കാരറ്റ് അലുവ
ചുരണ്ടിയ കാരറ്റ് രണ്ടരക്കപ്പ്, പാൽ നാലു കപ്പ്, പഞ്ചസാര മൂന്നു കപ്പ്, നെയ്യ് മുക്കാൽ കപ്പ്, വാനില ഒരു ടീസ്പൂൺ, കശുവണ്ടി പരിപ്പ് ചതച്ചതും മുന്തിരിയും കൂടി അരക്കപ്പ്.
ഉണ്ടാക്കുന്നവിധം
കട്ടിയുള്ള ഒരു പാൻ ചൂടാക്കി പാലൊഴിച്ച് കാരറ്റ് ചുരണ്ടിയത് ഇട്ട് വേവിച്ച് പറ്റിച്ചെടുക്കുക.
പറ്റിത്തുടങ്ങിയാൽ പഞ്ചസാര ചേർത്തിളക്കുക. ഇതോടൊപ്പം കുറെശെയായി നെയ്യ് ചേർത്ത് കൊടുക്കുക. വിടാതെ ഇളക്കണം. പാത്രം വിട്ടുവരാൻ തുടങ്ങിയാൽ പാനിക്കുക. ഡ്രൈ ഫ്രൂട്സ് ചേർത്ത് ഇളക്കി നല്ലതുപോലെ മുറുകി വന്നാൽ ഇറക്കിവച്ച് നെയ്യ് തൂത്ത ഒരു പരന്ന പാത്രത്തിലിട്ട് ഒന്നു പരത്തിവയ്ക്കുക. നല്ലതുപോലെ തണുത്തതിനുശേഷം ഇഷ്ടമുള്ള ആകൃതിയിൽ മുറിച്ച് ഉപയോഗിക്കാം.
<b>കശുവണ്ടി ദഫി
കശുവണ്ടി പൊടിച്ചത് ഒരു കപ്പ്, പഞ്ചസാര പൊടിച്ചത് മുക്കാൽ കപ്പ്, നെയ്യ് അരക്കപ്പ്, അൽമോൻഡ് എസൻസ് അര ടീസ്പൂൺ, വെള്ളം മുക്കാൽ കപ്പ്, പാൽ ഒരു കപ്പ്.
ഉണ്ടാക്കുന്നവിധം
കശുവണ്ടിപ്പൊടി പാൽ ചേർത്ത് നല്ലതുപോലെ അരച്ചെടുത്ത് ചുവട് കട്ടിയുള്ള ഒരു പാനിൽ ഒഴിച്ച് ഇളക്കി വറ്റിക്കുക. കുറുകിത്തുടങ്ങിയാൽ പഞ്ചസാരയും വെള്ളവും ചേർത്തിളക്കുക. പിന്നെ നെയ്യും കുറെശെയിട്ട് നല്ലതുപോലെ കുറുകിയാൽ എസൻസ് ചേർത്തിളക്കി ഇറക്കിവയ്ക്കുക. നെയ്യ് പുരട്ടിയ ഒരു പരന്ന പാത്രത്തിൽ ആക്കി നല്ലതുപോലെ പരത്തിയെടുത്ത് തണുപ്പിച്ച് കട്ടകളാക്കി മുറിച്ചു വിളന്പാം.
ജിലേബി
ഉഴുന്നുപരിപ്പ് ഒരു കപ്പ്, കേസരിപ്പൊടി ഒരുനുള്ള്, പഞ്ചസാര രണ്ടു കപ്പ്, വെള്ളം ഒരു കപ്പ്, റോസ് എസൻസ് അല്പം, വറുക്കാൻ ആവശ്യത്തിന് ഡാൽഡയോ നെയ്യോ.
ഉണ്ടാക്കുന്നവിധം
ഉഴുന്ന് കുതിർത്ത് വെണ്ണപോലെ അരച്ചെടുക്കുക. കേസരിയും എസൻസും ചേർത്തിളക്കി വയ്ക്കുക. പഞ്ചസാര ഒരു കപ്പ് വെള്ളത്തിൽ ഉരുക്കി പാനിയാക്കുക. നെയ്യ് ചൂടാക്കി ഒറ്റതുളയുള്ള അച്ചിൽ മാവുവച്ച് പൂപോലെ വീഴ്ത്തുക. ഉടനെ പാനിയിൽ ഇട്ട് എടുത്തുവയ്ക്കാം.
(തയാറാക്കിയത് ഓമന ജേക്കബ്)
കസ്റ്റേർഡ് പൗഡർ ഹൽവാ
ചേരുവകൾ: കസ്റ്റേർഡ് പൗഡർ 1 കപ്പ് (വാനില ഫ്ളേവർ)
പഞ്ചസാര3 കപ്പ്
വെള്ളം 4 കപ്പ്
അണ്ടിപ്പരിപ്പ് 15 എണ്ണം, ചെറുതായി അരിഞ്ഞത്.
നെയ്യ് 3 ടേ. സ്പൂൺ
തയാറാക്കുന്ന വിധം:
ചുവട് കട്ടിയുള്ള ഒരു പാൻ അടുപ്പത്ത് വച്ച് അതിൽ പഞ്ചസാരയും കസ്റ്റേർഡ് പൗഡറും വെള്ളവും എടുത്ത് കട്ട കെട്ടാതെ നന്നായി ഇളക്കുക. ഉയർന്ന തീയിൽ വച്ച് ജെല്ലി പരുവം ആകുംവരെ ഒരു തടിത്തവികൊണ്ട് ഇളക്കുക.
ഇനി 1 ടേ.സ്പൂ. നെയ്യൊഴിച്ചിളക്കുക. 3 മിനിറ്റ് ഇളക്കിയശേഷം 1 ടേ. സ്പൂ. നെയ്യ് കൂടി ചേർത്ത് നന്നായി ഇളക്കുക. ഇനിയത് നന്നായി കുറുകി, ഒട്ടാത്ത പരുവമായാൽ 1 ടേ. സ്പൂ. നെയ്യ് കൂടി ചേർത്തിളക്കുക. തിളക്കം വന്നു തുടങ്ങിയാൽ നെയ്യ് വശങ്ങളിൽ നിന്നും വിട്ട് ഊറിയൂറി വരും. ഉടൻ അണ്ടിപ്പരിപ്പ് നുറക്കിയത് ഇടുക. നന്നായി ഇളക്കി നെയ്യ് തടവിയ ഒരു സ്റ്റീൽ പ്ലേറ്റിലേക്ക് പകർന്ന് 12 മണിക്കൂർ ഫ്രിഡ്ജിൽ വക്കുക. അതിനുശേഷം മറ്റൊരു സ്റ്റീൽ പ്ലേറ്റിലേക്കിത് കമഴ്ത്തുക. കഷ്ണങ്ങളാക്കി വിളന്പുക.
ബീറ്റ്റൂട്ട് ബർഫി
ചേരുവകൾ: ബീറ്റ്റൂട്ട് ഗ്രേറ്റ് ചെയ്തത് അര കപ്പ്
തേങ്ങ ചുരണ്ടിയത് അര കപ്പ്
പഞ്ചസാര 1 കപ്പ്
നെയ്യ് 1 ടീസ് സ്പൂൺ
അണ്ടിപ്പരിപ്പ് 1 ടേ. സ്പൂൺ.
ഏലയ്ക്കാപ്പൊടി അര ടീസ് സ്പൂൺ
തയാറാക്കുന്ന വിധം:
ബീറ്റ് റൂട്ട് ചുരണ്ടി, കഴുകി, ഗ്രേറ്റ് ചെയ്യുക. ഒരു സ്റ്റീൽപ്ലേറ്റിൽ എണ്ണ തടവി തയാറാക്കിവയ്ക്കുക. ഒരു പാത്രത്തിൽ ബീറ്റ് റൂട്ട് തേങ്ങ‍യും ഇട്ട് നന്നായി വഴറ്റുക. 10 മിനിറ്റോളം ചെറുതീയിൽ വയ്ക്കുന്പോൾ പച്ചമണം മാറിയിരിക്കും. പഞ്ചസാരയിട്ട് ഇളക്കുന്പോൾ നിറം മാറുന്നതായി കാണാം. നെയ്യിൽ കുറച്ച് എടുത്ത് ഒരു ചെറിയ പാനിൽ ഒഴിച്ച് അണ്ടിപ്പരിപ്പിട്ട് വറുക്കുക. പൊൻ നിറമായാൽ കോരിവയ്ക്കുക. മിശ്രിതം കട്ടിയാകുന്നത് കാണാം. എല്ലാംകൂടി ഒറ്റക്കെട്ടായി വരുന്നതും കാണാം. ചെറുതീയിൽ വച്ച് തുടരെ ഇളക്കുക. ഇനിയിത് നെയ്യ് തടവി വച്ചിരിക്കുന്ന പ്ലേറ്റിലേക്ക് ഇടുക. മുകൾവശം നിരപ്പാക്കുക. ചൂടോടെ തന്നെ ചെറുകഷ്ണങ്ങൾ ആക്കുക. ആറിയതിനുശേഷം വായു കടക്കാത്ത പാത്രത്തിലിട്ട് അടച്ച് സൂക്ഷിക്കുക.
സേറ്റ് ആൻഡ് ക്യാരറ്റ് ലഡ്ഡു
ചേരുവകൾ: ക്യാരറ്റ് ഗ്രേറ്റ് ചെയ്തത് 1 കപ്പ്
കൊപ്ര ഗ്രേറ്റ് ചെയ്തത് 1 കപ്പ്
ഈന്തപ്പഴം ഗ്രേറ്റ് ചെയ്തത് കപ്പ്
റവ 1 കപ്പ്
ഉണക്കമുന്തിരിങ്ങ
കാൽ കപ്പ്
ഏലയ്ക്കാപ്പൊടി
അല്പം
തയാറാക്കുന്ന വിധം:
1 കപ്പ് ഈന്തപ്പഴം എടുത്ത് കുരുനീക്കി മിക്സി ജാറാലാക്കി നന്നായടിച്ച് പേസ്റ്റ് രൂപത്തിലാക്കുക. വെള്ളം ചേർക്കാതെ അരയ്ക്കണം. ഒരു പാൻ അടുപ്പത്ത് വച്ചിട്ട് റവയിട്ട് വറുത്ത് ബ്രൗൺ നിറമാക്കുക. ഒരു വലിയ ബൗളെടുത്ത് അതിലേക്ക് എല്ലാ ചേരുവകളും ഇട്ടിളക്കുക. ഇനി നന്നായി കുഴച്ച് ഉരുളകളാക്കുക.
( തയാറാക്കിയത് ഇന്ദു നാരായൺ)