National
താനെ: മഹാരാഷ്ട്രയിൽ ഇന്ന് നടക്കാനിരുന്ന അധ്യാപക യോഗ്യതാ പരീക്ഷ മാറ്റിവച്ചു. ചോദ്യപേപ്പര് ചോര്ന്നതിനെത്തുടര്ന്ന് അടിയന്തരമായി പരീക്ഷ നീട്ടിവയ്ക്കുകയായിരുന്നു.
സംഭവവുമായി ബന്ധപ്പെട്ട ഭീവാണ്ഡിയില് നിന്ന് മൂന്നുപേരെ പോലീസ് അറസ്റ്റ്ചെയ്തു. സംസ്ഥാനത്തിനു പുറത്തേക്കും ബന്ധമുള്ള സംഘം അട്ടിമറിക്കു പിന്നിലുണ്ടെന്നാണ് സംശയം.
സംസ്ഥാനത്തെ 1728 കേന്ദ്രങ്ങളിലായി ആറു ലക്ഷത്തിലേറെ ഉദ്യോഗാര്ഥികളാണ് പരീക്ഷയ്ക്കായി രജിസ്റ്റര് ചെയ്തിരുന്നത്.
National
ചെന്നൈ: പ്രദര്ശനാനുമതി കാത്തിരിക്കുന്ന വിജയ് ചിത്രം ‘ജനനായകന്’ ചോര്ന്നു. ചിത്രത്തിന്റെ അഞ്ചര മിനിറ്റോളം ദൈര്ഘ്യമുള്ള എച്ച്ഡി ക്ലിപ്പുകളാണ് പുറത്തുവന്നത്.
സ്വകാര്യ ടെസ്റ്റ് സ്ക്രീനിംഗിനിടെയോ പോസ്റ്റ് പ്രൊഡക്്ഷനിടെയോ പകര്ത്തിയ ദൃശ്യങ്ങളാണെന്നാണ് പ്രാഥമിക നിഗമനം. സംഭവത്തിൽ നിയമനടപടികൾ ആരംഭിച്ചതായി നിർമാതാക്കളായ കെവിഎൻ പ്രൊഡക്്ഷൻസ് അറിയിച്ചു.
വിജയ്യുടെ അവസാന ചിത്രമെന്നാണ് ‘ജനനായകന്’ വിശേഷിപ്പിക്കപ്പെടുന്നത്. എച്ച്. വിനോദ് സംവിധാനം ചെയ്യുന്ന ചിത്രത്തില് പൂജ ഹെഗ്ഡെ, മമിത ബൈജു എന്നിവര് പ്രധാനവേഷങ്ങളിലെത്തുന്നു.
ജനുവരി 10ന് റിലീസ് ചെയ്യാൻ പദ്ധതിയിട്ട ചിത്രം സെന്സര് ബോര്ഡ് അനുമതി വൈകിയതിനെത്തുടര്ന്ന് റിലീസ് നീണ്ടുപോവുകയായിരുന്നു.
Auto
പുതിയ ഐഫോൺ സീരീസ് പുറത്തിറക്കാൻ മാസങ്ങൾ ബാക്കിനിൽക്കെ ഇതു സംബന്ധിച്ച നിരവധി വിവരങ്ങൾ ഓൺലൈനിൽ വന്നുകഴിഞ്ഞു. ഐഫോൺ 18 സീരീസ് പുറത്തിറക്കാൻ കന്പനി ഒരുങ്ങുകയാണ്.
തുടർന്ന് 18 പ്രോയും 18 പ്രോ മാക്സും പുറത്തിറക്കും. ഈ മോഡലുകളെ കുറിച്ച് നിരവധി ചർച്ചകളും വിവരങ്ങളും അടുത്തിടെ പുറത്തുവന്നിരുന്നു. പക്ഷേ കമ്പനി ഔദ്യോഗിക വിവരങ്ങളൊന്നും നൽകിയിട്ടില്ല.
പിൻഭാഗത്തെ സുതാര്യമായ ഫിനിഷ്, പുതിയ നിറങ്ങൾ, മെച്ചപ്പെടുത്തിയ കാമറ സംവിധാനം, കൂടുതൽ ശേഷിയുള്ള ബാറ്ററി എന്നിവയാണ് പ്രധാനമായും ചർച്ചയാകുന്ന മാറ്റങ്ങൾ.
വരാനിരിക്കുന്ന ഐഫോൺ സീരീസിന്റെ ഡിസൈൻ ഭാഷയിൽ വലിയ മാറ്റമൊന്നും ഉണ്ടാകില്ല. കമ്പനി അലുമിനിയം ഫ്രെയിം ഉപയോഗിക്കുന്നത് തുടരും. കൂടാതെ, കമ്പനി ഒരു പുതിയ കളർ വേരിയന്റ് അവതരിപ്പിച്ചേക്കാം.
വരാനിരിക്കുന്ന ഉപകരണത്തിന് 8.8 എംഎം വരെ കനവും 240 ഗ്രാം ഭാരവും ഉണ്ടാകുമെന്നാണ് പ്രതീക്ഷിക്കുന്നത്. ആപ്പിളിന് ഡൈനാമിക് ഐലൻഡ് നീക്കം ചെയ്യുന്നതിനുപകരം മുൻവശത്തെ വലുപ്പം കുറയ്ക്കാൻ കഴിയും.
ഇത് ഉപയോക്താക്കൾക്ക് വലിയ ഡിസ്പ്ലേ നൽകും. പ്രധാനമായും പർപ്പിൾ, ബർഗണ്ടി, കാപ്പി എന്നീ മൂന്ന് കളർവേരിയന്റുകളാകും 18 സീരിസ് അവതരിപ്പിക്കുന്നത്. ഐഫോൺ 18 പ്രോ മാക്സിൽ പ്രോ-മോഷ് പിന്തുണയും 120Hz പുതുക്കൽ നിരക്കുകളുമുള്ള 6.9 ഇഞ്ച് ഒഎൽഇഡി ഡിസ്പ്ലേ പാനൽ ഉണ്ടാകും.
എ20 പ്രോ ചിപ്സെറ്റ് ഉപയോഗിക്കും. 2-നാനോമീറ്റർ പ്രോസസ്സ് ഉപയോഗിച്ച് നിർമ്മിക്കാൻ സാധ്യതയുള്ളതായും സൂചനകൾ ലഭിക്കുന്നുണ്ട്. ഐഫോൺ 18 പ്രോയിലും 18 പ്രോ മാക്സിലും 5,100mAh മുതൽ 5,200mAh വരെയുള്ള ബാറ്ററികൾ കാണും.
18, 18 പ്രോ സീരീസിലെ വരാനിരിക്കുന്ന ഉപകരണങ്ങളിൽ മെച്ചപ്പെട്ട കാമറ സെൻസറുകൾ ഉണ്ടാകും. പ്രധാന സെൻസറിൽ വേരിയബിൾ അപ്പർച്ചർ ഉണ്ടായിരിക്കും, ഇത് മികച്ച നിയന്ത്രണം വാഗ്ദാനം ചെയ്യുന്നു. സാംസംഗ് വികസിപ്പിച്ചെടുത്ത പുതിയ സെൻസർ സാങ്കേതികവിദ്യ കമ്പനി ഉപയോഗിക്കും.
ലോഞ്ച് ടൈംലൈനിനെക്കുറിച്ച് കമ്പനി ഇതുവരെ ഔദ്യോഗിക വിവരങ്ങളൊന്നും പങ്കുവെച്ചിട്ടില്ല. എന്നിരുന്നാലും എല്ലാ വർഷത്തേയും പോലെ, സെപ്റ്റംബറിൽ കമ്പനി പുതിയ ഐഫോൺ സീരീസ് പുറത്തിറക്കുമെന്നാണ് പ്രതീക്ഷിക്കുന്നത്.
Kerala
പുതുക്കാട്: പാചകവാതക പൈപ്പ് ലൈനില് ചോര്ച്ചയുണ്ടായ സംഭവത്തില് നഷ്ടമായത് 63,000 സിലിണ്ടറുകള് നിറയ്ക്കുന്നതിനുള്ള പാചകവാതകമെന്നു കണക്ക്.
കൊച്ചി-സേലം പൈപ്പ് ലൈനില് ഒരടി വ്യാസമുള്ള പൈപ്പിന്റെ 12 കിലോമീറ്റര് വരുന്ന ഭാഗത്താണ് ചോര്ച്ച ഉണ്ടായത്. ഈ സമയം 900 ടണ് പാചകവാതകം പൈപ്പിലുണ്ടായിരുന്നു എന്നുപറയുന്നു.
പൈപ്പ് ലൈനില് നെല്ലായിയിലും മരത്താക്കരയിലുമുള്ള വാല്വുകള് അടച്ചശേഷം ഈ ഭാഗത്തെ ഗ്യാസ് നീക്കംചെയ്ത് വെള്ളംനിറച്ച് പമ്പ് ചെയ്തു വൃത്തിയാക്കിയശേഷം വേണം ചോര്ച്ച അടയ്ക്കാന്. ഇതിനു കുറഞ്ഞതു മൂന്നുദിവസമെടുക്കും. ഈ സമയമത്രയും ചോര്ച്ചയിലൂടെ പുറത്തുപോകുന്ന ഗ്യാസിൽ വെള്ളം പമ്പുചെയ്ത് ശക്തി കുറച്ചുകൊണ്ടിരിക്കുകയും വേണം.
ഇന്നലെ വൈകുന്നേരം ആറുവരെ പുതുക്കാട് അഗ്നിരക്ഷാസേന ആറു യൂണിറ്റ് വെള്ളം ഇതിനായി ഉപയോഗിച്ചു. പൈപ്പിന്റെ ചോര്ച്ചയുള്ള ഭാഗത്തു പുറത്തേക്കുവരുന്ന വാതകവും വെള്ളവുമായി ചേര്ന്ന് ഐസ് രൂപപ്പെടുന്നതു ചോര്ച്ച കുറയാന് സഹായിക്കുമെന്നാണ് ഉദ്യോഗസ്ഥരുടെ പ്രതീക്ഷ.
പെട്രോളിയം കമ്പനി അധികൃതര് തെറ്റായി ലൊക്കേഷന് അടയാളപ്പെടുത്തിയതാണ് പൈപ്പ് മാറി തുളയ്ക്കാന് കാരണമെന്നു കെഎസ്പിപിഎല് അധികൃതര് പറഞ്ഞു.
Kerala
കൊച്ചി: പാക്കിസ്ഥാന് ചാരസംഘടനയായ ഐഎസ്ഐക്കു വിവരം ചോര്ത്തി നല്കിയ കേസില് പിടിയിലായ നേവി ഉദ്യോഗസ്ഥനെ റിമാന്ഡ് ചെയ്തു.
യുപി ആഗ്ര ചിറ്റ്പുര് സ്വദേശിയും കൊച്ചി നാവികത്താവളത്തിലെ ലീഡ് മെക്കാനിക്കുമായ ആദര്ശ് കുമാറിനെ (ലക്കി- 24)യാണു കഴിഞ്ഞദിവസം യുപി ഭീകരവിരുദ്ധ സ്ക്വാഡ് അറസ്റ്റ് ചെയ്തത്. ഇയാള് ഒരു വര്ഷമായി കൊച്ചിയിലാണു ജോലി ചെയ്യുന്നത്.
ഇന്ത്യയുടെ വിമാനവാഹിനികളുടെയും യുദ്ധക്കപ്പലുകളുടെയും അന്തര്വാഹിനികളുടെയും പരിപാലനം, അറ്റകുറ്റപ്പണി, റീ ഫിറ്റ് എന്നിവയുടെ സൂപ്പര് വിഷന് ചുമതലയുള്ള തസ്തികയിലായിരുന്നു ഇയാള്.
നാവികസേനയുടെ യുദ്ധക്കപ്പലുകളുടെ ചിത്രങ്ങളും ദൃശ്യങ്ങളും രേഖകളും ഉള്പ്പെടെയുള്ള നിര്ണായക വിവരങ്ങള് ഐഎസ്ഐക്കു ചോര്ത്തിയതായി എടിഎസ് കണ്ടെത്തിയിരുന്നു. മൂന്നു വര്ഷം മുമ്പ് സമൂഹമാധ്യമത്തിലൂടെ പരിചയപ്പെട്ട യുവതിക്ക് ഇയാള് വിവരങ്ങള് ചോര്ത്തി നല്കി പ്രതിഫലം കൈപ്പറ്റിയിരുന്നു.
സംഭവത്തില് എറണാകുളം സൗത്ത് പോലീസ് കേസെടുത്ത് അന്വേഷണം നടത്തിവരുന്നതിനിടെയാണ് ഭീകരവിരുദ്ധ സ്ക്വാഡ് ഇയാളെ അറസ്റ്റ് ചെയ്തത്.
ഇയാളുടെ സാമ്പത്തിക ഇടപാടുകളുടെ തെളിവുകളും എടിഎസിനു ലഭിച്ചിട്ടുണ്ട്. രഹസ്യാന്വേഷണ ഏജന്സികളും സംഭവത്തില് അന്വേഷണം നടത്തുന്നുണ്ട്.