ന്യൂയോർക്ക്: അമേരിക്കയിലെ ന്യൂയോർക്ക് വിമാനത്താവളത്തിൽ ലാൻഡിംഗിനിടെ എയർ കാനഡ വിമാനം റൺവേയിലുണ്ടായിരുന്ന അഗ്നിശമന ട്രക്കുമായി കൂട്ടിയിടിച്ച് പൈലറ്റും കോ പൈലറ്റും മരിച്ചു.
ഞായറാഴ്ച രാത്രി ലാ ഗാർദിയ വിമാനത്താവളത്തിലായിരുന്നു അപകടം. മറ്റൊരു വിമാനത്തിൽനിന്ന് പുക ഉയരുന്നതുകണ്ട് പരിശോധിക്കാൻ റൺവേ മുറിച്ചുകടന്ന് ട്രക്ക് പോകവേയായിരുന്നു അപകടം.
വിമാനത്തിന്റെ മുൻഭാഗം തകർന്നു. 72 യാത്രക്കാരും നാലു ക്രൂ അംഗങ്ങളുമായിരുന്നു വിമാനത്താവളത്തിലുണ്ടായിരുന്നത്. പരിക്കേറ്റ 39 യാത്രക്കാരെയും ക്രൂ അംഗങ്ങളെയും സമീപത്തെ ആശുപത്രികളിൽ പ്രവേശിപ്പിച്ചു. ഏതാനും പേർക്ക് ഗുരുതര പരിക്കാണ്. മറ്റുള്ളവർ ആശുപത്രി വിട്ടു. ട്രക്കിൽ സഞ്ചരിച്ചിരുന്ന രണ്ട് പോർട്ട് അഥോറിറ്റി ജീവനക്കാർക്കും പരിക്കേറ്റു.
അപകടത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്. അപകടത്തെത്തുടർന്ന് തിങ്കളാഴ്ച ഉച്ചയ്ക്ക് രണ്ടു വരെ വിമാനത്താവളം അടച്ചിട്ടു.