Leader Page
ആർട്ടിഫിഷൽ ഇന്റലിജൻസ് (AI) ലോകത്ത് പുതിയൊരു യുദ്ധത്തിന് തിരിതെളിഞ്ഞിരിക്കുകയാണ്. പ്രമുഖ എഐ ഗവേഷണ സ്ഥാപനമായ ആന്ത്രോപിക് (Anthropic) പുറത്തിറക്കിയ പുത്തൻ ടൂളുകൾ ആഗോള ഐടി രംഗത്തെയും കോർപറേറ്റ് ലോകത്തെയും അക്ഷരാർഥത്തിൽ പിടിച്ചുലച്ചിരിക്കുന്നു. മുൻ ഓപ്പൺ എഐ ഗവേഷകരും എക്സിക്യൂട്ടീവുകളും ചേർന്ന് 2021ൽ സ്ഥാപിച്ച ഈ കമ്പനി, സുരക്ഷയ്ക്കും വിശ്വാസ്യതയ്ക്കും മുൻഗണന നൽകിക്കൊണ്ടാണ് തങ്ങളുടെ ‘ക്ലോഡ്’ (Claude) മോഡലുകളെ അവതരിപ്പിച്ചിരിക്കുന്നത്. എന്നാൽ, വെറുമൊരു ചാറ്റ്ബോട്ട് എന്നതിലുപരി, മനുഷ്യനൊപ്പം ജോലി ചെയ്യുന്ന ഒരു ‘സഹപ്രവർത്തകനായി’ (Co-worker) എഐ മാറുന്ന കാഴ്ചയാണ് നാം ഇപ്പോൾ കാണുന്നത്.
ക്ലോഡ് ഓപസും ഏജന്റിക് എഐയുടെ വരവും
ആന്ത്രോപിക്കിന്റെ ഏറ്റവും നൂതനമായ ‘ക്ലോഡ് ഓപസ്’ മോഡലുകൾ കോഡിംഗിലും സങ്കീർണമായ ഡാറ്റാ വിശകലനത്തിലും അസാമാന്യമായ പ്രകടനമാണ് കാഴ്ചവയ്ക്കുന്നത്. ഇതിൽ ഏറ്റവും ശ്രദ്ധേയമായത് ‘ക്ലോഡ് കോവർക്ക്’ എന്ന എഐ ടൂളാണ്. ഒരു മനുഷ്യ സഹായിയെപ്പോലെ തന്നെ കാര്യങ്ങൾ ആസൂത്രണം ചെയ്യാനും നടപ്പിലാക്കാനും ഇതിന് സാധിക്കും. ഒരു വശത്ത് ക്ലോഡ് ഓപസ് 4.6 പോലുള്ള മോഡലുകൾ സാങ്കേതികമായി മികച്ചുനിൽക്കുമ്പോൾ, മറുവശത്ത് അത് വൈറ്റ് കോളർ തൊഴിൽ മേഖലകളിൽ വലിയ ചലനങ്ങൾ സൃഷ്ടിക്കുന്നു. ഡോക്യുമെന്റുകൾ തയാറാക്കുക, വലിയ ഡാറ്റകൾ നിമിഷനേരംകൊണ്ട് വിശകലനം ചെയ്യുക, മീറ്റിംഗുകൾ സംഗ്രഹിക്കുക, കോഡിംഗ് നടത്തുക തുടങ്ങിയ ജോലികൾ ക്ലോഡ് ഇപ്പോൾ അനായാസം കൈകാര്യം ചെയ്യുന്നു.
നിയമ സ്ഥാപനങ്ങളിൽ നടക്കുന്ന കരാറുകളുടെ പരിശോധന, നോൺ ഡിസ്ക്ലോഷർ എഗ്രിമെന്റുകളുടെ പരിശോധന, ലീഗൽ സമ്മറി തയാറാക്കൽ തുടങ്ങിയവയ്ക്കായി രൂപകൽപ്പന ചെയ്ത ‘ക്ലോഡ് ലീഗൽ ഏജന്റ്’ ഇതിനോടകം ചർച്ചയായിക്കഴിഞ്ഞു. സാധാരണയായി ജൂനിയർ അഭിഭാഷകരോ ക്ലർക്കുമാരോ ചെയ്തിരുന്ന ഇത്തരം ജോലികൾ എഐ ഏറ്റെടുക്കുമ്പോൾ അത് ആ മേഖലയിലെ തൊഴിൽ സാധ്യതകളെ സാരമായി ബാധിക്കും.
ഭീഷണി നേരിടുന്ന തൊഴിൽ മേഖലകൾ
ക്ലോഡ് പോലുള്ള നൂതന ടൂളുകൾ ഏറ്റവും കൂടുതൽ ബാധിക്കാൻ പോകുന്നത് ആവർത്തന സ്വഭാവമുള്ള ജോലികളെയാണ്. വിവർത്തകർ, കോപ്പി റൈറ്റർമാർ, കണ്ടന്റ് ക്രിയേറ്റർമാർ എന്നിവർക്ക് എഐയുടെ കടന്നുകയറ്റം വലിയ വെല്ലുവിളിയാകുമ്പോൾ, കസ്റ്റമർ സപ്പോർട്ട്, ഡാറ്റാ അനലിറ്റിക്സ് മേഖലകളെ എഐ ഏജന്റുകൾ ഇതിനോടകം കൈയടക്കിത്തുടങ്ങി. ഷെഡ്യൂളിംഗ്, ബുക്ക് കീപ്പിംഗ് തുടങ്ങിയ അഡ്മിനിസ്ട്രേറ്റീവ് ജോലികളും ഓട്ടോമേഷന്റെ ഭീഷണിയിലാണ്. ആഗോള ഐടി ഔട്ട്സോഴ്സിംഗ് മേഖലയിൽ അടുത്ത നാല് വർഷത്തിനുള്ളിൽ ഒമ്പതു മുതൽ 12 ശതമാനം വരെ വരുമാന ഇടിവുണ്ടാകുമെന്ന് വിദഗ്ധർ മുന്നറിയിപ്പ് നൽകുന്നു. വലിയ ടീമുകൾക്ക് പകരം ചുരുക്കം ജീവനക്കാരെയും കൂടുതൽ എഐ ഏജന്റുകളെയും ഉപയോഗിക്കുന്ന കമ്പനികളുടെ നയം ‘ഫ്രഷേഴ്സിന്’ തൊഴിൽ വിപണിയിൽ വലിയ പ്രതിസന്ധിയാണ് സൃഷ്ടിക്കുന്നത്.
ഇന്ത്യൻ സാഹചര്യവും ‘അൺഎംപ്ലോയബിലിറ്റി’യും
ഇന്ത്യൻ ഐടി, ബിപിഒ മേഖലകളിൽ എഐ സൃഷ്ടിക്കുന്ന ആഘാതം പ്രവചനാതീതമാണ്. നിലവിൽ 16 ലക്ഷത്തോളം പേർ ജോലി ചെയ്യുന്ന ബിപിഒ മേഖലയിൽ, ‘ഏജന്റിക് എഐ’ ടൂളുകളുടെ വരവോടെ കസ്റ്റമർ സപ്പോർട്ട് ജോലികളിൽ 70-80 ശതമാനം വരെ കുറവുണ്ടാകാൻ സാധ്യതയുണ്ടെന്ന് റിപ്പോർട്ടുകൾ വ്യക്തമാക്കുന്നു. 58 ലക്ഷം പേർക്ക് തൊഴിൽ നൽകുന്ന ഇന്ത്യൻ ഐടി വ്യവസായത്തിൽ 2031ഓടെ 15 ലക്ഷത്തോളം ജോലികൾ എഐ ഭീഷണിയിലാകുമെന്ന് നാസ്കോം കണക്കാക്കുന്നു. ജെമിനി 3ന്റെ കരുത്തിൽ ഗൂഗിൾ അവതരിപ്പിച്ച ‘ആന്റിഗ്രാവിറ്റി’ പോലുള്ള പ്ലാറ്റ്ഫോമുകൾ സോഫ്റ്റ്വേർ നിർമാണത്തെ ‘ഏജന്റ് യുഗ’ത്തിലേക്ക് നയിക്കുകയാണ്. കോഡിംഗിന് പകരം എഐ ഏജന്റുകളെ നിയന്ത്രിക്കുന്ന സൂപ്പർവൈസർമാരായി ഡെവലപ്പർമാർ മാറുന്നതോടെ ഉത്പാദനക്ഷമത കൂടുമെങ്കിലും അടിസ്ഥാന കോഡിംഗ് ജോലികൾ ചെയ്യുന്നവർക്ക് ഇത് വലിയ ഭീഷണിയാണ്.
ഇന്ത്യയിലെ ബിരുദധാരികളിൽ പകുതിയോളം പേർക്കും എഐ നൈപുണ്യങ്ങൾ ഇല്ലെന്നത് ‘അൺഎംപ്ലോയബിലിറ്റി’ എന്ന വലിയ പ്രതിസന്ധിയിലേക്ക് വിരൽ ചൂണ്ടുന്നു. വേൾഡ് ഇക്കണോമിക് ഫോറത്തിന്റെ നിരീക്ഷണമനുസരിച്ച്, ഇന്ത്യൻ തൊഴിൽശക്തിയുടെ പകുതിയോളം പേർക്ക് അടുത്ത മൂന്ന് വർഷത്തിനുള്ളിൽ പുനർപരിശീലനം അനിവാര്യമാണ്. പഴയ രീതിയിലുള്ള ജോലി പരിചയംകൊണ്ടു മാത്രം ഇനി തൊഴിൽ വിപണിയിൽ പിടിച്ചുനിൽക്കാൻ കഴിയില്ല.
അവസരങ്ങളുടെ പുതിയ വാതിലുകൾ
എങ്കിലും, ചരിത്രത്തിലെ എല്ലാ സാങ്കേതിക വിപ്ലവങ്ങളും പുതിയ അവസരങ്ങൾ തുറന്നിട്ടുണ്ട്. എഐ ടൂളുകളെ നിയന്ത്രിക്കാനും അവയുടെ ഫലം പരിശോധിക്കാനും ‘പ്രോംപ്റ്റ് എൻജിനിയറിംഗ്’ പോലുള്ള പുതിയ തരം തൊഴിലുകൾ രൂപപ്പെട്ടുവരുന്നു. മനുഷ്യനു മാത്രം സാധ്യമാകുന്ന സർഗാത്മകതയും വൈകാരിക ബുദ്ധിയും ആവശ്യമായ മേഖലകളിൽ എഐക്ക് പരിമിതികളുണ്ട്. എഐയുടെ കൃത്യമായ വിനിയോഗം 2035ഓടെ ഇന്ത്യൻ സമ്പദ്വ്യവസ്ഥയിൽ 1.7 ട്രില്യൺ ഡോളറിന്റെ അധിക നേട്ടമുണ്ടാക്കുമെന്നാണ് നിതി ആയോഗിന്റെ പ്രവചനം.
ആന്ത്രോപിക്കിന്റെ ക്ലോഡ് പോലുള്ള ടൂളുകൾ ലോകത്തെ മാറ്റിമറിക്കുമെന്ന് ഉറപ്പാണ്. ജോലികൾ എളുപ്പമാകുന്നതിനോടൊപ്പംതന്നെ, നിലവിലുള്ള തൊഴിൽ സംസ്കാരത്തിൽ വലിയ മാറ്റങ്ങളും ഇത് സൃഷ്ടിക്കും. മാറുന്ന കാലത്തിനനുസരിച്ച് സ്വയം നവീകരിക്കുക എന്നതാണ് ഈ എഐ യുഗത്തിൽ അതിജീവിക്കാനുള്ള ഏക പോംവഴി. സാങ്കേതികവിദ്യയെ ഭയപ്പെടുന്നതിനു പകരം അതിനെ ഒരു സഹപ്രവർത്തകനായി കണ്ട് ഉപയോഗിക്കാൻ പഠിക്കുകയാണ് നാം ചെയ്യേണ്ടത്.
(കാഞ്ഞിരപ്പള്ളി അമൽജ്യോതി എന്ജിനിയറിംഗ് കോളജിലെ കംപ്യൂട്ടർ സയന്സ് & എന്ജിനിയറിംഗ് വിഭാഗം മേധാവിയാണ് ലേഖകന്.)
Sports
ന്യൂഡൽഹി: കേന്ദ്ര ബജറ്റിൽ കായിക മേഖലയ്ക്കും വമ്പൻ പ്രഖ്യാപനങ്ങളാണുള്ളത്. ഇന്ത്യയെ ലോകത്തിലെ കായിക ശക്തിയാക്കി മാറ്റുക എന്ന ലക്ഷ്യത്തോടെ ‘ഖേലോ ഇന്ത്യ മിഷൻ’ കൂടുതൽ കരുത്തോടെ ആരംഭിക്കുമെന്ന് ധനമന്ത്രി പ്രഖ്യാപിച്ചു.
2036-ലെ ഒളിമ്പിക്സ് ഇന്ത്യയിൽ നടത്തുന്നതിനുള്ള ഒരുക്കങ്ങൾ ഗ്രാസ്റൂട്ട് തലം മുതൽ ആരംഭിക്കുക. കായിക ഉപകരണങ്ങളുടെ നിർമാണം, സ്പോർട്സ് സയൻസ്, ഗവേഷണം എന്നിവയിൽ ലക്ഷക്കണക്കിന് പുതിയ തൊഴിലവസരങ്ങൾ സൃഷ്ടിക്കപ്പെടും. കായിക മന്ത്രാലയത്തിനുള്ള വിഹിതം ഏകദേശം 3,794 കോടി രൂപയായി ഉയർത്തി. ഇതിൽ 1,000 കോടി രൂപ ഖേലോ ഇന്ത്യ പദ്ധതിക്ക് മാത്രമായി നീക്കിവച്ചു.
സാംസ്കാരിക രംഗത്തിന് വേണ്ടിയും പ്രഖ്യാപനങ്ങളുണ്ട്. സാംസ്കാരിക ടൂറിസം പ്രാത്സാഹിപ്പിക്കും. സാരനാഥ്, ഹസ്തിനാപുരം ഉൾപ്പെടെ ഇന്ത്യയിലെ 15 പുരാവസ്തു/പൈതൃക കേന്ദ്രങ്ങളെ ലോകോത്തര വിനോദസഞ്ചാര കേന്ദ്രങ്ങളായി വികസിപ്പിക്കും. ഉത്തർപ്രദേശിലെ സാരനാഥ്, ഹസ്തിനാപുരം എന്നിവയെ ‘വൈബ്രന്റ് കൾച്ചറൽ ഡെസ്റ്റിനേഷനുകൾ’ ആക്കി മാറ്റും. ഇത് പ്രാദേശിക ടൂറിസത്തിന് വൻ കുതിപ്പ് നൽകും.
മൂന്നിടങ്ങളിൽ അന്താരാഷ്ട്ര ട്രക്കിങ് കേന്ദ്രങ്ങള് തുടങ്ങും. ഹിമാചൽ പ്രദേശിലും ഉത്തരാഖണ്ഡിലും ജമ്മുകാഷ്മീരിലും ആണ് അന്താരാഷ്ര ട്രക്കിംഗ് കേന്ദ്രങ്ങൾ ആരംഭിക്കുന്നത്.
SUNDAY DEEPIKA
ബയോടെക്നോളജിയിൽ എംടെക് കരസ്ഥമാക്കിയ ബിന്ധ്യ ബാലകൃഷ്ണൻ എന്ന യുവ സംരംഭക താൻ സ്വായത്തമാക്കിയ അറിവ് പ്രതിബന്ധങ്ങളെ അതിജീവിച്ച് സൃഷ്ടിപരമാക്കിയപ്പോൾ അതൊരു പുതുചരിത്രമായി. ഇന്ന് മാസം പതിനായിരത്തിലധികം ടിഷ്യൂകൾച്ചർ തൈകൾ ഉത്പാദിപ്പിക്കുന്ന വലിയ സംരംഭകയാണ് തൃശൂർ ജില്ലയിലെ വെള്ളാങ്കല്ലൂർ സ്വദേശിയായ ഈ 39കാരി. അനേകം കർഷകർക്കു വലിയ സഹായമായി "പ്ലാന്റ് മിൽ' എന്ന ഇവരുടെ സംരംഭം.
അധ്യാപകൻ നൽകിയ സ്പാർക്ക്
ഭർത്താവും നഴ്സറി വിദ്യാർഥിയായ മകൻ വിഷ്ണുവുമായി ബംഗളുരുവിൽ കഴിയുന്നതിനിടയിലാണ് ഐടി എൻജിനീയറായ ഭർത്താവ് വിജേഷിനു നാട്ടിലേക്കു സ്ഥലംമാറ്റം കിട്ടിയത്. ഇതാണു വഴിത്തിരിവായത്. അതേക്കുറിച്ച് ബിന്ധ്യതന്നെ പറയട്ടെ:
"എംടെക് കഴിഞ്ഞിട്ടും വെറുതെയിരിക്കേണ്ടിവരുന്നതിന്റെ ചെറിയൊരു സങ്കടം ഉള്ളിലുണ്ടായിരുന്നു. കുഞ്ഞിന്റെ കാര്യം കുടുംബം ഏറ്റെടുത്താൽ എന്തെങ്കിലുമൊരു ജോലിയോ ബിസിനസോ നടത്താലോയെന്നൊരു ചിന്ത മനസിൽ മുളയെടുത്തു. ബയോടെക്നോളജിക്കാർക്കു നാട്ടിൽ ജോലി സാധ്യത കുറവായതിനാൽ സ്വന്തമായൊരു ബിസിനസ് തന്നെയാണ് ഉത്തമമെന്ന് മനസിലുറപ്പിച്ചു.
അപ്പോഴാണ് ചെന്നൈയിൽ ഗവേഷണ വിദ്യാർഥിയായിരിക്കുന്പോൾ ഗവേഷണസംഘം തലവനായിരുന്ന പ്രഫ. എസ്. സീനി നാട്ടിലൊരു ടിഷ്യുകൾച്ചർ ലാബ് തുടങ്ങൂ എന്നുപറയാറുള്ളത് ഓർമവന്നത്. പിന്നെ കൂടുതലൊന്നും ആലോചിച്ചില്ല. പഴയ പ്രഫസറെ വിളിച്ചു. വാഴയാണ് നല്ലതെന്നും കയറ്റുമതിമൂല്യമുള്ള ഗ്രാന്റ്നെയിൻ ആണ് വാണിജ്യത്തിന് ഏറ്റവും ഉത്തമമെന്നും ഉപദേശിച്ചു. കൂടാതെ കേരളത്തിലുള്ള ശിഷ്യൻ ഡോ. ഹേമന്തിനെ വിദഗ്ധോപദേശത്തിനായി ചുമതലപ്പെടുത്തുകയും ചെയ്തു.
പത്രവാർത്തയിലൂടെ ചെങ്ങാലിക്കോടനിലേക്ക്
കേരള ഫിനാൻഷ്യൽ കോർപറേഷനിൽനിന്നു പത്തുലക്ഷം രൂപയുടെ പലിശരഹിത വായ്പ നേടി ലാബ് തയാറാക്കുന്നതിനിടയിലാണ് വഴിത്തിരിവായ പത്രവാർത്ത വായിക്കാനിടയായത്. ചെങ്ങാലിക്കോടന്റെ ടിഷ്യൂകൾച്ചർ തൈകൾ ആവശ്യപ്പെട്ട് ഏതാനും കർഷകർ കാർഷിക സർവകലാശാലയെ സമീപിച്ചെന്നായിരുന്നു വാർത്ത.
ടിഷ്യുകൾച്ചറിൽ ചെങ്ങാലിക്കോടനെന്ന പരീക്ഷണം വൻ വിജയമായി. ഭൗമസൂചികപദവിയുള്ള ഈ നേന്ത്രവാഴയുടെ മാതൃസ്ഥലമായ എരുമപ്പെട്ടി, പഴയന്നൂർ, ചൊവ്വന്നൂർ മേഖലകളിലെ തോട്ടങ്ങൾ സന്ദർശിച്ച് ഗുണമേന്മയുള്ള മാതൃകോശങ്ങൾ സംഭരിച്ചു.
പ്ലാന്റ് മിൽ എന്ന സ്വപ്നം
2015 ഓഗസ്റ്റ് 28ലെ തിരുവോണനാളിൽ ഞങ്ങളുടെ അഞ്ചാം വിവാഹവാർഷിക ദിനത്തിൽ വെള്ളാങ്കല്ലൂരിലെ വീടിനോടുചേർന്ന് ആരംഭിച്ച ടിഷ്യൂകൾച്ചർ യൂണിറ്റിനു "പ്ലാന്റ് മിൽ' എന്നു പേരിട്ടു. സാധാരണ ടിഷ്യുകൾച്ചർ യൂണിറ്റുകളിൽ ടിഷ്യുകൾച്ചറിന് പ്രാഥമികമായി ഉപയോഗിക്കുന്നത് വാഴയുടെ മാങ്ങ് (കിഴങ്ങ്) ആണെങ്കിൽ നമ്മൾ വാഴയുടെ കുടപ്പനിൽനിന്ന്് (കൂന്പ് അഥവാ ചുണ്ട്) തൈകൾ ഉത്പാദിപ്പിക്കുന്ന നൂതന സാങ്കേതിക വിദ്യയാണ് ഉപയോഗിക്കുന്നത്. സാധാരണ രീതിയിൽ വാഴമാങ്ങിൽനിന്ന് 500-600 തൈകൾ ലഭിക്കുന്നതിനുപകരം ഈ രീതിയിൽ പരമാവധി 200-300 തൈകളേ ലഭിക്കൂ. പക്ഷേ ഉത്പാദനക്ഷമതയും പ്രതിരോധശേഷിയും തനിമയും ഉള്ള തൈകൾ ലഭിക്കുമെന്നതാണു സവിശേഷത.
പ്രാഥമിക ഹാർഡനിംഗും രണ്ടാംഘട്ട ഹാർഡനിംഗും (ദൃഢീകരണം) വെല്ലുവിളിയായിരുന്നെങ്കിലും അതും വിജയമായി. ഫീൽഡ് ട്രയലിന്റെ ഭാഗമായി പല കർഷകർക്കും ടിഷ്യു തൈകൾ നൽകി. മുള്ളൂർക്കരയിലുള്ള വിശ്വനാഥന്റെ കൃഷിയിടത്തിൽ ആദ്യ ടിഷ്യു ചെങ്ങാലിക്കോടൻ കുലച്ചു. മൂന്നു മാസത്തിനുശേഷം വിളവെടുത്ത് പഴുപ്പിച്ചപ്പോൾ ചെങ്ങാലിക്കോടന്റെ അസൽ രുചിയും നിറവും ഗുണവും. തുടർന്ന് എരുമപ്പെട്ടിയിലെ ബാബു 1000 ചെങ്ങാലിക്കോടൻ തൈകൾ വാങ്ങിനട്ടു. കൃത്യമായ പരിപാലനമുറകൾ സ്വീകരിക്കുകയും ജൈവവളം നൽകുകയും ചെയ്തതോടെ 17- 22 കിലോ തൂക്കമുള്ള ലക്ഷണമൊത്ത ചെങ്ങാലിക്കോടൻ കുലകൾ!
മഞ്ചേരിയും ക്വിന്റലും പൂജാകദളിയും
ചെങ്ങാലിക്കോടന്റെ വിജയം മറ്റു പ്രാദേശിക ഇനങ്ങളായ മഞ്ചേരി, ക്വിന്റൽ, തേനി എന്നീ നേന്ത്രൻ ഇനങ്ങളിലേക്കുകൂടി കടക്കാൻ പ്രചോദനമായി. കൂടാതെ കർഷകരുടെ വലിയ ഡിമാന്റിനെത്തുടർന്ന് നിവേദ്യക്കദളി (പൂജാ കദളി), റോബസ്റ്റ്, റെഡ് ബനാന എന്നിവയും. പിന്നീട് അലങ്കാരച്ചെടികളും ടിഷ്യൂകൾച്ചറിൽ ഉത്പാദിപ്പിക്കാൻ തുടങ്ങി. ഇപ്പോൾ അക്വാ പ്ലാന്റുകളും. നേന്ത്രൻ ഇനങ്ങൾക്ക് 30 ഉം പൂജകദളിക്ക് 45 രൂപയും അലങ്കാര ച്ചെടികളുടെ തൈകൾക്ക് ഒന്നിന് 50 രൂപയുമാണ് വില. '- ബിന്ധ്യ പറഞ്ഞു.
ഹൈടെക് ലാബ്
2021 ലാണ് 5000 ചതുരശ്ര അടിയുള്ള പുതിയ ബിൽഡിംഗും ഹൈടെക് ലാബും ഇവർ ആരംഭിച്ചത്. നബാർഡിന്റെയും മാനേജ് ഹൈദരാബാദിന്റെയും സഹകരണത്തോടെ നൽകുന്ന എസിഎബിസി പദ്ധതിപ്രകാരം ലഭിച്ച 25 ലക്ഷം രൂപയുടെ ലോണും ഇതിനു വലിയ സഹായമായി. ഈ തുകയിൽ സ്ത്രീകൾക്ക് 44 ശതമാനം സബ്സിഡിയുണ്ടായതും ഇവർക്കു വലിയ അനുഗ്രഹമായി.
ഫുള്ളി ഓട്ടോമാറ്റിക് ഇലക്ട്രിക്കൽ സ്റ്റെറിലൈസിംഗ് മെഷീൻ, കൾച്ചറിംഗ് ലാബ്, ലാമിനാ റൂം എന്നിവയടങ്ങിയ ബിൽഡിംഗിന് ഒരുകോടിയിലധികം മുതൽമുടക്കുണ്ട്. ടണൽ, ഗ്രീൻ ഹൗസ്, മഴമറ തുടങ്ങിയ സജ്ജീകരണങ്ങളെല്ലാം ഇവിടെയുണ്ട്. ഇന്നിപ്പോൾ ലാബിലും മറ്റുമായി 15 പേർക്ക് ഇവർ നേരിട്ടു തൊഴിൽ നൽകുന്നുണ്ട്. സുഗന്ധവ്യഞ്ജന തൈകൾ ടിഷ്യുകൾച്ചറിൽ ഉത്പാദിപ്പിക്കാനുള്ള പരീക്ഷണത്തിലാണ് ബിന്ധ്യയും സംഘവും. എല്ലാത്തിനും സന്പൂർണ പിന്തുണയുമായി ഭർത്താവും മകനുമുണ്ട്.