോബോട്ടുകളെ ഉപയോഗിക്കുന്നുണ്ട്. ഇനിയങ്ങോട്ട് ഈ മേഖലകളില് റോബോട്ടുകളുടെ ഉപയോഗം വ്യാപകമാകും.
റോബോട്ടിക്സ് പഠനശാഖ
സാങ്കേതികമായ പഠന താത്പര്യവും അഭിരുചിയും ഉള്ളവര്ക്ക് റോബോട്ടിക്സ് പഠനശാഖ ഗുണം ചെയ്യും. ഗവേഷണാത്മകമായ ബോധവും മാത്തമാറ്റിക്കല് റീസണിംഗും, അന്വേഷണാത്മകതയും, രൂപകല്പനയിലുള്ള താത്പര്യവും ഉള്ളവര്ക്ക് നല്ലൊരു പഠന മേഖലയാണ് റോബോട്ടിക്സ്. സ്വതന്ത്രമായ ഒരു കോഴ്സായി ഡിഗ്രി തലത്തില് റോബോട്ടിക്സ് പഠിക്കാവുന്നതാണ്. ഫിസിക്സ്, കെമിസ്ട്രി, കണക്ക് എന്നിവ വിഷയങ്ങളായി പഠിച്ച് പ്ലസ്ടു പഠനം വിജയകരമായി പൂര്ത്തിയാക്കിയവര്ക്ക് റോബോട്ടിക്സില് ഡിഗ്രി തല പഠനം തുടങ്ങാവുന്നതാണ്. മെക്കാനിക്കല്, ഇലക്ട്രിക്കല്, ഇന്സ്ട്രുമെന്റേഷൻ, ഇലക്ട്രോണിക്സ്, കംപ്യൂട്ടര് സയന്സ് മുതലായ എൻജിനിയറിംഗ് ശാഖകളിലെ ഡിഗ്രി തല പഠനത്തിന് ശേഷം ബിരുദാനന്തര തല പഠന മേഖലയായി റോബോട്ടിക്സ് തെരഞ്ഞെടുക്കുന്നതാണ് അഭികാമ്യം.
സാധ്യതകൾ/ സ്ഥാപനങ്ങൾ
ഇന്ത്യയില് ഒട്ടേറെ സ്ഥാപനങ്ങളില് റോബോട്ടിക്സില് ഉപരിപഠനം നടത്താനുള്ള സൗകര്യങ്ങള് ഇപ്പോള് ലഭ്യമാണ്. ബംഗളൂരുവിലെ ഇന്ത്യന് ഇന്സ്റ്റിറ്റ്യൂട്ട് ഓഫ് സയന്സ്, മുംബൈയിലെ ഭാഭ ആറ്റമിക് റിസര്ച്ച് സെന്റർ എന്നിവയാണ് ഈ രംഗത്തെ പഠന ഗവേഷണങ്ങള്ക്ക് ഇന്ത്യയില് തുടക്കമിട്ടത്. ഫിസിക്സ്, മാത്തമാറ്റിക്സ് എന്നിവ വിഷയങ്ങളായുള്ള പ്ലസ്ടു പൂര്ത്തിയാക്കിയവര്ക്ക് ഡിഗ്രി തലത്തില് റോബോട്ടിക്സ് എൻജിനിയറിംഗ് ചെയ്യാവുന്നതാണ്.
ചില സ്വകാര്യ സ്ഥാപനങ്ങള് റോബോട്ടിക്സില് ബിടെക്, ബിഇ കോഴ്സുകള് നല്കുന്നുണ്ട്. എൻജിനിയറിംഗ് ബിരുദ കോഴ്സുകള്ക്ക് ശേഷം ബിരുദാനന്തര ബിരുദ എംടെക്, എംഇ കോഴ്സുകളായി റോബോട്ടിക്സ് പഠിക്കാവുന്നതാണ്. ഇന്ത്യയിലെ പ്രമുഖ സ്ഥാപനങ്ങള് എല്ലാം ബിരുദാനന്തര ബിരുദ കോഴ്സുകളായാണ് റോബോട്ടിക്സ് നല്കി വരുന്നത്.
ബംഗളൂരുവിലെ ഇന്ത്യന് ഇന്സ്റ്റിറ്റ്യൂട്ട് ഓഫ് സയന്സ്, മുംബൈ, മദ്രാസ്, കാണ്പുര്, ഡല്ഹി, ഗരഖ്പുര് എന്നിവിടങ്ങളിലുള്ള ഐഐടികള്, രാജസ്ഥാനിലെ പിലാനിയിലുള്ള ബിര്ള ഇന്സ്റ്റിറ്റ്യൂട്ട് ഓഫ് ടെക്നോളജി ആന്ഡ് സയന്സ് എന്നിവ റോബോട്ടിക്സില് മാസ്റ്റര് ബിരുദങ്ങള് നല്കിവരുന്നു.
ഇന്ത്യയുടെ പ്രതിരോധ മന്ത്രാലയത്തിന് കീഴിലെ പ്രതിരോധ ഗവേഷണ - വികസന സ്ഥാപനമായ ഡിആര്ഡിഒക്ക് കീഴിലെ ബംഗളൂരുവിലെ സെന്റർ ഫോര് ആര്ട്ടിഫിഷല് ഇന്റലിജൻസ് ആൻഡ് റോബോട്ടിക്സിൽ, റോബോട്ടിക്സിലെ ഉപരി പഠനത്തിന് ശേഷം ഗവേഷണത്തിനും തൊഴില് സാധ്യതകള്ക്കും ശ്രമിക്കാവുന്നതാണ്. ഇത്തരം സ്ഥാപനങ്ങളിലെ പഠന - ഗവേഷണങ്ങള്ക്ക് ശേഷം നിങ്ങള് പുതിയ ഒരു റോബോട്ടിനെ വികസിപ്പിച്ചെടുക്കുന്നത് ഇനി ഒന്ന് സങ്കല്പ്പിച്ചു നോക്കൂ.
Deepika
E-paper LOGIN
LOGIN