തിരുവനന്തപുരം: നിയമസഭയിൽ സഭാ ചട്ടങ്ങൾ മറികടന്ന് ബിജെപി എംഎൽഎയ്ക്ക് സംസാരിക്കാൻ അനുമതി നൽകിയെന്ന് ആരോപിച്ച് പ്രതിപക്ഷത്തിന്റെ പ്രതിഷേധം. ചട്ടവിരുദ്ധമായി ബിജെപി അംഗത്തിന് പ്രത്യേക പരിഗണന നൽകിയതിനെതിരെ പ്രതിപക്ഷ അംഗങ്ങൾ ഒച്ചപ്പാടുണ്ടാക്കിയതോടെ സഭയിൽ വൻ ബഹളമുണ്ടായി. എന്നാൽ പ്രതിപക്ഷത്തിന്റെ കനത്ത പ്രതിഷേധത്തിനിടയിലും സഭാ നടപടികളുമായി മുന്നോട്ട് പോകാനാണ് സ്പീക്കർ ശ്രമിച്ചത്.
അടിയന്തര പ്രമേയത്തിന് അവതരണാനുമതി നിഷേധിച്ചതിനെ തുടർന്ന് പ്രതിപക്ഷം വാക്കൗട്ട് പ്രസംഗം നടത്തുന്നതിന് മുൻപ് ബിജെപി എംഎൽഎ ബി.ബി. ഗോപകുമാറിന് സംസാരിക്കാൻ അനുമതി നൽകിയത് ചട്ട വിരുദ്ധമാണെന്ന് ചൂണ്ടിക്കാട്ടിയായിരുന്നു പ്രതിപക്ഷത്തിന്റെ പ്രതിഷേധം.
എന്നാൽ സഭയിൽ ആദ്യപ്രസംഗം നടത്താൻ അർഹതയുള്ള ആളാണ് ഗോപകുമാറെന്നും സഭയിൽ ആദ്യമായി വന്ന് സംസാരിക്കാൻ തുടങ്ങിയപ്പോൾ തടയുന്നത് ശരിയല്ലെന്നത് കൊണ്ടാണ് സംസാരിക്കാൻ അവസരം നൽകിയതെന്നും സ്പീക്കർ മറുപടി നൽകി.