4

ഗാന്ധിനഗർ: ഗുജറാത്തിലെ വഡോദര ജില്ലയിൽ മുതലയുടെ ആക്രമണത്തിൽ യുവാവ് മരിച്ചു. ദേവ് നദിയിൽ വെള്ളം കുടിക്കാനെത്തിയ മിഥുൻ മഹേഷ്ഭായ് വാസവ (22) യാണ് മരിച്ചത്.

കന്നുകാലികളെ മേയ്ക്കുന്നതിനിടെയിലാണ് മിഥുൻ നദിക്കരയിൽ വെള്ളം കുടിക്കാൻ എത്തിയത്. ഏകദേശം 12 അടിയോളം നീളമുള്ള മുതല മിഥുന്‍റെ നേരെ ചാടിവീഴുകയും വെള്ളത്തിലേക്ക് വലിച്ചിഴക്കുകയും ചെയ്തു. യുവാവിന്‍റെ വായിൽ പിടിച്ച് മുതല മണിക്കൂറുകളോളം വെള്ളത്തിലൂടെ നീന്തി.

വാഗോഡിയ പോലീസ്, വനം വകുപ്പ്, അഗ്നിശമന സേന എന്നിവയിലെ സംഘങ്ങൾ സ്ഥലത്തെത്തി തിരച്ചിൽ നടത്തിയെങ്കിലും മുതലയുടെ വലിപ്പവും നദിയിലെ കലങ്ങിയ വെള്ളം തടസമായി. രക്ഷാപ്രവർത്തകർ അടുത്തെത്തുന്പോഴെല്ലാം മുതല  ആഴങ്ങളിലേയ്ക്ക് മുങ്ങുകയായിരുന്നു. മിഥുന്‍റെ മൃതദേഹം കണ്ടെത്തിയിട്ടില്ല.

വഡോദരയ്ക്ക് ചുറ്റുമുള്ള നദികളിൽ മതലകളുടെ എണ്ണം കൂടുതലാണ്. നദിക്കരയിൽ പോകുന്നവർ അതീവ ജാഗ്രത പാലിക്കണമെന്ന് ജില്ലാ ഭരണകൂടം നിർദേശം നൽകി.