അബുദാബി: 22 ലക്ഷം ദിർഹത്തിന്‍റെ (4.99 കോടി രൂപ) സമ്മാനങ്ങളുമായി മാൾ മില്ല്യനയർ കാന്പയിന് അബുദാബിയിൽ തുടക്കമായി. ലുലു ഗ്രൂപ്പ് ഇന്‍റർനാഷനലിന്‍റെ ഷോപ്പിംഗ് മാൾ ഡവലപ്‌മെന്‍റ് ആൻഡ് മാനേജ്‌മെന്‍റ് വിഭാഗമായ ലൈൻ ഇൻവസ്റ്റ്‌മെന്‍റ്സ് ആൻഡ് പ്രോപ്പർട്ടിയുടെ കീഴിൽ അബുദാബി, അൽഐൻ, അൽദഫ്ര മേഖലകളിലുള്ള 13 ഷോപ്പിംഗ് മാളുകൾ കാന്പയിന്‍റെ ഭാഗമായി.
മെഗാനറുക്കെടുപ്പിലെ വിജയിക്ക് 10 ലക്ഷം ദിർഹമാണ് (2.27 കോടി രൂപ) സമ്മാനം. മറ്റു അഞ്ച് പേർക്ക് ടി5 ഇവോ കാറുകളും നൽകും. ജനുവരി ആറ് വരെ നീളുന്ന കാന്പയിനിൽ പ്രതിദിന നറുക്കെടുപ്പിൽ 25 പേർക്ക് 20,000 ദിർഹത്തിന്‍റെ ഗിഫ്റ്റ് വൗച്ചറും നൽകും.
കൂടാതെ പ്രതിദിന നറുക്കെടുപ്പിൽ ഒരു ഉപഭോക്താവിന് ഫ്രീ ട്രോളി ഗിഫ്റ്റ് വൗച്ചറും (വാങ്ങിയ സാധനങ്ങളുടെ മൊത്തം തുക) നേടാം. പങ്കാളിത്ത മാളുകളിലെ ഷോപ്പിൽ നിന്ന് കുറഞ്ഞത് 200 ദിർഹത്തിന് സാധനങ്ങൾ വാങ്ങുന്നവരിൽ നിന്ന് നറുക്കെടുത്താണ് ഭാഗ്യശാലികളെ കണ്ടെത്തുക. ലോകോത്തര ബ്രാൻഡുകൾ കുറഞ്ഞ വിലയ്ക്ക് ലഭ്യമാകുമെന്നതാണ് പ്രത്യേകത.
ഇതിനു പുറമെ ഈ മാസം 22, 23, 24 തീയതികളിൽ 90 ശതമാനം വിലക്കുറവിൽ സാധനങ്ങൾ ലഭിക്കുന്ന ക്രേസി സെയിലും ഉണ്ടാകും. ഓരോ ഉപഭോക്താവിനും നേട്ടമുണ്ടാക്കും വിധമാണ് ക്യാന്പയിൻ ഒരുക്കിയിരിക്കുന്നതെന്ന് ലൈൻ ഇൻവസ്റ്റ്‌മെന്‍റ് ആൻഡ് പ്രോപ്പർട്ടി ഡയറക്ടർ വാജിബ് അൽഖൂരി പറഞ്ഞു.
ക്രിസ്മസ് പുതുവത്സര ഉത്സവ സീസണിൽ ഉപഭോക്താക്കൾക്ക് അവിസ്മരീണയ ഷോപ്പിംഗ് അനുഭവം ലഭിക്കുമെന്ന് ജനറൽ മാനേജർ ബിജു ജോർജ് പറഞ്ഞു. വിവിധ കലാപരിപാടികളും മാളിൽ ഒരുക്കിയിട്ടുണ്ട്.
സാമ്പത്തിക വികസന വിഭാഗം സിഇഒ ഖാലിദ് മുബാറക് ബനിസമ, സിഒഒ റാഷിദ് അൽഖുബസി, അഹമദ് അബ്ദുല്ല അൽ മൻസൂരി, മനാൽ അഹ്മദ് അൽ മസ്റൂഖി, ഷമ്മ ജാസിം അൽ ഹൊസാനി, ലുലു ഗ്രൂപ്പ് സിഇഒ സൈഫി രൂപാവാല, സിഒഒ വി.ഐ സലിം, എക്സിക്യൂട്ടിവ് ഡയറക്ടർ എം.എ.സലീം, മാർക്കറ്റിംഗ് ആൻഡ് കമ്യൂണിക്കേഷൻസ് ഡയറക്ടർ നന്ദകുമാർ എന്നിവരും പങ്കെടുത്തു.
അൽവഹ്ദ മാൾ, മുഷ്റിഫ് മാൾ, ഖാലിദിയ മാൾ, അൽറാഹ മാൾ, മസ്‍യദ് മാൾ, ഫൊർസാൻ സെൻട്രൽ മാൾ, അൽഫല സെൻട്രൽ മാൾ, മദീനത്ത് സായിദ് ഷോപ്പിംഗ് സെന്റർ, ഗോൾഡ് സെന്റർ, ഫോർസാൻ സെൻട്രൽ മാൾ (അബുദാബി), ഗോൾഡ് സെന്റർ, ഹമീം മാൾ, മഫ്റഖ് മാൾ, അൽഐനിലെ അൽഫോഹ് മാൾ, ബരാരി ഔട്‌ലെറ്റ് മാൾ, അൽദഫ്രയിലെ അൽദഫ്ര മാൾ എന്നിവിടങ്ങളില്‍ സമ്മാന പദ്ധതി നടക്കുന്നുണ്ട്.
|