കോർക്ക്: അയർലൻഡിലെ കോർക്കിൽ ചാരിറ്റി മ്യൂസിക് ഷോ സംഘടിപ്പിയ്ക്കുന്നു. സെപ്റ്റംബർ 28 ന് ശനിയാഴ്ച കോർക്ക് യൂണിവേഴ്സിറ്റി കോളേജ് (യുസിസി)ഓഡിറ്റോറിയത്തിൽ വൈകുന്നേരം ആറിന് പരിപാടികൾ ആരംഭിയ്ക്കും. മസാല കോഫി മ്യൂസിക് ബാൻഡാണ് പരിപാടി അവതരിപ്പിയ്ക്കുന്നത്.
സംഗീതപരിപാടിയിൽ ലഭിയ്ക്കുന്ന ലാഭം കേരളത്തിലെ വയനാട് ജില്ലയിൽ സമീപകാലത്തെ വെള്ളപ്പൊക്ക ദുരിതബാധിത കുടുംബങ്ങൾക്ക് നൽകാനാണ് സംഘാടകർ ലക്ഷ്യമിട്ടിരിയ്ക്കുന്നത്.
2014ൽ ആരംഭിച്ച മസാല കോഫി എന്നറിയപ്പെടുന്ന സംഗീതഗ്രൂപ്പ് കാപ്പ ടിവിയിലെ മ്യൂസിക് മോജോ എന്ന മ്യൂസിക് ഷോയിലൂടെയാണ് ജനഹൃദയങ്ങളിൽ സ്ഥാനം പിടിയ്ക്കുന്നത്. ആദ്യ അരങ്ങേറ്റത്തിലൂടെ തന്നെ ജനകീയമായ മസാല കോഫി ഇന്ത്യൻ നാടോടി, ബ്ലൂസ്, പോപ്പ്, റോക്ക് എന്നീ ഇനങ്ങളിലാണ് പ്രധാനമായും സംഗീതം അവതരിപ്പിയ്ക്കുന്നത്.
സ്ഥാപകാംഗം കൂടിയായ പെർക്കുഷ്യനിസ്റ്റ് വരുണ്‍ സുനിലാണ് ട്രൂപ്പിന്‍റെ ലീഡർ. സൂരജ് സന്തോഷ് (സഹസ്ഥാപകൻ), ഡ്രമ്മുകളിൽ ദയാ ശങ്കർ(ഡ്രംസ്), പ്രീത് പി.എസ്, ഡേവിഡ് ക്രിംസണ്‍ (എന്നിവർ ഗീറ്റാർ), പോളി (ബാസ്), ജോ ജോണ്സണ്( കീബോർഡ്) കൃഷ്ണ രാജ് (വയലിൻ) എന്നിവരാണ് ട്രൂപ്പിലെ അംഗങ്ങൾ.
ഉരിയാടി, ഹലോ നമസ്തെ, സോളോ, കണ്ണും കണ്ണും കൊള്ളയടിത്താൽ തുടങ്ങിയ മലയാളം, ഹിന്ദി ആൽബങ്ങളിലൂടെ ഇവർ ജനഹൃദയങ്ങളിൽ വീണ്ടും ചേക്കേറി. കേരളത്തിനു പുറമെ ചെന്നൈ, ഉൗട്ടി, മഥാപ്പൂർ, ഹൈദരാബാദ്, പോണ്ടിച്ചേരി, ദുബായ്, സിംഗപ്പൂർ എന്നിവ കൂടാതെ യൂറോപ്യൻ രാജ്യങ്ങളിലും മസാല ട്രൂപ്പ് പരിപാടികൾ നടത്തിയിട്ടുണ്ട്.
ആൽ ആയാൽ തറ വേണം എന്ന ശീർഷകത്തിൽ കാവാലം നാരായണപ്പണിക്കരുടെ ഗാനം ഇവർ ആദ്യത്തെ സിംഗിൾ വീഡിയോ ആൽബമാക്കി 2016 ജൂലൈ 23 ന് പുറത്തിറക്കി. സൗന്ദര്യമത്സര വിജയികളായ എയ്ലീന കാതറിൻ അമോണ്, രോഹിണി മറിയം ഇടിക്കുള എന്നിവരെ മുൻനിർത്തിയാണ് നാടോടി ഗാനമായ ആൽ ആയാൽ തറ എന്ന ഗാനത്തിന്‍റെ വീഡിയോ തയ്യാറാക്കിയത്. 2016 നവംബർ 11 ന് ആൽബം കരി റിലീസ് ചെയ്തു. ബേസിൽ ജോസഫ് സംവിധാനം ചെയ്ത കുഞ്ഞിരാമായണം എന്ന ചിത്രത്തിൽ മദ്യ നിരോധനത്തെക്കുറിച്ച് മസാല കോഫി ബാൻ ആക്ഷേപഹാസ്യഗാനം ആലപിച്ചത് വളരെ ഹിറ്റായി.
കണ്ണീരും വേദനയുമായി കഴിയുന്ന വയനാട്ടിലെ കുടുംബങ്ങൾക്കു താങ്ങും തണലുമായി മാറ്റാൻ ഉപകരിയ്ക്കുന്ന ചാരിറ്റി ഷോയിലേയ്ക്ക് ഏവരേയും ഹാർദ്ദവമായി സംഘാടകർ സ്വാഗതം ചെയ്തു.
വിവരങ്ങൾക്ക്:
ഷെറി 0858520202, സണ്ണി 0876135515, ബിജു 0872953260, ഷാജു, 0873205335, ഹരി 0879769468, ബിജോയ് 0894666940
റിപ്പോർട്ട്: ജോസ് കുന്പിളുവേലിൽ