Business
ബംഗളൂരു: നിക്ഷേപകർ ആശങ്കപ്പെടേണ്ടെന്നും ഒരുതരത്തിലുള്ള കള്ളപ്പണ ഇടപാടും കന്പനിയിൽ നടന്നിട്ടില്ലെന്നും വിശദീകരിച്ച് കോൺഫിഡന്റ് ഗ്രൂപ്പ് മാനേജിംഗ് ഡയറക്ടര് ടി.എ.ജോസഫ്. കന്പനി ചെയർമാൻ സി.ജെ. റോയി ജീവനൊടുക്കി ഒരാഴ്ചയ്ക്കുശേഷം സമൂഹമാധ്യമത്തിലൂടെ പുറത്തുവിട്ട വീഡിയോയിലാണ് മാനേജിംഗ് ഡയറക്ടറുടെ വിശദീകരണം. മരണശേഷം ചെയർമാനെ അപകീർത്തിപ്പെടുത്തുന്ന ശ്രമങ്ങൾ നടക്കുകയാണെന്നും അദ്ദേഹം അഭിപ്രായപ്പെട്ടു.
ചെയർമാന്റെ മരണത്തിനുപിന്നാലെ കന്പനിയുമായി സഹകരിച്ചിരുന്നവർക്ക് ആശങ്ക ഉണ്ടാകുന്നത് സ്വാഭാവികമാണെന്ന് സന്ദേശത്തിൽ ടി.എ. ജോസഫ് പറയുന്നു.
കന്പനിയെ സംബന്ധിച്ച് ഒരാളും ആശങ്കപ്പെടേണ്ട സാഹചര്യമില്ല. സമൂഹ മാധ്യമങ്ങളിലൂടെ കുറെപ്പേര് തെറ്റായ കാര്യങ്ങള് പ്രചരിപ്പിക്കുന്നുണ്ട്. എന്നാൽ ആരുടെയെങ്കിലും പൈസയോ കള്ളക്കടത്ത് പണമോ കമ്പനിയിലില്ല. അക്കാര്യത്തില് നിക്ഷേപകര്ക്ക് തന്നെ വിശ്വസിക്കാമെന്നും അദ്ദേഹം പറഞ്ഞു.
അതിനിടെ സി.ജെ. റോയിയുടെ മരണത്തെക്കുറിച്ചുള്ള പ്രത്യേക സംഘത്തിന്റെ അന്വേഷണം പുരോഗമിക്കുകയാണ്. അന്വേഷണസംഘം അടുത്തദിവസങ്ങളിൽ കൊച്ചിയിൽ എത്തിയേക്കും. കര്ണാടക പോലീസും അന്വേഷണത്തിനായി കൊച്ചിയിലെത്തുമെന്നാണ് വിവരം.
Kerala
തൃശൂർ: സൗത്ത് കളമശേരി ആസ്ഥാനമായി പ്രവർത്തിച്ചിരുന്ന അഗ്രി ടൂറിസം മൾട്ടി സ്റ്റേറ്റ് കോ-ഓപ്പറേറ്റീവ് സൊസൈറ്റി ഉടമകൾ 100 കോടിയിലേറെ രൂപയുടെ നിക്ഷേപവുമായി കമ്പനി പൂട്ടി മുങ്ങിയെന്ന ആരോപണവുമായി നിക്ഷേപകർ രംഗത്ത്.
തൃശൂരിലെ റീജണൽ ഓഫീസ് ഉൾപ്പെടെ കേരളത്തിനകത്തും പുറത്തുമുള്ള 14 ബ്രാഞ്ചുകളും ഹെഡ് ഓഫീസും അടച്ചുപൂട്ടി ചെയർമാൻ ഉൾപ്പെടെ കുടുംബാംഗങ്ങളെല്ലാവരും ഒളിവിൽ പോയതായി നിക്ഷേപകർ ആരോപിച്ചു. 1,200 ലേറെ നിക്ഷേപകരുടെ നിക്ഷേപസംഖ്യയും പലിശയുമായി 100 കോടിയിലേറെ രൂപയുടെ തട്ടിപ്പാണ് നടന്നിരിക്കുന്നത്.
എറണാകുളത്തും തൃശൂരുമായി വിവിധ പോലീസ് സ്റ്റേഷനുകളിൽ പരാതികൾ നൽകിയതിനെതുടർന്ന് 32 എഫ്ഐആറുകൾ ഇട്ട് കേസെടുത്തെങ്കിലും മൂന്നു മാസമായിട്ടും കമ്പനി ഡയറക്ടർമാർക്കെതിരേ യാതൊരു നടപടിയും ഉണ്ടാകാത്ത സാഹചര്യത്തിൽ തൃശൂർ, എറണാകുളം കമ്മീഷണർ ഓഫീസുകളിലേക്കു മാർച്ചും തുടർന്ന് സൊസൈറ്റി ചെയർമാൻ മുരളിയുടെ അയ്യന്തോളിലെ വസതിക്കുമുമ്പിൽ അനിശ്ചിതകാല നിരാഹാരസമരവും സംഘടിപ്പിക്കുമെന്ന് നിക്ഷേപകരുടെ കൂട്ടായ്മയായ അറ്റ്കോസ് വിന്നേഴ്സ് അസോസിയേഷൻ ഭാരവാഹികൾ പറഞ്ഞു.
കളക്ടർമാർക്കും പോലീസ് മേധാവിക്കും മുഖ്യമന്ത്രിക്കും ഭീമഹർജികൾ നൽകിയിട്ടും നടപടി ഉണ്ടാകിട്ടില്ല. ഈ സാഹചര്യത്തിൽ ഹൈക്കോടതിയെയും സുപ്രീംകോടതിയെയും സമീപിക്കുമെന്നും ഭാരവാഹികൾ പറഞ്ഞു.
പത്രസമ്മേളനത്തിൽ ആൽഫ്രഡ് ബെന്നോ, വർഗീസ് മൊഴിയിൽ, ജോയ് വർഗീസ്, നെൽസൺ സ്റ്റീഫൻ, സാവൂൾ തോമസ് എന്നിവർ പങ്കെടുത്തു.