District News
കണ്ണൂർ: സൂപ്പർലീഗ് കേരള സീസൺ 2 ന്റെ കലാശപ്പോരാട്ടത്തിന് ജവഹർ മുനിസിപ്പൽ സ്റ്റേഡിയവും കണ്ണൂരും ഇന്ന് സാക്ഷ്യം വഹിക്കും. കണ്ണൂര് വാരിയേഴ്സ് എഫ്സിയും തൃശൂര് മാജിക് എഫ്സിയുമാണ് ഫൈനല് മത്സരം. ഫൈനല് ദിനത്തിലെ കര്ട്ടന് റൈസര് പരിപാടികള് വൈകുന്നേരം ആറിനാരംഭിക്കും. 7.30 നാണ് കിക്ക് ഓഫ്. രാജ്യത്തെ പ്രമുഖ കലാകാരന്മാര് അണിനിരക്കുന്ന പരിപാടികളോടെയാകും ഫൈനല് സായാഹ്നം ആരംഭിക്കുക.
പ്രശസ്ത റാപ്പര് ഗബ്രിയടക്കമുള്ള താരനിരയാണ് ഫൈനല് മത്സരത്തിന് മുന്നോടിയായി നടക്കുന്ന സംഗീത നിശയില് പങ്കെടുക്കുക, വര്ണാഭമായ വെടിക്കെട്ടും ലൈറ്റ് ഷോ അടങ്ങുന്ന മികച്ച ദൃശ്യവിരുന്നാണ് സജ്ജീകരിക്കുന്നത്.
കണ്ണൂര് വാരിയേഴ്സ് എഫ്സി സഹഉടമയും നടനുമായ ആസിഫ് അലി, തൃശൂര് മാജിക് എഫ്സി സഹഉടമയും നടനുമായ കുഞ്ചാക്കോ ബോബന് എന്നിവരുള്പ്പെടെ പ്രമുഖ ചലച്ചിത്ര താരങ്ങള്, കായിക താരങ്ങള്, രാഷ്ട്രീയ പ്രമുഖര് എന്നിവര് ചടങ്ങില് സംബന്ധിക്കും.
പതിനെട്ടായിരം ആരാധകര്ക്ക് കളി നേരിട്ടു കാണാം
ഫെഡറേഷന് കപ്പ്, ഇ.കെ.നായനാര് ഇന്റർനാഷണല് ടൂര്ണമെന്റ്, ശ്രീനാരായണ ട്രോഫി, സിസര്സ് കപ്പ്, കേരള പ്രീമിയര് ലീഗ് തുടങ്ങിയ നിരവധി മത്സരങ്ങള് ജവഹര് സ്റ്റേഡിയം സാക്ഷിയായിട്ടുണ്ട്. അവസാനമായി 2008 ല് നടന്ന ഇ.കെ.നായനാര് ഇന്റർനാഷണല് ട്രോഫിയിലാണ് ഫുട്ബോള് മത്സരം കാണാന് ഗാലറി നിറഞ്ഞു കവിഞ്ഞത്. 35,000 പേര്ക്ക് ഇരിക്കാവുന്ന സ്റ്റേഡിയത്തിന്റെ ഒരു വശം നിലവില് ബലക്ഷയം കാരണം ഉപയോഗിക്കാന് സാധിക്കുകയില്ല. അതിനാല് 18,000 ത്തിലധികം പേര്ക്കായിരിക്കും ഫൈനല് മത്സരം കാണാന് സാധിക്കുക. കണ്ണൂര് വാരിയേഴ്സിന്റെ അഞ്ച് ഹോം മത്സരത്തില് നിന്ന് 66,596 പേരാണ് ജവഹര് സ്റ്റേഡിയത്തില് കളികാണാനെത്തിയത്.
ഫുട്ബോൾ സംസ്കാരം തിരിച്ചു വരുന്നുവെന്ന് സൂപ്പർ ലീഗ് അധികൃതർ
ഗാലറികളിലെ ആവേശകരമായ അന്തരീക്ഷം സംസ്ഥാനത്ത് ലൈവ് ഫുട്ബോൾ സംസ്കാരത്തിന്റെ ശക്തമായ തിരിച്ചുവരവിനെയാണ് സൂചിപ്പിക്കുന്നതെന്നും സൂപ്പർ ലീഗ് കേരള മാനേജിംഗ് ഡയറക്ടർ ഫിറോസ് മീരാൻ പറഞ്ഞു.
സ്റ്റേഡിയങ്ങൾക്ക് പുറമെ, ഡിജിറ്റൽ പ്ലാറ്റ്ഫോമുകളിലും ലീഗ് വൻ വിജയമായിരുന്നു. 11.6 ലക്ഷത്തിലധികം പേരാണ് സ്പോർട്സ് ഡോട്ട് കോം വഴി തത്സമയം മത്സരം കണ്ടത്. സോണി, ദൂരദർശൻ, ഇത്തിസലാത്ത് ഇവിഷൻ എന്നിവയിലൂടെയുള്ള സംപ്രേക്ഷണവും മുൻ റിക്കാർഡുകളെല്ലാം ഭേദിക്കുമെന്നാണ് കരുതുന്നത്. ഔദ്യോഗിക ബാർക്ക് റിപ്പോർട്ട് വരുന്നതോടെ ചരിത്രപരമായ കണക്കുകൾ പുറത്തുവരുമെന്ന് പ്രതീക്ഷിക്കുന്നതായി സൂപ്പർ ലീഗ് കേരള ഡയറക്ടറും സിഇഒയുമായ മാത്യു ജോസഫ് പറഞ്ഞു. ഫൈനൽ മത്സരത്തിന്റെ ടിക്കറ്റുകൾ ഏതാണ്ട് പൂർണമായും വിറ്റുതീർന്നത് ഫൈനലിനെതിരെയുള്ള ആരാധകരുടെ കാത്തിരിപ്പും ആവേശവും വ്യക്തമാക്കുന്നുവെന്ന് മാത്യു ജോസഫ് പറഞ്ഞു.
വൈകുന്നേരം അഞ്ചുമുതൽ പ്രവേശനം
മത്സരം കാണാനെത്തുന്നവര് ടിക്കറ്റുമായി വൈകുന്നേരം അഞ്ചുമുതൽ സ്റ്റേഡിയത്തിന് അകത്തേക്ക് പ്രവേശിക്കാം. തിരക്ക് നിയന്ത്രിക്കുന്നതിനുള്ള മുന്കരുതലായാണ് സ്റ്റേഡിയത്തിലേക്ക് പ്രവേശിപ്പിക്കുന്നത്.
7.15 ന് സ്റ്റേഡിയത്തിലെ പ്രവേശന ഗെയിറ്റുകള് അടക്കും. ആറുമുതല് ഫൈനലിനോട് അനുബന്ധിച്ചുള്ള പ്രത്യേക പരിപാടികള് നടക്കും. ടിക്കറ്റില് രേഖപ്പെടുത്തിയിട്ടുള്ള സ്ഥലത്തേക്ക് മാത്രമായിരിക്കും മത്സരം കാണാനെത്തുന്നവര്ക്ക് പ്രവേശനം. വിവിഐപി ടിക്കറ്റുള്ളവര് കണ്ണൂര് ജില്ലാ സഹകരണ ബാങ്കിന് എതിര് വശത്തെ ഗെയിറ്റ് നമ്പര് ഒന്നിലൂടെയാണ് സ്റ്റേഡിയത്തില് പ്രവേശിക്കേണ്ടത്.
വിഐപി ടിക്കറ്റുള്ളവര് ഗെയിറ്റ് നമ്പര് രണ്ടിലൂടെയും അമൂല് ഗാലറി ടിക്കറ്റുള്ളര് ഗെയിറ്റ് മൂന്ന്, നാല് എന്നീ ഗെയിറ്റിലൂടെ അകത്തേക്ക് പ്രവേശിക്കാം. സ്നിക്കേഴ്സ് ഗ്യാലറി ടിക്കറ്റുള്ളവര് ഗെയിറ്റ് നമ്പര് ആറ്, ഏഴ് വഴിയും ഓണേഴ്സ് ബോക്സ് ടിക്കറ്റുള്ളവര് ഗെയിറ്റ് നമ്പര് അഞ്ചിലൂടെയും സ്റ്റേഡിയത്തിന് അകത്തേക്ക് പ്രവേശിക്കാവുന്നതാണ്. കണ്ണൂര് വാരിയേഴ്സ് എഫ്സിയുടെ ആരാധകര് അമൂല് ഗാലറിയിലും തൃശൂര് മാജിക് എഫ്സിയുടെ ആരാധകര് സ്നിക്കേഴ്സ് ഗാലറിയിലുമായാണ് ഇരിക്കേണ്ടത്.
Sports
തിരുവനന്തപുരം: കാൽപ്പന്തുകളിക്ക് പുതിയ ആവേശം വിതറിയ സൂപ്പർ ലീഗ് കേരളയിൽ സെമി പോരാട്ടം പിന്നിട്ട് കലാശക്കൊട്ടിന് ഇനി രണ്ടു ദിനം മാത്രം ബാക്കി. ലീഗ് റൗണ്ടിലും സെമി മത്സരങ്ങളിലുമായി വിവിധ സ്റ്റേഡിയങ്ങളിലായി കാൽപ്പന്തുകളിയുടെ ആവേശം വരവേൽക്കാനായി എത്തിയത് 3.79 ലക്ഷം കാണികൾ.
ഒക്ടോബർ രണ്ടിന് കോഴിക്കോട് സ്റ്റേഡിയത്തിൽ പുൽമൈതാനിയിൽ ഈ സീസണിലെ ആദ്യമത്സരത്തിന് പന്തുരുണ്ടപ്പോൾ കാഴ്ച്ചക്കാരായി ഒഴുകിയെത്തിയത് 21,903, പേർ. കാലിക്കറ്റ് എഫ്സിയും ഫോഴ്സാ കൊച്ചിയും തമ്മിലായിരുന്നു ഉദ്ഘാടന മത്സരം. സെമിഫൈനൽ പൂർത്തിയായപ്പോൾ 3,79,238 പേർ.
ഇതേ സ്റ്റേഡിയത്തിൽ തന്നെ ഡിസംബർ 14ന് നടന്ന കണ്ണൂർ വാരിയേഴ്സ് കാലിക്കറ്റ് എഫ്സി ആദ്യ സെമിയിൽ കാണികളുടെ എണ്ണം 29,388 പേർ. ഡിസംബർ 19ന് കണ്ണൂർ മുനിസിപ്പൽ സ്റ്റേഡിയൽ ഫൈനൽ പോരാട്ടത്തിന് വിസിൽ മുഴങ്ങുന്പോൾ കഴിഞ്ഞ വർഷത്തെ കാണികളുടെ റിക്കാർഡ് കുത്തൊഴുക്ക് മറികടക്കുമോ എന്നാണ് അറിയേണ്ടത്.
2024 സൂപ്പർ ലീഗ് ഫൈനലിൽ കാലിക്കറ്റ് എഫ്സിയും ഫോഴ്സാ കൊച്ചിയും കോഴിക്കോട് കോർപ്പറേഷൻ സ്റ്റേഡിയത്തിൽ ഏറ്റുമുട്ടിയപ്പോൾ ആരവവുമായി എത്തിയത് 35,672 പേരായിരുന്നു. ഈ റിക്കാർഡ് കണ്ണൂരിൽ മറികടക്കുമോ എന്നാണ് അറിയേണ്ടത്.
നവംബർ 11ന് നടന്ന കാലിക്കറ്റ്-തൃശൂർ മത്സരം കാണാനായി 20,276 പേരാണ് എത്തിയത്. നവംബർ 19ന് മഞ്ചേരി സ്റ്റേഡിയത്തിൽ മലപ്പുറം എഫ്സിയും കാലിക്കറ്റ് എഫ്സിയും ഏറ്റുമുട്ടിയ്പ്പോൾ ആവേശം വിതറി ഗാലറി അടക്കി വാണത് 22,956 കാണികളായിരുന്നു. കണ്ണൂർ വാരിയേഴ്സും തൃശൂർ മാജിക്സും തമ്മിൽ നവംബർ ഏഴിന് ഏറ്റുമുട്ടിയപ്പോൾ കാല്പന്തുകളിയുടെ പ്രേമികളായ 18,656 പേരാണ് ഗാലറിയിൽ ആർപ്പുവിളികളുമായി എത്തിയത്.
ഏറ്റവും കൂടുതൽ കാണികൾ ഗാലറി കൈയടക്കിയത് കാലിക്കറ്റ് എഫ്സിയുടേയും മലപ്പുറം എഫ്സിയുടേയും തൃശൂർ മാജിക്സിന്റെയും മത്സരങ്ങൾ കാണാനായിരുന്നു. കൊച്ചിയിലും തിരുവനന്തപുരത്തും നടക്കുന്ന എവേ മത്സരങ്ങൾ കാണായി ഈ ടീമുകളുടെ ആരാധകർ എത്തുമായിരുന്നു. കാണികൾ ഏറ്റവും കുറവ് ഇക്കുറികൊച്ചിയിലെ മത്സരങ്ങളിലായിരുന്നു.
ഇതുവരെ കഴിഞ്ഞത് 32 മത്സരങ്ങൾ;പിറന്നത് 79 ഗോളുകൾ...
സൂപ്പർ സലീഗ് കേരളയുടെ രണ്ടാം പതിപ്പിൽ 32 മത്സരങ്ങളാണ് ഇതുവരെ പൂർത്തിയായത്. ഈ മത്സരങ്ങളിലായി 79 ഗോളുകൾ പിറന്നു. ഇനി ബാക്കിയുള്ളത് കലാശപ്പോരാട്ടം മാത്രം. കാലിക്കറ്റ് എഫ്സി, തൃശൂർ മാജിക്സ്, മലപ്പുറം എഫ്സി, കണ്ണൂർ എഫ്സി, തിരുവനന്തപുരം കൊന്പൻസ്, ഫോഴ്സാ കൊച്ചി എഫ്സി എന്നീ ടീമുകളിലായി ആകെ ഇടംപിടിച്ചത് 168 താരങ്ങൾ. ഇതിൽ 36 വിദേശതാരങ്ങളും 132 ഇന്ത്യൻ താരങ്ങളും. 132 ഇന്ത്യൻ താരങ്ങളിൽ തന്നെ 109 മലയാളി താരങ്ങളെന്ന പ്രത്യേകത കേരളാ ഫുട്ബോളിന്റെ വളർച്ചയ്ക്ക് സൂപ്പർ ലീഗ് കേരളയുടെ ഒരു കൈയൊപ്പ് എന്നു പറയാൻ കഴിയും.
ധനകാര്യമാധ്യമങ്ങൾ നല്കുന്ന സൂചനകൾ പ്രകാരമാണെങ്കിൽ 100 കോടി രൂപയാണ് ക്ലബുകളും സംഘാടകരും ചേർന്ന് മത്സരനടത്തിപ്പിനായി ചെലവഴിക്കേണ്ടി വരുന്നത്. കോർപ്പറേറ്റ് സ്ഥാപനങ്ങൾ ഉൾപ്പെടെയുള്ളവ വിവിധ ടീമുകളെ വാങ്ങി മത്സര രംഗത്ത് ഇറക്കിയതോടെ സംസ്ഥാനത്തിൻറെ പല സ്റ്റേഡിയങ്ങളുടേയും അടിസ്ഥാന സൗകര്യങ്ങളിലും കാര്യമായ പുരോഗതി ഉണ്ടായി.
തിരുവനന്തപുരം ചന്ദ്രശേഖരൻനായർ സ്റ്റേഡിയത്തിൽ ഉൾപ്പെടെ മൈതാനം കൂടുതൽ മനോഹരമാക്കുകയും ഇതിന്റെ അറ്റകുറ്റപ്പണികൾ കൃത്യമായി നടത്തുകയും ചെയ്യുന്നു.
താരങ്ങൾക്കും മികച്ച അവസരവും കുഴപ്പമില്ലാത്ത പ്രതിഫലവും ലഭിക്കുന്നു. വരും വർഷങ്ങളിൽ സൂപ്പർ ലീഗ് കേരള കേരളാ ഫുട്ബോളിനെ സൂപ്പറാക്കുമെന്ന വിശ്വാസത്തോടെയാണ് കാല്പന്തുപ്രേമികൾ കാത്തിരിക്കുന്നത്.
Sports
തൃശൂർ: കോർപറേഷൻ സ്റ്റേഡിയത്തിലെ മിനി പൂരത്തിൽ ട്രിനിഡാഡ് ആൻഡ് ടുബാഗോ സ്്രെടെക്കർ മാർക്കസ് ജോസഫിന്റെ ഹാട്രിക് മികവിൽ മലപ്പുറം എഫ്സിയെ കീഴടക്കി ആതിഥേയരായ തൃശൂർ മാജിക് എഫ്സി സൂപ്പർ ലീഗ് കേരള ഫുട്ബോൾ ഫൈനലിൽ പ്രവേശിച്ചു. രണ്ടാം സെമിഫൈനലിൽ ഒന്നിനെതിരേ മൂന്നു ഗോളിനായിരുന്നു മാജിക്കിന്റെ വിജയം.
ആദ്യ പകുതിയുടെ 26-ാം മിനിറ്റിൽ ഫ്രീകിക്കിൽനിന്നാണ് മാർക്കസ് ജോസഫ് ഗോൾവേട്ട തുടങ്ങിയത്. ആദ്യപകുതിയുടെ ഇഞ്ചുറി ടൈമിൽ അതേ പൊസിഷനിൽ ലഭിച്ച ഫ്രീകിക്കിൽനിന്ന് മൊറോക്കൻ മിഡ്ഫീൽഡർ അബ്ദലേ എൽഫോർസി മലപ്പുറത്തെ ഒപ്പമെത്തിച്ചു. എന്നാൽ 84, 95 മിനിറ്റുകളിലെ ഗോളുകളിലൂടെ മാർക്കസ് ജോസഫ് തൃശൂരിനെ ഫൈനലിലേക്കു കൈപിടിച്ചുകയറ്റി.
19നു വൈകിട്ട് ആറിനു നടക്കുന്ന ഫൈനലിൽ തൃശൂർ മാജിക് എഫ്സി കണ്ണൂർ വാരിയേഴ്സിനെ നേരിടും. വാരിയേഴ്സിന്റെ ഹോംഗ്രൗണ്ടായ കണ്ണൂർ ജവഹർ മുനിസിപ്പൽ സ്റ്റേഡിയത്തിലാണ് ഫൈനൽ. ആദ്യസെമിയിൽ നിലവിലെ ചാന്പ്യന്മാരായ കാലിക്കട്ട് എഫ്സിയെ ഏകപക്ഷീയമായ ഒരു ഗോളിനു കീഴടക്കി കണ്ണൂർ ഫൈനലിലെത്തിയിരുന്നു.
പരിക്കിനെത്തുടർന്ന് അഞ്ചു കളികളിൽ പുറത്തിരുന്ന മാർക്കസ് ജോസഫിന്റെ കളിയാട്ടമാണ് മലപ്പുറത്തിന്റെ പോരാട്ടത്തെ മറികടക്കാൻ തൃശൂരിനെ പ്രാപ്തരാക്കിയത്.
ടൂർണമെന്റിലെ ടോപ് സ്കോറർ ജോണ് കെന്നഡിയെ കൂടാതെ ഇറങ്ങിയ മലപ്പുറത്തിനു ഫിജിയൻ ഫോർവേഡ് റോയ് കൃഷ്ണ ഫോമിലാവാത്തതു തലവേദനയായി. മാജിക് എഫ്സി തുടക്കത്തിൽ ആക്രമിച്ചുകളിച്ചെങ്കിലും എൽഫോർസി കളി നിയന്ത്രിച്ചതോടെ മലപ്പുറം പതിയെ കളംപിടിച്ചു.
25-ാം മിനിറ്റിൽ മാർക്കസ് ജോസഫ് ഫ്രീകിക്കിലൂടെ മാജിക്കിനെ മുന്നിലെത്തിച്ചു. ആദ്യപകുതി അവസാനിക്കാനിരിക്കെ സമനിലഗോളെത്തി.
84-ാം മിനിറ്റില് മാർക്കസ് ജോസഫ് തന്നെ വീണ്ടും തൃശൂരിനെ മുന്നിലെത്തിച്ചു. ഐ ലീഗിലെ മുൻ ടോപ് സ്കോറർ കൂടിയായ മാർക്കസ് ജോസഫിന്റെ ഇടംകാല് ഗ്രൗണ്ടർ മലപ്പുറം ഗോൾകീപ്പർ മുഹമ്മദ് ജസീനെ കീഴടക്കി. 96-ാം മിനിറ്റിലായിരുന്നു മാർക്കസിന്റെ ഹാട്രിക് ഗോൾ.
Sports
തൃശൂർ: ഹോം ഗാലറിയിൽ ഇരന്പിയാർക്കുന്ന ‘ബ്ലൂ ഗഡീസ്’ ആരാധകപ്പടയ്ക്കുമുന്നിൽ മായാജാലം തീർക്കാൻ മാജിക് എഫ്സിയും മാജിക്കിന്റെ പ്രതിരോധപ്പൂട്ട് തകർക്കാൻ മലപ്പുറം എഫ്സിയും ഇന്ന് സൂപ്പർ ലീഗ് കേരള ഫുട്ബോൾ സെമിഫൈനലിൽ പോരിനിറങ്ങും. തൃശൂർ കോർപറേഷൻ സ്റ്റേഡിയത്തിൽ രാത്രി 7.30നാണ് മത്സരം.
ലീഗ് റൗണ്ടിൽ രണ്ടാമതു ഫിനിഷ് ചെയ്ത തൃശൂരിന്റെ പ്രതിരോധനിരയും മൂന്നാംസ്ഥാനക്കാരായി എത്തുന്ന മലപ്പുറത്തിന്റെ മുന്നേറ്റനിരയും തമ്മിലാകും ഇന്നു പോരാട്ടം.
റഷ്യക്കാരൻ ഹെഡ് കോച്ച് ആന്ദ്രെ ചെർണിഷോവിന്റെ പ്രതിരോധതന്ത്രങ്ങൾ തന്നെയാണ് മാജിക് എഫ്സിയെ ഇത്തവണ മുന്നോട്ടു നയിച്ചത്. ഗോൾ അടിച്ചുകൂട്ടിയില്ലെങ്കിലും ഗോൾ വഴങ്ങാതിരുന്നാലും ഫുട്ബോളിൽ മുന്നേറാമെന്ന, വിഖ്യാത മാനേജർമാരായ ഹൊസേ മൊറീഞ്ഞോയുടെയും ഡിയാഗോ സിമിയോണിയുടെയും തന്ത്രംതന്നെയാണ് ചെർണിഷോവും മാജിക് എഫ്സിയിൽ പയറ്റിയത്.
മറുവശത്ത് വിദേശതാരങ്ങളുടെ കാൽക്കരുത്തിലാണു മലപ്പുറം ഇറങ്ങുന്നത്. ബ്രസീലുകാരൻ സ്ട്രൈക്കർ ജോണ് കെന്നഡിയും ഫിജിയൻ സ്ട്രൈക്കർ റോയ് കൃഷ്ണയും ചേർന്ന മുന്നേറ്റനിര തന്നെയാണ് അവരുടെ ശക്തി. ഗോളടിക്കുകയും അടിപ്പിക്കുകയും ചെയ്യുന്ന സ്പാനിഷ് മിഡ്ഫീൽഡർ ഐറ്റോർ അൽഡലിറും മികച്ച ഫോമിലാണ്.
സീസണിൽ എട്ടു ഗോളുകളുമായി ഗോൾവേട്ടക്കാരിൽ ഒന്നാമതുള്ള ജോണ് കെന്നഡിയും റോയ് കൃഷ്ണയും പരിക്കിന്റെ പിടിയിലാണെന്നതാണ് മലപ്പുറം ക്യാന്പിനെ ആശങ്കയിലാഴ്ത്തുന്നത്.
സീസണിൽ തൃശൂരും മലപ്പുറവും രണ്ടുതവണ നേർക്കുനേർ വന്നപ്പോൾ ഇരുടീമും ഓരോ ജയം നേടി.
Sports
തൃശൂർ: സൂപ്പർ ലീഗ് കേരള ഫുട്ബോളിൽ ലീഗ് റൗണ്ടിലെ അവസാന രണ്ടു മത്സരത്തിലേക്കുകൂടി ആവേശം കോരിയൊഴിച്ച് കണ്ണൂർ വാരിയേഴ്സ്. തൃശൂർ മാജിക് എഫ്സിയെ കീഴടക്കി കണ്ണൂർ സെമിസാധ്യത സജീവമാക്കി.
ലീഗ് റൗണ്ടിലെ അവസാനമത്സരത്തിൽ ജയത്തിൽ കുറഞ്ഞതൊന്നും മതിയാവില്ലെന്ന അവസ്ഥയിൽ തൃശൂർ കോർപറേഷൻ സ്റ്റേഡിയത്തിലിറങ്ങിയ കണ്ണൂർ വാരിയേഴ്സ് തൃശൂർ മാജിക് എഫ്സിയെ ഏകപക്ഷീയമായ രണ്ടു ഗോളിനാണു കീഴടക്കിയത്.
നേരത്തേതന്നെ സെമി ഉറപ്പിച്ചതിനാൽ ഫസ്റ്റ് ഇലവനിലെ എട്ടു താരങ്ങളെ കരയ്ക്കിരുത്തിയ മാജിക്കിനെതിരേ ആദ്യപകുതിയുടെ 42-ാം മിനിറ്റിൽ പത്താം നമ്പറുകാരൻ സ്ട്രൈക്കർ അസിയർ ഗോമസും ഇഞ്ചുറിസമയത്തിന്റെ ഏഴാം മിനിറ്റിൽ അണ്ടർ 20 ഇന്ത്യൻതാരംകൂടിയായ എബിൻദാസുമാണ് കണ്ണൂരിന്റെ ഗോളുകൾ നേടിയത്.
ഇന്നും നാളെയും നിർണായകപോരാട്ടങ്ങൾ
തൃശൂരിനെതിരായ ജയത്തോടെ കണ്ണൂർ 10 കളിയിൽനിന്ന് 13 പോയിന്റുമായി മൂന്നാംസ്ഥാനത്തേക്ക് ഉയർന്നു. ഒമ്പതു കളികളിൽ 12 പോയിന്റുമായി നാലാമതുള്ള തിരുവനന്തപുരം കൊമ്പൻസിനു കരുത്തരായ കാലിക്കട്ട് എഫ്സിക്കെതിരായ ഇന്നത്തെ കളി ഇതോടെ നിർണായകമായി.
11 പോയിന്റുമായി അഞ്ചാമതുള്ള മലപ്പുറത്തിന് നാളെ മഞ്ചേരിയിലെ സ്വന്തം മൈതാനത്ത് താരതമ്യേന ദുർബലരായ ഫോഴ്സ കൊച്ചിക്കെതിരേയാണ് അവസാനകളിയെന്നതിനാൽ, ഇന്നു ജയത്തിൽ കുറഞ്ഞതൊന്നും കൊമ്പൻസിന് ആശ്വാസംനൽകില്ല.
20 പോയിന്റുമായി നേരത്തേതന്നെ സെമി ഉറപ്പിച്ച കാലിക്കട്ട് എഫ്സി പ്രമുഖതാരങ്ങൾക്ക് ഇന്നു വിശ്രമം അനുവദിച്ചാൽ സ്വന്തം മൈതാനത്ത് കൊമ്പൻസിനു സാധ്യതയേറും. കൊമ്പൻസ് ജയിക്കുകയും മലപ്പുറം ഫോഴ്സയോടു തോൽവിയോ സമനിലയോ വഴങ്ങുകയും ചെയ്താൽ മലപ്പുറം പുറത്താകും. കൊമ്പൻമാർ തോൽക്കുകയും മലപ്പുറം സമനില വഴങ്ങുകയും ചെയ്താൽ ഇരുടീമിനും 12 പോയിന്റാകും. ഇതോടെ മികച്ച ഗോൾശരാശരിയുമായി മലപ്പുറം സെമിയിലേക്കു മുന്നേറും. മലപ്പുറം തോറ്റാലും കൊമ്പൻമാർ മുന്നേറും.
തിരുവനന്തപുരവും മലപ്പുറവും അവസാനകളികൾ ജയിച്ചാൽ കണ്ണൂർ വാരിയേഴ്സ് പുറത്താവും. മലപ്പുറം ജയിക്കുകയും തിരുവനന്തപുരം സമനില വഴങ്ങുകയും ചെയ്താൽ തിരുവനന്തപുരത്തിനും കണ്ണൂരിനും 13 പോയിന്റാകും. മെച്ചപ്പെട്ട ഗോൾവ്യത്യാസത്തിൽ തിരുവനന്തപുരം സെമിയിലേക്കു മുന്നേറും. മൈനസ് രണ്ട് ആണ് കണ്ണൂരിനു ഗോൾവ്യത്യാസം. കൊമ്പൻസിന്റേതു പ്ലസ് ഒന്നും.
സെമി തൃശൂരിലും കോഴിക്കോടും
ഏഴാം തീയതി തൃശൂർ കോർപറേഷൻ സ്റ്റേഡിയത്തിൽ നടക്കുന്ന ആദ്യസെമിയിൽ തൃശൂർ മാജിക് എഫ്സി ലീഗ് റൗണ്ടിലെ മൂന്നാംസ്ഥാനക്കാരെ നേരിടും. 10നു ലീഗിലെ നാലാംസ്ഥാനക്കാരുമായി കാലിക്കട്ട് എഫ്സി കോഴിക്കോട് ഇഎംഎസ് കോർപറേഷൻ സ്റ്റേഡിയത്തിൽ രണ്ടാംസെമിയിൽ കൊമ്പുകോർക്കും. 14നു കോഴിക്കോട് ഇഎംഎസ് കോർപറേഷൻ സ്റ്റേഡിയത്തിൽ തന്നെയാണു ഫൈനൽ.
Sports
തൃശൂർ: കോഴിക്കോട് ഇഎംഎസ് കോർപറേഷൻ സ്റ്റേഡിയത്തിലെ സ്വന്തം കാണികൾക്കു മുന്നിലേറ്റ നാണക്കേടിനു പൂരപ്പറന്പിൽത്തന്നെ കണക്കുതീർത്ത് നിലവിലെ ചാന്പ്യൻമാരായ കാലിക്കട്ട് എഫ്സി. സൂപ്പർ ലീഗ് കേരളയിലെ ആദ്യ രണ്ടു സ്ഥാനക്കാർ കോർപറേഷൻ സ്റ്റേഡിയത്തിൽ ഏറ്റുമുട്ടിയപ്പോൾ ആതിഥേയരായ മാജിക് എഫ്സിയെ എതിരില്ലാത്ത ഒരു ഗോളിനു കീഴടക്കി നിലവിലെ ചാന്പ്യൻമാരായ കാലിക്കട്ട് ഒന്നാംസ്ഥാനത്തേക്കു കുതിച്ചു.
86-ാം മിനിട്ടിൽ പകരക്കാരനായെത്തിയ ഷാബാസ് അഹമ്മദിന്റെ ക്രോസിനു തലവച്ച അർജന്റീനക്കാരൻ ഫെഡറിക്കോ ബൊയാസോ ഫ്ലിയൂറിയാണ് നിർണായകഗോൾ സ്കോർ ചെയ്തത്. ജയത്തോടെ ഏഴു മത്സരത്തിൽ നാലു ജയവും രണ്ടു സമനിലയുമായി കാലിക്കട്ടിനു14 പോയിന്റായി. അത്രയും കളിയിൽ 13 പോയിന്റുമായി തൃശൂർ മാജിക് എഫ്സി രണ്ടാംസ്ഥാനത്തുണ്ട്.
പ്രതിരോധാത്മക ഫുട്ബോളിന്റെ വക്താവായ മാനേജർ ആന്ദ്രെ ചെർണിഷോവിനു കീഴിൽ ഇതുവരെ മൂന്നു ഗോളുകൾമാത്രം വഴങ്ങിയ മാജിക് എഫ്സി അതേ തന്ത്രവുമായാണു കാലിക്കട്ടിനെയും നേരിടാനിറങ്ങിയത്. സിറ്റിംഗ് ബാക്ക് ആൻഡ് കൗണ്ടർ അറ്റാക്ക് ശൈലിയിലായിരുന്നു തൃശൂരിന്റെ കളി. ഗോൾ വഴങ്ങാതെ കൗണ്ടർ അറ്റാക്കിലൂടെ ഒരു ഗോൾ നേടി മൂന്നുപോയിന്റ് കീശയിലാക്കാനായിരുന്നു ചെർണിഷോവ് ആശാന്റെ പദ്ധതി.
സൂപ്പർലീഗിൽ ഇതുവരെ രണ്ടു തവണ മാജിക് എഫ്സിയോടു തോറ്റ കാലിക്കട്ട് ഇന്നലെ ശ്രദ്ധയോടെയാണു തുടങ്ങിയത്. തുടക്കം മുതൽ അറ്റാക്ക് ചെയ്തുകളിച്ചതും കാലിക്കട്ട്തന്നെ. പ്രസ് ചെയ്തു കളിച്ച കാലിക്കട്ട് ബ്ലോക്ക് ഒഴിഞ്ഞ അവസരങ്ങളില്ലൊം ഗോൾവല ലക്ഷ്യംവച്ച് ലോംഗ് റേഞ്ചറുകൾ ഉതിർത്തുകൊണ്ടിരുന്നെങ്കിലും മാജിക്കിന്റെ വെറ്ററൻ ഗോൾകീപ്പർ ലക്ഷ്മികാന്ത് കട്ടിമണിക്കു മേലനങ്ങേണ്ടിവന്നില്ല. മധ്യനിരയിൽ അർജന്റീനക്കാരായ ജൊനാഥൻ പെരേരയും ബൊയാസോ ഫ്ലിയൂറിയും മുഹമ്മദ് ആസിഫും നിരന്തരം ലോംഗ് റേഞ്ചുറുകൾ ഉതിർത്തെങ്കിലും ലക്ഷ്യം അകന്നു.
മറുവശത്ത് പ്രതിരോധത്തിലൂന്നി കളിച്ച മാജിക് എഫ്സി കൗണ്ടർ അറ്റാക്കിലൂടെ ഗോൾ കണ്ടെത്താനുള്ള ശ്രമത്തിലായിരുന്നു. മുന്നേറ്റനിരയിലെ സെർബിയൻ ജയന്റ് ഇവാൻ മാർകോവിച്ചിനു ചില അവസരങ്ങൾ ലഭിച്ചെങ്കിലും കാലിക്കട്ടിന്റെ ഗോൾകീപ്പർ ഹജ്മലിനെ കീഴടക്കാനായില്ല.
രണ്ടാം പകുതിയുടെ തുടക്കത്തിൽത്തന്നെ പെനാൽട്ടി ബോക്സിന്റെ ഇടതുമൂലയിൽനിന്നു തൃശൂരിനു ലഭിച്ച ഗോൾഡൻ ചാൻസ് മാർക്കോവിച്ച് പുറത്തേക്കടിച്ചുകളഞ്ഞു. തൊട്ടുപിന്നാലെ കാലിക്കട്ടിന്റെ അജ്സലും സുവർണാവസരം നഷ്ടമാക്കി.
ഇന്റർകാശി എഫ്സിയെ ഐ ലീഗ് ചാന്പ്യൻമാരാക്കുന്നതിൽ പ്രധാന പങ്കുവഹിച്ച മുൻ ബ്ലാസ്റ്റേഴ്സ് താരംകൂടിയായ കെ. പ്രശാന്ത് രണ്ടാം പകുതിയിൽ കളത്തിലെത്തിയതോടെ കാലിക്കട്ടിന്റെ വലതുവിംഗിനു ജീവൻ വച്ചു.
ബ്രൂണോയുടെ പാസിൽ നിന്ന് അജ്സലിന്റെ ഷോട്ട് കട്ടിമണിയെ മറികടന്നെങ്കിലും ഇഞ്ചുകളുടെ വ്യത്യാസത്തിൽ പുറത്തേക്കുപറന്നപ്പോൾ മാജിക് എഫ്സി ആരാധകക്കൂട്ടം ബ്ലൂ ഗഡീസ് ഗാലറിയിൽ ആശ്വാസംകൊണ്ടു.
86-ാം മിനിട്ടിൽ കാലിക്കട്ട് കാത്തിരുന്ന മുഹൂർത്തമെത്തി. പകരക്കാരനായി കളത്തിലെത്തിയ ഷാബാസ് വലതുവിംഗിൽനിന്ന് ബോക്സിലേക്കു മറിച്ചുനൽകിയ ക്രോസ് ബൊയാസോ ഫ്ലിയൂറി ഹെഡറിലൂടെ വലയിലെത്തിച്ചപ്പോൾ തൃശൂരിന്റെ ബ്ലൂ ഗഡീസ് ആർമി ഗാലറിയിൽ മൂകരായി.
Sports
തൃശൂർ: ദശാബ്ദത്തിനുശേഷം പൂരനഗരിയിലേക്കു തിരിച്ചെത്തിയ പ്രഫഷണൽ ഫുട്ബോൾ ആവേശത്തിനു സോക്കർ മാന്ത്രികരുടെ വിജയതാളം. സൂപ്പർ ലീഗ് കേരള ഫുട്ബോളിൽ തൃശൂരിലെ ആദ്യ ഹോം മത്സരത്തിൽ മാജിക് എഫ്സി 2-1നു മലപ്പുറം എഫ്സിയെ തോൽപ്പിച്ചു. ഇതോടെ തൃശൂർ 13 പോയിന്റുമായി ലീഗ് ടേബിളിന്റെ ഒന്നാംസ്ഥാനത്തേക്കു കുതിച്ചു.
മത്സരം തുടങ്ങി നാലാം മിനിറ്റിൽ ബിബിൻ അജയന്റെ ക്രോസിൽ ഇവാൻ മാർക്കോവിച്ചിന്റെ ഗോളിലൂടെ മാജിക് എഫ്സി മുന്നിലെത്തി. രണ്ടുമിനിറ്റിനകം മലപ്പുറം എഫ്സിയുടെ ജോണ് കെന്നഡി മികച്ചൊരു ലോംഗ് ഷോട്ടിലൂടെ ടീമിനായി സമനിലഗോൾ നേടി. 27-ാം മിനിറ്റിൽ, തൃശൂർ മാജിക് എഫ്സിക്കുവേണ്ടി എസ്.കെ. ഫായിസ് രണ്ടാംഗോൾ കുറിച്ചു. ഇത്തവണയും ബിബിൻ അജയന്റെ ക്രോസിലാണ് ഗോൾ വന്നത്.
മലപ്പുറത്തിന്റെ ആക്രമണത്തോടെയാണ് രണ്ടാംപകുതി ആരംഭിച്ചത്. ബിബിൻ അജയന്റെയും അലൻ ജോണിന്റെയും തേജസ് കൃഷ്ണയുടെയും പ്രതിരോധവും ഗോൾകീപ്പർ ലക്ഷ്മികാന്ത് കട്ടിമണിയുടെ ഒന്നാന്തരം സേവുകളും മലപ്പുറത്തെ സമനില ഗോളിൽനിന്നും അകറ്റി.