ഹൂസ്റ്റണ്: ഹൂസ്റ്റണിൽ നാലു ദിവസം നീണ്ടു നിൽക്കുന്ന ഏഴാമത് സീറോ മലബാർ ദേശീയ കണ്വൻഷനു തിരശീലയുയാരാൻ ഇനി ഇനി അന്പതു ദിനങ്ങൾ മാത്രം ബാക്കി. അമേരിക്കയിലെ സീറോ മലബാർ സമൂഹം ഒരുമിച്ചു കൂടുന്ന മഹാസംഗമത്തിന് വേദിയാകാൻ സെന്റ് ജോസഫ് നഗർ എന്ന് നാമകരണം ചെയ്യപ്പെടുന്ന ഹിൽട്ടണ് അമേരിക്കാസ് ഹോട്ടൽ സമുച്ചയം തയാറെടുത്തു.
ഹൂസ്റ്റണ് സെൻറ് ജോസഫ് സീറോ മലബാർ ഫൊറോന ആതിഥ്യമരുളി നൽകി നടത്തുന്ന ദേശീയ കണ്വൻഷന്റെ വിജയത്തിനായി ഫൊറോനാ വികാരി ഫാ. കുര്യൻ നെടുവേലിചാലുങ്കൽ (കോ കണ്വീനർ), ഫാ. രാജീവ് വലിയവീട്ടിൽ (ജോയിന്റ് കണ്വീനർ), ചെയർമാൻ അലക്സാണ്ടർ കുടക്കച്ചിറ, വൈസ് ചെയർമാൻ ബാബു മാത്യു പുല്ലാട്ട്, ജോസ് മണക്കളം എന്നിവരുടെ നേതൃത്വത്തിൽ നാൽപതു കമ്മറ്റികൾ അഹോരാത്രം പ്രവർത്തിക്കുന്നു. ഓഗസ്റ്റ് 1 മുതൽ 4 വരെയാണ് കണ്വൻഷൻ.
സീറോ മലബാർ സഭ മേജർ ആർച്ച്ബിഷപ്പ് കർദിനാൾ മാർ ജോർജ് ആലഞ്ചേരി, ഷിക്കാഗോ രൂപതാധ്യക്ഷൻ മാർ ജേക്കബ് അങ്ങാടിയത്ത് (കണ്വൻഷൻ രക്ഷാധികാരി), സഹായ മെത്രാൻ മാർ ജോയി ആലപ്പാട്ട് (ജനറൽ കണ്വീനർ), കേരളത്തിൽ നിന്നെത്തുന്ന പിതാക്ക·ാരായ മാർ ജോസഫ് പാംപ്ലാനി, മാർ തോമസ് തറയിൽ എന്നിവരും നിരവധി വൈദികശ്രേഷ്ഠരും കണ്വൻഷനിൽ പങ്കെടുക്കും.
പ്രശസ്ത വചന പ്രോഘോഷകനായ ഫാ. ഡാനിയേൽ പൂവണ്ണത്തിൽ ബൈബിൾ പ്രഭാഷണങ്ങൾ നടത്തും. റിട്ട. ജസ്റ്റീസ് കുര്യൻ ജോസഫ്, ക്രിസ്റ്റീന ശ്രീനിവാസൻ (മോഹിനി), പ്രശസ്ത അമേരിക്കൻ പ്രാസംഗീകരായ പാറ്റി ഷൈനിയർ, ട്രെന്റ് ഹോണ്, പോൾ കിം, ജാക്കീ ഫ്രാൻസ്വാ ഏഞ്ചൽ തുടങ്ങിയവർ മുതിർന്നവർക്കും യുവജങ്ങൾക്കുമായി വേദികൾ പങ്കിടും. വിവിധ ആത്മീയ സംഘടനകളുടെ കൂടിച്ചേരലുകളും, സെമിനാറുകളും, ഫോറങ്ങളും കണ്വൻഷനിലുണ്ട്.
ഉദ്ഘാടനത്തിൽ നടക്കുന്ന ഫാ. ഷാജി തുന്പേച്ചിറയിന്റെ സംവിധാനത്തിലുള്ള പ്രത്യേക ദൃശ്യാവിഷ്കാര പരിപാടിയും, തൈക്കുടം ബ്രിഡ്ജ് ലൈവ് മ്യൂസിക്കും കണ്വൻഷൻ സ്റ്റേജുകളെ പ്രകന്പനം കൊള്ളിക്കും.
ജോയ് ആലൂക്കാസ് ജൂവൽസും അമേരിക്കയിലെ പ്രമുഖ മലയാളി വ്യവസായി സിജോ വടക്കന്റെ ട്രിനിറ്റി ഗ്രൂപ്പുമാണ് കണ്വൻഷന്റെ മുഖ്യ പ്രായോജകർ. കണ്വൻഷനിൽ നടത്തുന്ന പ്രത്യേക റാഫിൾ ടിക്കറ്റിൽ വിജയിയെ കാത്തിരിക്കുന്നത് ജോയ് ആലുക്കാസ് സ്പോണ്സർ ചെയ്തിരിക്കുന്ന ബിഎംഡബ്ല്യു കാറാണ്.
അമേരിക്കയിലെ വിവിധ ദൃശ്യമാധ്യമ പ്രവർത്തകരും കണവൻഷൻ റിപ്പോർട്ട് ചെയ്യുവാൻ എത്തിചേരും. കണ്വൻഷൻ രജിസ്റ്റർ ചെയ്യുവാൻ ഇനിയും സൗകര്യം ഉണ്ടായിരിക്കുനതാണന്നു മീഡിയാ ചെയർ സണ്ണി ടോം അറിയിച്ചു.
വെബ് സൈറ്റ് https://smnchouston.org
റിപ്പോർട്ട്: മാർട്ടിൻ വിലങ്ങോലിൽ