റഷ്യൻ സേന അണ്വായുധ അഭ്യാസത്തിന് : Deepika.com International News |

Click here for detailed news of all items

റഷ്യൻ സേന അണ്വായുധ അഭ്യാസത്തിന്

Wednesday, May 8, 2024 1:06 AM IST

മോസ്കോ: റഷ്യൻ സേന ആണവ സൈനിക പരിശീലനത്തിന് ഒരുങ്ങുന്നു. ഫ്രഞ്ച് പ്രസിഡന്‍റ് ഇമ്മാനുവൽ മക്രോണിന്‍റെയും ബ്രിട്ടീഷ് വിദേശകാര്യമന്ത്രി ഡേവിഡ് കാമറോണിന്‍റെയും പ്രസ്താവനകളുടെ പശ്ചാത്തലത്തിലാണു റഷ്യൻ പ്രസിഡന്‍റ് പുടിൻ സൈനികാഭ്യാസത്തിന് ഉത്തരവിട്ടത്.

യുദ്ധഭൂമിയിൽ പരിമിതമായ ആക്രമണത്തിന് ഉപയോഗിക്കുന്ന ടാക്റ്റിക്കൽ അണ്വായുധങ്ങളുടെ പരിശീലനമായിരിക്കും നടക്കുക. തീയതി വ്യക്തമാക്കിയിട്ടില്ല.

യുക്രെയ്നിൽ ഫ്രഞ്ച് സേനയെ വിന്യസിക്കുന്ന നിർദേശം തള്ളിക്കളയാനാവില്ലെന്നാണു മക്രോൺ കഴിഞ്ഞയാഴ്ച പറഞ്ഞത്. ബ്രിട്ടൻ യുക്രെയ്നു നല്കുന്ന ദീർഘദൂര മിസൈലുകൾ റഷ്യക്കുള്ളിൽ പ്രയോഗിക്കുന്നത് തടയില്ലെന്നു കാമറോണും പറഞ്ഞിരുന്നു.

മക്രോണിന്‍റെ പരാമർശം റഷ്യയുമായി നേരിട്ട് ഏറ്റുമുട്ടലിനു തയാറാണെന്നതിന്‍റെ സൂചനയാണെന്നും, കാമറോൺ പറഞ്ഞത് ഇതുവരെയുള്ള ബ്രിട്ടീഷ് നയത്തിനു വിരുദ്ധമാണെന്നും റഷ്യൻ വിദേശകാര്യമന്ത്രാലയം പറഞ്ഞു.

ഇരു രാജ്യങ്ങളുടെയും അംബാസഡർമാരെ മോസ്കോ വിളിച്ചുവരുത്തി. ബ്രിട്ടീഷ് ആയുധങ്ങൾ റഷ്യയിൽ പ്രയോഗിച്ചാൽ യുക്രെയ്നകത്തും പുറത്തുമുള്ള ബ്രിട്ടീഷ് സൈനിക സംവിധാനങ്ങളെ ആക്രമിക്കുമെന്നും റഷ്യ ഭീഷണി മുഴക്കിയിട്ടുണ്ട്.

റഷ്യയുടെ അണ്വായുധ അഭ്യാസം നിരുത്തരവാദപരമാണെന്ന് നാറ്റോ പ്രതികരിച്ചു. റഷ്യ ബ്ലാക്മെയിൽ ചെയ്യുകയാണെന്ന് യുക്രെയ്ൻ പറഞ്ഞു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.